Военной лётчик Василий Наумов: Дор. Инбам. Дан.

Ангелина Снигирева
By Ангелина Снигирева 10 апреля, 2020 09:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Военной лётчик Василий Наумов ветлӥз Афган оже, вуылӥз Чернобыльысь аварилэсь бервылъёссэ утялтонэ, Чечняын боевикъёсын ожмаськиз, ООН-лэн миссиеныз ӵош службазэ нуиз Африкаысь Сьерра-Леоне Республикаын. Кышкасьтэм луэмез понна данъямын Горд Знамя, «За боевые заслуги» орденъёсын, 2 пол пусъемын Горд Кизили орденэн, озьы ик «Воину-интернационалисту от благодарного афганского народа» гадьпусэн, «За заслуги перед Отечеством» орденлэн 3-тӥ степенё медаленыз.

В. Наумов

Вуж Омга

— Вордӥськи мон пыдлось удмурт гуртын — Кизнер ёросысь Вуж Омгаын огшоры удмурт семьяын. Гуртмы соку бадӟым вал, колхозмы юн во­зиськиз, анай-атае отын быдэс улонзэс тыршизы. 4 пинал вордӥзы, — шуэ Василий Михайлович.

Пичи дырысеным уйвӧтам адӟылӥ, кызьы самолётлэн штурвалэз сьӧрын пукисько, тылобурдо кадь инмын ух! лобасько. Кӧт ик шурдэ! Соку угось странаысьтымы вань пиос понна зэмос герой луиз нырысетӥез космонавт Юрий Гагарин. Мынам но со кадь лётчик луэме потӥз. Мылкыды уката бурдъяськылӥз, атаелэсь, Михаил Михайловичлэсь, война сярысь мадемъёссэ кылзыса. Со Быдӟым оже пыриськемын. Калык азьын трос уг мадиськы вал, нош мунчое ӵошен мынӥськом ке, сюлэмзэ усьтэ вал ни. 1943-тӥ арын солы 17 арес тырмем но, аслыз одӥг ар ватсаса, фронтэ куриськем. Курской дугаозь вуэм, эсьмаса. Но батальонзылэн командирез тодытэк ӧз улы, вылды, со вакытэ уноез пияшъёс тазьы пӧяськыса фронтэ шедьылӥзы шуыса. Адӟиське ук — воксё еж ай пияш. Командирез шуэм: яке тон мыным зэмос арлыддэ вераськод, яке мон тонэ дорад берлань келясько. 
«Дорам уг берты, — шуэм атае, — отын сиыны номыр». Шонерзэ верам. Озьы батальонысьтызы 11 кузя 17 аресъемъёсты, зэмос арлыдзэс ватэмъёсты, Дальний Востоке келяллям. Отын нырысь военной ужлы дышетӥллям, собере Япониен кунгожез чакланы ыстӥллям. 1945-тӥ арын, советско-японской война кутскем бере атайме ожмаськыны келяллям. Война йылпумъяськем бере, аэродромной ротае шедем, военной самолётъёсты эскерем-тупатъям. Озьы со гуртэ берытскиз ай 1951-тӥ арын гинэ. Улонысь кошкиз 1976-тӥ арын. Анае, Мария Павловна, огназ кема ӧз чида…

Егит лётчик

Вуж Омга гуртамы та вакытэ 20 корка гинэ кылемын ни. Бусыос сикен шобырскемын. Куд-ог дыръя малпасько, адӟысалзы ке вашкалаосмы гуртмылэсь туала туссэ, сюлэмзы чигысал, дыр. Нош мон покчи дыръя гуртамы 4 классъем школамы но вал ай. 8-тӥ классэз йылпумъяй бускель Муркозь-Омга гуртысь школаын. Нуналлы быдэ отчы-татчы 6 иськемез вамышъяно луиз. Дышетскыса бертӥськод, нош дорын маке мында пудо, бакча бадӟым, анай-атай колхозын. Юртъер котырысь вань уж ми вылын вал.

