Пичи Пурга ёросысь Пуро гуртын сюрес лэсьтӥзы

Удмурт Дунне
By Удмурт Дунне 30 апреля, 2020 09:27
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем арын вордскем гуртам — Пичи Пурга ёросысь Пуроын — сюрес лэсьтӥзы. Бадӟым ужез гуртоос вормизы, веме карыса но интыосысь кичӧлтонъёслы дурбасьтонъя элькун программае пыриськыса. 

Та уж возьматӥз: асьме гуртмес, улонмес ӟечгес, чебергес карыны быгатӥськом асьмеос ик. Азьтэмез гинэ вормоно. Уго туала вакытэ дасьсэ возьмаса уд пукы ни.
Туспуктӥз Мария Векшина.

Пуро гурт туж ик пичи ӧвӧл: 116 корка, 340-лэсь трос улӥсез. Вань школамы, лавкамы. Газ, ву коркаосы пыртэмын. Умой кадь. Зэм но, толалтэен, гужемен калыклэн улонэз гань-гань ке, но тулыс-сӥзьыл вуэ ке, бадӟым куректон кылдэ: корка дорозь, дэриез колатэк, уд пыры ни. Асфальт гурт дорозь гинэ кисьтэмын. 5-6 ульчаос пӧлысь зор-кот куазен ветлыны луэ одӥгетӥз гинэ — Выль (Молодёжной) ульчаетӥ. Со уго школае вуттэ, соин ик вольыт лэсьтэмын. Нош шур сопалан улӥсьёс машинаоссэс гурт пуме, асфальт вылэ, кельто.  Кема, дыр, тазьы улысалзы на, но кылем арын гуртоосмы интыосысь кичӧлтонъёслы дурбасьтонъя элькун программае пыриськыны малпазы. 

Та программа Россиын кылдӥз 2015-тӥ арын, со дырысен таӵе амалэн ужало ни трос улосвылъёсын, валля арын бордазы итӥськиз Удмуртия но. Гуртоос кыӵе ке проект гожто, лыдъяло, кӧня солы уксё кулэ луоз: ог куиньмос люкетсэ бичало калыклэсь, спонсоръёслэсь но гурт администрацилэсь, нош кылемзэ, бадӟым люкетсэ, аслаз
кисыысьтыз висъя элькун. Озьы кылем арын шаерысьтымы трос гуртъёсын кылдӥзы нылпиослы шудон интыос, тупатскизы сюресъёс но мукет.

Таӵе луонлык сярысь тодыса, уж борды басьтӥськизы библиотекаын ужась Тамара Волкова, школалэн директорез Людмила Софронова, сюрес лэсьтонъя огазеяськонын ужась Александр Бичурин, «Байситово» хозяйствоын ужась Пётр Микишев но мукетъёсыз. Калыкез люказы, кенешизы, кыӵе проект лэсьтоно.

— 3 малпанмы вал: Выль ульчае нылпиослы шудонинты ӝутоно, пеймыт
ульчаосты югдытоно но
шайвылэ нуись сюресэз — Зелёной, Лесной ульчаосты — лэсьтоно, — вера Тамара Волкова. — Калык, конечно, кизэ сюрес понна ӝутӥз.

Кема курадӟизы проект гожтонэн, кулэ документация бичанэн, уго гуртоослэн таӵе ужен ноку но выремзы ӧй вал. Калыклэсь уксё бичазы, коньдонзэс ӧз жалялэ Аксакшур муниципал кылдытэт, «Аксакшур» СПК, «Байситово» огазеяськон. Пуроослэн тыршемзы юнме ӧз луы, проектсы вормиз!

Щебенен нырысетӥ машинаос вуизы бер сӥзьыл. Куазь зоре, горд сюй кисальӟе, бадӟым машинаос нюко-гопо ульчалэн вырйылъёсаз тубыны уг быгато, гылӟо. Гуртоос асьсэ машинаоссэс но поттӥзы, гравий, щебень, песок нуллӥзы, киосазы лопаткаос кутӥзы. Техникаен юрттӥськизы Аксакшур муниципал кылдытэт, ужбергатӥсь Александр Купцов.

— Ми палась нюкмес асьмеос тупатӥм, кин быгатӥз песок нуллӥз, пограм топольёсты кысказ, ву кошкон трубаосты лэсьтӥз, — вера Лесной ульчаын улӥсь Елена Волкова. — Ми пала гравий векчигес ке но сюриз, талы но шумпотӥськом. Машинаос
нюктӥмы тубыны быгато ни. Тодӥсько на, 2000-тӥ арын гужем ӝуаны сюрим вал. Пожарнойёс лыктытозь, гуртоос нюк пыдсысь шурысь ву тубтылӥзы, сюресэз коттӥзы. Пожарнойёс лыктӥзы но, котмем горд сюй вылтӥ машиназы кема тубыны курадӟиз.

Озьы валче кужымен пуроос иськем пала сюрессэс тупатыны быгатӥзы — Зелёной ульчаез но Лесной урамлэсь оглюкетсэ. Со ӧжыт ӧвӧл.

— Быдэс тол ӵоже малпаськыса улӥ, тулыс вуиз ке, кыӵе сюресмы луоз? — мылкыдзэ кисьтэ Тамара Волкова. — Али учкисько но: пумен юнма кадь. Сыӵе сюлэм шумпотэ. Та сюрес пумысен трос бызьылоно луиз но, аслам ульчаысьтым калык шуэ ни: малы ми пала ӧд лэсьты? Гурезе тубонмес коть асьме кужымен тупатоно: уксё бичамы ни, тани-тани щебень ваёзы.

Та уж возьматӥз: асьме гуртмес, улонмес ӟечгес, чебергес карыны быгатӥськом асьмеос ик. Азьтэмез гинэ вормоно. Уго туала вакытэ дасьсэ возьмаса уд пукы ни.

Школаын ужасьёс нылпиослы шудон площадка лэсьтыны, семьялы сӥзем клуб усьтыны проект гожтӥллям ни. Озьы ик калыклэн мылкыдыз вань на Вуж — Советской — ульчае сюрес лэсьтыны. Таиз ини — вуоно арын, оскытӥзы Аксакшур
муниципал кылдытэтын.

________

Мария ВЕКШИНА

Удмурт Дунне
By Удмурт Дунне 30 апреля, 2020 09:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<