Глазов ёросысь Понино гуртэз коронавирус тылтэк кельтӥз

Удмурт Дунне
By Удмурт Дунне 20 апреля, 2020 09:49

Глазов ёросысь Понино муниципал кылдытэтэн 2 арлэсь ятыргес кивалтэ ни Нина Дзюина. Туала улонлэн куремезъя гуртоос но пӧртэм проектъёсы пырисько.

Туэ Пониноысь 14-25 аресъем егитъёсын ӵош «Атмосфера» проект гожтӥллям. Гужем ортчытыны медо «Жара-2020» ёрос фестиваль, отчы витё ёросысь вань поселениосысь кырӟасьёсты. Ужрадэз Быдӟым Вормонлы 75 ар но Понино черкогуртлы 275 ар тырмонэн герӟало. Проектсы грант ӧз уты ке но, сое одно ик быдэстыны чаклало.

— Понино черкогуртысь ульчаосты югдытон бордын но ужаськомы, — шуэ муниципал кылдытэтэн кивалтӥсь. — Калык трос, нош куд-ог ульчаосмы уг югдытӥсько. Энергосберегающей лампаос басьтыны 1 миллион 200 сюрс манет кулэ. Гурт калыклэсь 119 сюрс манет, спонсоръёслэсь 124 сюрс манет пала шедьтоно вал, соку кылемзэ республика висъясал. Секытэн ке но, калык валаз милемыз, котькуд хозяйствоысь 300 манетэн бичамы. Жаляса верано, ужмес уретӥз коронавирус, спонсормы но ышиз. Табере нош ик калыкен вераськоно луоз. Тырмыт коньдон ӧм люкалэ ке, ужмы быдэсмытэк кылёз.

«Самообложение» программае пыриськыса, гуртысь ошмес котырез тупатъяны малпало. Пӧжыын 4 ошмес. Гуртоослэсь 16 сюрс манет люканы быгатӥзы ни, 3 поллы тросгес коньдон висъялоз республика. Валамон, со коньдон вань ошмес котыръёсты утялтыны уз тырмы на.

Муниципалитетын пичи гуртъёс сярысь но уг вунэто. Туэ чакламын Помаяг но Зотово ульчаосы тыл кыскыны, Изошур гуртэ нуись сюресэз но Пӧжы гуртысь памятникез тупатъяны.

Коронавирус сярысь гуртоосын вазен ик вераськизы, висьыны усьыкузы, эмъясез доре ӧтёно шуыса. Нина Дзюина ушъя Пудвай но Пӧжы гуртъёсын улӥсьёсты — вань верамъёсты соку ик санэ басьтӥллям. Понино черкогурт бадӟымгес бере, ульчаетӥ ветлӥсь калык тросгес. Пыдлось гуртын улӥсьёс маскаослы ёрмо.

Удмурт Дунне
By Удмурт Дунне 20 апреля, 2020 09:49