Липеттэк кезьыт

Ангелина Снигирева
By Ангелина Снигирева 6 апреля, 2020 15:44

Шаерамы 4 сюрс 374 сирота пинал лыдъяське, 758-эзлэн анай-атаез кулэмын. Кунлэсь юрт басьтыны шорлыдын ог 7-8 ар возьмано луо.

Удмуртиысь 4 сюрс 549 сирота возьма юрт
Туспуктӥз Максим Егоров

Квартира интые — сертификат?

Анай-атайтэк кылем нылпиос берло дыре пӧртэм ведомствоос кие выжылӥзы ни. Юрт висъян сярысь сюлмаськонэн нырысь выриз Дышетонъя но наукая министерство. Отӥяз та ужпум усиз Лэсьтӥськонъя, ЖКХ-я но энергетикая министерство вылэ. Туэ январьысен, та министерстволы сяна, сирота нылпиослы юрттон оскемын на Калыкез улон-вылонын утён политикая но ужъя министерстволы. Но арысь аре улон сэрег висъянын югдур секытоме но секытоме.

Юртлы черодэ сирота нылпиос султо 14 аресысенызы. Квартира басьтыны правозы кылдэ 18 аресысенызы. Но быдэ вуэмзы бере соос ураметӥ кема костаськоно луо на. Кылсярысь, 2017-тӥ арын 3 сюрс 140 быдэ вуэм мурт юртлы черодын лыдъяськиз. Россия Федерацилэн но Удмурт Элькунлэн бюджетъёсысьтызы 286 миллион манет висъямен, 186 адямилы корка пырон ортчытыны шуд усиз. Кылем арын бюджетъёсысь 300 миллион манет висъяськиз ке но, 61 сироталы сяна юрт басьтыны ӧз кылды. Кун Кенеш бордысь Эскеронъя кун комитетысь специалистъёс пусъемъя, Лэсьтӥськонъя, ЖКХ-я но энергетикая министерство висъям коньдонэз быдэсак кутыны ӧз быгаты — сомында юрт пуктыны дась ӧй вал. Соин ик 140 миллион манетэз выльысь федерал центре берыктоно луиз.

Шаерысьтымы 18 арессэс тырмытэм вань сирота нылпиослы липет висъян понна туннэ кулэ ог 4 миллиард манет. Законъя 23 аресозь сироталы одно ик квартира сётыны кулэ. Солэн быдӟалаез 
ог 36 квадрат метр луыны кулэ. Сьӧд риелторъёслы квартираоссэс медаз вузалэ шуыса, нылпиослы 2013-тӥ арысен социальной найм амалэн сэрег висъяны кутскизы. Озьы 5 ар ӵоже адями отын улыны быгатэ, но сое вузаны алэмын. 5 ар ӵоже егит муртэ чакласа возё: шедьтӥз-а уж, визь пыриз-а? Та адямилы юртэз оскыны вазь на шуыса валало ке, социальной наймъя огкылэз эшшо 5 арлы кузёмыто.

А. Муталенко

Правительстволэн Тӧроезлэн воштӥсез Анастасия Муталенко:

— Анай-атайёссылэсь талам куд-ог нылпиослэн я сиротаослэн 
юртсы вань ни — вордскем дырысенызы сыӵе правозы кылдэмын. Но детдомын дыръязы юртсэс нокин уг чакла, со аналме. Табере 
социально-реабилитационной центръёсын кылдытомы юристъёслэсь но специалистъёслэсь ёззэс, соос юртъёсты утён сярысь сюлмаськозы. 18 аресъем пинал аслаз корказ берытскыны мед быгатоз шуыса яке 
долязэ берыктыны мед пӧрмытоз шуыса, ваньзэ лэсьтозы.

Но туннэ шаерамы сиротаослы висъяны тупамон юртъёс уг пуктӥсько, шуыны луоз. Правительстволэн Тӧроезлэн воштӥсез Анастасия Муталенко пусъемъя, туннэ рынокысь 1 комнатаем тупась квартира шедьтыны секыт. 2019-тӥ арысен бюджет уг быгаты долевой строительствое пыриськыны. Соин но вань коньдонэз кутыны ӧм быгатэ, шуэ А. Муталенко. Али Лэсьтӥськонъя, ЖКХ-я но энергетикая министерство районъёсын валче ужаны малпа, межевание лэсьтэ, озьы сиротаослы тросгес коркаос пуктыны луоз. Со сяна, министерство ӧдъя бюджет удысын ужасьёс, аварийной коркаосы кылемъёс понна нимысьтыз юртъёс ӝутыны, отын ик сиротаослы 
квартираос луозы.

— Туннэ Россиын, квартира интые, квартиралы сертификат 
сётон сярысь верасько. Банк пыр сирота ачиз квартира басьтыны быгатоз, сыӵе дыръя вуж юртъёсысь но сэрегъёс яралозы. Таӵе амал югдурысь потыны юрттысал, — шуэ Анастасия Александровна.

