Скал кыскиз Махачкалаын

Удмурт Дунне
By Удмурт Дунне 21 апреля, 2020 12:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пичи Пурга ёросысь Яган-Докья черкогуртысь Светлана Кожевникова ассэ туж шудо нылкышноен лыдъя. Котькыӵе вакытъёсыз чидано луиз ке но.

скал кыскись
Пичи Пурга ёросысь Яган-Докья черкогуртысь Светлана Кожевникова али но пудоен выре.
Туспуктэм: Светлана Кожевниковалэн архивысьтыз

Кыштыр ваньзэ пӧрмытӥзы

Светлана Кожевникова вордскиз Пичи Пурга районысь Пуро-Можга гуртын. Школазэ йылпумъяса, Глазовын вуз карисе дышетскиз. 18 арес вал ай — бызиз.

— Али кадь ик тодӥсько на, кызьы Гыронбыдтонын вуоно кузпалме нырысьсэ адӟи. Со шофёр луыса ужа вал, чылкыт, чебер. Кызьы сыӵе муртлы уд синмаськы? — данъяськыса сямен вера Светлана Ивановна. — Ӵош улэммылы тани 39 ар тырмоз ни.

Светлана Ивановна Яган-Докьяын 2 ар гинэ вуз карисьын ужаз, собере, улон инты кулэ шуыса, 1984-тӥ арын фермае скал кыскисе кариськиз: дояркаослы улон инты сётӥське вал. Со арын кузпалыз, Владимир Григорьевич, ю-нянь октон-калтон дыръя котькинлэсь трос ю тысь нуллӥз — районысь шофёръёс пӧлын 1-тӥ инты басьтӥз.

— Но улон инты ӧз сётэ, кӧты туж ӝож луиз, — азинтэ веранзэ нылкышно. — Мукетъёсызлы висъязы, фермаын уг ужало ке но вал. Картэлы шуи: ойдо асьмеос ик кызьы ке но корка пуктом.

Озьы Кожевниковъёс кыштыр корка ӝутӥзы, ужын вормонъёс басьтылӥзы. Светлана Ивановна быдэс республикаысьтымы скал кыскисьёс пӧлын вожвылъяськонъёсы но пыриськылӥз. Тодаз вае: одӥг полаз 1-тӥ инты басьтэмез понна ӵыжак-выль халат но скал кыскон «Волга» аппарат кузьмазы. Берло тодӥз: конкурсэ пыриськисьёс пӧлын тросэз зоотехникъёс вылӥллям — скал кыскисьёссы уз быгатэ шуыса, асьсэос отчы пыриськоно кариськиллям.

1990-тӥ арын республикамылэсь данзэ утьыны С. Кожевникова ветлӥз Махачкалае — отысь 1-тӥ интыен бертӥз. 1991-тӥ арын сое келязы Саранске — татын 2-тӥ луиз.

— Удмуртилэсь данзэ утьылӥ ке но, мыным со понна номыр ӧз сётэ, — лулӟиське Светлана Ивановна. — Ужысь ветеран нимы но ӧвӧл. Соцзащитаысь юай вал, малы номыр уд сётӥське шуыса. Асьтэлы, пе, сыӵе грамота куроно вал, кудӥзъя ветеран луыны быгатысалды. Ма, мае валасько вал соку — 29 аресъем маке. Вӧзам валэктӥсез но вылымтэ.

Скал кыскемез бере ни С. Кожевникова кунян но сюдӥз, бусыын но ужаз.

— Огвакытэ механизаторъёслы уждун лыдъяса улӥ, ужан интые машино-счётной бюро шуиське вал, — трудовой книжказэ ик поттыса, возьматэ Светлана Ивановна. — Пенсие потӥ пекарняысь — 5 арзэ кивалтӥ соин, берло 2 арзэ нянь пыжи. Огвакытэ тыпак уксё уг сётъяло вал. Кыкнамы ик совхозын ужам. Мукет азьысь юрттэт нокытысь возьманы. Кыкез пиналъёсмы садике ветло на вал, кыкез — школае. Мар карыны ёрмыса, кузпалылэсь чиньыысьтыз сюан зундэссэ кыски, аслэсьтым вӧзаз понӥ на — кыксэ но Ижысь зарниен вуз каронъя огаз магазинэ нуи. Пиналъёсмы паймемзэс верало вал: мама, тӥ котькуд нунал ужаны ветлӥськоды но, малы уксёды ӧвӧл?