9-тӥ классэ мыныны ӵектӥзы Безменшурысь школае. Нош отчыозь — 20 иськем. Интернатын, пе, улоно. Малпасько, анай-атай юрттӥсьтэк кылёзы ук! Нош гуртмы сьӧрын ик Киров улос кутске, куриськи отысь Каксинвай гуртысь школае. Со 10 иськемын, нуналлы быдэ доре бертаны луоз. Озьы 2 ар ӵоже 10 иськемез лёгано луиз на. Кызьы, бен, спортсмен уд луы! Сӥзьылзэ-тулыссэ пыдын я великен, толалтэзэ — куасэн. Нялтас вераса, гуртысьтымы монэн ӵош школае ветлэм пиос ваньзы военнойёс луизы. Одӥгез — подводник, мукетыз — загранплаваниысь моряк, кыкез — лётчикъёс.

Школаын мон, зэмзэ вераса, огшоры дышетски. Но кыӵе ке ӵошатсконэ пыриськоно ке, мон котьку азьпал радын вал.

Германия

— Военкоматын шуизы: Оренбургысь лётной училищеысь разнарядка вуиз, келялом, пе, отчы. Но пырыны ӧй быгаты, конкурс бадӟым вал со арын. Кутӥ но Украинаысь Волчанск городысь лётной училищее йыгаськи. Военкоматын комиссиез ортчи, нош математикая экзаменын «3» басьтӥ. Эх, таяз но ӧй шедьы. Мон сямен ик, конкурс пыр ортчымтэ пияш соку шуэ: ойдо Ярославльысь учебно-авиационной центре куриськом, кин тодэ, оло, отчы шедём? Озьы ик карим. Таяз радэ мыным удалтӥз, отчы капчиен пыри но, йылпумъяй но. Документъёсме сётыны малпасько вал ни Сызраньысь военно-авиационной вылӥ училищее. Но ӵапак 1978-тӥ арын СССР-лэн обороная министрез Д. Устинов приказ поттӥз: авиационной училищеосын дышетскемъёсты армие келяно. Милемлы кылӥськиз вал ни: Афганистанын югдур умойтэм, тани-тани война кутскоз. Нош лётчикъёс уг тырмо, ож кутскытозь, соосты рос-прос дышетыны вуттоно. Ӵапак со вакытэ авиация туж зол азинскыны кутскиз.

Озьы монэ 1978-тӥ арын армие басьтӥзы. Ар пала Владимир городын военной вертолётъёсын лобаны дышетӥзы. 60 вертолётмы вал. 1979-тӥ арын быдэс полкез келязы Германие. Армейской вертолётъёсын лобан быгатонлыкъёсмес волятӥм, соос борды юнматэм ож тӥрлыкен ыбылӥськыны дышетским. Отын мон службаме нуи 5 ар ӵоже — 1984-тӥ арозь. Германиын нырысь экипажлэн командирез луи, бӧрысь — 1-тӥ классъем лётчик. Учконо ке, 48 ар ӵоже будӥ эскадрильяен кивалтӥсёзь, подполковникозь. Та тубатэтӥ ӝутскыны капчи ӧй вал: секытлэсь секыт зачётъёс, эскеронъёс. Ваньзэ лыдэ басьто — тазалыктэ но, тодон-валанъёстэ но, кышкыт учырысь но, вертолётэн лобаны быгатэмдэ но — гурезё яке ӵошкыт интыын яке пумтэм-йылтэм зарезь вадьсын. Германиын службаме нуытозям, заочной амалэн дышетски Сызраньысь военно-авиационной вылӥ училищеын. Сое ӟеч йылпумъяй.

Германие мон сьӧры семьяе но мынӥз ни. Кузпалме пумитай, Ярославльысь учебно-авиационной центрын дышетскыкум. Огез бӧрсьы мукетыз вордскизы нылъёсмы: Ольга но Надя. Жаляса верано, кузпалы улонысь вазь кошкиз, огнам кыли. Нылъёсы семьяосынызы палэнын уло, внукъёсыным арлы огпол гинэ адӟиськыны кылдэ. Огез эмеспие но военной лётчик.

Афганистан

Германия бере милемыз, рос-прос дасям 4 лётчикъёсты, келязы Белоруссиысь Пружаны город котырысь полке. Нош отысен 1984-тӥ арын 2-тӥ апреле келязы Афганистанэ. Военной лётчикъёс отын шорлыдын 10-12 толэзь ӵоже лобазы, ожмаськизы ке, мыным отын 15 толэзь служитьтоно луиз. Юнматӥзы Ми-24 военной вертолётысь экипажлы командире.

