Геннадий Парфёнов. Вужер. Верос

Удмурт Дунне
By Удмурт Дунне 16 апреля, 2020 17:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
ud06-07-22

Геннадий Парфёнов — «Удмурт дунне» газетлэн Кияса черкогуртын улӥсь авторез

Окыль куинетӥ уйзэ йӧназ уг ни кӧлы… Ма, кызьы кӧлод? Оло ӵуказе, оло бӧрысь пизэ тыложе басьтозы. Эк шу, турнаны кусо дасяз ни вал. Ваньзэ сураз-пожаз война: улон чуки-беки луиз. Али гинэ умой улыны кутским вал. Ма кароно? Ма кароно? Окыльлэн атаез герман оже ветлэмын, отысь пал пыд вуиз. Ог 20 ар ортчиз — немец улонмес нош ик сураз.

Саригуртын шим-шим луиз. Военкоматысь повесткаос нырысь ик сётӥзы кышнояськем воргоронъёслы. Окыльлэн пиезлы — Матюшлы — ӝоген 16 арес луоз. Кин тодэ, туннэ-ӵуказе сое но тыложе нуозы. Пизэ со огназ будэтэ. Окыльлэн сӧсыр атаез кулэмын, анаез но ӵем но ӵем висьылэ. Окыльлэн нырысь нылпиез куспетӥ вордскиз, арня но ӧз улы — кулӥз. «Аресэ трос но трос луэ, неужто сюдӥсь-вордӥсьтэк кылё?», — малпалляз нылкышно.

Бер сӥзьыл Саригуртэ сюанчиос ветлӥзы, соку ик Окыль одӥг воргоронзэс «маялтӥз». Ма, кудӟем-капчиям адями валаса ӧз ву, кызьы нылмурт сьӧры кеносэ пыриз. Зол «тыршиллям» — Окыльлэн шумес пыдсаз шыр усем. Гужем юон азьын, Петролэ, Матюшез вордӥськиз.

— Нош ик мирошка ваем, — шедизы супыльтӥсьёс, — таре кинэ меда валесаз выдтэм?

Озьы кыл шеризы кышноос, кинлэн картэз палэнын «шыраны» яратэ. Мукетъёсыз куанӥзы-шумпотӥзы: Окыльлэн юрттӥсез-сюдӥсез будэ.

Егит анай но ӵужанай ну и эркеязы Матюшсэс! Эшъёсыз ӵукна ик вал гид дорын — колхозлы юрттӥсько, нош кин но со нуназеозь кеносын изе. Эркеямзы — син азьын: пизы токыль-токыль, кӧня ке бызе ке — шоканэз пытсаське. «Кӧй парсьпи» — эшъёсызлэн та исанзы Матюш борды сир кадь лякиськиз. Окыль ораськиз но, умоен но вераськиз экеосын — пайдаез ӧвӧл. Ваньмызлэсь ымзэс кобыен уд ворса. Эмъясь доры но, туно-пелё доры но Окыль нуллӥз пизэ — нокин ӧз вера куаён мугзэ.

— Кӧй яке ӟызы — аслам пие, — буйганы уг вала анай. — Мон сое тыложе уг лэзь. Со мынам юрттӥсе но утисе. Ма каром? Ой, каръян сюлэмы…

Тӥни озьы куинь уйзэ чырым но кӧлытэк ортчытӥз Окыль.

— Дугды ай, оло, сельсоветэ ветлоно, отын Надёк ӵужодӥглэн родняез ужа. 2 ар ортчыса, пиелы 18 арес тырмоз, соку ик армиен нерад карозы. Кӧня воргоронъёс кошкизы ини! Бускеле, Зояпай, Петыр картсэ келяз, а ведь нокин ӧз учкы, 5 нылпиез шуыса, — Окыль ма борды кутскыны уг вала. — Чын но, ветлоно сельсовет шуонэ, оло, родняе юрттоз?

Кышномурт бригадирен вераськиз, часталы, пе, сьӧр гуртэ ветло, эмъюм ваё, сэре уже пото. Я, ветлод-а, мар-а, соглаш луиз бригадир.

Окыль кыштыр гинэ дасяськиз. Векчи виятэмзэ ӟенелике лэзиз, сумка пыдсаз вож кияр понӥз на. Пӧраськемезлы но инты сюриз. Эшшо оброс канаысь пиезлэсь вордскем сярысь кагаззэ басьтӥз но кисыяз пыдлогес понӥз. Всё, ваньмыз кадь. Анаезлы эмъюмлы ветло шуиз. Ярам, ветлы, пе.

