Депутатъёс куд-ог законъёсты туала югдуръя тупатӥзы

Удмурт Дунне
By Удмурт Дунне 23 апреля, 2020 11:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

16-тӥ апреле Кун Кенешысь депутатъёс люкаськылӥзы азьвыл ялымтэ 24-тӥ сессиязы. Солэн ужаз пыриськиз Удмуртилэн Тӧроез Александр Бречалов. Радъямын вал онлайн-трансляция.

Кун Кенешлэн Тӧроез луиз В. Невоструев.
Туспуктэм: udmgossovet.ru

Выль Тӧро

Эскерем ужпумъёс пӧлын одӥгез валтӥсез луиз Кун Кенешлы выль Тӧро быръён. Азьвылэз кивалтӥсь Алексей Прасолов интыысьтыз ас мылкыд каремезъя кошкон сярысь куриськон гожтӥз 16-тӥ мартэ. Со дырысен та ужез быдэсъяз ни Кун Кенешлэн Тӧроезлэн нырысетӥ воштӥсез Владимир Невоструев. Сое ик ӵектӥзы Тӧрое, мукет кандидатураос ӧй вал. Владимир Невоструев понна дурбасьтыса, вераськизы Елена Дербилова, Анатолий Наумов но мукет депутатъёс.

Удмуртилэн Тӧроез Александр Бречалов пусйиз В. Невоструевлэсь ужаны, кыл кутыны быгатӥсь луэмзэ, бырйисьёс сярысь сюлмаськемзэ.

— Владимир Невоструев та вакытэ кылдэм югдурын ужаны дась, — шуиз со. — Мынам трос вал ни дыры сое валаны-адӟыны. Яр, Юкаменск палъёсысь предприятиосы-а, сходъёсы-а, школаосы-а пырисько, котькытын шуныт кылъёс верало со сярысь. Озьыен, адями ӧз вунэты кытын будӥз, кытын кивалтӥсь луиз, кинъёслы луыса Кун Кенеше сюриз.

Ӵош ужась эшъёсыз азьын кыл вераса, Владимир Невоструев пусйиз:

— Коронавирус чигнам бере ужалом ни чылкак мукет, воштӥськем условиосын. Соин ик али чаклано-валано, кыӵе шуг-секытъёс кылдозы экономикаын, социальной удысын. Ваньзэ тае лыдэ басьтыса, али ик законопроектъёс дасяны кутсконо.

В. Невоструев чакла муниципалитетъёсын Кун Кенешлэсь нуналъёссэ ортчытъянэз азинтыны, муниципал кылдытэтъёслэн кивалтӥсьёссылэсь огазеяськонзэс выльысь улӟытыны, юнгес кусыпъёс тупатыны Удмуртиысь Общественной палатаен, общественной огазеяськонъёсын но мукет.

Лушкем куара сётыса, В. Невоструев понна 50 депутат пӧлысь 46-ез дурбасьтэмзэ вераз, пумит кариськиз 3-ез. Озьы Кун Кенешлэн Тӧроез луиз В. Невоструев.

Вытъёс кулэстэмын

Коронавирусэн сэрен шуге-леке вуэм ужбергатӥсьёс ӧжытгес выт тырозы — депутатъёс налогъёсын герӟаськем законъёсы воштонъёс пыртӥзы.

Капчиятонъёсты, кылсярысь, шӧдыны кулэ дӥсь вуронэн, калыкез транспортэн нуон-ваёнэн, издательской ужен, вузъёсты вуттонэн (курьер ужен), туризмен, калыклэсь ваньмон дырзэ радъянэн вырись но куд-ог мукет организациос-предприятиос, нимаз ужбергатӥсьёс. Ваньзы, кин налог тыре УСН (упрощённая налоговая система) амалъя. Одӥгъёсызлы 6 процентысь 1 процент, мукетъёсызлы 15 процентысь 5 процент кельтэмын.

УФНС-лэн лыдпусъёсызъя, республикаямы та вакытэ упрощённой системая 9 сюрс 695 пичи но шор ужбергатонэн вырись организациос выт тыро, отын 41,5 сюрс адями тырше.

Депутатъёс озьы ик одӥгтэмак соглаш кариськизы: физкультура но спорт удысын ужась организациосты налог тыронлэсь мозмытоно. УФНС-лэн лыдпусъёсызъя, таӵеос республикаямы 127.

Пичиятэм вытъёс шаерысьтымы ужбергатӥсьёслы возиськыны, ужан интыоссэс утьыны юрттозы.

