Ольга Бородина. Мукет яратон. Верос.

Удмурт Дунне
By Удмурт Дунне 15 апреля, 2020 15:33
ud06-07-17

Ольга СЕМЁНОВА (Бородина) — «Кенеш» журналлэн валтӥсь редакторез, Удмуртиысь дано журналист

Люда ӵукна ик нянь котыса кельтӥз. Ужысь бертӥз ке, дась мед луоз. Нош ӝытазе дораз вуиз но — ыльняньзэ поттыны кӧбера. Ӧвӧл, азьтэмъяськемысьтыз ӧвӧл, пӧраськыны со яратэ: пыжиськем вань ке, коркан ик шулдыр, шуныт луэ кадь. Кышномуртэ мукетыз шугъяськытэ. Малы ке ӵемысь озьы укша: уж бере ӝытазе пыжиськон йӧндыре ке, кузпалыз одно беромыса, кудӟыса вуэ. Я, беромыса бертылэмъёсызлы дышиз ни. Юэмын ӧвӧл ке, кизэ уг йӧттылы. Нош котмемын ке, коть дунне пыдсы лэзькы яке, пичи бӧчылы пӧрмытскыса, выж пулъёс вискы чуртнаськы — шедьтоз.

Шӧдонэз Людаез туннэ но ӧз пӧя. Кузпалыз уг вуы. «Мар та улон таӵе: ӟеч кылэз но, ма, солэсь шӧмзэ гинэ но вунэтӥськиз ни. Укно сьӧрысь суредъёс но чик уг шумпотто: кыдёке-кыдёке кыстӥськись вӧл-вӧл дуннеез, чагыр-чагыр инэз адӟем потэ, нош синъёс улыно-вылыно коркалэн пурысь борддор бордаз гинэ мырӟисько. Нош кыӵе потэ вылэм, укно пыр ке но, мукет дуннеез адӟем», — ас понназ кыла-бура Люда.

Нылкышнолэн мӧзмыт малпанъёсыз огез вӧзы мукетыз пӧлэстӥськыса нуйтӥсько но, ӝожлы чидатэк, бам вылтӥ сутӥсь синкылиосын питырско.

Нош дас ар талэсь азьло гинэ кыӵе чебер но сайкыт вал кадь ваньмыз: егитъёс, ог-огзылы синмаськыса, кузпалъяськизы, сюаназы, оло, вань гурт калык шулдыръяськиз. Люда аслаз Витяеныз котьку ӵош, ог-огзэс валаса улозы кожаз. Нырысь, зэм но, озьы ик вал. Нош малы али со ваньмыз сыӵе кыдёке, вашкалае, кылиз? Шудо, шумпотоно вакытъёс воксё но ӧй вал кадь.

«Малы милям но, трос мукетъёсызлэн сямен ик, юнэсь кадь кусыпъёсмы куинь ар куспын тэшказы? — аслэсьтыз ачиз юа Люда. — Малы номыре берыктыны уг луы ни? Ӧжыт азьлогес, оло, луысал на, нош али уг пӧрмы ни. Витяезлэн угось — мукет яратонэз. Со яратон — лек но ас бордаз бинялтӥсь.

* * *

Люда вань тодэмзэ син азяз пуктыны выре. Витязэ соин одӥг классын дышетскись эшъёсыз тодматӥзы. Вадим эшез дас тямыс арессэ пусйыны вань классэс дораз люказ. Витя выль тодмоезлы соку ик синмаськиз шуыны уг луы. Шонерзэ вераса, солы со чик но ӧз яра.

Армиын дыръяз со сярысь тодаз но ӧз вайылы, ма, матысь тодматскыса ик ӧз вутты на вал. Нош армиысь бертэмез бере нырысьсэ валаз: соин туж шулдыр.

Но Людаеныз пумиськемез бере тодмоез сярысь вунэтӥз. Зэм, пыраклы ӧз, дырын-дырын соос пумиськылӥзы ик, но Витя синмаськемзэ кузпалызлэсь ватыны тыршылӥз. ӝоген ваньмыз шараяськиз, танӥськыны кулэ ӧй вал ни. Та пумысен Люда керӟегъяськыны кутскиз, кузпалзэ пыкылыны ӧдъяз.

