Александр Бикузин: Серекъяса адями кышканзэ ворме

Удмурт Дунне
By Удмурт Дунне 2 апреля, 2020 16:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Алнаш ёросысь Азамат гуртын вордскем журналист Александр БИКУЗИН кема аръёс ӵоже ужаз «Мынам Удмуртие» телерадиокомпаниын, али Эшъяськон юртысь калыкен но СМИ-осын ужанъя отделэн кивалтэ. Ваньмон дыръяз егитъёслэн «Куара» огазеяськоназы пыриське. Кылем арын А. Бикузин «Удмурт стендап» проектэз мытӥз — табере толэзьлы одӥг пол Ижын удмурт комикъёслэн ӝытсы ортчылэ. Ольга кышноеныз ӵош 2 пинал будэто, Лиза нылзэс но Ваня пизэс пичи дырысенызы ик удмуртлыкез гажаны дышето.

А. Бикузин

— Али гинэ 1-тӥ апрель ортчиз. Тон адямиосты пышкылыны, сереме уськытыны яратӥськод, дыр?

— Мон адямиосты телефон пыр юмоке вуттылыны яратӥсько. Пичи дыръям дорамы телефонмы ӧй вал. Весь вожъяськисько вал пиналъёслы, кинлэн дораз телефонэз вань. Соин али озьы вырисько, дыр. Шуом, ужея алигес тодыны кулэ вал, кыӵе ёросъёсысь загсъёсын удмурт кылын сюан ортчытыны луэ. Мон огшоры гинэ ӧй юалляськы. Яр ёросэ жингыртыкум, шуи: мынам невестае бесерман, луоз-а бесерман кылын регистрация ортчытыны? Кинлы ке вералляй, мон газетчи, телевизионщик шуыса. Я кыӵе ке зулись воргорон кадь керӟегъяськыса вераськылӥ.

Зэм, мыным ӧч карыны, адямиослэсь йыркурзэс поттыны кельше. Но озьы выронъям ачим но капчиен пуштӥсько, воже потыны ӧдъя. Мон алама провокатор (серекъя).

— Тон телерадиокомпаниын ужад, собере журналистикаез огдырлы кельтӥд вал. Акыльтӥз шат?

— Кин ке но кема дыр ӵоже одӥг интыын ужа, нош мыным огдышем ужен вырыны акыльтэ — мӧзмыт. Соин уждэ яратоно, но яратонэд но мултэс медаз лу. Куд-ог адямиос уженызы гинэ уло, мукет дуннеез уг адӟо. Со но алама.

Кылем арысен мон Эшъяськон юртын ужасько. Али Герберез дасяны юрттӥськом, удмурт GPS-навигатор лэсьтӥськом. Милям бадӟым ужпуммы вань — медиацентр кылдытоно. Татын съёмкаос радъяны павильон усьтом. Отын подкастъёс (пӧртэм темаослы сӥзем 
аудиоматериалъёс) гожъялом, вотэсын стримъёс нуом.

Интернетэ потоно. Тани библиотекаосын пӧртэм презентациос ортчыло, но вотэсэ соосты транслировать уг каро. Ми но презентациос радъялом, соосты онлайн учкыны луоз, нош гожтэм видео пыраклы кылёз. Ӟеч техника басьтӥм ке — ваньмыз круто луоз. Ми нимысьтыз компьютер, монитор, микрофон, камера ум октэ. Малпаськом ӟеч планшет басьтыны, соин ик видео лэсьтыны но, монтировать карыны но мед луоз. Со дунтэмгес усе, кужым но ӧжытгес быре. Одӥг адями операторлэсь, монтажёрлэсь, ивор вӧлмытӥсьлэсь ужзэ быдэстыны быгатэ.

— Азьвыл тон «Шунды» огазеяськонлэн ужаз мылысь-кыдысь пыриськиськод вал, али «Куара» огазеяськонэ выжид. Оген ужаны тыныд мӧзмыт, шӧдске.

