Сиён-юон корка вутто

Удмурт Дунне
By Удмурт Дунне 2 апреля, 2020 10:27

Коронавирусэн сэрен тросэз арлыдоос, коркасьтызы потатэк, улыны тыршо. Нош мар карод, сиён-юонэд, эмъюмед быризы ке? Яке газ, ву но тыл понна тырыны дыр вуиз ке? Таӵе учыре юрттозы «Мы вместе» проектэ пыриськись волонтёръёс.

Волонтёръёс пересьёслы юртто
Туспуктӥз Максим Егоров

Пересьёс но инвалидъёс, юрттэт курыса, 8-800-200-34-11 телефон пыр вазиськыны быгато яке мывместе2020.рф сайтэ заявказэс кельто. Проект быдэс Россиын быдэсъяське бере, вань куриськонъёс Москвае вуо, берло ини улосвылъёсы келясько.

24-тӥ мартэ проект борды Удмуртиысь «Калык фронт» но итӥськиз. Соин ик вазиськыны луэ Удмуртиысь штабе но. 8 (3412) 655-007 телефон номер но телефонъёслы «ОНФ. Помощь» приложение уен-нуналэн ужало.

— Милям штабамы, ижъёс сяна, гуртъёсын улӥсьёс но вазисько, — вераз «Калык фронтын» егитъёсын ужась Дарья Байраншина. — Вал ини Воткинскысь, Можгаысь, Сарапулысь но Пичи Пурга, Дэри, Эгра ёросъёсысь заявкаос. Таӵе учыре ми ёрос администрациен герӟаськиськомы, егитъёсын ужась центръёс мыло-кыдо та уже пырисько, пересьёслэсь куронъёссэс быдэсто.

Ӵемысь волонтёръёсты косо сиён-юон яке эмъюм, маскаос но перчаткиос басьтыса вайыны. Со сяна, ЖКХ понна тырыны.

Нырысь элькунамы нуналаз 7-8 пересьёс вазись-
кылӥллям, юрттэт курыса. Таяз арняе сыӵеослэн лыдзы шӧдскымон будӥз: понедельнике ӵукна ик 15 адями заявказэ кельтӥз.

Но штабын, волонтёръёс тырмемысь дугдозы шуыса, уг кышкало, али 160 пала егитъёс ужаны мылкыд каремзэс веразы ни, нуналысь нуналэ соослэн но лыдзы будэ. Одӥгъёсыз штабын заявкаосты эскерыса пуко, пересьёслы жингыръяло но тодо, мае но кӧня басьтоно. Собере дась заявкаез мукет волонтёръёслы сёто ни, таосыз пересьёс доры пото. Заявка лэсьтэм муртлы нимысьтыз код ивортэмын луэ. Соя пересь мурт но волонтёр ог-огзэс «тодмало».

— Ужмес кутскыкумы, волонтёръёс общественной транспортэн ворттылӥзы, но отын олокыӵе но инфекция пумиське ук, — вераз Дарья Байраншина. — Умой, али милемлы «Огъя Россия» партия юрттӥське, со висъяз машина но водитель.

Коркась корка ветлэм сяна, волонтёръёс 8 (800) 100-80-72 телефонъя психологической яке юридической консультациос сётъяло, со понна нимысьтыз дышетскемзы луыны кулэ.

Мария Емельянова

Удмурт Дунне
By Удмурт Дунне 2 апреля, 2020 10:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<