Сельсовет кузёзы, Тит Степанович, интыяз вылэм. Окыль адӟе: кузёзылэн ымныр посудаез посӥськемын — макмыр, лэся. Ма бордысен кутсконо ай? Я, счетоводэз кыре потӥз, лэся, таре вераськыны луоз. Окыль дэра сумкаысьтыз саламзэ поттӥз — анае, пе, келяз. Степаныч ӟенелик жингыртэмез соку ик сактӥз — пельыз умой кылэ. Кышномурт лыктон мугзэ дӥсьтытэк гинэ вераз. Озьы но озьы, шуиз, пиелэсь вордскем арзэ 2 арлы коть кулэстоно вал, ато тыложе — войнае басьтозы. Степанычед, тае кылыса, макмыр сярысь ик вунэтӥз.

— Ой, сьӧлык та, сьӧлык. Проверка лыктӥз ке, йырме уз маяллялэ, — пуконысьтыз султӥз кузё.

Дышетскемез 4 класс ке но, вала, маин та берытскоз. Но йыр дотово висе. Была не была, 2 пол ум кулэ…

— Мотри, нокинлы пал кыл но эн потта, — соглаш луиз кадь Тит Степанович. — Казыр выльзэ документ гожто. Тон, Окыль, укнотӥ учкы ай, счетоводэ уг лыкты-а?

Кагаз дась. Предзы пияла посудаез, киярзэ, перепеч-шаньгизэ ӝӧказ донгиз. Всё, пе, кобыдэ эн усья, нокинлы пал кыл но эн потта. Анаедлы но.

Куноез тау карыса ӝогак гурт палаз дыртӥз. «Всё, Матюшме таре нокин тыложе уз ну, вордскем арзэ 2 арлы кулэстӥ уго», — кышномуртлэн мылкыд куанэмын-уртчемын, кисыяз — выль кагаз.

Уже кошкемлэсь азьло одӥг карнан ке но ву ваёно шуыса, Окыль Гыркмас шур пала дыртӥз. Бадьпуос доры вуиз но, ымнырыз чырс палэзь сием кадь луиз. Шур дуре вулы васькем Манефа но. «Вот ведӥн, одно ик тонэ адӟоно вал», — мылкыдыз соку ик басылаз али гинэ пальпотӥсь Окыльлэн. Гуртоос шуо: Манефалэн тодэмез вань. Кытысь вуиз со Саригуртэ — нокин уг ни тоды. Ма, берытскыса уд кошкы ук.

— Чай юэмед потӥз-а, нылы? — тыро ведраоссэ луо вылэ пуктӥз Манефа. — Мон но тани вулы васьки ай.

Окыльлэн сюлэм тэрс каре ини, ма, одно ик та ведӥнэн пумиськоно вал шат…

— Ой, нылы, нылы. Туннэ лэсьтэм ужед бакель уз лу. Пиедлэн быдэс улоназ со вужер кадь ветлоз. Тол но, гужем но, уйин но, ӵукна но.

Арлыдо кышномурт тыро ведраосыныз калленак гурт пала тубиз…

* * *

Тылож дугдыны ӧз ни вала. Тани пичи гинэ Саригуртэ 4 «похоронка» вуиз ини. Выль ар азьын Зояпайлэн Петырез кунул бодыосын — костылен — вуиз. Ӵок, сӧсыр ке но — улэп, буйгато ог-огзэс кузпалъёс.

Гуртын ужасез — чиньыен лыдъямон. Кин фермаын, кин нюлэс коранын, кин чугун сюрес лэсьтонын. Матюшез но Кекоран пала кыскало вал, но анаез, Окыль, кырныж кадь омырскиз бригадир вылэ.

— Кытцы сое, висись муртэ?! Луӵӵе ачим мыно. Дорын нэнэмес но учкись кулэ.

— Бон ярам, ачид ке ачид. Нош пиед Микон пересен фермае мед васькоз. Тӥрен ужаны быгатэ, дыр?

Анаез пизэ весь пичи кожа на, нош соизлэн мыйыкез бычыра ни. «Кӧй парсь» шуыса исаны нокинлы. Матюшлэн огъёзъёсыз Юрмалай МТС-ын тракторен ужало, кыкез — тыложын. Эрке писэй гинэ весь кулэмтӥськыса улэ. Ма, ачиз нылъёсын мынчыръяське ини.