Афганистанын

Али кадь ик син азям пуксе Афганистанэ вуэммы бере нырысетӥез нунал. ИЛ-76 самолётэн милемыз, 250 адямиез, вуттыны кулэ вал Кабулэ. Но отын самолётлы ӝутскон-пуксён полосаез тупатъяло вылэм, самолётмы пуксиз Баграм городысь аэродроме. Самолётысь потӥм капчи мылкыдын, ог-огмылы серемпыр ма но ум мадиське. Эх, малпаськом, быгатонлыкъёсмес табере зэмос ожын эскеромы. Инме учким но — Ми-6 транспортной вертолёт бур пала кырыжскыса лобе, бӧрсяз — нап-нап ӵын. Экипажез — 6 адями — огез бӧрсьы мукетыз тэтчаны кутскизы. Но, жаляса верано, огезлэн но парашютэз усьтӥськыса ӧз вутты, ваньзы быризы. 
Вертолёт угось туж улӥетӥ, музъемлэсь ог 200 метрын гинэ лобе вал. Вертолёт музъем вылэ усиз, пуштӥз, ӝуаны кутскиз.

Та ваньмыз син куспын ортчиз. Шыпытамы, йырмес ошимы: татын уз луэ дышетскыса лобанъёс, татын — зэмос ож. Нош Афганистанын гурезё интыос, атмосферной давление туж бадӟым, вертолёт интыысьтыз шуген ишкалске. Эшшо ке люкетэ туж кужмо тӧл. Вертолётлы нырысь, самолётлы сямен, музъем вылысь кӧнялы ке гинэ ӝутскыса, азьлань лобоно, собере гинэ выллане ӝутскыны пӧрмытэ. Шоканы секыт, пӧсь, тузон. Вертолётэз но нуоно, улӥысь душманъёсты но чаклано, быдтоно… Вераны кулэ, асьме вертолётъёс соку возьматӥзы, котькыӵе секыт учыръёсын но оскымон луэмзэс.

Ми-24 вертолётъёсын лобась лётчикъёс азьын ужпум пуктэмын вал: сухопутной войскоосты инмысен утёно, тушмонлэсь ож тӥрлыкен караванъёссэ быдтоно, десантникъёсты, озьы ик пӧртэм грузэз ваёно-нуоно, сӧсырмемъёсты госпитале вуттоно.

Музъем вылтӥ мынӥсь техника вадьсытӥ ӧд лоба ке, сое душманъёс ыбылыса быдтозы. Нош вертолётъёс вань ке, исаны уг дӥсьто. Соин ик солдатъёс милемыз «ангелъёс» нимало вал. Эстӥськон тырме 2 часлы гинэ, со дыр куспын вань ужез быдэстыса вуттоно но берлань гарнизонэ берытсконо.

Огпол 13 адямиен спецназэз вазь ӵукна одӥг интые нуыса кельтӥм. Таос душманъёслэсь ож тӥрлыкен тырмытэм 3 машиназэс ӝегатӥллям, ӟырдыт жугиськон пуромем. Монэ Ми-24 вертолётэным соос доры лобыны косӥзы. 
Уй вал ни, гурезьёсын тём-тём пеймыт. Ярам, спецназъёс, инме ыбылыса, возьматӥзы, кытын сылэ караван. Со шоры ыбылӥм. Эстӥськонмы быре ни вал бере, берытсконо луиз. Вазь ӵукна нош ик шуо: спецназъёсын, пе, связь ӧвӧл. Нош ик инме ӝутским. Югыт луэмын вал ини, синйылтӥм караванэз. Шоразы ыбылыны кутским. 2 машинаос сыӵе зол пуштӥзы, котыр дунне югак луиз, инме бугыр-бугыр тыл ӝутскиз. Тушмон эшшо золгес урмиз, вертолётмы шоры пулемётъёсын ыбылэ. Вӧзам пукись лётчик-оператор Гонанков сӧсырмыны шедиз: пыдаз но кӧтаз осколокъёс мертчизы. Ярам, шудэз вылэм, улэп кылиз. 
Тушмон но, ож тӥрлыксы но пазьгемын вал соку. Нош спецназъёсты быдэс нунал ӵоже утчам на. Жаляса верано, соосты ваньзэсты душманъёс быдтӥллям. Та ожмаськон бере монэ пусйизы Горд Знамя орденэн.

