Кыӵе ож сярысь кырӟа артист?

Удмурт Дунне
By Удмурт Дунне 3 апреля, 2020 13:36

Быдӟым Вормонлы 75 ар тырмон аре «Мынам Удмуртие» радиолэн шыкысэз 28 выль кырӟанэн узырмиз. Вордскем музъеммес данъясь, Быдӟым Атыкай ожез тодэ вайытӥсь, калыклэн кужымезлы сӥзем кырӟанъёс ыстэмын вал «Быдӟым Вормонлы сӥзисько» вожвылъяськонэ.


Пичи Пурга ёросысь Вуж Мӧньяысь «Мылкыд» ансамбль
яраз радио кылзӥсьёслы
2020-тӥ ар 2-тӥ оштолэзь
«Малопургинский Дом культуры» огинлэн «ВКонтакте» бамысьтыз

Конкурслы йылпумъянъёс лэсьтэмын вал меӵак эфирын 28-тӥ южтолэзе. Эфирын конкурслэн финалаз потэм кырӟанъёс чузъяськизы. Кылзӥсьёс, куара сётыса, асьсэлэсь мылкыдзэс веразы. Калыклы золгес яраз Пичи Пурга ёросысь Вуж Мӧнья гуртысь «Мылкыд» ансамбльлэн «Бугрес аръёс» кырӟанэз (кылъёсыз Надежда Фёдоровалэн, крезьгурез Фаина Ивановалэн).

Нош вормисьёсты бырйиз жюри: Удмуртиысь Крезьгурчиослэн огазеяськонзылэн тӧроез Марина Ходырева, «Италмас» ансамбльлэн хормейстерез Семён Байкузин, Удмуртиысь калык артистка Валентина Пудова, кылбурчи но литературовед Виктор Шибанов, кылбурчи но «Удмурт дунне» газетысь корреспондент Анастасия Шумилова. Соос котькуд кырӟанлэсь пуштроссэ, крезьгурзэ, артистлэсь яке ансамбльлэсь кырӟамзэс, кырӟанэз йылаз-пумаз вуттэмез дунъязы. Куд-ог артистъёс кырӟанзэс студиын гожтӥзы, профессиональной аранжировка дасязы. Ёросъёсысь ансамбльёс арган шудэм улсын кырӟазы, вал крезьгуртэк гожтэм кырӟанъёс но. Куд-ог кырӟанъёсын классикъёслэн (Николай Байтеряковлэн, Иосиф Бобровлэн, Илья Зоринлэн) чуръёссы чузъяськизы. Крезьгурчиос туала вакытысь тодмо поэтъёслэсь (Алексей Ельцовлэсь, Любовь Ганьковалэсь, Любовь Тихоновалэсь, Владимир Михайловлэсь, Зинаида Рябининалэсь но мукетъёсызлэсь) кылбуръёссэс но кырӟанъёслы пӧрмытӥзы. Конкурсэ пыриськизы ёросъёсысь самодеятельной кылбурчиос но.

3-тӥ интые потӥз Удмуртиысь калык артистлэн Геннадий Кузнецовлэн «Синкылиен дурем вормон» кырӟанэз (кылъёсыз Любовь Тихоновалэн, крезьгурез Геннадий Кузнецовлэн). Азвесен пусъемын Глазов ёросысь Юрий Князевлэн «Мон берто, анай» кырӟанэз (кылъёсыз Валентина Васильевалэн, крезьгурез Юрий Князевлэн). Нош устоез кырӟан Удмуртиысь калык артистлэн Геннадий Бекмановлэн «Медаз быр куара» кырӟанэз (кылъёсыз Зинаида Рябининалэн, крезьгурез Геннадий Бекмановлэн).

— Туж шумпотӥськом, конкурсамы трос адями пыриськиз шуыса, — вера «Мынам Удмуртие» телерадиокомпаниысь журналист, конкурсэз радъясь Светлана Белых. — Ог 40 заявка вуиз, пӧлысьтызы устооссэ бырйим, соосты ини жюри но кылзӥсьёс дунъязы. Быдӟым ож сярысь кырӟан гожтыны егитъёслы, оло, шуггес ик вал, но егит артистъёс но пыриськизы. Шуом, Алина Антоновалэсь чебер кырӟанзэ кылзыса, егитъёслы та тема матынгес потоз, оло, озьы соос вормонлэсь дунзэ шӧдыны быгатозы. Куд-ог кырӟанъёс калыкын дауръёсын улэм кырӟанъёслы матын луо, кылсярысь, Алнашысь 87 аресъем Капиталина Мартыновалэн «Ум вунэтэ» кырӟанэз. Финалэ потэм вань кырӟанъёс фонотекамес узырмытӥзы, ужпуммес быдэстӥм — патриотической мылкыдын удмурт кырӟанъёс тросгес луизы.

Конкурсэ ыстэм тросэз кырӟанъёс сӥземын вал Быдӟым Атыкай ожын бырем солдатъёслы, пиоссэс фронтысь витем анайёслы, ожын но ужын подвиг лэсьтэмъёслы. Мукет ож сярысь кырӟанэз пӧрмиз вормисьлэн
Геннадий Бекмановлэн —кырӟанзэ со анай кылзы понна нюръяськисьёслы сӥзиз.

— Ожын валамон вал, кин тушмон, кинэн нюръяськоно. Нош али асьмеос ик асьмелы тушмон луиськом, кылмес ум утиське ке. Асэныд нюръяськоно луэ, — вера Геннадий Иванович. — Берло дыре сюлэм висе, калыкмы но кылмы быре шуыса. Анай кылзы понна нюръяськыны дась пӧртэм вакытысь батыръёслы: Кузебай Гердлы, Ашальчи Окилы, Альберт Разинлы но мукетъёсызлы — кырӟанме сӥзи.

«Кинлы кулэ каргам война» кырӟанэн конкурсэ пыриськиз Ижысь Ольга Перевозчикова. Вормисьёс пӧлы ӧз ке но сюры, кырӟанзэ калык вылӥ дунъяз.

— Кырӟанлэн гурез кылем арын вордӥськиз ини, — вера О. Перевозчикова. — «Мынам Удмуртие» радио, таӵе конкурс ялыса, кузьым лэсьтӥз кадь — кылбур гожтыны муг кылдӥз. Милям, кырӟасьёслэн но авторъёслэн, туж потэ на конкурсэз радъясьёслэсь, жюрилэсь мылкыдзэс, ӵектонъёссэс кылэммы.

Конкурслэн финалаз потэм кырӟанъёс «Мынам Удмуртие» радиолэн эфираз чузъяськылозы. Вормон Нуналэ вань та кырӟанъёсты лумбыт кылзыны луоз. Кырӟанъёс поттэмын конкурслэн «ВКонтакте» вотэс бамаз, текстъёсты озьы ик печатлалом 16-тӥ оштолэзе потӥсь газетамы.

Анастасия Шумилова

Удмурт Дунне
By Удмурт Дунне 3 апреля, 2020 13:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<