Кызьы юрттӥсько волонтёръёс?

Удмурт Дунне
By Удмурт Дунне 1 апреля, 2020 18:20

Удмуртиысь «Калык фронтлэн» штабаз огыр-бугыр. Берпуметӥ арняосы татын ужало волонтёръёс, соос юртто гуртазы пукись пересьёслы но инвалидъёслы: магазинэ, аптекае ветло. Волонтёръёслэсь ужзэс мон но ас вылам эскери.

Волотёръёс басьясько
Туспуктӥз Максим Егоров

Пыр-поч валэкто

Штабе пыреме бере ик киме антисептикен пазязы, температураме мертазы. Тазьы татын пумитало котькуд волонтёрез. Сёто на маска но резина перчатки — пересьёс дортӥ соостэк ветлыны уг яра.

Ижысь индустриальной техникумысь студенткаос Лера но Катя, мон кадь ик, туннэ нырысьсэ «Мы вместе» проектэ пырисько.

— Маин ке юрттыны быгатӥськомы бере, малы юнме гуртын пукомы шуыса малпамы но мывместе2020.рф сайтэ заявкамес кельтӥмы, — верало нылъёс. — Отын пӧртэм удысъёсы волонтёръёсты бичало: кин ке психологической, кин ке юридической консультациос сётыны мылкыд каре, но милям солы дышетскеммы ӧвӧл бере, ми пересьёслы юрттонэз бырйимы.

Соосын ӵош мон но пичи дышетскон пыр ортчи.

— Маскадэс но перчаткидэс эн кыльылэ, сиён-юон басьтыны пыриды ке, перчаткидэс но басьяськон корзиналэсь кутонъёссэ антисептикен ӵушылэ, — ваньзэ пыр-поч валэктӥз Удмуртиысь «Калык фронтын» егитъёсын ужась Дарья Байраншина. — Пересьёслы 1-2 метрлэсь матэ эн султэ, пакетъёстэс муз вылэ пуктэ яке ӧс кутэтэ оше. Коньдонэз но гольык ки эн кутылэ.

Дарья Байраншина вань еж волонтёръёсын ужа, нырысетӥ заявказэс быдэстыны соосын ӵош ачиз пота. Озьы ми Дарьялэн машинаяз пуксимы но Ижысь Кунгурцев ульчае вырӟимы — Светлана Петровна Дарницкаялы творог, сӥль, пызь, маска но перчатки ваёно!

Ӵемысь ӵапак таӵе огшоры арбериосты ик куро, пе. Но маскаосты шедьтыны туж секыт. Соин ик телефон пыр заявкаосты эскерись волонтёръёс аптекаосы жингыръяло, тодо, кытын маскаос вань. Куддыр 5 маска понна (солэсь трос одӥг кие уг вузало) городлэн мукет пумаз ветлоно луэ…

— Зэмзэ ке, мар но уг куро, — сюрес вылын мыныкумы ини, вера Дарья. — Тани кылем арняе Дэри ёросэ кечъёслы сиён нуимы, туннэ кышномурт инвалид картэзлы дартс но Рубиклэсь кубиксэ куриз. Али вань магазинъёс уг ужало бере, утчаськыса ветлоно луиз ик. Тамак но вина ум нуллӥське. Ми тазалык понна!

Волонтёръёс одӥген уг ветло, пе, тыршо нылъёсты но пиосты паръяны: мешокъёсын картошка, пызь, сакыр нылъёслы секыт нуллыны. Но, жаляса верано, волонтёръёс пӧлысь уноез ӵапак нылъёс.

Пӧяськисьёслэсь утёз код

Дарья ик вераз, волонтёр кариськыса, коркась корка пӧяськисьёс но ветлыны кутскиллям ини шуыса. Кылем арня пумын Воткинскысь пенсионеръёс доры егит муртъёс вуиллям, шуиллям: «Ми магазинэ сиён-юон дуре поталомы, мар тӥледлы кулэ?» Арлыдоос, соослы оскыса, коньдонзэс сётӥллям, созэ-тазэ басьтыны куриллям. Нош егитъёс коньдонэн валче ышиллям.

