Елена Набиуллина. Люция. Верос

Удмурт Дунне
By Удмурт Дунне 17 апреля, 2020 17:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Елена НАБИУЛЛИНА — Татарстанысь Улысь Балтач черкогуртысь егит гожъяськись

Люция, вазь ӵукна ик султыса, гурзэ эстӥз: пиез туннэ городэ кошке. Шумесысьтыз няньзэ, лач-лач гинэ карыса, тыриз, вылаз картош немыр вӧлдӥз, шуккем курегпузэн зыраз. Сергеез шаньги яратэ, сайкатозяз пыжыны мед вуысал, сьӧраз но нуыны яралоз.

Гурын пу тачыр ӝуатозь, Люция гидэ потӥз. Марта скалзы, кузёзэ адӟыса, пельёсыныз выретӥз, бӧксыны кутскиз. Кышномурт, шукыяськись нап йӧлэз кыскыса, корка пыртӥз. Йӧлзэ сӥсъяса но холодильнике поныса вуттӥз гинэ — ульчаын сюло шлачкетэм кылӥськиз. Урамтӥ скалъёс гызмыль кошко. Люция но скалзэ ульчае поттӥз. Бускель Зина кенаксы урамын сылэ вал. Люциез адӟыса, со берытскиз но азбараз пыриз, дыртэменыз колошаез ик шлачкетӥз. Люция но азбараз пыриз, капка вӧзысь ӟус вылэ пуксиз. Йыраз малпанъёс бугырскыса кошкизы…

Ӧз, ӧз яратэ Люциез гуртоосыз. Бызем дырысеныз дас тямыс ар ке но ортчиз ини, ӧз быгаты со адямиосын огкыл шедьтыны. Малызэ ваньзы тодо. Соин ик кышномуртлэсь сюлэмзэ позыртэ дас тямыс ар талэзь азьло луэм учыр.

Бер сӥзьыл. Люция дыртыса уж дураз вамышъя, угось гуртэ али гинэ бызем ныллы уж но ӝог шедиз. Сое фермае кунян сюдыны ыстӥзы. Ужез секыт ӧз поты егит кышномуртлы. Ӵукна но ӝыт пал кисаль пӧзьтоно, сӥямез бере кунянъёсты сюдоно.

Со нуналэ ужез фермаын кемагес кыстӥськиз. Одӥгез кунян малы ке ӧз сиськы. Висьыны шедем, дыр, шуыса, Люция пудо эмъясез ӧтиз. Ужзэ быдтыкуз, педлон тём-тём пеймыт вал ини. Со куспын ӧслэн ӟукыртэмез кылӥськиз, кин ке фермае пырись луиз. Нырысь Люция кышкатскиз, йыраз ишанъёс но ведонъёс сярысь малпан лыктӥз. Андрей нимо зоотехниклэсь матэктэмзэ адӟыса гинэ, сюлэмыз интыяз пуксиз.

— Ой, Андрей агай, кышкатӥды ук, — серектӥз нылмурт.

— Кышкад-а, мар-а? — серектӥз пиосмурт.

— Милям тани одӥг кунянмы висьыны усиз. Эмъясь шуиз, ӝушаз, пе, язва каръяськем. Кисаль сюдыны уз луы ни, шуныт йӧл гинэ яралоз.

— Озьы ке, озьы. Тон нош бертыны уд малпаськы на-а?

— Ой, бертоно ни вал. Ужъёс быризы кадь.

— Дугды ӧжытак.

Кужмо пиосмурт киос ныллэн пельпумъёсыз борды ӝабырскизы.

— Лэзе монэ!

Люцилэн син азяз йӧтӥз борддор борды пыкъям саник. Ачиз но ӧз вала, кызьы сое кутӥз но Андрейлэн кус бордаз сачкытӥз. Соиз вӧсь луэменыз шымырскыны гинэ вутскиз на. Пыдъёссэ шӧдытэк, Люция фермаысь бызьыса кошкиз.

Та каргам ӝыт Люциялэсь вань улонзэ йырин-чукин берыктӥз. Ӵукнаяз быдэс гурт тодэ ни вал, Люция быдэс уйзэ фермаын Андреен ӵош ортчытӥз шуыса. Кин сыӵе куара вӧлмытэм — шедьтод на, пе. Но гуртлэн огпалаз шыпытак вазид ке, мукет палаз сюрс поллы бадӟыматыса вералозы. Озьы ик татын но луиз.

Тужгес секыт луиз Люцилы, куке та ӟабыльтон Коля картэз дорозь вуиз. Но кышномурт ваньзэ кызьы вал вераз но картсэ оскытӥз. Коляез талы эшшо но золгес пурӟиз. Огпол кудӟем йырыныз зоотехникез саникен бышкалтӥз. Соиз, больницаын арня улытэк, кулӥз. Коляез нош, йыр быдтӥсь шуыса, пытсэт сьӧры келязы.

Та учыр бере гурт калык золгес адӟонтэм кариз Люциез. Тон, пе, Андреез виид, тонэн йырин Коля пытсэт сьӧрын. Пегӟы вылэм та гуртысь, нош кытчы? Люцилэн вордскем юртаз но табере сюранаез гинэ улэ на. Та учырез кылыса, со Люциез дораз ӧз лэзьы, сыӵе адямиосын улэме уг луы, пе. Йырзэ быдтон сярысь но малпалляз кышномурт, вордӥськымтэ нуныез гинэ дугдытӥз. Бен со маин виноват? Та дуннее вордскытэк кулыны… Со понна уло, сое будэто, шуиз соку аслыз Люция.

