Йӧно атай — батыр пиос

Ангелина Снигирева
By Ангелина Снигирева 8 апреля, 2020 10:54

Мынам 2 полэс пересь ӵужатае (прапрадедушка) Фёдор Михайлович Колбин — данъяськымон адями вылэм.

Ф. Колбин

Солэн тыршеменыз, 1931-тӥ арын Алнаш ёросысь Кузёбай гуртын кылдӥз «Культурник» колхоз. Фёдор Михайлович председатель луыса ужам 1943-тӥ арозь. Туж секыт но кышкыт сюресэз ортчоно луэм солы Кузёбай гуртын колхоз кылдон вакытэ но председательын ужакуз: колхозлы пумитъяськисьёс сое 2 пол виыны турттӥллям. Колхоз контораын тулыс кизён сярысь кенеш нуыкуз, укно пилиськем но, солэн мугор вӧзтӥз саник лобӟем. Мукетыз учыр: пересь ӵужатае толалтэ валэн, дӧдьые пуксьыса, нюлэскытӥ Алнаше колхоз ужъёсъя мынэ вылэм. Таяз учыре колхозлэн тушмонъёсыз сое ыбыны дасяськиллям. Пуля, ӵужатаелэн тулупезлэсь воротниксэ ишкалтыса, пель дортӥз ик лобӟем.

Солэн семьяез бадӟым вылэм, кузпалыныз ӵош 8 нылпи будэтӥллям: Матрон, Ёрги, Параска, Микаль, Илья, Марья, Бисток, Гирша. 1941-тӥ арын 3 пиоссы: Ёрги (вордскиз 1904-тӥ арын), Микаль (вордскиз 1913-тӥ арын) но Илья (вордскиз 1917-тӥ арын) войнае кошкизы. Пересь ӵужатайме фронтэ ӧз басьтэ — колхоз председательлэн бронез вылэм.

Ёрги Колбин

Войналэсь азьвыл 3 пиосызлэн ик семьяоссы вылӥллям ини. Ёргилэн 4 нылпиез вылэм, Микальлэн — 2, Ильялэн — 1. Ёрги быриз 
1944-тӥ арын 5-тӥ гудырикошконэ, со ватэмын Польшаысь Люблинской улосын. Со старшой лейтенант вылэм, строевой взводлэн командирез луыса ожмаськем. Ёргилэн кулэмез сярысь похоронка вуиз. Нош Илья ивортэк ышемын. 2 полэс пересь ӵужатае ялан возьмам Ильяезлэсь бертэмзэ. Со 82 аресаз улонысь кошкиз, пиез сярысь таки тодытэк кылиз. Алигес ми, солэн выжыосыз, вотэс бамысь таӵе чуръёс шедьтӥм: «Колбин Илья Фёдорович — призван в сентябре 1939-го года, рядовой стрелок, пропал без вести в октябре 1941-го года».

Николай Кузнецов историклэн Быдӟым войнаын ожмаськем удмуртъёслы сӥзем «Дауръёслы улэпесь удмуртъёс» книгаысьтыз мон шедьтӥ пересь ӵужмуртэлэсь Михаил Фёдоровичлэсь нимтулзэ. Пересь ӵужмуртме 1944-тӥ арын «Смерш» службае басьтӥллям. «Смерш» — со контрразведкая управление, отчы куто вылэм котыр ласянь быгатӥсь, визьмо офицеръёсыз. Тӥни сыӵе вылэм Михаил Колбин но. Со Западной но Воронежской фронтъёсын ожмаськем. 1943-тӥ арын Воронеж дорын ожмаськон бере Горд Кизили орденэн дунъямын. Соку М. Колбин 108-тӥ нимысьтыз ПТР батальонын командирлэн воштӥсез вал. Воронеж дорын секыт ожъёс мыныку, ӵужмуртэ 60-тӥ армиын нимысьтыз группаос кылдытыны ӵектэм. Соос тушмонлэн мышказ ветлылӥзы, выжъёсты, сюресъёсты куашкатъяса, связез уретыса. М. Колбин быремын 1945-тӥ арын 16-тӥ толшоре Венгриын, ватэмын Будапештлы матысь Рокостмахельской шайвылын.

Микаль Колбин

Пересь ӵужаелэн Мария Фёдоровна Фёдоровалэн нылпиосыз (ачиз кулэмын ини) али но утё Микальлэсь фронтысь берпуметӥ гожтэтсэ. Мария Фёдоровна мынам песянаелэн, Лидия Алексеевна Кузьминалэн, анаез луэ. Микаль гожтэ сузэрезлы:

«Ӟеч-а улӥськоды? Кыдёкысь мурт музъем вылысен гожтӥсько та гожтэтме, мусо сузэре Марья, озьы ик вань семьяеныды туж умой но таза мед улоды шуыса, пӧсь фронтовой салам верасько. Аслам улонэ сярысь ке верано, пока улӥсько таза но быдэс. Мӧзмисько, ваньдэс адӟем потэ, кыӵе меда улӥськоды? Гожты, Марья сузэре, кыӵе дорын улон. Салам вера анайлы, атайлы, Гиршалы, Бистоклы, Параскалы, Маник кенлы, Одиялы но вань асьме родняосмылы. Скоро лэзё аслэсьтым фотокарточкаме. Али уй но нунал туж кужмо жугиськиськом. Та гожтэтме гожтӥ одӥг час вис луон куспаз землянкаын. Ӟеч улэ, ӟеч возьмалэ, войнаез быдтыса, бертом, ваньмы ӵош луом. Тынад братэд Микаль».

Илья Колбин

Гожтэт гожтэмын 1945-тӥ арын 7-тӥ январе. Нош 16-тӥ январе Микаль бырыны шедиз. Тӥни сыӵе ож сюресэз ортчыны кылдэм пересь ӵужатаелэн 3-тӥ пиезлы. «Удмурт дунне» газетын «Алнаш батыръёс» нимын статья потӥз вал (2019-тӥ ар, 12-тӥ толсур), отын Михаил Колбин сярысь гожтэмын но Кузёбай школалэн борддораз солы сӥзем буре ваён пул шуккыны дэмламын. Михаил Фёдорович татысь школаын дышетскемын но дышетӥсьын ужамын. Туннэ Кузёбай школаын солэсь ужзэ азьланьто Марья сузэрезлэн пиез, солэн кузпалыз, озьы ик Марья сузэрезлэн нунокез. Мон оскисько, буре ваён пул одно ик шуккемын луоз шуыса.

2 полэс пересь ӵужатайме Фёдор Михайловичез но солэсь нылпиоссэ ми, ӵыжы-выжыоссы, ум вунэтӥське, котьку соосын данъяськиськом. Дано нимъёссэс ми но ӟеч ужъёсынымы данъяны тыршиськом.

Полина КУЗЬМИНА, Алнаш ёросысь Кузёбай школаын 10-тӥ классын дышетскись.

Ангелина Снигирева
By Ангелина Снигирева 8 апреля, 2020 10:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<