Школа чалме…

Ангелина Снигирева
By Ангелина Снигирева 8 апреля, 2020 13:00

Сьӧлта ёросысь Гопгурт школаын 17 гинэ дышетскисез. Маиз урод но маиз умой ӧжыт кузя дышетсконын?

Сьӧлта ёросысь Гопгурт школаысь пиос
компьютер пыр но ярато шахматэн шудыны
Туспуктӥз Элина Кумачёва

Ог-огедлэсь адӟем карон быриз

2008-тӥ арын Гопгуртын чебер шыкыс кадь выль школа-сад усьтӥськиз — 54 дышетскисьлы чакламын.

— Со вакытэ милям ог 60 пиналъёсмы вал на, ваньмы тэрытӥським, — тодаз вае директорлэн воштӥсез Антонина Полянских. — Пиналъёсмы, ОГЭ, ЕГЭ гожтыкузы, ӟеч тодон-валанъёссэс возьматылӥзы, пӧртэм предметъёсъя олимпиадаосы пыриськылӥзы.

4 ар талэсь азьло шор ёзо школаез 9 классъем кельтӥзы. 10-тӥ-11-тӥ классъёсты выжтӥзы Выль Мӧньяла — со дырысен соосты нуэ-вае автобус. Нырысь аръёсаз ог 10 кузя люкаськылӥзы на ке, туэ 3 мурт ветлэ.

— Бадӟым классъёсты быдтэм бере ик умойтэме усимы, — веранзэ азинтэ Антонина Степановна. — Анай-атайёс валаны кутскизы: 9-тӥ класс бере пиналъёссы мукет школае ветлоно луозы бере, оло, пичи классъёсысен ик мукет интыын мед дышетскозы ни. Озьы палэнэ улыны выжыны кутскизы — кытын ужало, отчы ик карисько. Гуртын уж ӧвӧл.

Озьы школа арысь аре чалмытгес кыле. Классъёсын 2-3 муртэн дышетско. Пинальёс верамъя, соос одӥг семьяын кадь уло ке но, дышетскыны секыт. Вазен пичиосыз бадӟымъёсыз сьӧры кыстӥськылӥзы, соос кадь луыны тыршылӥзы — табере таӵеез вунэмын. Ог-огзылэсь адӟем карыса дышетскон мылкыдзы пиналъёслэн пуксиз.

— Вазен котькуд классын нимаз-нимаз ужрадъёс ортчытыны луэ ке вал, али вань пиналъёсты одӥгаз огазеяськом, — пусъе директорлэн воштӥсез. — Но пиналъёс пӧртэм арлыдъемесь бере, соослэн тунсыкъяськонъёссы но, кулэяськонъёссы пӧртэмесьгес. Соин ик соосты огазеяны капчи ӧвӧл. Собере, ӧжыт пиналэн тросэз ужпумъёс быдэсмытэк кыльыны быгато. Кылсярысь, алигес ёросамы ортчиз «Сыны Оте­чества» ужрад. Котьма кароно вал: кырӟан но дасяно, плакат но лэсьтоно, ож вакытысь техникаез но возьматоно. Ваньзэ тае лэсьтыны пиналъёсмы ӧз тырме, соин ик одӥгъёсыз ик пӧртэм ужен выроно луизы. Суредась пиналмы висьыны усиз, ужез ӝыныё кылиз. Милям плакатмы ӧй вал…

Ныпъетсы трос

Озьы школаысь котькуд пиналлэн аслаз бадӟым сценаез: одӥгъёссэ ик кыскало спортэ но, пӧртэм предметъёсъя исследовательской ужъёсы но, кырӟаны-эктыны но.

4-тӥ но 5-тӥ классъёсын дышетскисьёс — Александр Загребин, Игорь Булычев но Денис Мазиков — урокъёс бере доразы ноку уг дырто — секциосы но кружокъёсы ветло. Каникулъёсы но туж ик потэмзы уг поты на вал, гуртын сярысь, школаын тунсыкогес, пе.