— Покчи дыръям октябрёнок, пионер луэме потэ вал. Сандыкын костюме но, галстуке но кыллё ини вал. Книгаосысь лыдӟылӥмы: пионер пересьёслы юрттэ, пиналъёсты обидьыны уг сёты, со визьмо, ваньзэ чакла. Сыӵе луэме потэ вал. Тодӥсько на ай, кызьы милесьтым одӥг арлы бадӟымгес классэз оградэ султытӥзы, значок сётӥзы. Нош вуоно араз милемлы веразы, пионеръёс уз луэ ини шуыса. Но калыклы пайда ваён мылкыды со дырысен ӧз кысы. Кыӵе ке бадӟым идея понна ужам потэ. Али со уже удмуртлыкен герӟаськемын.

Пичи дыр

Удмуртлыке шӧдтэк шорысь сюри. Студент дыръям монэ «Шунды» огазеяськонысь азьветлӥсь Люда Чернова, китӥм кыскыса, огазеяськонэ нуиз. Нош школаын удмурт кылэз, литератураез уг яратӥськы вал. Милям дышетӥсьмы ӝотрес сямо вал, чурыт куронъёс пуктылӥз, маке зӧкта книгаос лыдӟыны косылӥз. Ӟуч литератураен но сомында уг сётъяло вал. Валамон, 12 мурт пӧлысь 2-ез гинэ лыдӟиське вал. Нош мон шаляй-валяйгес вал. Одӥг книгаез лыдӟи ик. Огпол дышетӥсе азям книга понӥз но шуэ: ме, Бикузин, коть родняедлэсь лыдӟы. Озьы Пётр Черновлэсь «Казак воргорон» книгазэ лыдӟи. Пётр Чернов — ӵужатаелэн двоюродной братэз. Книга мыным кельшиз. Отысь «бен палъёс» веран йырам кылиз.

4-тӥ-5-тӥ классъёсын кылбуръёс гожъяны мылкыды ӝутскиз вал. Ага, малпасько, мар сярысь кылбурало поэтъёс? Инкуазь сярысь. Пукси, укно сьӧрын — сӥзьыл. «Тани нош ик вуиз сӥзьыл куазь…» гожтӥ. Одӥг чур пӧрмытӥ но, отӥяз ӧз ни мыны (серекъя).

— Нош журналистикае кызьы сюрид?

— Мон школа бере сельхозакадемие целевой направлениен мынӥсько вал ини. Собере ӵектӥсьёс луизы: тон гуманитарий ук, утча журфаке пырыны. Со дырозь Удмурт кун университетысь журналистикая факультет сярысь уг но тодӥськы вал. Студент вакыт шулдыр ортчиз. Али куддыр жалясько: шулдыръяськем интые, дышетскыны луэ вал ук.

Монэ но Руслан Нуриахметов одногруппникме, 3-тӥ курсын дышетскыкумы, «Мынам Удмуртие» телерадиокомпание стажировкае кутӥзы. Зэмзэ вераса, собере ми кизилияськыны кутским. Журфакысь одӥг дышетӥсьмы ми сярысь пичигес курсъёслы вера вал, соос милесьтым адӟем медаз каре шуыса. Олокыӵе но учыръёс вал. Тодӥсько на, огпол стилистикая тест гожтӥм, ми Русланэн ог-огмылэсь списать карим. Куница пӧйшурлэсь пиоссэ кызьы нимало, гожтоно вал. Ми, йырез чик ужатытэк, гожтӥм: «птенцы куницы». Дышетӥсьмы али но вера та сярысь.

— Тӥляд Руслан Нуриахметовен асьтэлэн творческой огазеяськонды но вал.

— О-о, Русланэн «Рубик» (Руслан но Бикузин) проектмы вал. «Мынам Удмуртие» телерадиокомпаниын ужакумы ини, кытчы ке съёмкаосы потӥськом но шаянтӥськом вал. Мон кыӵе ке серемес интервью басьтӥсько, Руслан камераен ужа. Собере Павел Поздеев режиссёр, продюсер (со но телевидениын ужаз) монтировать карылӥз. Поздеев шуэ вал: о, круто, «Реутов ТВ» кадь лэсьтӥськом. Нош ми Русланэн ум но тодӥське вал, мар со «Реутов ТВ». Берло тодӥм, со туж тодмо комедийной проект шуыса.

