Камсьӧръёсты ӝутӥз Прокопьев

Удмурт Дунне
By Удмурт Дунне 4 апреля, 2020 14:06

Кылем даурлэн кутсконаз удмурт калыкез югдытонын, асваланзэ ӝутонын бадӟым уж нуиз тодмо писатель, публицист, дышетӥсь Максим Прокопьевич Прокопьев. Туэ солэн вордскемез дырысен 136 ар тырмиз.

М. Прокопьевлэн семьяез

Адӟем кариз агайёсызлэсь

Кылем даурын 20-тӥ аръёсы М. Прокопьев дышетӥз вордскем гуртысьтым — Башкириысь Янаул ёросысь Каймашабашысь — 2 классъем школаын. Мылкыды ӝутскиз солэсь улэм-вылэмзэ тодыны-эскерыны: тужгес но милям ёросамы, черкогуртамы ужан вакытсэ. Мон понна со зэмос герой луиз.

Максим Прокопьевич Прокопьев вордскиз 1884-тӥ арын 19-тӥ январе Татарстанысь Кукмор ёросысь Нырья гуртын, азьвыл сямен — Казань губерниысь Мамадыш уездысь Ядыгарской волостьын. Анай-атаез, Прокопий Петрович но Аграфена Васильевна, вордӥзы 7 пизэс но 1 нылзэс: Гавриил, Антон, Семон, Петыр, Кузьма, Максим, Денис но Анна. Соос ваньзы нимо-дано адямиос луизы, тужгес но данэ потӥзы Гавриил, Антон но Максим.

Максим пичи дырысеныз адӟем кариз агайёсызлэсь: соос ӟеч образование басьтэмын вал ни, вань кужымзэс сӥзизы удмурт калыкез югдытонлы. Максим дышетскиз земской школаын, бӧрысь Гавриил агаез юрттэмъя дышетсконзэ азьланьтӥз Карлыганысь (та вакытэ Марий Эл республикаысь Турек ёросысь Карлыган черкогурт) вотской школаын. Сое йылпумъяса, 1898-тӥ арын дышетскыны пыриз Казаньысь дышетӥсьёсты дасянъя семинарие. Ӵапак та вакытэ Максим Прокопьев мылысь-кыдысь пыриськыны ӧдъяз политикае. А. Пушкинлэн, М. Лермонтовлэн, Н. Некрасовлэн, Л. Толстойлэн творчествозы Максимез бурдъяз гожъяськон уж борды но басьтӥськыны. Озьы со удмурт кылэ берыктӥз «Интернационал» гимнэз. Сое удмурт калыклы валамон, учконъёсызлы тупамон кариз. Та бӧрсьы ик басьтӥськиз А. Пушкинлэсь «О попе и работнике его Балде» выжыкылзэ удмуртэ берыктон борды. Калыке со ӝог вӧлмиз, М. Прокопьевлэн выжыкылэн рукописез киысь кие ветлӥз. Нош нимаз книгаен «Поп но Визьтэм» нимын потӥз ай, уно аръёс ортчыса гинэ, — 1918-тӥ арын.

Ымзэс усьтыса кылзӥзы

Семинариез М. Прокопьев йылпумъяз 1902-тӥ арын Похвальной грамотаен. Сое ыстӥзы Уфа губерниысь Бирской уездысь Каймашабаш черкогуртэ. Октябрь революцилэсь азьвыл отын ужазы 2 классъем 2 школаос: удмурт но ӟуч нылпиослы. Удмуртаз дышетскизы, Каймашабашысь сяна, бускель гуртъёсысь но пиналъёс: Вуж Варяшысь, Арланысь, Нурканысь, Выль Кыргиысь, Шуди-Мариысь. Педагогика удысысь ветеран Гафур Зарипович Мардамшин верамъя, Каймашабаше вуэмез бере Максим Прокопьев пумитаз вуоно кузпалзэ — выжыезъя ӟуч дышетӥсез Евгения Васильевна Шестаковаез. Бӧрысь соослэн вордскизы 2 пиналъёссы: Геннадий пизы но Людмила нылзы.

Каймашабаш гуртысьтымы мӧйыез адями Мелызиян Хаерзамановна Султанаева (улонысь кошкемын ни) тодаз вайылоз вал атаезлэсь верамъёссэ: нуназе Максим Прокопьев школаын нылпиосты дышетэм, нош ӝытазе бадӟымъёслы кружокъёс нуэм. Гуртоосты нодъя вылэм: киосты ӵем миськоно, мугорез чылкыт возёно, корка пырыку, пыдкутчанэз куштоно. Куд-ог дыръя люкалля вылэм ёросысь мукет школаосысь дышетӥсьёсты, егитъёсты: соосты дышетэм вакытэз валаны, тыршем асваланзэс ӝутыны. Тазьы ужамез полицилы кельшымтэ, сое сак чакланы кутскиллям, дораз обыскен но вуылӥллям. Правительстволы пумит ужа шуыса, номыр сыӵе-таӵезэ шедьтӥллямтэ ке но, Каймашабаш школаысь сое кошкыны косӥзы. Талы эшшо одӥг муг шедиз на: Ямады бигер гуртын школазы (медресе) ӝуаз. Гуртысь кивалтӥсьёс огкылэ вуизы: Каймашабашысь школаез выжтоно Ямадые. М. Прокопьев но, Каймашабашысь калык но талы пумит луизы, школаез гуртазы ик кельтыны куризы. Но соослэсь нокин кылэм-адӟем ӧз кары, одӥг уй куспын каймашабаш школа выжтэмын вал Ямадые.

