Одӥг урокын — кык кылын

Ангелина Снигирева
By Ангелина Снигирева 7 апреля, 2020 13:24

Дэри ёросысь Выль Казьмас школаын удмурт кылъя урокъёсты 40-тӥ арзэ нуэ Антонина Веретенникова. Антонина Фёдоровна та гуртын вордскемын, татын ик дышетскемын.

А. Веретенникова С. Бабинцеваен олимпиадалы дасясько.
Туспуктӥз В. Емельянова

Ужаны кутскыкуз, дышетӥсь ӧз но малпалля, куке-соку удмурт гуртысь пиналъёс ӟучомозы шуыса. Соку анай кылэз ваньзы дышетӥзы.

— Аръёс ортчемъя улон воштӥське вылэм, — шуэ Антонина Веретенникова. — «Ӟеч-а, бур-а, удмурт кыл!» программае выжеммы бере кӧня куректӥ: кин дышетскоз та программаен, кинъёс потозы табере пиналъёсмы? Удмурт книгаосмы но тани быдэс шкаф тыр, ваньмыз вань. Амалтэк тодэ лыкто ужаны кутскем аръёсы, соку книгаослы шугъяськонъёс кылдылӥзы, нош дидактической материалъёсты шедьтыны уг луы вал. Табере ваньмыз вань, нош пиналъёсмы ӟучомизы. Улон сыӵе. Гуртамы пӧртэм интыосысь адямиос вуизы. Нош пичи дыръямы быдэс гуртамы 1-2 семья гинэ ӟуч вал.

Та вие школаын 10-тӥ классозь удмурт кылэз дышето, нош 10-тӥ-11-тӥ классъёсын арняяз 2 час удмурт литература нуиське. Вазенгес, пе, удмуртэз дышетонлы часъёс тросгес висъяськылӥзы. Кылсярысь, 9-тӥ классын арняяз 4 час вылэм, «Ӟеч-а, бур-а, удмурт кыл!» программае выжыса, 3 час кылем.

Выль программая ужаны кутскем дырысенызы табере 9 ар ортчиз ни. Дышетӥсь уг ваты, пиналъёс пӧлын, пе, котькыӵеез вань. Куд-огезлэн мылкыдыз ӧвӧл удмуртэз дышетыны, тросэз нылпиоссы ӟучомемын. «Ӟеч-а, бур-а, удмурт кыл!» программа учкыса гинэ капчи адске, но удмуртэз ӟеч валасьёс но куд-ог дыръя малпаськонэ усьыло. Огкылын вераса, ваньмыз потэ дышетскисьлэн но мумы-бубыослэн мылкыдзы бордысь.

— Школаямы пӧртэм выжы калыкъёслэн нылпиоссы дышетско, — шуэ Антонина Фёдоровна. — Ваньзы соос удмурт кылэз мылысь-кыдысь дышето, нош 9-тӥ классын дышетскись курд нылмы предложениосты но умой вала, кылбур но акценттэк лыдӟе.

Школаын азербайджан, армян, курд выжыысь пиналъёс дышетско. Анай-атайёссылэн, пе, одӥг пол но пыкылэмзы ӧвӧл удмурт кыл понна. Куд-ог дыръя удмурт анай-атайёслэн ик пумит ваземзы потэ. Пиналъёсмылы, пе, секыт, урок лэсьтыса ум вуттӥське.

Выль Казьмас школаын нылпиос тырмыт, классъёсын 10-23 кузя дышетско. Удмурт кылъя ёрос олимпиадаосы пиналъёс мыло-кыдо пырисько. Антонина Веретенниковалэн дышетскисез Софья Бабинцева ёросын туэ 2-тӥ инты басьтэм. Дышетӥсь талы шумпотэ но, ӝожоме но кадь. Котькуд ар, пе, шаерамы ортчылӥсь олимпиадаосы пыриськылӥмы, туэ кельтоно луом, 2-тӥ инты гинэ басьтӥмы бере. Урокъёсын гинэ тодон-валан люкаса, кыдёке уд вуы, соин ик нимысьтыз но дасяськоно.

Гуртысь дышетӥсьлэн мукет сюлмаськонъёсыз но вань. Азьвыл аръёсы классъёсын 20 пиналлэсь трос вал ке, соосты 2 группалы люкыло вылэм, али ваньзы ӵош пуко: удмурт кылын вераськыны быгатӥсьёс но, сое валасьтэмъёс но. Со вакытэ ик кунгожсьӧр кылъя урокъёсын классъёс 2 группалы люкисько. А. Веретенниковалы таӵе югдур туж валантэм. Амалтэк но, пе, малпан кылдэ, городысь школаосын удмурт кылэз ӟечгес дышето шуыса.

Озьы-а, тазьы-а, нош Антонина Фёдоровна ужаны мылкыдзэ уг куашкаты. Ёросысьтызы удмурт кылъя дышетӥсьёсын ӟеч кусып возе. Дышетӥсьёс толэзьлы быдэ пумиськыло но ог-огзылэн ужан амалъёсынызы тодматско, куд-ог дыръя мукет ёросъёсысь эшъёссы доры но потаны луонлык шедьто.

Валентина Емельянова

Ангелина Снигирева
By Ангелина Снигирева 7 апреля, 2020 13:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<