Нуналаз — 3 вагон сюй

Удмурт Дунне
By Удмурт Дунне 20 апреля, 2020 10:53
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Пичи Пурга ёросысь М. Петрова

Песянаелэн сузэрез Мария Романовна Петрова (Романова), пичи дырзэ тодаз вайыкуз, синъёссэ ӵушылэ. Туж секыт аръёсы улӥмы, оломае но адӟыса вуттӥмы, вера со.

Мария Романовна вордӥськиз Пичи Пурга ёросысь Улын Юри гуртын 1928-тӥ арын 8-тӥ пӧсьтолэзе.

1927-тӥ-1928-тӥ аръёсы Улын Юри гуртын пуктӥзы «Соперницы» киноез. Москваысь артистъёс улӥллям Романовъёслэн юртазы. Соосты сюдыны бадӟым парсез вандӥллям. Со понна москваос одӥг кырым азвесь уксё сётыса кельтӥллям. «Соперницы» киноын вань курка сюдӥсь пересь пиосмуртэн сцена. Дӥсяськемын тӧдьы айшетэн, йыраз гын шляпаен. Со Чечей — Миколай Романов — Мария Романовналэн песятаез.

— Москваысь куноос ми дорын улыкузы, мон вордӥськоно луи, — азьланьтэ Мария Романовна. — Мынам нимы но московской — Маруся. Италмас ним поныны туртто вылэм, но берло кельшытӥллямтэ ини: гуртысьтымы Италмас апаез ыж лушкамез понна, сюмыс сюлоен жугыса, чыртыяз ыж йыр ошыса, урамтӥ нуллӥллям. Со кадь ыж лушкась луо шуыса, кышкаллям.

Романовъёслэсь семьязэс кулаке поттон вакытэз но Мария Романовна тодаз вае:

— Улон юртмы милям туж бадӟым вал. Песятай колхозэ пырымтэ но, милемыз раскулачить каризы. Кеносэз, валъёсты, дӧдьыосты, куиськон тӥрлыкез нуизы, узыресь шуыса. Раскулачить каремзы бере нош пыд йыламы султӥм, малы ке шуоно атаймы туж ужась вал, но йыркуръяськисьёсыз сюриллям… Ми нош ик ваньбуртэк кылим — коргид укноямы тыл понӥзы. Тазьы ик син азям пуксе на: нэнэ коркась куттэмпыд, йыртэмпол потӥз, бӧрдэ. Милемыз, пиналъёсты, Бака ты доры нуыса кельтӥллям. Нэнэосмы ӵуштаськем ӟегез, муш пуклёосты, ӟазегъёсты поттыса вуттӥзы. Но ур-вар карисьёс ӟазегъёсты лушкаса нуизы, мушъёсты но нуо вылэм ини, Терентей Володя агай адӟемен гинэ, кельтӥллям на. Атаймылэн зарниез но вылэм, лэся. Корка ӝуаку, со корка сиге тубиз зарниезлы, нош Семон агаймы сое, куктӥз кыскыса, васькытӥз — сиге тыл вуэмын вал ини… Ӝуаммы бере юртъермы ӧвӧлэн Пати кенак дорын, атайлэн Митрей братэз дорын улӥмы.

13 аресаз Мария Романовнаез сьӧрло ужаны басьтӥзы. Пересь апаймы ужаз Ижевск — Балезино чугун сюрес лэсьтонын.

— Кыӵе-сыӵе тодмотэм, пеймыт нюлэсэн котыртэм интыын ужамы меда? — али но пайме пересь апай. — Нокыӵе сиыны ярамон турын-куар, емыш ӧз сюрылы. Сьӧрамы нуэм сиёнмы чаляк быриз. 6 иськемын пекарня, пе, вань, но уксёмы ӧвӧл. Валъёслы ваем сезьы кыдэз (жмых) ӵукна котӥськом, нуназе бертӥськом но, 5-6 ведраез таганэ пуктыса, кисаль пӧзьтӥськом. Собере нош ик ужаны кошкиськом. Кин сыӵе сиён пӧзьтыны дышетэм, али но уг тодӥськы. Кыз сулэн липем балаганын улӥмы, со но сисьмемын вал. Вылтӥмы но ву вия, ултӥмы но ву кошке. Ужамы лопаткаосын, киркаосын, нуналаз 3 вагон сюй люкаськом вал. Нокытчы но кошкеммы но, пегӟеммы но уг луы — котькытын сторожъёс пуко. Но пегӟыны быгатӥсьёсыз но вылӥллям — шур вамен, чемоданъёссэс тэльбугоосын кыскаса, пегӟиллям. Нош ми кошкыны ӧм дӥсьтэ.

Трос секытэз чидамез, ужаса фронтлы юрттэмез понна Мария Романовна уно медальёсын пусъемын. Мынам но музъемозь йыбырттэме потэ солы.

________

Анисья Коновалова,

Пичи Пурга ёросысь
Улын Юри школаысь
11-тӥ классын дышетскись

Дышетӥсез
Надежда Семёновна Егорова

Удмурт Дунне
By Удмурт Дунне 20 апреля, 2020 10:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<