Лётчикъёс сотэк но уг тырмо, эшшо ке ваньзы сямен ӵужектонэн висьыны кутскизы. Афганистанысь климат ӧз тупа, лэся. Келязы соосты Ташкентысь госпитале. Мынам тазалыке юнгес вылэм, висёнлы ӧй сётскы. Лётной состав кулэсмиз бере, мыным Афганистанын кемагес ожмаськоно луиз — 15 толэзь.

Бӧрысь берытски Пружаные. Но таин Афганистан мон понна ӧз йылпумъяськы. ӝоген монэ выльысь отчы келязы. Таяз радэ шеди 
Афганистанлэн Пакистанэн, Иранэн кунгожъёсыз пала. 
Татын инкуазь мукетгес: гурезьёс вож-вожесь, котыр улос но шулдыргес. Отын ваньзэ-ӧвӧлзэ 760 боевой вылетъёсы потай, озьы лобай 1 сюрс 67 час. Мон бере вуэм лётчикъёсты гурезё интыын лобаны дышетӥ на. Олокыӵе но кышкыт учыръёс вал, но Инмар утиз, сӧсырмыны но ӧй шедьы.

Чернобыль

— 1986-тӥ арын Чернобыльысь атом станция пуштӥз, монэ отчы келязы. Радиационно-химической разведкаысь специалистъёсты инме ӝутоно, пе, омырлэсь кыӵе луэмзэ эскерон вылысь. Нырысь ӝутскиськом 200 метрлы 
вылӥе, химикъёс пробаос басьтӥзы, бӧрысь 300, 400, 500 метре. Та бӧрсьы Гончаровский городэ берытскылӥмы, Чернобыль кемысь отчы ӝыны час лобоно. Отын вертолётмес пуж-пуж миськылӥзы. Лётчикъёсты, химикъёсты мунчое келяллязы. Отын часъёсын мисьтӥськыса, пӧсяса пукимы. Но шутэтскыны дыр ӧй вал, та бӧрсьы нош ик Чернобыле лобоно, нунал куспын пробаос кӧня ке пол басьяно угось.

Пиналъёслы ӟеч сямъёс пыӵатэ

Али кадь ик син азям пуксе Чернобыльысь со вакытэ инкуазь. Инмысен со туж ӟеч адске. Гужем, нош Припять шур котырысь нюлэс — ог 300 метр пасьтала — ӵуж-ӵуж. Ӵапак отӥ ортчем радиацилэн кужмо тулкымез. Тае адӟыса, юзыр-кезьыр луоно. Сӥзьыл но писпуос такем яркыт-ӵуж уг луо…

Ваньмылэсь тазалыкмес, кӧня облучение басьтэммес эскерыса возизы. 8 нунал куспын лобаса, тырмыт облучение басьтӥськем. Но госпитале келяны ӧз дыртэ. Инме ӝутскылыны ӧз лэзе ни, мон бӧрсьы вуэм лётчикъёсын кивалтыны косӥзы. Соослы кыӵе интыос вадьсытӥ лобаны сюрес возьматылӥ, вертолётъёсты чакласа вози. Шӧдӥсько, тазалыке лябӟе, ӟигары быре. Озьы 10-тӥ августэ монэ Минскысь госпитале келязы. Нош виры уг тупатскы, мугорысьтым облучение уг поты. Эмъясьёс шуизы: тӥледыз Москваысь госпитале келяськом.

Нош мон дышемын ӧвӧл арняосын-толэзьёсын эмъяськыны. Кутӥ но, Москваысь госпитале уг выды шуыса, рапорт гожтӥ. 45 нуналлы отпуске лэзизы. Удмурт шаерлэсь сокем мӧзми вал ни — вордскем гуртам бертӥ. Вот кытын вылэм шуд, гань-гань улон! Выльысь пичи дырам берытски кадь. Отын соку атай юртэ ӧй вал ни, жаляса верано, со ӝуаз. Но агае выль корка пуктӥз. Со дорын, пудо утьыса, юрт котырысь ужез быдэсъяса, йӧл-сӥль сиыса, быдэс отпускме ортчытӥ.

Выльысь госпитале берытски но, вирме эскеризы. Эмъясе шуэ: Наумов, кин тон понна вирзэ анализлы сётӥз? Шуисько: ачим! Анализъёсыд ӟечесь, уг оскиськы, пе, сомында облучение басьтыса, вирыд такем мед тупатскоз шуыса. Эшшо огпол эскеризы, зэм но, мугоры чылкытам. Госпитальысь лэзизы, озьы нош ик вуи боевой лётчикъёс радэ.

