Секыт эрик

Ангелина Снигирева
By Ангелина Снигирева 9 апреля, 2020 15:48

Таяз арняе дышетсконын 2 арня вис каремзы бере урокъёс борды пуксизы школьникъёс. Дышетон мынэ дистанционной амалэн. Котькуд школа но дышетӥсь ачиз чакла, кыӵе амалэн радъяно урокъёсты, кызьы эскероно быдэстэм ужъёсты.

Та нуналъёсы пиналъёс дышетско ас ноутбукъёссы сьӧрын
Туспуктӥз Чудья Жени

3 гуртысь нылпиос

Пичи Пурга ёросысь Баграш-Биграысь анай-атайёс но дышетӥсь кенешо Интернет пыр. Со понна огаз соцсетьын асьсэлэн чатсы кылдытэмын. Интернетэн шугъяськонъёс гуртын ӧвӧл, соин вань пиналъёс тодо, мар карыны косэ дышетӥсь.

1-тӥ классэ ветлӥсь Кирилл Баграшов понедельнике 4 урок дышетӥз. Мамаез валэктӥз математикаен выль темаез. Пияш лэсьтӥз на ӟуч кылъя но лыдӟиськонъя заданиосты. Технологиен уж дасяз. Понедельнике ӝыт дышетӥсьсы ӵуказелы чаклам заданиос лэзиз ни.

— 2 арня каникул бере ӝӧк сьӧры пуксьыны пиелы секытгес вал. Ачим но сюлмаськи, быгато-а выль темаез валэктыны шуыса. Ярам, дорысь ужъёсты берло дышетӥсез эскероз, соосты Интернет пыр лэзьянэз ӧвӧл. Собере, оценка но 1-тӥ классын уг пуктыло, со интые «мылкыд» (смайл) гинэ суредало, — шуэ Кириллэн анаез Наталья.

Баграш-Бигра школалэн директорез Алексей Тимофеев верамъя, али ваньмыз ик 164 пиналъёс доразы дышетско. Тужгес сюлмаськоно школаез йылпумъясь пиналъёс понна. Туэ 9-тӥ классэз быдтэ 17 пинал, 11-тӥез — 5 нылпи. ОГЭ но ЕГЭ сётон дырез выжтэмен, пиналъёслэн, огласянь, дырзы ватсаськиз, мукет ласянь, соос табере асьсэ понна дасяськыны кулэ.

— Дышетӥсьёсмы 23 кузя. Ваньзы ик дорысенызы нылпиослы заданиос дасяло. Котькуд класслэн соцсетьын аслаз группаез кылдытэмын. Отын заданиос сётэмын. Котькуд дышетӥсь ачиз чакла, кыӵе амалэн урокъёсты эскероз. Кин ке ӵектэ «Учи.ру» платформаысь ужъёсты. Кин ке лэсьтэм заданиосты туспуктыса ыстыны косэ, кин ке тетраде быдэстыны куре. 6-тӥ апрельысен дышетӥсьёс электрон журнал нуо. Нылпиос лэсьтэм ужзы понна отметка басьто, — шуэ школалэн директорез Алексей Тимофеев.

Баграш-Бигра школае 3 гуртысь пиналъёс ветло. Интернетэн сюлмаськонъёссы уг кылдо Бигралась но Орлойысь нылпиослэн. Нош Куреггуртын Интернет ляб. Озьы ке но заданиосты тодӥсьтэм нылпиос ӧвӧл. Куспазы телефон пыр кенешо пиналъёс но, анай-атайёс но.

— Дистанционной амаллэсь ӟеч палзэ шуг вераны. Нылпиослэн 2 арня ӵыдэтскемзы бере мылзы уггес поты дышетскыны. Асьсэ понна тодон-валан люканы соослы секыт, — шуэ Алексей Иванович.

Мылкыдыз куашказ

Ижысь 83-тӥ школаысь 11-тӥ классын дышетскись Катя Рыцевалэн самоизоляциен валче вань мылкыдыз куашказ. Нылаш куаш дасяськиз ЕГЭ-ослы. 2 ар ӵоже со физикаез но математикаез ватсаса дышетэ, репетиторъёс доры ветлэ. Табере ваньзэ ас понназ дышетэ, туж сюлмаське. Уго репетиторъёсыз онлайн амалэн занятие уг нуо. Нош самоизоляциен валче соос доры ветлыны уг яра.

Катя «5»-лы гинэ дышетске, школазэ медален йылпумъяны дасяське. Соин таяз четвертьын ӟуч кылъя репетитор доры вазиськизы вал — зарни медаль басьтон азьын нокыӵе могӟетъёс медаз луэ.

Табере Катялы, огласянь, эрик, мукет ласянь, валантэм югдур. Самоизоляцие со гуртэ песянай-песятаез доры бертӥз вал. Дистанционной дышетсконэз татын но вормоз кожаз. Озьы ке но гуртын Интернетэн югдур капчи ӧвӧл — дышетӥсьлэсь сётэм заданиоссэ со котькуд нунал 15 часозь быдэстыса эскерыны келяны кулэ. Нош Интернет куашка — Катя сюлмаське: оло вуиз ужез, оло — ӧз. Соин матысь дыре мумиз но бубиз нылзэс выльысь городэ вайыны чаклало.

* * *

18-тӥ мартысен Россиысь вань анай-атайёс понна Просвещениея министерствоын ужа дистанционной дышетонлы сӥзем «пӧсь» телефон: 8-800-200-91-85. Отчы 3 арня куспын 6 сюрс 500 юан вуиз ни. 68 процентэз вазиськисьёс — анай-атайёс. Тужгес сюлмаськытӥсь юан: кызьы нылпилэсь тазалыксэ утёно, уго табере со амалтэк тросгес дырзэ быдтэ компьютер азьын?

Елена Скворцова

Ангелина Снигирева
By Ангелина Снигирева 9 апреля, 2020 15:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<