Калыкысь потӥз, калыке ик берытскиз

Ангелина Снигирева
By Ангелина Снигирева 7 апреля, 2020 12:05

Удмуртиын но, шаермылэн палэназ но 3 Светӥосты тодӥсьтэмез ӧвӧл, дыр. Светӥосты кылыны луэ «Мынам Удмуртие» радиоын, адӟыны телевизор пыр, соослы чабо концертъёсын. 3 Светӥослэн кырӟанъёссы шаплы вӧлмо калык пӧлы.

3 Светӥос: Белых, Кибардина но Пикулева.
Туспуктӥз: Максим Егоров

Кылем арын «Мынам Удмуртие» радиоын чузъяськиз выль кырӟан.

 Ой, тӥ вал-а, тӥ вал-а но,
Чебересь сяськаосы.
Ой, тӥ вал-а, тӥ вал-а но,
Яратоно эшъёсы?

Тазьы кырӟало Светлана Пикулева но Светлана Белых. Та кырӟан сокем кельшиз кылзӥсьёслы — сое курыса жингыръясьёс но гожъясьёс трос луизы. Соин «Нош ик егит луисько» гур 2019-тӥ арлэн яратоно кырӟанъёсыз пӧлы пыриз.

— Ми ялан выль кырӟанъёс сярысь сюлмаськиськом, — маде журналист Светлана Белых. — Кылем арын Светлана Пикулевалэн гуртаз — Пичи Пурга ёросысь Пурое — вуылӥм. Гуртоос тодматскыны ӧтизы асьсэлэн кырӟанъёсын поттэм сборникенызы. Пуро калык туж быгатӥсь. Туж тросэз, бадӟым арлыдазы вуыса ини, кыланы-бураны, кырӟан гожъяны кутскиллям. Сборниклэн презентацияз быдэс клуб тыр калык люкаськиз. Туж шулдыр концерт возьматӥз «Инльӧль» ансамбльзы. Ӵапак соослэсь кылӥм та кырӟанэз. Солэсь кылъёссэ но крезьгурзэ гожтэм Ольга Пикулева.

Ольга Пикулевалэн кылбур гожъян мылкыдыз пуромиз, пенсие потыса.

— 68 аресам нырысетӥ кылбуре вордскиз. Али мыным 72 арес. Нош кылбуръёсы весь кылдо но кылдо — нимаз сборникен поттэмын ни, — серекъя Ольга Григорьевна.

Вань улонзэ кышномурт ужамын гуртын: вуз карон удысын но, бухгалтерын но, учётчик-агрономын но. Уката, пе, кельше вал агрономлэн ужез. Кӧня бусыостӥ ветлӥз, омырын поръян сяменыз весь кырӟаз. Нош пенсие потыса, Ольга Григорьевна «Инльӧль» ансамбле ветлыны кутскиз. Татын ик кырӟанъёсыз вордскизы.

— «Пуроысь сюлэм гуръёс» сборнике 127 кырӟан пыремын. Со пӧлысь 10-лэсь троссэ Ольга Григорьевна гожтӥз. Оглом солэн 20-лэсь ятыр кырӟанъёсыз люкаськизы ни, дыр, — вера «Инльӧль» ансамбльлэн кивалтӥсез Николай Еговкин.

Ольга Пикулева «Нош ик егит луисько» гуреныз лыктӥз ӵапак Николай Васильевич доры. Кышномурт выль кырӟанзэ нёжъяз, нош Николай Еговкин сое нотаос вылэ пуктӥз.

Озьы выль кырӟан вордскиз. Светлана Белых та гурлы но, кылъёслы но соку ик синмаськиз.

— Света, тани асьмелы тупась кырӟан, — вазиз Пикулевалы.

Та мылкыдзэс веразы кырӟанлэн авторезлы Ольга Григорьевналы но «Инльӧль» ансамбльлы. Пуроос шумпотыса кузьмазы яратоно гурзэс 3 Светӥослы. Зэм, Ольга Пикулевалэн кырӟанысьтыз 1 кылзэ воштӥзы ик — огаз чурын автор «мӧйымон» гожтӥз вал. Светлана Пикулева ӵектӥз сое «мӧзмылон» карыны. Озьы ик вӧлмиз со калыке но.

— Кырӟась Светӥосын эшъяськеммылы туж шумпотӥськом, — шуэ Николай Еговкин. — «Нош ик егит луисько» кырӟанэз «Инльӧль» ансамблен но Светӥосын ӵош быдэстӥмы «Арлэн кырӟанэз — 2019» концертын. Сое уго радио кылзӥсьёс туж ӵем курылӥзы, озьы кырӟан 3-тӥ инты басьтӥз кылем арын. «Аксион» дворецлэн сцена вылаз потаммы ӧй на вал. Туж шумпотӥм таӵе сӥлы каремзылы.

Вераны кулэ: Светӥос котькуд ужзэс йӧн-йӧн быдэстыны сюлмасько.

— Ми котькуд кырӟанмы бордын профессионалъёсын ужаськом. Куддыръя вазиськиськом Марина Галичанина кырӟасьлы, мукетъят — Наталья Ушаковалы. Соос куараосмес кылыны, кырӟан композициез пуктыны юртто. «Нош ик егит луисько» кырӟанын куараосмес пуктӥз Марина Галичанина, аранжировка лэсьтӥз Анатолий Эркишев, — вера Светлана Пикулева.

— Ми ведь ноку ӧм малпаллялэ эстрадаысь артистъёс луыны. Кырӟанъёсмы — концертъёсмылэн концепциезлэн люкетэз. Соосты ми быдэстӥськом кутсконаз но йылпумъяназ. Мон понна туж паймымон вал, кырӟаммы калыклы кельше шуыса. Табере валаны кутски: кыӵе кырӟанъёс кылзӥсьлы матын, соос улыны кужым но оскон сёто, кылъёсыз сюлмысь потэмын, крезьгурез но валаса гожтэмын, — шуэ Светлана Кибардина.

Елена Скворцова

Ангелина Снигирева
By Ангелина Снигирева 7 апреля, 2020 12:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<