Павел Поздеев милемыз бурдъяз. Со, 10 арлы азьпала учкыса, ужаны быгатэ. Али, 10 ар ортчыса, валаськод, со ваньзэ шонер вера вал шуыса, нош соку ми соин споръяськылӥм. Со шуэ вал: удмуртъёслы «супермаркет» кулэ. Удмурт адями, супермаркетын кадь, бырйиськыны мед быгатоз. Али валасько: ӵапак солэсь малпанзэ улонэ пыӵатыса, та вакытэ тросэз ужало. Кылсярысь, али гуртысь егитъёс городэ вуо ке, соос адӟо, Ижын удмурт кыл улэ шуыса. Кин ке удмурт дискотекае мынэ, мукетыз «Юмок» театре вуэ, кин ке «Шудком» интеллектуальной шудонэ пыриське, кин ке «Удмурт стендап» ӝытэ лыктэ. Ваньмыз со возьматэ, удмурт кыл азинске, будэ, со кулэ шуыса. Асьме кылынымы серекъяны но, визьмо вераськыны но луэ.

Брангурт песянайёсын

— Удмурт кылын азинскись ӵыж-выль проект — стендап ӝытъёс. Соосты радъяны малпанэд кызьы вордскиз?

— Мон огвакытэ радио пыр стендап ӵем кылзӥськылӥ. Малпай: удмурт кылын но таӵе формат луыны кулэ. Удмурт эстрадаын юмор тырмыт ӧвӧл. Азьло Анатолий Ушаков серекъятӥз калыкез. Нош али мар возьмато, мыным серем ӧвӧл. Отын юмор таӵе: сцена вылын возьмато гуртын улӥсь песянаез, со ӟуч кылын уг вала, таксие пуксе но юмоке сюре. Сыӵе юмор чебер ӧвӧл мон понна. Пумит кариськем потӥз, со дыре ик юан кылдӥз: луоз-а адямиосты, сцена вылын гольтыръяськытэк, серекъятыны?

Мон телевидение вазиськи, Елена Слесарева журналист ӵектӥз быгыослы жингыртыны. Шаркан ёросысь Быгы гуртын «По соседству» передача лэсьтӥзы вал. Е. Слесарева адӟем, гуртысь егитъёс куспазы серем верасько шуыса. Мон жингыртӥ соослы, Гавриил Кузьмин, Катя Бехтерева, Фёдор Байданов стендапе пыриськыны соглаш луизы. Собере Эшъяськон юртын ужась Августина Михайловаез чортӥ. 
Дарали Лелилэн «Юмок» театрысьтыз егит артистъёсты но ӧти, соос но али пырисько.

Котькудӥзлэн комиклэн аслаз кылыз, тусыз, пӧлазы вожвылъяськон ӧвӧл. Али Россиысь телевидениын кышномуртъёслэн асьсэлэн стендап шоузы кылдӥз, со али модно. Милям но вань Мария Иконникова, Екатерина Бехтерева. Фёдор Байдановлэн аслаз стилез — со ассэ гуртысь пӧрмостэм пияшез кадь возьматэ. Августиналэн интеллигентной образэз. Мон сое нимасько «финно-угроведение удысысь но удмуртлыкысь комик». Мукетъёсыз но аспӧртэм учыръёсты возьмато, пӧртэм ужпумъёс сярысь верасько.

— Гуртъёсы стендап возьматыны потэмды уг-а поты?

— Ум ӧдъяське. Берло стендапез видеое гожтыса кельтӥм, вотэсэ поттӥм. Кинлэн потэ — учкоз. Нош бадӟым сцена вылэ комикъёсты поттэм потэ вал. Таиз самой бадӟым ужпум — возьматыны, эстрадаын пӧртэм юмористъёс вань шуыса.

— Али «Куара» огазеяськонэн ӵош трос проектъёсты быдэсъяськод. Кызьы та огазеяськонэ шедид?