Чечня

— 1993-тӥ арын Совето Союз куашказ. Военной лётчикъёс но кин кытчы быгатэм кошкизы. Одӥгъёсыз Белоруссие Пружаные ик кылизы, мукетъёсыз Москвае шонтӥзы, мон — Заполярьее — Мурманск улосысь Алакуртти каргурт дорысь полке. Семьяеным отын улӥ, служить кари 1999-тӥ арозь.

Приказ поттэмын вал ни монэ Тверь улосысь Торжок город котырысь полке келяны. Но ӵапак со вакытэ Чечняын кыкетӥ кампания кутскиз, отчы келязы. Отын лобай 3 толэзь ӵоже. Чечняын но, Афганистанын сямен ик, гурезьёс, ӟеч тодӥсько вал ни таӵе интыын лобанлэсь аспӧртэмлыкъёссэ. Та ожын но десантникъёсты инмысен возьмаллямы, гурезьёсы пегӟем боевикъёсты быдтылӥмы, сӧсырмемъёсты госпитальёсы вуттылӥмы. Та ожын ыштӥ 2 эшъёсме — 
Андрей Завитухинэз но Алексей Кирилинэз. Соослы Россилэн Героез ним сётӥзы.

Мынэсьтым ӵем дыръя юало, кышкыт ӧй вал-а ожын? Конешно, кышкыт. Но вуэ сыӵе дыр, куке тон жадиськод кышканы. Долг, присяга, честь — асьме военнойёс понна та валатонъёс котьку валтӥсь интыын.

Сьерра-Леоне

— Чечня бере 2000-тӥ арын вуи Тверь улосысь Торжок городысь полке. Лётчикъёсты переобучать каронъя центрын валтӥсь инструктор вал. Эскадрильялэн командирез.

Сьерра-Леонеын

Ар ортчыса, приказ вуиз: Африкаысь Сьерра-Леоне республикаысь конфликтэз чаклано. Отын повстанецъёс но правительство куспын ожмаськон мынэ вал. Монэ отчы ыстӥзы ООН-лэн миссиеныз ӵош. Ожмаськонэ милемлы пыриськыны лэземын ӧй вал, Сьерра-Леонелэсь кунгожъёссэ гинэ инмысен чакланы косэмын вал. Вертолётмы тӧдьы вал, каскаосмы-беретъёсмы — чагыресь. Вот кытын вертолётэн лобаны ӵапак интыез — атмосферной давление уг вошъяськылы. Вертолёт капчиен ӝутске, лоба. Нош кыӵе чебер отын инкуазь! Тыоссы алмазэн тырмемын, вожалэс буёло. Отын пыласькыку, алмазъёс пӧлын уяськод кадь. Алмаззы трос, нош калыксы — куанерлэсь куанер.

Иж

— Африка бере Торжоке ик берытски. Но военнойёслэн соку уждунзы пичи вал. Нош семьяез маин ке сюдоно, нылпиосты пыд вылазы султытоно. Ӵош служить карем эшъёсы сямен ик, мон но увольненилы рапорт гожтӥ. Кӧня ке дыр ӵоже возьмаськисьын ужай, уждунэз, армиын сярысь, ӟечгес вал. Собере Иже берытски.

Инмын мон ортчытӥ 3 сюрс 200 час. Кытчы кароно армиын басьтэм тодон-валанъёсме, быгатонлыкъёсме? Вуи Ижысь пинал лётчикъёслэн школаязы. Туж кельше военной техникаен тунсыкъяськись нылпиосын ужаны. Пӧртэм школаосысь кадет классъёсы ветлӥсь пиналъёсты дышетӥсько. Соос пӧлысь тросэзлэн военной лётчик луэмзы потэ. Но, жаляса верано, туала пиналъёслэн тазалыксы ляб. Тани кылем арын лётной училищее пырыны дасяй вал 6 пияшез. Туж ӝож, одӥгез но комиссия пыр ӧз ортчы. Али кадетъёсме дасясько Быдӟым Вормонлы 75 ар тырмонлы сӥзем парадэ. Оскем потэ, коронавирус сое ортчытыны уз люкеты…

Елена Никитина

Ангелина Снигирева
By Ангелина Снигирева 10 апреля, 2020 09:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<