Зэмзэ вераса, Витя ачиз но ӧз вала, кызьы но ку «выль туганэз» сое сокем бордаз биньыны быгатӥз. Табере арня ӵоже уг адӟылы ке сое, висьыны шӧта: «Кыӵе каньыл, шулдыр соин, сюлмаськонъёс кытчы ке тӧлӟо, номыр сярысь малпаськем уг поты ни». Макем ӵемгес пумиськылыны кутскизы, сокем юнгес луизы кусыпъёссы — нокыӵе кужым люкыны уз быгаты ни кадь соосты.

Тае шӧдыса, вылды, «гажанэз» пумен сямзэ но возьматылыны ӧдъяз: Витя возьма, пумиськон утча, нош соиз пега, номыр вератэк, чиптэм-чаптэм ыше. Воргорон уйёссэ но кӧлыны уг быгаты ни, йыраз но, сюлэмаз но — со гинэ: ку вуоз, ку сюроз? Медаз гинэ ышы, медаз гинэ тӧлӟы, нош Витя солэсь олокыӵе но сямзэ чидалоз. Конялэныз вуёмытӥз ке — мед, юмалэныз пӧяз ке — ӵок ойдо, курытэныз ӵушказ ке — иназ. Та йыбыртъяно «яратонэзлы» Инмарлы сямен вӧсяське, малпанъёсыз соин гинэ тырмытэмын. Дунне вылын вань на меда солэсь бадӟымгес яратон?! Людалэн улоназ ноку ӧй вал сыӵеез, нош кузпалызлэн тани вань — гочатӥсь, чильпырась, йырез поромытӥсь ву. «Аракы» солэн нимыз.

Кӧня сюлвориз ни картсэ Люда эмъяськонние ветлыны, соиз кылэм но уг кары. Ма, конешно, малы эмъяськоз, со уг висьы ук — яратэ. Нош Люда яратонэныз пыкылыны кутске ке, Витя вожпотэмзэ уг вормы но, мыжыкъёссэ сэзъяса, соку ик кышноез доры вуэ.

Картэз мыжгыны дӥсьтоз шуыса, Люда нырысь ӧз оскы. Кышкатоз гинэ кожаз. Нош соиз пырак ымныраз мыжгиз. Йыркурен, дӥсьтыса, вормемзэ шӧдыса. Со нуналэз Люда ӟеч тодэ на. Мыжгемлэсь нылкышно усиз, ӝутскыны турттэ, нош картэз, уката пуромыса, вылысьтыз вылаз тыш-таш васькытъя. Нылкышно, мырдэм но кызьы ньыльпыдъяськыса, пырон ӧс пала чигназ. Кытысь-мар кужымзэ поттыса, кузпалзэ донгиз но, ӧсэз усьтыса, подъездэ пегӟиз. Кытчы-мар кариськоно? Кинлэсь юрттэт куроно?

Олокытӥ-мар куатетӥ этажысь кыкетӥяз вуиз. Татын эшез улэ. Люда жингыртэм вылысь жингыртэ ӧсэ.

— Ма, кинлэн воксё чиданэз ӧвӧл ни? Лыктӥсько, лыктӥсько! — кылӥське ӧс сьӧрын.

Люда капчияк шокчиз. Ярам, кузпалыз сьӧраз уг уйиськы кадь. Калык азьын мыжгаськыны кепыралоз ик, дыр. Катя, эшезлэсь шулӟектэм ымнырзэ но тугаськем йырсиоссэ адӟыса, паймытскиз:

— Ма, воксё аслыд ачид уд кельшиськы ук. Пыр ни ӝоггес, ваньзэ вералод.