* * *

Малпаськонэ усем кышномурт ӧз но шӧды, кызьы со вӧзы пиез пуксиз.

— Анай, тон мар кариськод? Отын гуред ӝуаса бырем ни…

— Пие, тон султӥд-а ни?

— Нош тон малы бӧрдӥськод?

Сергей каллен гинэ анаезлэсь йырзэ маялтӥз, бамысьтыз синвуоссэ киосыныз ӵушиз.

— Эн куректы, анай. Мон ӝоген берто ук. Дышетскыны гинэ пыро. Собере атаймы но бертоз. Ваньмыз умой луоз.

Пизэ юн-юн бордаз ӝиптӥз Люция. Тани солэн осконэз, солэн улонэз…

Кык кызьпу

Автобус ширтэ, капчи тӧл выллем, азьпала мынэ. Машалэн туннэ самой шулдыр нуналэз, угось со вань экзаменъёссэ сётӥз но али агаез доры куное дыртэ. Кыӵе кема соос ӧз адӟиське ни, быдэс кык ар! Тани со вуоз, ӟыгыртоз сое, бам вылтӥз синкылиез погыльскоз! Кыӵе кема возьмам нунал вуэ!

Машалэн син азяз — пичи дыръязы ӵошен бызьылэмзы, шудэмзы, исаськемзы. Нош одӥг пол соос, нюлэскысь вайыса, бакча сьӧразы кык кызьпу мерттӥзы. Одӥгез, пе, Саша луоз, мукетыз — Маша. Туж мусо будӥзы та кызьпуос, агаен сузэр выллем. Котькыӵе шуг-секытэ но, тӧласькыку но соос ӵошен будозы, ӵошен луозы.

Ортчизы аръёс, будӥзы пиналъёс. Машалэн агаез кышноеныз ӵош палэнысь каре улыны интыяськиз, соин ик туж шер гуртаз бертылӥз. Сузэрез доры ноку но вуылыны ӧз пӧрмылы. Маша вала: агаез ужа, выль квартира басьтыны коньдон люка. Кытысь солэн дырыз луоз? Нош нылаш школазэ йылпумъямез бере кыдёке ӧз кошкы, дышетсконзэ азьланьтыны матысь городэ гинэ мынӥз. Кемаласен ини потэ вал Машалэн агаез доры вуылэмез, коньдонэн гинэ шуг-секытъёс кылдылӥзы.

Вокзалэ вуыкузы, куазь ӝомыт вал ини. Маша сумкаоосэ басьтӥз но автобусысь потӥз. Кӧня адямиос, йыромод татын! Нылаш синъёсыныз ӝог гинэ утчаськиз: нокин тодмо уг адӟиськы-а? Сюлмыз но кушерскиз, оло, агаез вунэтэм пумитаны лыктыны… Агаезлы жингыртыса утчаз — соиз телефонзэ уг куты. Ма кароно? Машалэн синкылиосыз питыраны кутскизы. Кык час возьмамез бере со ачиз агаез доры мыныны кариськиз. Такси ӝог гинэ вуттӥз агаезлэн корка дорозяз.

Ӧссэ усьтӥз Люда кенакез.

— Маша? Тон кытысь-о вуид?

— Ма, мон верай вал агаелы, лыкто шуыса. Кытын нош со?

— Саша, чаль ай татчы! Тынад сузэред лыктэм, нош тон ӧд но вера мыным.

— Маши, чылкак вунэ-тӥськем лыктэмдэ, — коридоре Саша потӥз. — Вождэ эн вайы ини. Пыр ойдо, ма ӧс сьӧрын сылӥськод…

Автобус ширтэ. Маши гуртаз бертэ ни. Агаез дорысь со ӵуказеяз ик кошкиз, угось татысь аслэсьтыз агайзэ со ӧз шедьты ни… Нылашлэн пушкыз чигемын. Котьмае чидалод та улонын, но матысь адямиед мурт луэ ке — со валантэм…

Гуртэ вуыкуз, куазь тём-тём пеймыт вал ини. Анаез, нылызлэсь бертэмзэ тодыса, пыжиськем, мунчо эстэм.

— Тонэ лумбыт возьмасько ини, нылы, ма, кызьы агаед доры ветлӥд?

— Туж умой кунояй. Корказэ возьматӥз, каретӥ поръям, олокытчы но вуылӥм…

Маши мадемезъя анаезлэн бамъёсыз кузя быльырась синкылиосты синйылтэ. Со шудо синкылиос нылпиосыз понна шумпото.

Бакча сьӧрын кык тӧдьы кызьпуос вайёсыныз шаугето. Кыдёкысен учкыса, малпалод: ӝужытэз покчизэ тӧллэсь шобыртэм, кезьыт сӥльтӧллэсь уте. Кык кызьпуос, агаен сузэр кадь, котьку ӵошен луозы, ог-огзылы юрттыса, улозы. Нош улонын куддыръя озьы уг луы вылэм.

Удмурт Дунне
By Удмурт Дунне 17 апреля, 2020 17:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<