Кинлы кыӵе юрттэт висъяське

Ангелина Снигирева
By Ангелина Снигирева 6 апреля, 2020 13:21

26-тӥ мартэ «Удмурт дунне» редакциын лыдӟисьёсмылэн юанъёссылы валэктон сётӥз калыкез улон-вылонын утён политикая но ужъя министр Татьяна Чуракова. Трос сюлмаськытӥсь ужпумъёс сярысь вераз, визь-нод сётӥз.

Т. Чуракова
Туспуктӥз В. Емельянова

Ож вакытэ вордскемъёслы юрттэт

Анае ужысь ветеран луэ, льготаосыз вань. Война вылтӥ вордскемъёслэн льготаоссы бадӟымесьгес, шуо. Кин таос пӧлы пыре но кыӵе юрттэт соос басьто? Анае ужысь ветеран нимлэсь куштӥськыны дась, война вакытэ будэм но ужам нылпиос радэ пырыны умойгес ке.

Елена М. Можга ёрос

Тросэз ӝожтӥсько, ми но война вылтӥ вордӥськимы, нош милемлы нокыӵе выплата уг тыро шуыса. Россиын нимысьтыз ож нылпиос сярысь закон ӧвӧл, но котькуд улосын вань арлыдоослы юрттэт сётонъя законъёс. Удмурт шаерын 2015-тӥ арын 41-РЗ закон кутӥзы куд-ог гражданъёслы юрттэт висъян сярысь. Ӵапак со законъя 1937-тӥ арозь вордӥськем муртъёслы толэзьлы быдэ 500 манет юрттэт чакламын. Озьы ик элькун законъя 1937-тӥ-1945-тӥ аръёсы вордскемъёслы тыриське 300 манет. Та 2 категорие пырисьёс шаерамы ог 80 сюрс кузя. Но туннэ та выплатаез басьто ог 5 сюрсэз гинэ, угось кылемъёсызлэн мукет льготаоссы вань ни. Адямилэн ужысь ветеран нимыз вань ке, со уг быгаты ни мукет выплата басьтыны, малы ке шуоно солы ужысь ветеранлы сямен льготаос тупатэмын ни, со льготаос бадӟымесьгес луо. Шаерамы ужысь ветеранъёс 140 сюрслэсь ятыр. Толэзьлы быдэ 435 манет басьтэм сяна, городысь транспортын дунтэк ветлыны быгато. 1 адямилы 2 пумо льгота тупатэмын ӧвӧл, огезлы гинэ право кылдэ.

Соцконтракт — 3 арлы огпол

Улӥськомы гуртын. Трос ныл­­­пиё семья луиськомы. 2018-тӥ арын, министерство пыр социальной контракт гожтыса, улон-вылонмес 
умоятон вылысь уксё басьтыны быгатӥмы. Туэ но соцкон­трактлы вазиськимы, но ёро­сысь администрациын милемлы шуизы, юрттэт, пе, 3 арлы огпол гинэ сётӥське. Шонер-а со?

Дарья В. Дэри ёрос

Начар улӥсь семьяослы 2014-тӥ арысен социальной контрактъя юрттыны выриськомы. Азьвыл теплица пуктыны, пудо басьтыны, ужзэс усьтыны дорамы вазиськем адямилы огпол гинэ коньдон висъяллямы. Но положениез воштӥмы но, табере социальной контрактъя уксё 3 арлы огпол сётӥське. Вуоно арын тӥ нош ик дорамы вазиськыны быгатоды.

Кин но со малпа, соцконтрактъя корка пуктыны уксё басьтыны луэ шуыса. Лэсьтӥськыны, вуж юртэз тупатъяны коньдон уг висъяськы. Личной подсобной хозяйствоез юнматыны-возьыны но коньдон ум сётӥське ни. Мар со соцконтракт? Адямилы я семьялы социальной юрттэт сётон, секыт улон-вылонзэ капчиятыны тыршон.

Программае пыриськисьёсъя учконо ке, 49 процентэз уксё басьтӥзы, сое кулэезъя кутӥзы, нош асьсэос умойгес улыны кутскон 
понна номыр ӧз лэсьтэ. Соос ик выльысь юрттэтлы вазисько. Огпол коньдон басьтэм адями отӥяз ёрмисьёс радысь потыны кулэ. Кылсярысь, асьсэлэсь ужзэс усьтыны мылкыд карисьёслы ог 250 сюрс манет сётӥськомы. Озьыен, соос тыршыны кулэ, азьланяз ёрмонэ выльысь медам ни пыре шуыса. Со сяна, соцконтрактъя уж утчаны, стажировка ортчыны, дышетскыны коньдон висъяськомы. Воксё секыт улӥсьёслы я эмъяськисьёслы толэзьлы быдэ быдэн 10 сюрс манет сётӥськомы. Кинлы ке нылпизэ садэ нуллыны уксё кулэ, кинлэн ке пунэмъёсыз маке быдӟаесь. Таослы но юрттӥськомы. Ваньзылэсь улэм-вылэмзэс нимысьтыз эскериськомы, учкиськомы, кызьы соослы юрттэммы луэ. Адямилы уждунэзлэсь оглюкетсэ тыриськомы, со соцконтрактъя кытчы ке ужаны кутскемын ке. Мед гинэ ассэ та улонын шедьтоз, югдурез капчигес мед луоз. Адями ачиз но мед сюлмаськоз улон-вылонзэ ӟечомытыны — дасьсэ гинэ возьмано ӧвӧл.