Бускельзы, Зояпай, воксё паймемын: ма, Окылен соос огвакытэ нылпи вайизы, ӝыны ар кусыпсы. Зоялэн бадӟым пиез тыложын, нош Матюш — гуртын, колхоз уже но кыткиськемез туж уг поты. Ослоп но ослоп. Я, гуртоос куара-ланга уг потто.Улон кузь, Инмар адӟоз ай…

…Тани тылож но быриз. Кин бӧрдэ, кин кырӟа, кин кайгыре. Окыль кабзэ куанэмын: яратоно пиез бордаз, таре кышнояно вал. Весь анай вӧзын уз улы. Ма вераз вал Манефа Гыркмас шур дурын — со но вунӥз. Вужер, пе. Ӵок, огшоры вераськон-супыльтонлы уд оскы.

* * *

Арлы быдэ тулыс Гыркмас ӧрысьтыз потэ. Сое гуртоос яю шуо. Жадизы сариос тулыс вулэсь, ма, гуртазы не лавка, не клуб ӧвӧл, школа нергезэс но ворсазы. Артысь гуртэ, пе, выжом, урам но висъямын, артэ ик улом. Матюш — о, таре со йӧно воргорон: мон — Матвей, вунэтэ со Матюш нимме. Матвей гинэ ош кадь пыкиськиз: быдэс улонме-а кыед поттом, музъемын копаськом, луӵӵе мон палэнын шудме утчало. Окыльлэн бӧрдонэз ымдураз ни, но пиез азьын юн возиськиз. Дась вал пиез сьӧры кошкыны. Но ма ужалоз палэнын? Не йӧназ дышетскемез ӧвӧл, не ӟуч сямен дыго-мого вераське. Ойдо, пиез ас шудзэ ачиз мед утчалоз.

…Киясаын Матвеез нокин пӧсь чаен, табанен ӧз пумита. Кытын улоно, ма ужано, сием-юэм но потэ. Эркеям ослоп со сярысь ноку ӧз малпаськылы — ялан нэнэез бергаз-сюлмаськиз.

Кыкетӥ нуналаз Матвейлы дотово удалтӥз. Ёрос центрын выль урам пуктыны кутскиллям, ужасьёс, пе, кулэ. Ӵок, нимаз дышетскемез ӧвӧл, но кирпич-цемент нуллыны институтэз йылпумъятэк но ярам. А эшшо строительёс толэзяз 2 пол уксё басьто. Бригадирзы, сое ваньзы Никандрыч шуо, патер сярысь но сюлмаськиз. Нырысь Матвей арня пала столяркаын кӧлаз, чидаз, гужем ук.

— Бускеле городэ улыны кошкиз, юртсэ учкись кулэ, оло, улод кӧня ке? эшшо пунызэ сюдоно луоз, — Никандрыч Матвеен кенешыны малпаз. — Кин тодэм, оло, бӧрысь вузалозы юртсэс.

Китрой бригадир вазенгес ик синйылтӥз Матвеез. Ужаны дыше, курытсэ уг ю, тамак, бен, пурккетэ ик кадь. Бригадир юнме уг сюлмаськы: солэн аслаз йыр висёнэз. Нылыз люкиськемын, ӧжыт вольной луэмын, утыр анай-атаеныз даллашыны вуэ. Одӥг коркан уло — шуг дышыны. «Кузъяно вал таосты, — ас понназ малпа Никандрыч, — весь казакпиын уд ветлы, оло, Манимы но тупатскысал». Матвей соку ик соглаш луиз бускель юртын улыны.

Тӥни озьы бригадир одӥг ыбемен кык лудкечез кутӥз. Нылыз, Маниез, ыгы кадь ӝабырскиз Матвей борды. Арня но ӧз ортчы, етӥз кышномурт бускель корка, Матвей доры, выжиз. Огназ ӧз, 5 аресъем нылыныз ӵош. Сӥзьылаз Мани Матвеез шумпоттӥз: нылпимы вордскоз. Умой, пе, луысал та юртэз асьмелы басьтыны. Вот только кытысь коньдон шедьтоно?

Матвей лэсьтӥськонын кема уг ужа бере, байкыса ӧз на ву. Ӵужанайлэсь куроно, вылды, со пенсия басьтэ, толэзяз 12 манет, но ар куспын люкаське. Нуныкаезлы одно сётоз. Бертылоно. Бригадир лэзиз, только кема эн ӝега, шуиз.

— Ой, Матюше, гыдыке, вуид-а? Ой, мӧзми ни вал, ымныр патреттэ ик вунэтӥ, — ӟыгыръя ӵужанаез. — Нэнэед фермаын, казыр вуыны кулэ ни.