Секыт югдурысь потон понна Светлана Кожевникова Ижысь базаре йӧлэн-вароген вуз карыны ветлыны ӧдъяз. Трос чипы-курег, пудо вордо вал. Ярам, кузпалызлы, уждун интые, ю тысь сётылӥзы.

— Ноку но уг вунэтӥськы ни, кызьы нырысьсэ 300 манет тыр вуз кари, — шуэ нылкышно. — Ай со вакытэ со трос уксё вал ми понна. Озьы пичиен-пичиен шуг-секытысь потыны быгатӥм, грузовой но легковой машина, мотоблок басьтӥм.

Анаен данъяськон

Кожевниковъёс 4 ныл будэтӥзы. Зэм, котькыӵе вакытъёсты чидано луизы.

— Одӥг пол гуртысьтымы ик одӥг гинэ пиналэн кышномуртлэсь юаны шедьтӥ: нылпи вайыны уд малпаське ни-а? — тодаз вае Светлана Ивановна. — Нош со пумитам вераз ук: «Нищету не хочу разводить». Сыӵе кӧты урод луиз. Мон вылтӥ вераз кадь. Бӧрысь соцзащитаысь но огез специалист юаз вал: пияны пияды но будэтыны быгатоды-а кадь потэ? Марлы озьы юаз — али но малпаськисько, ачим урод дӥсяськемын вал меда?

Трос нылпиез будэтыны, зэмзэ но, капчи ӧй вал. Но анаен атай котьку тыршылӥзы: вожъяськонэз медаз валалэ.

— Мон ачим трос нылпиё семьяын ке но будӥ, номырлы
но ӧй вожъяськылы. Атаен анаен тыршо, сюлмасько вал ми сярысь, — азинтэ веранзэ Светлана Ивановна. — Ай ми асьмелы туж узыр потӥськом вал: нырысьёсыз пӧлын басьтӥм скал, телевизор. Умой тодӥсько на, кызьы котырысьтымы нылпиос, алюминь кружка кутыса, йӧл юыны дорамы лыкто вал. Озьы ик корка тыр люкаськылӥм телевизор учкыны. Бӧрысь муш вордыны кутским. Анай-атаймы шоры учкыса, ми но дышим ужаны, собере милесьтым дышизы ни нылпиосмы. Асме самой шудо кышномуртэн лыдъясько: вӧзам яратоно, валась, ужась картэ, котырам будэтэм нылъёсы.

Кожевниковъёслэн пиналъёссы школаын умой дышетскизы, собере ваньзы вылӥ тодон-валан басьтӥзы, асьсэлэсь семьяоссэс кылды-
тӥзы ни. Табере 7 нунокъёсын шумпоттӥзы ини.

Нош Светлана но Владимир Кожевниковъёс али но тэк улонэз уг валало. Одӥг аре гурт поселениязы ортчем Яган базар дыръя «Зарни песяй» конкурсэ пыриськизы — 1-тӥ инты басьтӥзы. Мукетъят, нылпиосынызы кенешыса, гуртсы вӧзысь ошмесэз утялтӥзы, котыраз сяська мерттӥзы. Ма кулэ луиз, ваньзэ дорысьтызы каризы.

— Нош уд оске, — шуо Светлана Ивановна но Владимир Григорьевич, — ваньмыз со арня куспын тӥямын вал. Лымысуред но капказямы лэсьтэммы уг луы, тӥяло. Соин ик туэ сое лапас йыламы пуктылӥм ини.

Светлана Ивановналы, 50 арес тырмыкуз, нылпиосыз юромо лэсьтэм «Мать-героиня» медаль кузьмазы. Талэсь дуно кузьым со понна ӧй вал ни.

________

Маргарита Тулбаева.

Пичи Пурга ёрос,

Пуро-Можга гурт

Удмурт Дунне
By Удмурт Дунне 21 апреля, 2020 12:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<