Оскымон учкозы

2 пичи пиналъёсын огнам кыли. Ижын улӥськомы. Анай-атае Алнаш ёросын уло бере, дорамы ӵем вуылыны уг быгато. Больницае, МФЦ-е я мукет азе потоно ке, пиналъёсме нокинэн кельтыны. Россиысь куд-ог улосъёсын мон кадь анайёслы социальной няня проектъя нимысьтыз дышетэм специалистъёс юртто. Башкириын соцнянялы вазиськон понна 140 манет тыроно. Семьялэн огъя доходэз ичи ке, сыӵеослы воксё дунтэк юртто. Вань-а асьмелэн та выллем программамы? Вань ке, кытчы но кинлы вазиськоно?

Светлана М. Ижкар

Ижысь Шевченко нимо ульчаысь 25 номеро юртын ужа Социальной реабилитацияя центр. Нылпиостэс кытчы кельтыны паймиськоды ке, татчы соосты быдэс часлы вайыны быгатӥськоды. Отын 2-ысен 10 аресозь нылпиосты куто. Асьтэлэн лыктыны луонлыкты ӧвӧл ке, специалистъёс дорады потыны быгатозы. Зэм, центрын нылпиосты утялто-чаклало дунын — часаз 100 манет. Семьялэн доходэз пичи ке, дунтэк но юртто. Озьы ик татчы вазиськыны быгато инвалид нылпиосты будэтӥсь семьяос. Сьӧре одно кутоно документъёстэс, нылпиды номырин уг висьы шуыса больницаысь справка. Центрысь специалистъёсын герӟаськыны луэ 
8(3412) 61-43-96 номеръя.

Оген нылпи будэтон

Трос нылпиё семьяослы юрттон вылысь кун ялан сюлмаське. Нылпизэс оген будэтӥсь анайёслэн я атайёслэн нокыӵе но льготаоссы ӧвӧл. Таослы юрттон ласянь азьланяз маке малпамын луоз меда?

Ольга В. Алнаш ёрос

Нылпизэс оген будэтӥсь­ёслы, доходзы пичи ке, одӥг пумо гинэ выплата чакламын — толэзьлы быдэ 416 манет. 2 нылпизы ке, выплата бадӟымгес. Удмуртилэн Тӧроеныз вераськиськом, та семьяослы но юрттэтэз паськытатоно шуыса. Кылсярысь, уксё шедиз ке, сыӵе семьяосысь нылпиосты школаын дунтэк сюдыны ӧдъяськомы.

Тазалыкез эскерон

Мурт пиналэз опекае бась­тӥськод ке, пиналлы но, опекунлы но арлы быдэ дис­пансеризация ортчоно луэ. Больницае уд возьматъяськиськы ке, прокуратура предписание гожтэ. Отӥяз штраф ляко. Коронавируслэсь утиськон вакытэ воксё но врачъёс дортӥ ветлэм уг поты. Мар кароно, штраф медаз тупатэ шуыса?

Мукет юан но кылдэмын. Трос нылпиё семьяосысь пиналъёсты школаын дунтэк сюдо. Карантинэн сэрен экономия кылдэмын, сухой паёк шуонъёс чакламын ӧвӧл меда?

Олеся П. Дэри ёрос

Таӵе югдурын диспансеризацилэсь возиськыса умойгес луоз. Али Россиысь Ужъя министерстволэн косэмезъя вань эскеронъёс дугдытэмын. Диспансеризациез ортчымтэен сэрен предписаниос гожтэмын луыны кулэ ӧвӧл.

Школаын сюдон сярысь верано ке, сиёнлы уксё висъяське пинал дышетскыны ветлэм нуналъёс понна гинэ. Нылпи дораз пуке ке, нокыӵе льготаос чакламтэ.

Шутэтсконэз радъян

Трос нылпиё начар семьяосысь пиналъёс быгато лагерьёсын тазалыксэс юнматыны. Соослэсь списоксэс кылдыто ёрос администрациын. Со дыре ик умой доходэн трос нылпиё семьяос нылъёссэс-пиоссэс лагере келян понна асьсэос сюлмаськоно луо. Сыӵеос пӧлы ми но пыриськомы. Луэ меда ёросъёсын 2 список кылдытыны?

Елена С. Пичи Пурга ёрос

Министерство 6 но ӝыны аресысен 16 аресозь секыт югдуре шедем нылпиослэсь шутэтскон но тазалыксэс юнматон вакытсэс радъянэн выре. Нылпиослэсь списоксэс кылдыто ёрос администрациосын. Озьы лагерьёсы сюрыны быгато сирота кылем нылпиос, сӧсыр пиналъёс, секыт югдуре шедем я начар улӥсь семьяосысь нылъёс-пиос. 1 пинал ар ӵоже каникулъёс дыръя быгатэ лагерьын 2 пол шутэтскыны.

Ӟеч улӥсь трос нылпиё семьяослы кун воксё уг юртты шуыны уг луы. Тӥ быгатӥськоды лагере путёвка дунлэсь оглюкетсэ берыктыны. Компенсация басьтон вылысь вазиськоно ёросысь дышетонъя управление. Куриськонэз арлэн кутсконаз гожтыса умойгес луоз.

Бамез дасяз Елена Сараматова

Ангелина Снигирева
By Ангелина Снигирева 6 апреля, 2020 13:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<