16 ёросъёсысь 30 хозяйствоос бусые потӥзы ни

Удмурт Дунне
By Удмурт Дунне 16 апреля, 2020 14:45

9-тӥ апрельысен шаерамы кутскиз ю-нянь кизён. 15-тӥ апрельлы 16 ёросъёсысь 30 хозяйствоос сеялкаоссэс гаражысь поттӥзы ни.

Вавож ёросысь «Восход» хозяйствоын кизем бере бусыосты лёгаса ортче В. Огородников.
Туспуктӥз Валентина Богатырёва

Сӥзьылэз малпало

8 сюрс 227 гектар киземын ни. Чакламлэсь со 3 процент луэ. Котькинлэсь чырмыт ужало Вавож ёросын. Татысь ваньмыз 9 хозяйствоос бусыын ни. 23 процентсэ кизёнзэс йылпумъязы. Ӝог ужамзылэн мугез но вань: лымызы вазь шуназ. Мичурин нимо хозяйствоын ю тысь улэ висъямын 1 сюрс 100 гектар, ӝынызэ кизизы ни. Татын техниказы трос ужез огдыре быдэстыны быгатэ. Ваньмыз сямен выль, кужмо. Предприятиен кивалтӥсь Владимир Капеев пусъемъя, дуннеын секыт югдур кылдэмен, туэ запчасть вайыны гинэ шугъяськизы. 120 тонна топливо кемалась дасямын,
40-эз кизьыны кошкоз.

— Мичурин нимо хозяйство сьӧры уйиськыны секыт, — шуэ Вавож ёросысь ик «Восход» хозяйствоысь валтӥсь агроном Виктор Эшкеев. — Ми районын нырысь ик кизьыны потӥмы ке но, техникамы начаргес, мичуринъёсын ӵошатӥськеммы уг луы. Соос рапс кизён борды но басьтӥськизы ни. Нош ми одӥг нунал ужаськомы но — тӥяськиськом, куддыр быдэс нуналлы ремонтэ султӥськом. Кизем бусыосты лёгаса ортчиськомы (прикатывание) мускытсэ утён вылысь. Сотэк кидысэз тӧл нуэ. Озьы кезьыт куазен кидыс небӟоз, вуэз пушказ кыскоз. Зол
кынтэмлэсь гинэ кышкыт — тысь пилиськоз. Соку урожай ӧжыт люкаськоз, ю висись луоз. Но гаражын пукыны уг яра ни — бусыос кӧсало.

Гурт удысъя но сиён-юонъя министерствоысь музъем кусыпъёсъя но будосъёсъя ёзэн кивалтӥсь Алевтина Бурдина верамъя, шаерамы 16-тӥ июнёзь шӧдтэк шорысь кынтыны быгатоз на.

— Тулыс вазь вуиз бере, сӥзьыл но вазь матэктоз, — шуэ Алевтина Михайловна. — Соин ик хозяйствоослэн кизьыны кутскемзылы шумпотыны кулэ. Эсьма, урожайзэс утялтыны дырзы кылёз. Вавожъёс сяна, можгаос но йӧн-йӧн ужало ни, татын
чакламлэсь 10 процентэз
кизёнзы быдэстэмын. Котькуд гектаре 30 килограмм удобрение поно. Тужгес трос со люкаське Вавож ёросын — гектарлы быдэ 51 килограмм. Удобрение воксё ӧз басьтэ Камбарка но Красногорск ёросъёсын.

Механизаторъёс уг тырмо

13-тӥ апреле Можга, Вавож, Кизнер ёросъёсын ог 10 сантиметр зӧкта лымы усиз. Но со лымылы гуртоос шумпотэмын — али со удобрение кадь луэ.

