Мылкыдзы вуюись кадь

Ангелина Снигирева
By Ангелина Снигирева 6 апреля, 2020 12:26

Кылем арняе Дэри ёросысь Ягул черкогуртын усьтӥськиз выль нылпи сад. Со Ягуллэн выль микрорайоназ — «Радугаын» — ӝутэмын. Выль нылпи садын 80 пиналлы инты луоз.

Ягулысь нылпи садын чус ӧвӧл
Туспуктӥз Андрей Поздеев

Ягул муниципал кылдытэтысь школа борды юнматэмын матысь гуртъёсысь нылпи садъёс но. Соос табере 4 луизы: Ягулын, Русский Вожой но Сокол гуртъёсын, «Радуга» микрорайонын. Ягул котырын вылысьтыз вылаз сямен ӝутско выль ульчаос — коттеджъёсын 
посёлокъёс гинэ 20-лэсь трос. Татчы улыны выжо егит семьяос, нош пиналъёссэс нылпи садэ интыяны уг быгато.

— Ягул поселениын 7 сюрс 600-лэсь трос адями улэ. Соин та нылпи садэз ми туж возьмамы. Али 3 нылпи садэ 229 тэшкылиос ветло. Эшшо 200-лэсь трос пиналъёс черодзэс возьмало, — вераз Ягул школалэн директорез Ирина Ларионова.

Зэмзэ но, «Радуга» микрорайонын улӥсьёс нылпи садэз усьтонэ празднике кадь лыктӥзы. Уго татын 3-5 аресъем тэшкылиос но 
доразы пуко на — нылпи садын интызы ӧвӧл. Нош 80 муртлы удалтӥз — соослэн путёвказы вань ни. Куд-огез медосмотр но ортчыса вуизы. Соос коть ӵуказе ик садэ лыктыны дасесь. Но коронавирус вӧлмемен валче пиналъёсты ӧжыт берлогес кутозы.

Ирина Рейзвих — трос нылпиё анай. Солэн 4 пиналыз. Нырысетӥез школае ветлэ ни, кыкетӥез — Ягулысь нылпи садэ. Эшшо кыкто нылъёссылы путёвка возьмазы 3 но ӝыны ар.

— Песянайёсмы кыдёкын уло. Соин нылпиосты кельтыны нокинэн. Нырысь Сокол гуртысь садэ путёвка сётӥзы вал — отчы 14 иськеме нуоно-ваёно. Сыӵе луонлыкмы ӧвӧл. Ужысь 
кошкон сярысь заявление гожтӥ вал ини. Табере выль уж утчано. Туж шумпотӥсько, кыктоосы нылпи садэ мынозы ни шуыса, — шуэ Ирина.

Выль садикын ваньмыз выль
Туспуктӥз Андрей Поздеев

Выль юрт 1 этажъем гинэ ке но, татын инты тырмыт: группаос вӧл-вӧлэсь, крезьгуръя зал югыт но чебер. Уката ушъяськымон сиён пӧран интызы. Таӵе пӧраськон тӥрлыклы вожъяськозы мукет садъёсысь поваръёс.

— Сиён пӧран инты 8-лы люкемын: бакча сиён юдыны, сӥльлэсь пӧраськыны, чорыглы но мукет. Поварлы дӥсь воштыны гинэ но нимаз сэрег чакламын. Нош сиён дасян висъетын вань электроен ужась таба — отын пыжыны луэ котлет, тефтели. Вань нимысьтыз пароконвектор — таиз пар вылын сиён дасяны чакламын. Нимысьтыз бадӟым пурты — компот пӧзьтыны — бадӟым горшокъёсты ӝутканы кулэ ӧвӧл. Вуж садъёсын плита но пыжиськыны гур гинэ луэ вал. Татын ческыт сиён пӧраны мылкыд уката ӝутскоз, — ужан тӥрлыклы синмаськемзэ маде садысь завхоз Альбина Козина.

К. Русинов

Дэри ёрослэн йырыз Константин Русинов:

— Эшшо 5 садлы проект дасямын. Соосты возьмало Постол черкогуртын, Юськи, Люкшудья, Хохряки, Лудорвай гуртъёсын. Соин нылпи садъёсын интылы шугъяськон сылмоз, 2-3 ар ортчыса гинэ.

Вераны кулэ: Дэри ёросысь трос пиналъёслы нылпи садъёсын инты уг тырмы. Кылем арын черодэ пуктэмын вал 2 сюрс пинал. Берло 2 ар ӵоже 6 нылпи сад ӝутэмын. Озьы 530 пиналлы инты шедиз. Февраль пумын выль нылпи сад усьтӥськиз Дэри черкогуртын, эшшо 3 юрт возьма лицензированилэсь йылпумъяськемзэ. Соку выль интые вамыштозы Изгуртысь, Вуж Чультэм но Хохряки гуртъёсысь пиналъёс. Но югдур сюлмаськытэ на.

Елена Скворцова

Ангелина Снигирева
By Ангелина Снигирева 6 апреля, 2020 12:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<