Кинлы оскиз Герд?

Удмурт Дунне
By Удмурт Дунне 5 апреля, 2020 12:27

«Ой, тырос ук, ой, уно ук удмуртлэн куректонэз»

Литературовед Фома Ермаков быдэс улонзэ сӥзиз Кузебай Гердлэсь улонзэ но творчествозэ эскеронлы. Но тросэз-а лыдӟизы солэсь ужъёссэ? Дэмласьком Россиысь радио пыр 1999-тӥ арын ӟуч кылын чузъяськем интервьюысь люкетъёсты. Фома Ермаковен вераське писатель Николай Кузнецов.

Н. Кузнецов но Ф. Ермаков пиналъёслы
К. Герд сярысь мадё.

— Кузебай Гердлэн улонэз маин ке укша Христослэн ортчем сюресэзлы. Сыӵе ик лякыт, матысьёсыз сярысь сюлмаськись, аслэсьтыз уло­нзэ калыкезлы сётӥсь. Кыӵе со вал?

— Удмурт калыклэн дано пиез К. Герд туж ӧжыт улӥз — 39 ар. Со пӧлысь 5 арзэ Соловкиын лагерьын пукиз. Озьыен, ужаны солы 14-15 ар гинэ кылдӥз. Но со куспын сомында лэсьтӥз! Печатлам ужъёссэ гинэ верано ке — ӟуч но удмурт кылъёсын 439 кылбур, 14 поэма, пӧртэм статьяос. Жаль, 3 сборникез ышемын. Со сяна, пыраклы ыштэмын «Улонлэн пыртӥз» романэз, 100-лэсь трос научной ужъёсыз, куд-ог мукет гожъямъёсыз. Этнологияя но калык творчествоя диссертацизэ со 3 ар ӵоже гожтӥз… Огшоры адямилы сомында лэсьтон понна 100 ар но уз тырмы.

К. Герд зол выриз этнографиен, фольклористикаен. Юнме-а ГДР-ысь академилэн вице-президентэз, академик Вольфган Штейниц шуиз: мадькылъёсты, загадкаосты эскерон борды басьтӥськись котькуд адямилы одно лыдӟоно К. Гердлэсь ужъёссэ. Уката ик со ужъёс печатламын ни немец, фин, венгер кылъёсын но. К. Герд усьтӥз загадкалэсь мур пуштроссэ но солэсь егитъёсты будэтонын интызэ. Со ачиз но дышетӥсь, калыкез югдытӥсь вал. Нош кӧня со учебникъёс дасяз: география, геометрия, природоведение… — ваньмыз удмурт кылын.

— Евангелиын вань«О сеятеле» притча. Тросэз визьмо адямиос асьсэ творчествоязы со притча котырын бергало. Шӧдӥське, К. Герд но Библиен тодмо вал шуыса. Солэн творчествояз кизён тема ӵем гинэ пумиськылэ.

— Та темая солэн 8 кылбурез. К. Герд Кукаркаысь дышетӥсьёсты дасясь семинариын дышетскиз (1912-тӥ-1916-тӥ аръёсы). Нош отын, математикалы но мукет наукаослы сяна, визьнодазы сад будэтыны, сяська мерттыны. Крезьгуръя урокъёсын калык инструментъёсты ортчизы, фор­тепьяноен, мукет инструментъёсын шудӥзы. Нош суббота, арнянуналъёсы ваньзы черкын кырӟазы. Бен, Библиез но дышето вал. Но, малпасько, К. Герд Библиен тодмо вал ини азьвылгес. Вавожын дышетскыкуз, со быдэс толэзь улӥз поплэн нылыз Анна Меньшикова дорын. Нош солэн 4 агайёсыз пӧлысь 3-ез духовной академиез йылпумъямын вал, одӥгез врач луыса ужаз. Озьы К. Герд пичи дырысеныз ик оскон сярысь трос тодӥз.

Но со дыре ик со туж туала вал. А. Меньшиковалэн одӥгез агаез дышетӥз К. Гердэз крокетэн шудыны. Крокет — со Европаысь вуэм шудон. Кукаркаын дышетскыкуз ини, К. Герд та шудонэн эшъёссэ но, дышетӥсьёсты но тодматӥз.

Кукаркаысь семинариын «Семинарское перо» журналын К. Герд ӟуч но удмурт кылъёсын печатласькиз. Озьы 1914-тӥ арын ик со печатла ни «Матӥ» повестьлэсь люкетсэ. Та сярысь мон тодӥ, ӵош дышетскем эшеныз Попковен вераськыса. Со сяна, семинариысь дышетӥсьлэн дэмламезъя К. Герд удмурт кылэ берыктэ Т. Шевченколэсь,
М. Горькийлэсь, Я. Купалалэсь кылбуръёссэс. Солы дэмлало Н. Некрасовлэсь но «Сеятели» кылбурзэ берыктыны, отын «Сейте разумное, доброе, вечное…» чуръёсыз вань. К. Герд, берыктэм гинэ ӧвӧл, со произведение вылэ пыкиськыса, выльзэ кылдытэ.

Малпасько, писателез тодон понна солэсь произведениоссэ лыдӟоно.

— К. Герд туж сюлмаськиз калыкез сярысь. Соин ик революциез но ӝутскем мылкыдын пумитаз. Но собере мылкыдыз куашканы кутскиз. Малы?

— Революцилэсь азьвыл ай одӥг кылбураз со гожтӥз:

 Ой, тырос ук, ой, уно ук
Удмуртлэн куректонэз;
Кам шурлэсь но
туж паськыт ук,
Туж бадӟым ук бӧрдонэз.
Синкылизэ люкасал ке,
Быдэс зарезь луысал,
Куректонзэ люкасал ке,
Гурезь ӝужда тырмысал...

