Нянь сиисьёс йылӥзы…

Ангелина Снигирева
By Ангелина Снигирева 9 апреля, 2020 12:43

Пичи Пурга ёросысь Бобья-Уча гуртысь магазинын, быдэс кунамы сямен ик, ог 3 арня талэсь азьвыл тросэн басьязы макаран, кеньыръёс, вӧй, туалетной бумага… Али шыпытгес луиз, но вуззы, пе, 20-30 процентлы тросгес кошке.

Бобья-Учаысь магазинны котьмаиз вань
Туспуктӥз Татьяна Феофанова

— Берло дыре басьяськисьёсмы тросгес луизы, городысь чисто студентъёс бертылӥзы. Садикъёс, школаос ворсаськемен, нылпиос песянайёссы вӧзын уло, куд-огезлы городысь вайыса кельтэмын на, — валэктэ Бобья-Уча гуртысь магазинлэн кивалтӥсез Татьяна Феофанова. — Соин ик милям но тросгес вуз вёно луэ. Тужгес зол кошке нянь. Азьвыл нуналаз 120 колды нянь вузаськом ке вал, али 200 пала ваёно луэ. Нянь ёросысьтымы ик Улын Юри, Вуж Монья гуртъёсысь пекарняосын пыжо, отысь вайиськом. Эшшо тросэн басъяло йӧл, емыш.

Татьяна Геннадьевна ук ваты, вуз карисьёсызлы маска шедьтыны ӧз быгаты, нокытын, пе, уг вузасько. Ярам, асьсэос ужасьёсыз кытысь ке шедьтӥзы. Нош перчаткиослы уг ёрмо, нуналлы быдэ вошъяло.

— Котькуд нунал асьмеос ик магазинэз хлоркаен миськиськом, ваньзэ ӵушылӥськом, — шуэ татысь одӥгез вуз карись Светлана Семёнова. — Ымнырамы маска нуллӥськом. Маскалы ёрмоно, соин, малпаськом, асьмеос вурыны кутском ни. Басьяськисьёсмы пӧлын олокыӵеез но вань. Куд-огез серем гинэ каре, уг оскы, маска юрттоз шуыса. Нош куд-огез туж чакласько, маскаен лыкто, эшшо ог-огзэс куарето: нош тон малы маскатэк? Ваньзы телевизор учко, иворъёсты тодо. Куд-огез магазинэ пыремез бере мукет муртэ черодэ бӧрсяз ик султыны уг лэзьы, висмы 1, 5 метр луыны кулэ ук, шуэ.

Светлана Семёновалэн верамезъя, Бобья Уча гуртысь калык югдурез оглом вала. Ог 2-3 арня талэсь азьвыл туж тросэн басьязы, пе, вал макарон, кеньыр, вӧй, спичка, туалетной бумага, пызь, сакыр песок…

— Соку кивалтӥсьмы арняяз 2 пол но вуз вайыны ветлэ вал. Ижысь базаосын озьы ик бадӟым черодъёсын сылоно луылӥз. Калык шузимыса басьяськиз. Али ужмы сыӵе пӧсь ӧвӧл ни, озьы ке но городысь вуэм егитъёсты, дорын пукись нылпиосты нуналаз олокӧня пол сюдоно. Соин песянайёс пельнянь, колбаса кадьёсты трос басьто, чаляк пӧзьтыны но пиналъёсты сюдыны мед луоз, шуо.

Нялтас вераса, Бобья Уча гуртысь тросэз калык дораз уг пукы. Ужало колхозын, аптекаын, больницаын… Ма, пудоез сюдытэк, утялтытэк уд возьы ук…

— Азьвлгес куд-ог песянайёс внукъёсынызы кыре пото но поръян сяменызы магазинэ нуналаз олокӧня пол вуыло вал. Али эскеронлэсь но, висёнлэсь но кышкало ни. Куд-огез милесьтым маска куро, уд-а, пе, вузаське? Асьмеос мырдэм шедьтӥм ай, шуиськом…

Елена Васильева

Ангелина Снигирева
By Ангелина Снигирева 9 апреля, 2020 12:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<