32 ар дышетӥз

Ангелина Снигирева
By Ангелина Снигирева 7 апреля, 2020 12:27

Можга городлэн дано адямиез Римма Данилова туэ феврале 85 арессэ пусйиз.

Р. Иванова

Римма Ивановна — Россия Федерациысь дано дышетӥсь, удмурт методист, покчи классъёсын дышетон книгаослэн но дышетӥсьёслы дасям методической пособиослэн авторзы.

Римма Шаркан ёросысь Ляльшур школаысь 7-тӥ классэз Данъян грамотаен йылпумъяз, собере Ижысь педучилищее экзаменъёстэк дышетскыны пыриз. 1953-тӥ арын Римма Верещагина покчи классъёсысь дышетӥсьлэсь дипломзэ басьтӥз. Дышетсконзэ Ижысь пединститутын азинтӥз. Татысен ик вуоно картсэ Григорий Даниловез пумитаз.

1958-тӥ арын, дышетсконзэс йылпумъяса, егит кузпалъёс — Римма но Григорий Даниловъёс — Можга педучилищее ужаны лыктӥзы. Со вакытэ ужаны туж секыт йӧтӥз. Угось педучилищелы чаклам дышетон программаос но, учебникъёс но ӧй вал. Озьы ке но Римма Ивановна туж тыршиз, урокъёслы материал пырыен-пырыен утчаз. Вуоно дышетӥсьёслэн дышетӥсьсы урокъёсын тунсыко ужан амалъёсты возьматыны кулэ. Тодматоно педагогъёслы дасям учебникъёсын но методикая пособиосын. Индылоно, студентъёс вань тодэмзэс урокъёсазы кутыны мед быгатозы шуыса.

Педучилищеын урокъёс нуэм сяна, Римма Ивановна классэн кивалтӥз. Пӧртэм гуртъёсысь дышетскыны лыктэм востэм нылъёслы но пиослы анай интыын вал: соослэн сюлэмшугъяськонъёсынызы но шумпотонъёсынызы улӥз. Со сяна, соосты городын улыны, пӧртэм интыосын астэ тупамон возьыны, валаса дӥсяськыны дышетэ вал. Римма Ивановналэн та мукетыз дышетон ӧрез луиз.

Можга педучилищеез кемалась нимало удмурт интеллигенциез дасянлэн кебитэныз. Зэмос интеллигентэз будэтон понна студентъёсын урокъёсын но, урокъёс бере но туж трос ужаны кулэ. Римма Ивановна драматической кружокен быгатыса кивалтӥз.

Данилов кузпалъёслэн сюлмаськеменызы, Можгаысь педучилище ӟеч кусыпъёс возиз удмурт гожъясьёсын. Соослы сӥзьыса, пӧртэм пумиськонъёс радъяськылӥзы. Римма Ивановналэн та 3-тӥ дышетон ӧрез луиз.

Педучилищелы Римма Ивановна 32 арзэ сётӥз. Та дыр ӵоже дышетон удысын пӧртэм воштӥськонъёс луизы. Котькуд вакытэ выль куронъёсъя тупатэм учебникъёс кулэ вал. Соосты кылдытон бордын тыршиз дано дышетӥсь но. Озьы Римма Ивановналэн 15-лэсь уно учебникъёсыз но ужан пособиосыз потӥзы. Шумпотымон, та дыре Р. Даниловалэсь ужзэ азьланьто дышетэм пиналъёсыз: Ю. Байтерякова, Н. Байкузина, Л. Парамонова, Т. Иванова.

Ог 30 ар талэсь азьло Можгалан «Удмурт Кенеш» огазеяськонлэн ёзэз кылдӥз. Татын но Римма Ивановна нырысетӥ радын вал. Можгалан удмурт класс усьтоно-а, дано удмуртъёсын пумиськон радъяно-а, нылпи садъёсын удмурт кылэз дышетоно-а — вань та ужпумъёсты быдэстонэ пыриськылӥз. Можга городысь арлыдоосты «Азвесь» клубе люказ но кема аръёс ӵоже соосын быгатыса кивалтэ ни. 2001-тӥ арысен Римма Ивановна луэ Можга городлэн дано адямиез. Со сярысь статья пыртэмын Удмурт Элькунлэн энциклопедияз но.

Ми данъяськиськом Римма Ивановнаен, солэн улон сюресэз адӟем карымон.

Татьяна ИВАНОВА, Можгаысь педагогикая колледжысь дышетӥсь

Ангелина Снигирева
By Ангелина Снигирева 7 апреля, 2020 12:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<