Лия Малых. Ням-ням! Верос

Удмурт Дунне
By Удмурт Дунне 15 апреля, 2020 11:34
Лия Малых Удмуртиысь Писательёслэн огазеяськонзылэн ёзчиез

Пичи ӟус вылэ шобрет вальыса но йыролтэс (миндэр) поныса, Лиза сузэрзэ, мунёез сямен, отчы выдтӥз но шобрет пумъёсын бинялтӥз. Катя куинь аресаз мынэ ке но, мугорыз чингыр-вангыр, векчи чыртыяз бабыля йырыз гинэ мултэс бадӟым адӟиське. Дыдӥ, ньыль пыдын сяна, ветлыны но уг быгаты ай, йырыз кыске. Сиён тырмымтэен, арес котыраз гинэ пиньяськиз, нош йырпиньёсыз али гинэ потыны ӧдъязы.

Пуклёк вылэ пуксьыса, Лиза ӟусэз пыдесъёсыз вылэ интыяз. Катьтэммем Катя уг пумитъяськы, синвуэн тырмем паськыт синъёсыз гинэ апаез шоры мертчиськизы. Ньылоназ кугӟам бӧрдонэз тани-тани выльысь пӧсьтоз кожаса, Лиза сое лӥятыны выре.

— Кати, ойдо баб на кӧня ке. Мон тонэ веттало, асме но пичи дыръям атай тазьы лэйкатылӥз. Тон яратӥськод ук ӟус вылын кылльыны? Асьмеос ӵемысь озьы шудӥськом. Нош мон тыныд анайлэсь кырӟанзэ кырӟало.

Ӟусэз пыдъёсыныз выретыса, Лиза кырӟан нёртӥз:

— Изь, изь, нуные,

Улмопу сяськае.

Уӵы тыныд кырӟалоз,

Зарни муш чечы ваёз.

Чагыр бурдо бубыли

Йыр улад сяська валёз,

Коньыпиос пашпуысь

Пушмульы бичалозы,

Бичам ческыт тысьёссэс

Бур кисыяд понозы…

Ческыт тысь сярысь кылыса, Катилэн бӧрдонэз нош ӧръяськиз. Сузэреныз ӵош Лиза но куараен вузыны ӧдъяз.

— А-а-а, ба-аб, ба-аб шуисько. — Катялэсь йырзэ поромытыны турттыса, Лиза ӟусэз тур-пар кыска, пумен сузэрзэ усемлэсь возе.

Но ӝоген пыдъёсыз секытомизы кадь. Ӟусэз пуктыса, Катяез бордаз ӟыгыртӥз но кӧня ке пол корка кузя ортчиз. Но ӟигарыз кемалы ӧз тырмы, бӧрдӥсь сузэрзэ валес вылэ выдтӥз. Сӥяны вуттэм гурын пукись чайникысь турын-куар парем вуэз кружкае лэзиз но, кӧня ке ачиз юыса, Катилы сётӥз. Нылок кружкаез ымдораз вуттӥз вал но, вуэн тордэм кӧтыз таӵе пӧетлы пумит луиз. Кружкаез, Лиза киысь кыскыса, зӥрак выж вылэ сэрпалтӥз.

— Кати, пичие, кӧня ке чида! Ӝоген анай вуоз но чечым пыжос лэсьтоз, — кружкаез ӝутыса, синву пыр буйгатыны выре Лиза сузэрзэ. Нош нылок номыре уг кылы, уг адӟы, гуньдылыса, гуньдылыса чир! кесяське. Тани-тани шоканэз пытсаськоз кадь.

Куалектэменыз Лизалэн пыдессинъёсыз ик юскиськизы, ньыльпыдъяськыса гур сьӧры мынӥз но, канаез усьтыса, пыдлось банкае ватэм бинетэз поттӥз. Пертчыны дӥсьтытэк, кӧня ке кияз бергатӥз. Собере, синвуосыныз ӵош виясь зырымзэ плаття сӧзулыныз ӵушылыса, Катя доры вамыштӥз.