— Огвакытэ малпанэн улӥ: маке уг тырмы, маке лэсьтоно, кинэн ке огазеяськоно вал… Нош мон котырын теоретикъёс гинэ — нокин вырӟытӥсь, ӵыжись-а шуод, ӧй вал. Собере Влад Степанов ӧтиз: ойдо огазеяськон кылдытом. Мон бызьыса мынӥ. Али «куараосын» стендапез радъяськом, пиналъёсты блогерлэн уженыз тодматӥськом, анайёслы «Аныкай» медиашкола нуиськом. «Удмурт блогеръёслэн школазы» проектэн пӧртэм ёросъёсы вуылӥськом. Пиналъёсын ужаны кельше. Соос куд-ог дыръя паймо, мон кыӵе ке егит блогеръёсты, «Тик-Ток» соцсетьысь кизилиосты тодӥсько шуыса. Мон сярысь малпало: пересь ке но, туала. Мон соослы 34 аресам вашкала потӥсько ини угось. Нош туала культураез тодӥсько, малы ке шуоно мынам нылпиосы вань.

— Тынад Ольга кузпалыд но удмурт проектъёсы пыриське, али «Чеберай» марафонэз радъяны юрттэ. Кызьы сыӵе чылк-чылк удмурт семья кылдытӥды?

— Оляен, 1-тӥ курсын дышетскыкум, тодматски. Со Глазовысь пединститутын дышетскиз, мынам одноклассницаеным эшъяське вал. Огпол Оля Алнаш ёросысь Шайтангуртэ вуиз, одноклассницаелэн вордӥськем нуналэз вал. Мон, конешно, отын вал. Собере кусыпмес ыштӥм. 3-тӥ курс бере нош ик пумиським. 4-тӥ курсын ини ветлыны кутским. Дышетсконмес йылпумъяса, кышнояським.

Мыным потэ, котькуд ар кусыпмы воштӥське. Азьло мукет вал, али мукет — кыкнамы ик будӥськом. Куд-ог дыръя керетонъёс потыло ик. Со ӝожтӥське, мон романтик ӧвӧл шуыса. Нырысетӥзэ пумиськон нуналмы сярысь вунэтылӥсько. Огпол сюан нуналмес вунэтӥ. Нош кышное туж романтичной, праздникъёслы аспӧртэм кузьымъёс малпа. Нош мон кузьым лэсьтӥсько ке — мед со пайдаё луоз. Сяська куд-ог дыръя басьясько ик. Али кышноелы сяська вайисько ке, Лиза нылылы но басьтӥсько — кӧтыз ӝож медаз луы.

Удмурт семья

— Лиза нылыд но пичи дырысеныз ик удмуртлыкен тодмо. Тынад сюлмаськеменыд-а, анаез-а тырше?

— Мамаез, дыр. Нылмы модельной агентствое, удмурт блогеръёслэн школаязы ветлӥз, олимпиадаосы пыриськылэ, скрипкаен шудэ. «Камали» удмурт студиын кырӟаны дышетскиз. «Камалие» сётыны малпам, возьдаськонзэ мед вормоз шуыса. Ум но малпаське вал, кырӟаны пӧрмытоз шуыса — Оля но, мон но кырӟасесь ӧвӧл. Нош солэн кырӟаны быгатонэз вылэм, али тани музыкальной школае но ветлэ.

Ваня пимы мыным туж тупа. Но пельёсыз мынамъёсызлэсь золгес урдӥськемын. Со будэ ай, али Кузебай Герд нимо садике ветлэ.

Пиналъёсы монэн удмурт кылын вераськыны дышемын. Пиналэн пичи дыръяз ик ӟучен вераськид ке, отӥяз со удмуртэн уз ни вазьы. Аслыд ляб кариськоно ӧвӧл. Одӥг тодмоелэн — со мон быдӟа — алигес пиез вордӥськиз. Со юа: кызьы мон сое удмурт кыллы дышетом? Мон шуисько: вераськы удмурт кылын. Со пичи ук ай, уз вала, шуэ. Нош кызьы, шуисько, со ӟуч кылын валалоз? Мон валасько, со выллем атайёс трос шуыса. Соос зэм но уг валало, кызьы пиналзэс удмурт кыллы дышетоно.