Таӵе учыръёсы сак кариськоно, тодын возёно: волонтёръёс озьы уг ветло. Заявка штабе вуэм бере пересь муртэн одно ик телефон пыр герӟасько, пыр-поч юаллясько, мар кулэ, со сяна, 4 яке 5 числоен код верало. Сое волонтёръёс гинэ тодо. Соин ик егитъёслы ӧсэз усьтон азьын со кодэз юаны керпотоно ӧвӧл.

Магазинъёсын но аптекаосын волонтёръёс бичасько фондысь коньдонэн. Товарен ӵош вань чекъёсты ваё. Собере гинэ песянай-песятайёслэсь коньдон куро.

Ӝог вуиды!

Вераськыса пумен Кунгурцев ульчае вуимы, татысь аптекае но магазинэ гинэ пыраны кылиз на. Ваньзэ каримы озьы, кызьы дышетӥзы: перчаткиосмес но корзина кутэтэз антисептикен зырамы. Шорамы кырыж учкись муртъёс ӧй вал. Магазинын вуз карисьёс маскаосын ужало, тросэз басьяськисьёс но, ми сямен ик, маскаосын ветло. Ваньзы валало секыт югдурез, тазалыксы понна сюлмасько.

Волонтёръёс С. Дарницкаялы сӥён-юон басьтыса ваизы
Туспуктӥз Максим Егоров

Магазинысь потӥмы но — егит семьяос пиналъёсынызы калго, школьникъёс, ӟус вылын пукыса, телефонэнызы шудо. Таосыз ужантэм нуналъёсты, гуртын пукыса, ортчытыны уг но малпало, лэся…

Кошкимы маска но перчатки утчаны, милемлы удалтӥз — аптекаын ваньмыз вал. Ми дась Светлана Петровна доры мыныны!

Домофонэ жингыртон азьын нош ик эскеримы, ваньзэ-а басьтӥмы. Вань чекъёсмес туспуктӥмы, угось быдэстэм ужмы сярысь отчёт Москвае келяно.

Светлана Петровна милемыз возьма ни вал. Пумитамы бахилыосын, перчаткиосын потӥз.

— Ӝог вуиды, — паймиз со. — Умой, таӵе луонлык вань шуыса. Мынам тани маскаосы, перчаткиосы быризы, улӥсько огнам, егит ӧвӧл ни, соин ик кышкасько педло потаны. Тани тӥ мыным ваньзэ басьтӥды, табере маскаеныды но перчаткиеныды магазинэ ачим потаны быгато ни.

Тау каремез бере Светлана Петровна юаз на: «Нош тӥледлы тазьы ветлэмды понна мар ке тыро-а?» Волонтёръёслэсь ӵем озьы юало, валэктон одӥг — уг. Мар понна, иське, ужало? Ас мылкыдзы понна. Подъездысь бурдъяськыса ик потӥськод: мон ӟеч уж лэсьтӥ, кинлэсь ке тазалыксэ ути. Табере ӝоггес штабе мынэм потэ: выль заявка борды басьтӥськыны дась!

Меӵак вазиськоно

Али Россилэн тросаз улосъёсаз самоизоляция режим ялэмын, соин ик «Мы вместе» проектлэн порталаз трос вазиськонъёс быдэс странаысь вуо, дырыз дыръя валэктонъёс ваньзылы сётыны ик уг вутто.

Волонтёръёс доры вазисььконъёс трос вуо
Туспуктӥз Максим Егоров

— Жингыртӥ вал проектлэн федеральной номерезъя, — вераз милемлы Светлана Дарницкая но, — 15 минут пала витьыны косӥзы. Укыр кема потӥз. Собере вотэсысь адӟи, Удмуртиысь штабе но меӵак вазиськыны луэ шуыса 8 (3412) 655-007 номеръя.

Волонтёр луон понна заявкаме мывместе2020.рф порталэ пятницае кельтӥ, понедельнике ужаны ӧтизы ни. Но волонтёре ваньзэс уг куто. Мылкыд карисьёс 16-50 аресъемесь луыны кулэ. Со сяна, одно ик эскеро тазалыкез: ӧвӧл-а коронавируслэн симптомъёсыз, ты висёнъёсын курадӟылэмез.

Мария Емельянова

Удмурт Дунне
By Удмурт Дунне 1 апреля, 2020 18:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<