— Кати, ме ням-ням, ме нянь! — сузэрезлэн ки бордаз йӧтскиз Лиза.

Нянь кыллэсь Кати шуак чалмытскиз, викышъянзэ ньылыны турттыса, пичи чиньыосыныз апаезлэн кияз ӝабырскиз но ым дораз кыскиз.

— Ой-ой, чиньыосме куртчод! — Лиза куасьтэм нянь турижез Катялэн кияз сётӥз. — Возьма, ву ваё, отчы веттылыса, сукари ӝог небӟоз.

Лиза ачиз турттэ вал нянез вуэ веттылыны, но Кати сокем зол кырмиськиз сиён борды, чиньыосыз ик лызэктӥзы.

— Мыням, уг сётьы!

— Эн кышка, уг басьты… Соку ачид котты.

Кати дӥсьтытэк учкиз Лизалэн синъёсаз, кружка шоры, собере куасьмем нянез вуэ месӥз. Потэн суро пыжем нянез солэн вуэ веттылыса сиемез вань, анаез ӵемысь озьы сюдылэ.

Лизалэн дыльдыез шыр вия, Кати шоры учкыса. Синъёссэ воштыны турттэ ке но, соос асьсэос мертчыло нянь шоры. Нош Кати со куспын кружка пыдэсысь вуэз ымаз виятӥз но чиньыосыныз пушказ зымиз. Бугыръяськем карыса, ки бордаз лякиськем пырыосты кылыныз нюлӥз. Собере, кружкаез Лизалы мычыса, куриз:

— Ням-ням! Вай нянь.

— Нянь быриз, ӧвӧл, — киоссэ вӧлъяса, валэктӥз Лиза.

Кати нош ик кружкае
пыриз, выльысь но выльысь чиньыоссэ нюлӥз.

Сузэрез буйгамысь Лиза шумпотӥз, соин валче пушказ йыркурез бугырскиз.

— Мон со нянез атай понна вози. Сӥзьылысен. Кӧня пол киям кутылӥ, зынъяй. Ӧй сиы, чидай. Атай войнаысь кӧтыз сюмаса бертоз, маин табере куно каром сое?

Кати паймыса учкиз Лиза шоры, кружкаез пушкы… Чиньыеныз нянь пырыез поттыса мычиз:

— Изя, ме.

Куать аресъем Лиза пӧсьвуаськиз кадь, бамъёсыз ӵыжектӥзы. Анайзы быдэс нуналлы сиён дасяса кельтӥз вал, нош со Катилэсь но пайзэ гумыльтӥз…

* * *

Нуназезэ сюдыса, Лиза сузэрзэ кӧлыны выдтылэ. Тол ӵоже лябӟем Кати котьку кема изьылӥз, со куспын нылаш куддыр ульчае но потаз. Кыдёке ӧз кошкылы, корка вӧзазы люкаськем лымы гурезьын нискылаз. Одӥг-ог Оги песянайлэн Лизалэсь кык ареслы пичигес Аня нуныкаез соин ӵош шудылӥз.

Анялэсь мумызэ нюлэс коранэ ыстӥзы, кык но ньыль аресъем пиналъёссэ чаклаз Оги песянай. Нош Лизалэн но Катилэн анайзы кӧня ке мурт понна фермаын тыршиз — пичи пиналыз вань шуыса, палэнэ ӧз келялэ. Утиськись луиз Лиза. Ужан висказ анайзы ӝогак гинэ вуылӥз нылъёссэ чакланы. Куддыр Оги песянай, бодыез вылэ пыкъяськыса, поталляз: ваньмыз-а, пе, умой тӥляд, нуныосы.