Ӝоген тани «Куараен» удмурт анайёс понна «Ныло-пиё» подкастъёс гожъялом. Нош мон валасько: атайёслы но сыӵе подкастъёс кулэ. Удмурт воргоронъёслы нокин уг возьматы удмурт кыллэсь, культуралэсь кулэлыксэ. Атайёс удмуртлыкен ӵемысь герӟаськемын ӧвӧл, удмурт проектъёс сярысь уг тодо. Нылпиоссэс будэтыкузы но, кылэз дышетон сярысь шер сюлмасько. Со понна сюлэм висе. Пиналъёс кылзэс ышто ке, мон со понна янгыше атайёсты уськытӥсько. Удмурт воргоронэз удмурт атай луыны дышетоно. «Аныкай» проект вань бере, «Атыкай» но кулэ.

Пиналъёс понна тросгес удмурт мультфильмъёс, блогъёс, шудонъёс луыны кулэ. Тани удмурт кылэ берыктӥзы «Синий трактор» мультфильмез. Мон сое пиналъёсылы возьматӥ, кыкназылы но кельшиз. Пие мае ке учке но, йыраз шудонысь, мультикысь тунсыко веранъёс кылё. Берло дыре сямыз вань, дорам лыктэ но шуэ: папа, прикол вералом-а? Тӥни со берыктэм мультикысь но кыӵе ке веранэз тодаз кылиз, отысь «приколэз» мыным вераз.

Паймымон учыръёс, арбериос адямилэн тодэ ваёнъёсаз кемалы кылё. Удмурт стендапез поттӥськом ке, со бадӟымгес адямиослэн йыразы кыле, нош пиналъёсты мультикъёс паймыто. Аслам пичи дыръям телевизор пыр удмурт кылын фильмъёсты учкылэме вань. Азьло «Удмуртия» ГТРК удмурт кылэ берыктэм киноосты возьматъя вал. Пыраклы йырам кылиз: киноын воргорон телефон пыр вераське, солэсь юало: кин жингыртӥз? «Жингыртыны» кылэз уг тодӥськы вал, но та сцена весяклы тодам кылиз.

Эшшо учыр вал. Мон 4-тӥ курс бере нырысьсэ Гербере вуылӥ, со Дэбес ёросын ортчиз. Мынам культурной шок вал. Собыдӟа ужрад, сомында отын удмуртъёс, сыӵе яркыт шоу. Сыӵе бадӟым кужым! Мон малпасько, со нуналэ басьтэм мылкыд монэ али но бурдъя. Кинлэн ке сюлмаз удмурт книгаос озьы пыро, монэ сыӵе бадӟым ужрадъёс абдрато. Мультфильмъёслэн но сыӵе функцизы. Со шулдыръяськон гинэ ӧвӧл, со удмуртлыке трамплин.

— Юмор доры берытсконо ке — малы адямиос серекъяло меда?

— Кытысь ке лыдӟи вал: серекъяса адями кышканзэ ворме.

— Нош тон малэсь кышкаськод?

— Пичи дыръям ӟоскыт интыослэсь курдасько вал. Эшшо бӧрдэмме тодӥсько на: Чечняын война кутскиз но, туж курдай. Пичи дыръямы весь верало вал, макем шимес вал Быдӟым война. Соин туж зол курдай, малпай, асьме пала но ож вуоз шуыса. Али курдасько ӝокаса кулыны. Курдасько ӝуждалалэсь. Курдасько, матысь адямиос вӧсь луозы, улонысь кошкозы шуыса. Курдасько, адямиос шузи кылёзы, дунне вылын зэмбур (справедливость) уз луы шуыса. Курдасько огнам кыльыны.

— Коронавируслэсь кыш­кась­код-а?

— Уг. Малпасько, куалектон, паника вируслэсь но курдытгес. Ваньмыз адями бордысь потэ — кышкад ке, висён но бордад капчиен кырмиськоз. Но уг курдаськы ке но, чакласькисько. Ассэ утись муртэ Инмар но уте, шуо.

Анастасия Шумилова

Удмурт Дунне
By Удмурт Дунне 2 апреля, 2020 16:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<