Семьялэсь ӟечез ӧвӧл

Алнаш ёросысь нылпи юртэз туэ февраль толэзе ворсазы. Калыкез улон-вылонын утён политикая но ужъя министерствоысь семья но нылпи ужпумъёсъя управлениен кивалтӥсь Светлана Корепанова пусъемъя, отысь 28 нылпиосты городъёслы матэгес детдомъёсы выжтӥзы. Азьланяз мукет нылпи юртъёсты но огазеян-юнматон сярысь ужпум сылэ.

— Нылпиез анай-атайёсыз борды кельтон яке мурт семьяе сётон бордын ужаськомы, — шуэ Светлана Александровна. — Озьы солэн йыр вадьсаз аслаз шуныт липетэз, ӵуказелы осконэз луэ. Нылпи но тазагес будэ. Детдоме сюрем нылпи угось юртысь долязэ но ӵемысь пумен ыштэ, коркаез но чаклатэк сисьме, быре. 
Шумпотымон, куд-ог кышномуртъёслы но пиосмуртъёслы нылпилэн улон интыез воксё нокыӵе уг йӧты — соос дась котькинэ семьяязы басьтыны. Туннэ пиналэз асьсэлы кутыны дась 170 мурт. Зэм, ваньмызлы сямен 3 аресозь пичиос кулэ.

Туннэ Алнаш ёросын семьяосы басьтэмын 97 пинал. Та пӧлысь юртлы черодын 23 аресозь нылпиос 41 кузя, 23 арессэс ортчемъёс 16 лыдъясько.

Алнаш ёросын учётэ басьтэм сирота нылпиослы социальной найм амалэн квартира берлозэ 2014-тӥ арын ёрослэсь палэнын сётэмын.

— Ёросамы сиротаослы юртъёс уг пуктӥсько. Соин ик Можга ёросысь Сибы гуртын 30 квартираем юрт лэсьтыкузы, милям 2 сиротаосмылы но отчы быдэн сэрег висъязы. Вань сиротаосты одӥг липет улэ интыян выльысь детдоме сюрон кадь луиз, зэм, воспитательёстэк. Ог-огзэс качало, куд-огез юо. Сибыын ужаны нокытын. Нылпиос асьсэос но кӧня пол вераллязы: огазе эн интыялэ, гуысьтымы потыны ум быгатэ, вӧзамы умой семьяос улӥзы ке, ми но умойгес луыны тыршом. Но соосты кылӥсь ӧй вал — квартира сёто ке, басьтэ шуэм кадь. Сертификат сётӥзы ке, трослы каньылгес луоз, шуо. Одӥг муртлы коть 2 сертификат мед сётозы но, уксё ӧз луы ке, бумагаен мар карозы? — шуэ Алнаш ёрос администрациысь семья ужпумъёсъя управлениен кивал­тӥсь Ольга Краснова.

Уждун быдӟа пособие

Камбаркаысь Евгений Чикуровлы тани-тани 23 арес тырмоз. Юрт мед висъялозы шуыса, со кӧня ке пол суд пыр ортчиз ни. Москваысь кун университетын дышетскон висказ но судэ берталля. Но Камбаркаын юрт ӧвӧл, шуо.

— 2003-тӥ арын милемыз, 3 нылпиосты, анай-атаймылэсь люкизы, соослэсь мумы-бубы луон правозэс талазы. Агае 2 ар талэсь азьло кулӥз, квартирае пырытэк ик кылиз — эпилепсиен висе вал. Апаелы 30 арес. Солы ас вакытаз вашкала баракын укнотэм сэрег висъязы. Ярам, али пиосмуртэн паръяськиз, соин ӵош Ижысь студиын уло.

Ачим кадь тодмоосыным вераськисько. Квартиралы 6-8 ар черодзэс возьмано луо. Улон инты дырыз дыръя уг сёто ке, кун аренда понна компенсация тырыны кулэ, шуо. Но милемлы сое нокин уг висъя. Кин но со шуэ: анай-атаед, ӵыжы-выжыед вань, мар судъёстӥ ветлӥськод, берт доразы. Но детдомын 10 ар улытозям, анае огпол гинэ жингыртӥз. Нош табере квартира понна нюръяськыны кутски но, родняос потӥзы. Кытын соос азьло вал?!

Мон кадьёс понна кун умой сюлмаське. Вузэ пырем бе­ре дӥсяськыны, сиськыны то­лэзьлы быдэ 20 сюрс манет пособие тыро. Мон эшшо умой ды­шетскисько на, озьыен, ака­­демической но социальной стипендиос басьтӥсько — оглом 11 сюрс манет. Куд-огезлэн уждунэз но со быдӟа уг люкаськы. Юрт висъян ужпум капчиенгес сётӥськысал ке, воксё умой луысал.

Елена Сараматова

Ангелина Снигирева
By Ангелина Снигирева 6 апреля, 2020 15:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<