— Зор но али умойлы гинэ: эсьма вань бусыос огкадь кисьмалозы, — вера
Кизнер ёросысь «Новый путь»
хозяйствоен кивалтӥсь Александр Морозов. — 800 гектар пӧлысь 78 гектарзэ кизьыса вуттӥмы ни вал. Артэ ӟеч музъем луысал ке, эшшо бусыосмес паськытатысалмы. Но начар муос сяна ӧвӧл ни. Отысь трос урожай уд басьты. Асьмелэн но музъемъёсмы гектарысьтыз 19-22 центнер сяна урожай люканы уг сёто. Ужась но уг тырмы. 2 механизаторез 60 иськемлы палэнысь гуртысь нуналлы быдэ уже нуллоно луэ. Трактор сьӧры пуксись гуртын ӧвӧл ни, 20 сюрс манет уждунэз куд-огез уксёен уг лыдъяло. Нош техникаез ваньмызлы уд оскы. Эшшо ке шур сьӧрын гинэ, 10 иськемын, Киров улос. Отчы гуртоосмы ужаны
ветло. Нош со палан коронавирус шараяськем, шуо. Асьме хозяйствое но пӧртэм предприятиос вуыло я ю тысь, я пудо басьтыны. кудпалась меда висён вуоз шуыса, кышкаса улӥськомы. Гуртэ пыриз ке, карантин ялӥзы ке, пудо сюдӥсь но, гырись-кизись но уз луы.

Уйпалан букосъёс кыллё на

Шаерамы бусыоссэс усыяны, удобрение поттыны воксё уг быгато на уйпалась 9 ёросъёсысь хозяйствоос. Татын интыен-интыен лымы пуке. Миым сӥзьыл урожай калтыны шугъяськизы. Ялан зорыса улэмен, кидыссы начар. Кылсярысь, Балезино ёросын вань дасям кидыссы пӧлысь 55 процентэз гинэ ӟеч. Ёрос администрациысь гурт удысъя управлениысь валтӥсь агроном Татьяна Столбова пусъемъя, али кидыссэс воштыны, тазатыны выро, лыдпуссэс 70 процентозь вуттыны малпало. Куд-огез выль кидыс басьтыны уз быгатэ — коньдонзы ӧвӧл.

— Кизьыса вуттомы ай. Висён гинэ медаз вуы. Ваньмы маскаосын ужаськомы, ог-огмес ум тодмаське. Али быдэс ёросын техосмотр ортче, — шуэ Татьяна Аркадьевна.

Туэ хозяйствоос ӧдъяло 21 процентлы уногес рапс кизьыны. Та ласянь чырмыт ужало Вавож, Можга, Пичи Пурга ёросъёс. Ю-нянь 341,4 сюрс гектар вылэ киземын луыны кулэ. Гуртоос басьтӥськизы ни одӥг аръем турынъёсты кизён борды но.

Сиён поттӥсьёслы юрттэт

Удмуртилэн Тӧроез А. Бречалов пӧртэм удысъёсын ужась предприятиосын онлайн амалэн пумиськылэ.

Грак ёросысь «Родина» СПК-ен сыӵе пумиськон ортчиз ни. Со огез кужмоез хозяйство луэ. Ёросысь 11 фермеръёс, 5 хозяйствоосын сомында йӧл уг кыско, кӧня сётэ «Родина» — районын поттэм йӧл пӧлысь 53,2 процентсэ. Озьы ик ёросын бичам вань ю-нянь пӧлысь 47 процентэз соослэн. Татын шоро-куспо уждун 27 сюрс манет. Арлы быдэ выль гид пукто. Туэ малпало кунян гид ӝутыны. Пичиятэм процентэн кредит басьтыны луысал ке, вӧзаз мукет объект но ӝутыны пӧрмытысалмы, шуэ СПК-ен кивалтӥсь С. Петров. Озьы ик капчиятэм кредитлы кулэяське ёросысь «Вылнуд» хозяйство — роботъёсын ужась ферма ӝутэ. Производствозэс азинтыны малпасьёслы котькыӵе вакытэ юрттомы, шуиз Тӧро.

Елена Сараматова

Удмурт Дунне
By Удмурт Дунне 16 апреля, 2020 14:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<