Азбарын быжзэ вӧлъя павлин

Удмурт Дунне
By Удмурт Дунне 20 мая, 2020 16:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Павлинэз аслаз азбараз вордэ Эгра ёросысь Комсомолец гуртысь Александр Ворончихин. Павлин — сыӵе ик курег, шуэ.

Пиосмурт чебер быжо павлинъёсты вайиз ог 6 ар талэсь азьвыл. Соку ай 1 йыр тылобурдо понна 10-15 сюрс манет курылӥзы. Али соосты Интернет вотэс пыр но, зоопаркысь но капчиенгес басьтыны луэ. Табере Александр Ворончихинлэн лызпыръемъёсыз но, тӧдьыосыз но вань ни. Ачиз ик инкубаторын павлинпиосты поттыны выре. Курегпузъёсын ӵошатыса, таоссэ кемагес — 28-30 нунал — шунтоно луэ, пе.

— Павлинъёс ненегесь адско. Нош соосты вордыны секытэз ӧвӧл — курегъёсын одӥг липет улын возисько, одӥг тусьысь сюдӥсько. Жугиськемзэс синйылтэме ӧвӧл. Павлинъёс мукет тылобурдоез адӟем но уг каро — асьсэ дуннеязы уло, мон татын кузё шуо кадь. 2 айы павлинъёс гинэ артэ уг тэро: мумы павлин понна ожмаськыса, ог-огзэс кокало, — вера Александр Ворончихин.

Мумы павлинъёс 3-4 килограмм будо, айыосыз 4-6 килограмм люкало, быжынызы валче 3 метр кузьда луо. Зэм, быжзы будэ 2-тӥ араз гинэ. Пи поттон вакытазы, пузъёссы ӵогиськем бере, шумпотэменызы эктыса ик быжысьтызы вань тылыоссэс уськытъяло. Тылыоссэс дуно дунын басьтӥсьёс шедё. Павлинъёс уло 15-23 ар.

— Павлинъёс кузёзэс ярато. Азбаре потэмлы быдэ котыре лыкто, синме учкыло, вешамез возьмало кадь. Нылпиос ярато ке ярато ни соосты. Тылобурдоосты учкыны куное вуыло. Аслым тужгес яра, павлинъёс уг висё шуыса. Нырысь кышкасько вал: ӟезьы йылтӥ лобӟизы ке, кытысь шедьтод на? Куддыр, писпу вай йылэ кечырскыса, котыр утчаськыса пукыло, но юртъер котырысь нокытчы уг пегӟо. Курегъёслэсь бадӟымесьгес бере, соослы инты вӧл-вӧлгес кулэ. Кынтылыны кутскытозь, кӧланы педлон ярато, гидэ пыремзы туж ик уг поты. Толалтэ улазы тросгес куро валёно луэ, медаз кынме шуыса, — индылэ пиосмурт.

Павлинъёс ярато луо я пень пӧлын пыласькыны. Озьы мугорзэс сузяло. Таза тылобурдолэн синъёсыз чылкытэсь, нырыз юн, тылыосыз чиляло, сыӵе павлинъёс трос бызьыло, ог-огенызы шудо. Ярато сиыны пӧзьтыса нелькем картошкаен сурам вож турынэз. Озьы ик сиё нянь, ю тысь, бакча сиён но емыш. Мултэс трос сюдыны но, сютэм возьыны но уг яра: шугекто, пе. Чырсам сиёнэз тылобурдоос азе поныны уг яра — кӧтсы чутыръяны кутскоз. Тусязы кылем-мылемзэ выль сиён понон азьын одно утялтоно. Кӧтазы йӧтӥз ке, пудо эмъясьёслы вазиськоно.

— Пузаны кутскон вакытазы сием потон мылкыдзы эшшо но ӝутске, — шуэ Александр Ворончихин. — 1 павлин нунал куспын ог 600 грамм сиыны быгатэ. Но сыӵе дыръя сиён жаль ӧвӧл. Гуждор но потэмын луэ ни, вож турын вылын соос кема улыны быгато. Тулыс шорысен гужем пумозь пузало. Пузъёссы, сӥльзы сямен ик, куреглэн выллем ческыт, но бадӟымгес. Азьло инкубаторе ӧй вал но, трос люкаськем пузъёссэс пи поттон вылысь курег, немыч но ӵӧж улэ тырисько вал. Павлинъёс асьсэос но чипыоссэс умой учко-утялто. Пиоссы чырткемесь вордӥсько, мумызылэн тыбыр вылаз ворттылыны ярато. Озьы кезьытлэсь но, тушмонъёслэсь но утиськыны выро.

Удмурт Дунне
By Удмурт Дунне 20 мая, 2020 16:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<