Нош туннэ анайзы уж висказ колхоз бусые ветлоно кариськиз: оло, пе, кын картофка шедьто на. Катиез Оги песянайлы кельтыса, арнянуналэ Лиза но анаеныз ӵош кема гинэ бугыръяськиз картофка мерттэм бервылын. Ӝыны ведра пала шедьтӥзы. Шунаны кутскем музъем вылтӥ ветлыса, Лизалэн бинялтонэн кутэз быдэсак котмиз, пыдэсаз юнматэм пул но ӧз юртты. Гуртэ со ӟонгыраса вуиз. Ярам, Оги песянай мунчозэ эстэм, отын шунскизы, веник чот ньылпу вайёсын париськизы, лысъёслэсь парем вуэз чай интые юизы. Кынмизы ке но, висён бордазы ӧз лякиськы. Со понна, пешник, пушнер но мукет вож турын потытозь, ма но со куртчонзы луоз.

Кати умме усем бере Лиза басмалэсь лэсьтэм мунёосты кияз кутӥз вал но, шудонэз иназ ӧз мыны. Синмыз весь мертчылӥз ӝӧк вылысь тэркые. Отын кык пыжос кылле — Катилы кельтэмын. Аслэсьтыз со нуназе ик гумыль-гамыль ньылӥз Кати адӟымтэ дыръя. Ӧз чида. Потэн суро ӟег нянь бере макем ческыт вал! Гордкушманлэн но ӵужкушманлэн куасьтэм куаръёссылэсь пӧзьтэм шыдын гинэ но со пот кидыс!

Лиза интыысьтыз султӥз но ӝӧк доры вамыштӥз. Ӟег пызьын ӧжытак погылляса пыжем сиён шуэ кадь солы: «Учкы, кыӵе мон ческыт!» Нылаш одӥгзэ пыжосэз пичильтык тӥялтӥз но ымаз понӥз. Собере эшшо но эшшо тӥялтӥз. Кӧлӥсь Кати шоры учкыса, кыкетӥ пыжос борды басьтӥськиз. Ӝынызэ сиемез бере гинэ дугдыны быгатӥз. Умойтэм ужамзэ валаса, ассэ шонере поттыны турттӥз: «Со картофка понна кӧня мон кынми, жади! Нош Катилы кык-куинь пол куртчемен но тырмоз, турын парем ву сёто на, отӥяз анай бертоз». Нош шузи-мази сузэрез, ӧч карем кадь, кема ик ӧз кӧлы, бӧрдыса сайказ. Ярам, ватосэз вал. Табере Кати, сое жалям карыса, нянь пырызэ сётэ. Лизалэн кӧтӝожез соку ик вунӥз.

— Эх, шузи-мазие тон мынам! — сузэрзэ бордаз ӟыгыртӥз но чупаз. — Ачид си, тыныд будыны но юнманы кулэ, Катёна. Атай тонэ гожтэтъёсаз озьы нима. Солэн тонэ ноку адӟемез ӧвӧл, войнае кошкыкуз, тон анайлэн кӧтаз вал. Озьы ке но монэ кадь ик яратэ. Мон но тонэ яратӥсько. Возьма, атайлэсь гожтэтсэ куто! Лиза шыкысысь, гожтэтэз поттӥз но, букваос вылтӥ чиньыеныз нуллыса, Катилы валэктӥз: — Тани учкы, ма гожтэм атай. Туж, пе, зол мӧзмисько тынэсьтыд, Тася, нылъёсмылэсь Лизалэсь но Катёналэсь. Вань тушмонъёсты улляло но берто. Эшшо гожтэм на: Лиза, нылы, тон бадӟым табере, уть пичи сузэрдэ. Лиза мур-мур лулӟиз: — Нош мон… Гужем вуиз ке, трос-трос узы-боры бичало мон тыныд, Кати, пыд вылад гинэ ӝоггес султы! Атаймылы со тужгес бадӟым кузьым луоз.

Кати валес вылысь васькиз но каллен-каллен азьлань вамыштӥз. Солэн ымныраз ӝужаз пальышан.

Удмурт Дунне
By Удмурт Дунне 15 апреля, 2020 11:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<