Антон Решетников но Лиза Тюбина
Туспуктӥз Элина Кумачёва

5-тӥ классысь Антон Решетников но Лиза Тюбина школаын ортчись «Быдӟым Вормонлы — 75 «витьёс» вожвылъяськонын азьмынӥсьёс радын. Соос школаысь вань пиналъёс пӧлын пӧртэм предметъёсъя тужгес тросгес «витьёс» люкаллям ни. Антонлы капчиенгес сётӥсько математика но история, Лизалы — физкультура но технология. Нош каникулъёсы потонзы азьын кыксы но быдэн «витьёс» басьтӥзы удмурт кылъя урокын — «Шаертодонъя азбука» проектэ пыриськемзы понна. Пиналъёслы сётэмын вал алфавитысь кӧня ке букваос — гожтоно соосын кутскись инты, турын, писпу, тылобурдо нимъёсты но мукет.

— Дышетӥсьёс но милям кӧня ке предметъёсты нуоно луо, — шуэ А. Полянских. — Кылсярысь, информатикая визьнодасьмы нуэ на физика, математика, технология, ОБЖ урокъёсты. Покчи классъёсысь дышетӥсьмы ас вылаз басьтоно луиз технология, ИЗО, география урокъёсты…

Карантинэз чакланы дасесь

Ӧжыт кузя дышетскемзылэсь пайдазэ гопгуртъёс нырысьсэ шӧдӥзы, дыр, али март пумын каникулэ потон азязы. Соос туж оскизы: арня ортчыса, выльысь партаос сьӧры пуксёзы — коронавирусэн сэрен дистанционной амалэ уз выже.

— Дышетскисьёсмы 17 кузя, садикамы 8 пинал ветлэ, дышетӥсьёс 11 кузя, эшшо кӧня ке мурт выж миськисьёс, возьмаськисьёс вань на, но соос школае урокъёс бере лыкто, тросэз пиналъёс кошкыса вутто, — вераз Антонина Степановна. — Озьы ми оглом 50 кузя но ум люкаськиське.

Каникулэ потон азьын ортчытӥзы кенешон, анай-атайёс шуизы: дистанционной амалэ выжытозь, пиналъёс школае ик мед ветлозы. Нылпиос угось палэнысен дышетскыны дасесь ӧвӧл, тросэзлэн доразы ӝог Интернетсы но ӧвӧл.

— Выль темаосты дышетӥсьёс урокын пыр-поч валэкто ке, пиналъёсмы кызьы сое асьсэ понна валаны быгатозы? — паймизы анай-атайёс.

Зэмзэ но, Удмуртиысь нылпиос каникулэ потон азьын дышетонъя но наукая министрлэсь ужзэ быдэсъясь Ирина Крохина шуиз вал: шаерамы 17 малокомплектной школаос, отын 20-лэсь ичи дышетскисез. Соин ик дистанционной амалэ одно потоно уз луэ, урокъёс озьы ик нуиськыны быгатозы.

Гопгурт школаын ваньзэ чаклазы: классъёсты 2 часлы быдэ Роспотребнадзор дэмламъя нимысьтыз суретъёсын миськылӥзы ке но, урокъёсты нуыны интыос тырмозы: 1-тӥ этажын спортзал вань, 2-тӥ этажын библиотекаез класс интые кутыны луоз, эшшо информатикая классы туж бадӟым, отын 8 компьютер — огдыре 3 класс но люкаськыны быгатоз. Озьы карантин вакытэ куронъёсты быдэсъяны соос дасесь.

Но туннэ югдур аслэсьтыз куасалтӥз. 30-тӥ мартэ пиналъёслэн каникулзы ӧз йылпумъяськы. Шаерысьтымы вань пиналъёс сямен ик, гопгуртъёс таяз арняе но доразы пуко. Мар луоз вуоно арняе — секыт вераны.

Элина Кумачёва

Ангелина Снигирева
By Ангелина Снигирева 8 апреля, 2020 13:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<