Окыльлы кин ке верам, пиед бертӥз шуыса. Шок-пуль гинэ вуиз ужысьтыз. Эх ма, нэнэез но пересьмыны кутскем…

— Ма, каллен улӥськом, — сиён дасянъяз вера Окыль. — Скалмес вузам — кин ай турын дасялоз. Бакчаме но кулэстӥ, пумаз Зояпай турын кизиз. Ярам, колхозмы умой, пу но ваё, сӥль-йӧл но дунтэменгес сёто. Ужасьсэс уг обидё. Зояпайлэн пиез, ӵош шудэм эшед, пумес вандэ но пильылэ. Школаысь нылпиос но вуо юрттӥськыны. Тыныд уго, кызьы шуиськод, «весь некогда».

Матвейлы возьыт тае кылыны, но анаез шонер вера. Ӝӧк сьӧрысен пизы вераз ма муген лыктэмзэ. Озьы но озьы, корка басьтоно вал, но аслам уксёе ӧжытгес. Маниез сярысь но вераз, нылпимы, пе, луоз. Окыль, тае кылыса, синвуаськиз, озьыен, со песянай луоз!

Кортэн дурем сандыксэ усьтыса, Окыль вань люкам уксёзэ пиезлы сётӥз. Скал вузамзэ но, анаезлэсь пенсизэ но, аслэсьтыз уждунзэ но.

— Ой, пие, мотри, эн янгыша, алдаме медад кыль. Котькыӵе адями вань, умоез но, сукез но. Кагазэн-документэн умой ужа, — та вие Окыль Манефаез тодаз вайиз. Но вужер сярысь пиезлы ӧз вера, можот, со чын но ӧвӧл.

Пизы уйлы но ӧз кыльы — сюрес вылэ потӥз. Бакча юбоос ланьырамын шуэмысь, Матюшсылэн одӥг пигоныз но ӧз вырӟы…

Ну и куанӥз коньдонлы кышно луонэз! Матвеез валаса но ӧз вутты, тодэмез но ӧз поты кадь, ку-мар Маниез юртэз ас вылаз гожтӥз. Табере карт шуонэз — пыртос. Но та сьӧд ужез берло гинэ шараяськиз ай, куке Матвей Манизэ шабашникен кутӥз. Быдэс нунал зоремен, бригадирзы ужасьёссэ вазьгес лэзиз вал…

Тэшкам пиялаез уд ни лякы, пилиськоз гинэ на. Судын варматай шуонэз — Никандрыч — юртлы ачим вань уксёме сётӥ шуиз. Солы оскизы — бригадаез начальствоослы сандык кадь коркаос пуктэ. Пересь ӟичы вала, кызьы улон берга. «Нылпимы луоз», — та но алдаськон вылэм. Таре Маниед коркан дусыменыз улэ.

* * *

Ортчизы аръёс. Матвейлэн ӵужанаез ӧвӧл ни, анаез но пересьмиз. Матвеед но кочон кадь ӧвӧл ни — суй-пыд висе. Шер ке но, бертылэ ик дораз. Ӵош шудэм эшъёсыз кирпич корка пуктӥллям, вузы но, газзы но вань, муспотон нуныкайёссы будо. Эшъёсыз ас шудзэс доразы шедьтӥзы — пуаса ӧз ветлэ. Матвейлэн не соиз, не таиз ӧвӧл.

Ракат (умой) луэ улон гуртын но. Азьло гуртоослы паспорт чик уг сёто вал, али — пожалуйста. Матвейлы но паспорт сётӥзы. Учке документэз — уг оскы, эсьма, синъёсыз чарка быдӟа луизы. Малпа вал, ог 10 ар ортчыса, пенсие потоз. Но паспортъя со 2 арлы пинал вылэм. Окыль ачиз ик шараяз сьӧлыксэ, ачим, шуэ, ачим озьы кари, тонэ тыложе медаз басьтэ шуыса. Озьыен, Матвейлы 2 ар мултэссэ ужано луоз кирпич заводын. Нош суйёсыз чик уг ни чидало.

— Тазалык со порма ни, оло, гуртэ бертоно, анай доры? — куинетӥ уйзэ уг кӧл Матвей. — Татын монэ нокин кутӥсь ӧвӧл. Пыртос вал ас юртам, пыртос ик кыли та улонын. Но бер ӧвӧл ай, улон кузь — маке малпалом.

Синвуоссэ уг ӵушы воргорон. Вуж чемоданаз люка, тыре дӥсьсэ…

Удмурт Дунне
By Удмурт Дунне 16 апреля, 2020 17:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<