Ярам, Людалэсь кузпалыныз кусыпъёссэ Катя умой тодэ, эшсэ жаля. Соин ик Люда котьку со доры бызе, сюлэмшугзэ эшезлы вера но кӧнялы ке буйга. Катя огназ улэ, Людалэн выллем сюлмаськонъёсты уг тоды. Егит дыръяз ӧз бызьы, табере оло курда, оло пиосмуртэн улыны мылкыдыз тӧлӟиз. Тани ӝоген куамын витьсэ тырмытоз. Люда куддыръя ассэ но янгыш карылэ: «Мынэсьтым улонме адӟыса, тон пиосмуртъёслэсь палэнскиськод ни», — Катялы шуылэ со.

* * *

Люда али гинэ чаклаз: нянез, буй-буй ӝутскыса, миска котырзэ няням но ӝӧк вылэ пань-пань вӧлдӥськем ни. Синкыли ошмесэз но пумен куасьмиз, пушказ буш-буш кылиз. Пумтэм бӧрдыны уг луы вылэм, синкыли адямилы лыдъяса сётӥське, оло.

— Ох, Витя, Витя, пыжиськон мылкыдме но тон чылкак быдтӥськод ни. Нош азьло кыӵе ушъяса-ушъяса, тау карыса сииськод вал пӧрамъёсме. Али нылылэсь гинэ тау шуэмзэ кылӥсько на… Мар меда нылы ӧвӧлтэм дыръя но тазьы пӧраны йӧндырисько на? Толэзьлы гинэ ук классэныз ӵош лымшор пала шутэтскыны кошкиз. Со дыр ӵоже пӧрам-пыжиськемтэк но улыны луысал. Шедьтӥсько ук аслым сюлмаськон, — Люда ассэ тышкаське-пыкылэ ке но, киосыз огдышем сямен провор ужало: тани ыльнянь но погыльтэмын ни, кутэмняньёс но лэсьтэмын, гуре пыжыны но пуктэмын.

Сиемез гинэ уг поты пӧрамзэ: ӝоженыз кӧтыз тыремын, лэся. Люда кутэмняньёссэ вӧяз-мараз но, медаз куасьме, небытэсь мед луозы шуыса, ӵушконэн шобыртӥз. Ӵапак соку ӧсэ жингыртӥсь луиз. Люда ӧз паймы, дышемын ни, котьку озьы луэ: кузпалыз гурысь пыжиськем потэм бере яке солэсь бергес вуэ.

Витя нош ик котмемын. Но пыд йылаз юн возиське. Таӵе дыръяз со котькулэсь кӧшкемыт. Озьы ик вань.

— Кытын сиёнэд? Малы мыным шыд ӧд ӝуты на? — кухняе пыремез бере ик ишкиськыны кутскиз. Ӝӧк вылысь пыжиськемез синйылтӥз. — Яке таосыныд гинэ монэ алданы малпад-а?

— Уг ке яра, эн сиы, — пумит вазьытэк ӧз чида Люда.

— Уг яра, уг сиы! Укно сьӧры кушто мон соосты! Тэркыед сьӧры астэ но отчы ик лобато, — одӥгзэ кутэмнянез усьтэм форточкае зӥртӥз ни, пумен укноез усьтыны выре.

Люда пыжиськемен тэркыез ӝӧк вылысь басьтӥз.

Картэзлэн тыбыраз синъёсыз вань, лэся, — зӥрак берытскиз но кеськиз ук:

— Пукты интыяз, ато тэркы интые нырысь ачид лобод!

— Ме, кушты, дасьсэ куяны каньыл ук.

— А, тон монэ дась сиись шуыны турттӥськод-а?

Нылкышно адӟе ни, кызьы азяз сылӥсь воргоронлэн чиньыосыз мыжыке кырмисько но солэн ымныр дораз матэкто.

Йырзэ олокызьы-мар палэнтыса, Люда ури-бери ӧс доры бызиз. Ӧс усьтэмын. Кузпалыз юыса бертэ ке, Люда бӧрсяз ӧсэз ноку уг пытса. Тодэ уго: дорысьтыз пегӟоно луоз. Созэ но тодэ: кузпалыз сьӧраз уз уйиськы. Калык азьын астэ уродэн возьматыны уг яра шуыса вала на.