Шара ужаны быгатозы

Нокыӵе документъёсын юнматытэк доход поттӥсьёслы, самозанятойёслы, табере шара ужаны дэмлалозы. Кызьы пыӵатӥськоз выль радлык но кӧня налог басьтӥськоз — депутатъёс выль законэн юнматӥзы.

— Россиын юнматэм законъя 2020-тӥ арын 1-тӥ июльысен улосъёс ас мылкыд каремзыя таӵе режимез пыӵатыны быгато, — вераз шаерысьтымы экономикая министр Михал Тумин. — Эксперимент чот сое эскеризы ни 23 улосъёс, 550 сюрс пала самозанятойёс шара ужаны мылкыд каремзэс веразы. Шорлыдын котькудӥзлэн доходэз ог 21 сюрс манет люкаське. Шара ужаны кутскемзы понна, огласянь, соослы куд-ог льготаос тупатӥсько, мукет ласянь, улос бюджетэ но
пичияк коньдон люкаське.

Табере таӵе улосъёс борды итӥськоз Удмуртия но. Депутатъёс лыдъязы: выль закон тросгес адямиослы ас ужзэс асьсэлы кельшись условиосын нуыны луонлык сётоз. Соос асьсэ сярысь шара вераны но клиентъёссэс уноятыны быгатозы, ас правооссэс судын утьыны луонлыксы кылдоз но мукет.

— Таӵе воштӥськонъёсты возьмаськом ни вал, — мылкыдзэ вераз Бюджетъя, вытъя но коньдон ужпумъёсъя ялан ужась комиссилэн кивалтӥсез Юрий Тюрин. — Оскисько, шаерамы улӥсьёслы со кельшоз.

Самозанятойёслы тупатэмын пичиятэм вытъёс: нимаз адямиосын ужасьёсызлы — 4 процент, услугаоссэс предприятиослы, огазеяськонъёслы сётӥсьёслы — 6 процент.

Кызьы валэктэмын вал сессиын, ужзэс доразы радъясьёслы кассовой аппарат басьтоно, декларациос гожъяно уз луы, нокыӵе фондъёсы отчислениос соос уз келялэ.

Нош вуж сямен-а ужалозы, выль режиме-а потозы —
самозанятойёслы асьсэлы бырйыны луонлык сётэмын. Но Экономикая министерство чакламъя, ог 10 сюрс мурт туэ ар пумозь ик выль амаллы синмаськоз. Со сяна, оло, куд-ог адямиос нырысьсэ самозанятой кариськозы но, доразы уж мытыса, барыш поттыны кутскозы.

Выль законэз умоен лыдъяз 49 депутат, солы пумит кариськемзэ вераз 1-ез гинэ.

500 манетысен

5 сюрс манетозь

Кышкыт учырлы дась луонъя режимез тӥясьёсты табере штрафъёс витё — депутатъёс воштонъёс пыртӥзы административной кыл кутон сярысь элькун законэ.

Та вакытлы Россиын самоизоляция режимез тӥясьёсты кыл кутон улэ кыскыны луэ КоАП-ысь 6.3 статьяысьтыз 2-тӥ люкетэзъя. Штрафъёс 15 сюрс манетысен 40 сюрс манетозь. Озьы ик 1-тӥ апрельысен кодексэ пыртӥзы выль 20.6.1 статьяез, соя кыл кутон улэ кыскыны луэ кышкыт учыр кылдэм дыръя режимез тӥясьёсты.

Но кызьы валэктӥз Кышкытлыклэсь утиськонъя, рег­ламентъя но Кун Кенешлэсь ужзэ радъянъя ялан ужась комиссилэн кивалтӥсезлэн воштӥсез Сергей Лукьянчиков, вылӥын пусъем статьяосты кутыны уг луы
элькунамы юнматэм алонъёсты тӥян учыръёсы. Соин ик элькун законэ воштонъёс одно пыртоно.

Озьы тупатэмын тыриськонъёс: шаерамы тупатэм куронъёсты тӥям понна — 500 манетысен 2 сюрс манетозь, республикамылэн палэнысьтыз вуыса самоизоляциез чакласьтэмъёслы — 3 сюрс манет. Таосыз ар ӵоже 2-тӥ ползэ сюризы ке, 5 сюрс манет тыроно луозы ни.

________

Элина КУМАЧЁВА

Удмурт Дунне
By Удмурт Дунне 23 апреля, 2020 11:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<