Озьы М. Прокопьев ужтэк кылиз. Выль инты утчаса, со Уфа губерниысь Бирск городэ вуэ. Отын но сое нокытчы уже уг куто. Чыры-пыры уж быдэсъяса, улыны мырдэм тырмымон уксё поттыса, ёрмыса улэ. Ар ортчыса гинэ, 1907-тӥ арын, сое ужаны куто Кушнаренковской ёросысь Канлы гуртысь школае. 2 ар ортчыса, отын со усьтэ удмурт нылпиослы класс.

Но семьяезлэсь палэнын улыны М. Прокопьев кема ӧз чида. Кузпалызлы, нылпиосызлы матэгес луон понна со ужаны выже Бирск уездысь Алтау гуртэ — таиз угось Каймашабашлэсь ог 30 иськемын гинэ. Арнялы быдэ со семьяез доры вуылӥз: гужемзэ — валэн-уробоен, толзэ — дӧдьыен.

Алтауысь школаын 2 ар дышетыса, М. Прокопьев выжоно кариськиз Пермь губерниысь Осинской губерние: отысь Вылын Гондыр гуртын со школа усьтэ. Но ӝоген сое ужаны выжто та уездысь ик Бадӟым Гондыр школае, отчы со семьязэ но вайыны быгатӥз ни. Та гуртын ик со вакытэ улӥзы-ужазы М. Прокопьевлэн агайёсыз — Антон но Гавриил. Татын агай-вынъёс лулысь-сюлмысь басьтӥськизы удмуртъёслэсь асваланзэс ӝутон борды, калык пӧлын валэктон уж нуизы. Соослэсь верамъёссэс, ымзэс усьтыса ик, кылзӥзы егитъёс но, мӧйыос но. Эксэй властьлы нош ик ӧз кельшы. Ӝоген Антонэз но Максимез басьто армие, дышетыны ысто Киевысь прапорщикъёсты дасянъя школае. Нош отысен соосты келяло германской фронтэ ожмаськыны.

Нимыз медаз сылмы

Семьяез доры М. Прокопьев берытскиз 1917-тӥ арын гинэ. Совето властез юнматонэ пыриське, сое быръё Пермь губерниысь Осинской уездысь Депутатъёслэн Кенешазы. Солэн кивалтэмез улсын 1918-тӥ арын июне Елабугаын ортче удмуртъёслэн 1-тӥ ӧтчамзы, нош 1919-тӥ арын мартэ Сарапулын радъяське 2-тӥез съезд. Со ортчем бере июне Максим Прокопьевез ужаны басьто Москвае — отын солы оско РСФСР-ысь Наркомнацлэн Вотской ёзэныз кивалтыны.

Москваын со вань мылкыдзэ-кужымзэ сётэ Вотской автономной областез кылдытонлы, сюлмаське удмурт кылын книгаос но газетъёс поттон сярысь. Солэн кичӧлтэмез улсын Мултанын но Елабугаын усьтӥськизы удмурт педтехникумъёс, уездъёсын кылдӥзы удмуртъёслэн ужпумъёсынызы вырись ёзъёс но трос мукетыз.

Удмурт калыклэн мукетыз дано пиез К. Герд М. Прокопьев сярысь шуиз: со аслаз киыныз карта вылэ пусйиз Удмурт улослэсь гожъёссэ, солэн конституциезлы инъет кылдытӥз. М. Прокопьев улонысь кошкем бере К. Герд «Гудыри» газетэ некролог гожтӥз, сое «Удмурт батыр» шуыса нимаз. Отын со тодаз вайиз: «Тодматски мон соин Малмыжын, удмуртъёслэн 1-тӥ ӧтчамзы дыръя. Ми соку ог-огмылы кылмес сётӥм: кулытозямы удмурт калык сярысь сюлмаськомы. Кыкетӥзэ пумиськимы Москваын, Наркомнацлэн Вотской ёзаз… Соку со шуиз: Удмурт улослэсь кунлыксэ кылдытон борды басьтӥськи. Комиссаръёс оскытӥзы — уже пӧрмоз… Нырысь мон талы ӧй оскы. Но со мыным люкам документъёссэ возьматӥз. Отын пусъемын вал ни Удмурт улослэн картаез, городъёс, улослэн конституциез… Сюлмам нясь-нясь луиз, малпай: удмуртъёс пӧлын М. Прокопьев кадь адямиос луизы ке, удмурт калык пеймытэ уз ышы…»

М. Прокопьев трос лэсьтӥз удмурт калыкез ӝутон, югдытон, кунлыксэ кылдытон но удмурт кылэз утён понна. Но жаляса верано, Удмурт Республикалэн шоркараз — Ижын — та дырозь одӥг урам но солэсь нимзэ уг нуллы на. Зэм, кылем даурын 20-тӥ аръёсы К. Герд сюлмаськемъя Ижысь одӥгезлы школа-интернатлы М. Прокопьевлэн нимыз сётэмын вал. Но со кемалась ворсамын-быремын…

2009-тӥ арын Пермь улосысь Бадӟым Гондыр гуртысь школалэн юрт бордаз юнматӥзы М. Прокопьевез буре ваён пул. Та гуртысь одӥгез урам нуллэ солэсь нимзэ. Солы сӥзем ульчазы вань Татарстанысь Кукмор каргуртын но. Кылем арын октябре Каймашабаш школамы борды но юнматӥзы М. Прокопьевлы сӥзем пул. Соку ик радъяськиз «Удмурт калыклэн дано пиез» бадӟым ужрад. Та югыт, визьмо, юн сямо адямилэн нимыз ноку но медаз сылмы.

________

Альбина БАШИРОВА, Башкортостанысь Янаул городысь 4 номеро школаын дышетскись

Удмурт Дунне
By Удмурт Дунне 4 апреля, 2020 14:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<