Чидано, ӧвӧл калтыртоно

Ангелина Снигирева
By Ангелина Снигирева 9 апреля, 2020 11:34

2-тӥ апрельысен пыӵаны кутскизы Административной кодексэ воштонъёс: самоизоляцилэсь куронъёссэ тӥям понна кыл кутон улэ сюрыны луэ.

Полицейскойёс валэкто, малы арлыдо адямиос 
доразы пукыны кулэ.
Туспуктӥз Максим Егоров

Югдурез сак чакласа возё полицейскойёс. Соосын ӵош Ижкар урамъёсы потӥмы ми но, журналистъёс. МВД-ысь делопроизводствоя но режимъя отделысь сотрудник Дмитрий Корнев но пресс-службазылэн кивалтӥсезлэн воштӥсез Павел Шахторин рейдэ потэмлэсь азьвыл юазы: вань-а городэтӥ ветлыны лэзись справкады. Сыӵе справка сётӥське та вакытэ ужасьёслы. Паспортмес но справкамес возьматыса, нырмес-ыммес маскаен возъяса, ортчимы Ижысь Камбарской урамтӥ.

— Толон, та урамез эскерыса, 20 сюрс вамыш лэсьтӥськеммы — 14 иськем мында. Нош бадӟымгес микрорайонъёсты эскерись полицейскойёс нунал куспын талэсь но тросгес ортчо. Озьы йыртэман учыръёсты но нялтас шараяськомы. Лымы шуназ, калык великен ворттылыны кутскиз, соосты лушкан учыръёс но вал ни. Озьы кык кечез кутӥськом, — шуэ П. Шахторин.

Ӵап со вие полицейскойёслэн син шоразы йӧтӥз велосипедэн ширтӥсь ог 8 аресъем пияш. Азьысьтыз сюресэз уг ик адӟы, питранъёсызлэсь ӝог бергамзэс учке. Полицейскойёс пумитаз вамыштӥзы. Но пияш соосты синйылтыны вуттӥз но син куспын тӧлӟиз.

— Валамон, нылпиосты дорын возьыны секыт, урамын шудэмзы потэ. Соосты, котькудзэ сямен ик, дугдытӥськом, юаськом: макем кыдёке кошкиз улон интыезлэсь, кытын анай-атаез. Бадӟымъёсын ӵош ветлӥсь пиналъёсты но синйылтӥськомы. Дугдытӥськом, ма муген ульчае потӥзы шуыса юалляськиськом. Лавкае, аптекае ке, ярам. Поръяны гинэ потэмын ке, доразы бертыны куриськомы. Ми азе протокол гожтыны, адямиосты кыл кутонэ кыскыны ужпум пуктэмын ӧвӧл. Калык пӧлын валэктон уж нуыны сюлмаськиськом. Конешно, шӧмаськем адями вуэ ке городлэн мукет палаз, отын йыруж лэсьтэ ке, сое кыл кутон улэ кыскыны луэ, самоизоляция режимез лыдэ басьтытэк, административной кодексысь 20.6.1 номеро статьяя — общественной интыын порядокез тӥян, — шуэ Д. Корнев.

Шаерысьтымы Югдурез утёнъя министерстволэн пресс-службаез ивортэмъя, кылем шутэтскон нуналъёс ӵоже шараямын 249 таӵе учыр. Режимез тӥясьёслы табере тыриськоно луоз. П. Шахторин верамъя, соослэн эскероно участоказы таӵе учыръёс ӧй вал на.

Урамъёстӥ ветлон сяменымы синйылтӥмы: нылпи площадкаос котыртэмын горд-тӧдьы лентаосын. Коронавируслэн аляменыз, тазьы нюръясько управляющей компаниос. Анай-атайёс тазьы алэмез лыдэ басьто, шӧдске: ваньмыз сямен ик нылпи площадкаос бушесь. Ӧм синйылтэ нылпи коляскаосын анайёсты но. Бызьылӥсь спортсменъёс пумитэ шедьыло ик, но полицейскойёс соосты уг дугдытъяло — соослы лэземын урамын мугорзэс юнматыны. Огназы яке тренеренызы, но ог-огзылэсь нимазгес возиськыны кулэ.

Полицейскойёс тужгес бадӟым саклык висъяло мӧйыослы. Урамын соос ичи ӧвӧл: ваньзы сямен магазинысь пото.

— Коронавирус мӧйыослы тужгес кышкыт луэ. Соин ик ульчаысь синйылтӥськомы ке тыро сумкатэк, кытчы ке вамышъясь арлыдоосты, одно дугдытӥськом, валэктӥськом, дорын пуконо шуыса. Кылем арняе листовкаос но сётъямы, отын рос-прос гожтэмын, кыӵе куронъёсты быдэсъяно самоизоляция дыръя, — шуэ П. Шахторин.

Ӵап пумитамы матэктӥз ог 70 аресъем нылкышно. Ымныраз маскаен, синъёсаз — сьӧд очкиос, киосаз — перчаткиос. Полицейскойёслэн юанъёссылы шуиз: почтае потӥ, со сюрес вамен гинэ, судысь извещениез, пе, туннэ ик кутоно. Нош мукетыз мӧйы нылкышно эмъюмлы аптекае потэм. Улон юртэлэсь, пе, 100 метрлы кыдёке ӧй кошкы.

— Валамон, котькудмылэн ужмы лачак: созэ лэсьтоно, татчы ветлоно, — шуэ Д. Корнев. — Со вие ик котькудмы валаны кулэ: макем ӟеч чаклалом режимез, сокем таза луом. Соин ик мугтэк ураме эн поталэ. Дорын туж умой ук!

Елена Никитина

Ангелина Снигирева
By Ангелина Снигирева 9 апреля, 2020 11:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<