Тани кыкетӥ этажысь тодмо ӧсъёс. Люда, ачиз но пумозяз валатэк, тодмо кнопкаез вань кужмысьтыз зӥбе — борддор пушкы пыртыны турттэ кадь. Ӧс сьӧрын чал-чал. Соку Люда мыжыкъёсыныз йыганы ӧдъяз. Таизлы чидатэк, ӧсэз усьтӥзы. Катя эшез — туж йыркуро:

— Люда, тон со карттэ гинэ но уд вормиськы-а, мар-а, адямиосты паймытъяса, этажысь этаже бызьылӥськод? Мынам куное вань, тон понна мон туннэ дорам ӧвӧл, валад-а? — озьы шуиз но Людалэн ныр улаз ик ӧссэ пытсаз.

Эшезлэн жалямезлы, лӥятэмезлы дышем нылкышно та кылъёслэсь онгромиз кадь: тыш сием вылэ сое нош ик тышказы на кадь.

Люда, шуак луэменыз, нырысь ма карыны ӧз вала. Вырӟыны но ӧз быгаты ни. Собере, интыысьтыз ишкалскыса, тубатъёсты лыдъятэк, ӝокыт подъездысь ураме сётскиз. Гужем уй сай-сай. Нылкышно, кинлэсь ке юрттэт курыса кадь, синъёссэ вылӥе ӝутӥз. Инбамын ӟар-ӟар пиштэ толэзь. Люда тодаз вайиз песяезлэсь верамзэ. Толэзьысь карнанэн нылаш сярысь. Юись картэзлэсь вуёмыса но ултӥямзэ чидатэк, нылкышно вылӥысь толэзьлы вазиськем но ассэ дораз басьтыны курем. Толэзь нылкышнолэсь куронзэ быдэстэм — юись картэзлэсь мозмытэм.

Люда, та мадёсэз тодаз вайыса но толэзь шоры дол учкыса, скамья вылын кема пукиз. Малы ке оскыса, мае ке возьмаса кадь. Малпамтэ шорысь кымес вылаз маке тёп усиз. «Зорыны кутске-а, мар-а?» — малпаз Люда но шапыкез киыныз ӵушалтӥз. Но ки улаз воксё но зор шапык вылымтэ — ӟольгыри озьы вылаз паньсаськем.

— Ма, мар ай монэ ваньмыз мыскылляны туртто? Тани пичи ӟольгыри гинэ но кызьы ултӥяз! — Люда интыысьтыз чорк гинэ султӥз но квартираяз бызьыса сямен тубиз.

Кузпалыз уг изьы на. Люда, бугырскем мылкыдзэ сӥятыны кышкаса кадь, пырыкуз ик вань кужмысьтыз кеськиз:

— Тырмоз, люкиськиськом! Ӵуказе ик загсэ куриськон гожтӥсько.

Воргорон диван вылысь дыртытэк гинэ султӥз но, кескич пальпотыса, кузпалыз доры вуиз.

— Мар шуид? Люкиськон сярысь кылпум поттӥд кадь? Кинэн со дыр куспын кушласькыса вуттӥд? Я, вера, вера, маиз пӧртэмгес солэн?! — пиосмуртлэн мыжыкъёсыз Людалэн ымныр дораз матэкто.

Но кышномурт интыысьтыз ӧз вырӟы, ымнырзэ, азьло сямен, киосыныз ворсаны ӧз дырты. Картэзлэн синъёсаз мыр-мыр учкыса, Люда юн-юн вераз:

— Мыжгод ке мыжгы, мон уг кышкаськы тынэсьтыд. Мон уг гажаськы тонэ. Та дырысен мон уг тодӥськы ни тонэ.

Собере нылкышно, фильмысь суредъёслэсь вошъяськемзэс выллем, учкыса улӥз, кызьы картэзлэн урдэм мыжыкез, шуак катьтэммыса кадь, ньӧр сямен уллане лэзиськиз. Син пумтӥз адӟиз на, кызьы укно янак вылэ пуксем ӟольгыри кескич гинэ пальпотӥз.

Удмурт Дунне
By Удмурт Дунне 15 апреля, 2020 15:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<