К. Герд кылбуръёсаз калык пӧлысь адӟемзэ гожъяз. Озьы ик вералляз, мон, пе, кылбуръёсме, гуртъёстӥ калгыса, бусыостӥ ветлыса, кылдытӥсько, кылбуръёсам удмурт калыклэсь сюлэмзэ, малпанъёссэ усьтӥсько.

Калыкезлэсь курадӟемзэ ад­­ӟыса, со шуэ вал: ку тон, удмуртэ, вань секытсэ сэрпалтод-куштод ини, ку тон ӟеч мылкыдын потод кидыстэ мерттыны?

Нош революция бере К. Герд мукет сямен гожъя ни. Со малпа, революция шуд ваёз. Гожтэ удмурт гимн. Жаль, гурез ыштэмын. Герд гожтэ:

Тазалыко мед луоз
Республикамы,
Туж ӟеч мед улоз яратон
музъеммы!
Тэльёс, паськыт бусыос
эрказ луизы,
Чебер шунды ӝужаз —
калыкъёс султӥзы...

Кин ке сое куар­етӥз: малы «республика» гожтӥд, автономия гинэ ук. Но К. Герд шуиз: удмуртъёслы но луоз ай республика! Озьы со
14 арлы азьпала учкыны быгатӥз.

Кылбурчи гуртоос пӧлын валэктон уж нуиз. Но коллективизация кутскем бере солэн мылкыдыз пумен куашканы кутскиз. Со адӟиз: ваньмыз сокем ӟеч ӧвӧл. Тани Вавож ёросысь Гурезь-Пудга гуртын коммуна кылдытӥзы, 40 сюрс гектар музъемзы. Коммуналы К. Герд улэп дыръя ик солэсь нимзэ сётӥзы. Но кылбурчи адӟиз, кызьы калыклэсь пудо-животсэ таласа одӥг лапас улэ люкало, нош пудо отын кынмыса кулэ. Солы пумит «Гуртын буран» кылбур гожтэ, гуртэ вылез лыктэ, но со вылез пыӵалэн но пуныен вуэ шуыса. Та кылбур бере шуизы: К. Герд колхозъёслы пумит. Но со ноку коллективлы пумит ӧй вал — чакласькытэк, усьтыр-табыр гинэ ужанлы пумит. Самой ужась калыкез кулак каризы ук.

Нош кыӵе со оскиз Ленинлы! Со сярысь поэма но гожтӥз. Удмурт писательёс пӧлысь со гинэ Ленинлэсь выступленизэ 2 пол адӟемын. Туж куректӥз: Ленинлэн верамез уг быдэсмы, постановлениос уг ужало, огшоры вераськон луыса кошке…

— Мынэсьтым сюлэмме тужгес бугыртӥз анаезлы сӥзем кылбурез. Анайзэ со лулысь-сюлмысь яратӥз, со­лы сӥзьыса, роман но гожтыны кутскиз, шуо…

— Зэм но, К. Герд сыӵе роман гожтӥз. Со романзэ Горькие (али Нижний Новгород) Колчин писатель кие кельтэм. Нош отысь со романэз Антоновский следователь басьтэм. Озьы роман пыраклы ышиз. Нош верамзыя отын 360-380 бам вылэм.

Ми дорозь вуиз К. Гердлэн анаезлы сӥзем 2 кылбурез. Одӥгез — «Мынам пересе» — быдэс баллада выллем. Ӝытазе, пе, изён азям пересе син азям пуксе, кырӟаны, пе, кутске, пие, тон та кырӟанъёсме гожты, тросгес калыклы вера, шуэ.

Гердлэн анаез зэмзэ но туж кырӟась вал. Кылбурчилэн вордӥськем гуртаз, Вавож ёросысь Покчивуко гуртын, туж кырӟась калык улӥз. Со сяна, отын туж тунсыкоесь крезьчиос улӥзы. 90 аресъем Опоч крезьчилэсь кырӟанъёссэ К. Герд эпосэз выллем гожтӥз. Анаезлэсь но кырӟанъёссэ гож­тӥз — быдэс «Докъявыл» эпос. Ӟуч этнограф М. Худяков озьы ик гожтэ: «По красоте и звучанию не уступает Калевале. Очень жаль, что до сих пор не опубликовано…» Со ик пусъе, «Докъявыл» эпослэн 13 ёзэз шуыса. Но табере со но воксё ышемын.

— К. Гердлэн быронэз но Христослэн кадь луиз ук. Со ваньзэ азьвыл ик шӧдӥз, дыр…

— К. Гердлэн вань кылбурез, кытын со гожтэ, тон туж ӟеч адями вал, шыпыт улӥд, озьы ик кошкид, пе. Но мон озьы улыны уг быгатӥськы, шуэ, мон калыклэн шудэз понна нюръяськыса быро. Куке-соку, оло, шедёзы сыӵе эшъёс, соос монэ вузалозы. Озьы ик луиз…

К. Гердлэн М. Тимашев писательлы гожтэтэз кылемын. Отын К. Герд шуэ: мон егитъёслы юрттӥсько вал. Одӥгезлы озьы юрттӥ но, со вылам локанэн-локанэн пож ву кисьтаны кутскиз. Зэм, пе, удмуртъёс шуиллям: сюдэм пуныед аслэсьтыд ик пыддэ куртчоз.

Печатлаське нырысьсэ

Удмурт Дунне
By Удмурт Дунне 5 апреля, 2020 12:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<