Буям курегпузъёс

Удмурт Дунне
By Удмурт Дунне 22 апреля, 2020 17:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Жигмонд Мориц / Централизованная библиотечная система Канавинского ...
Жигмонд Мориц — Венгриысь
1879-тӥ-1942-тӥ аръёсы улэм тодмо писатель.

Тиса шур дурын, Париттяш но Галамбош гуртъёс вискын, кузь ӵы­пет (дамба) вылтӥ сюрес усьтӥське. Ӵыпетлэн огпалаз кыдёке-кыдёке, макем син сузе, вожектӥсь чабей анаос адӟисько: нокытын но ӧвӧл ӵыпет быдӟа гинэ но нюко-гопо интыез.

Мукет палаз, кикыр-кокыр букваос гожъям сямен, кожылыса бызе Тиса, тулыс тудву дыръя гинэ ӧрыз шонерске, соку тудӟе но, тапал но тупал ӵыпетъёс вискысь зарезьлы пӧрме, бадьпуос гинэ отын-татын адӟисько, Робинзонлэн шормуӵъёсыз выллем.

Ӵыпетлэн улӥяз бызись сюрес сокем дэри, ньыль валэн но буш уробоез одӥг гуртысь мукет гуртэ мырдэм кыскыса потто, нош вылӥяз тӧл пельтэ но горд сюё музъемез каньылля куасьтэ. Куинь пичи нылъёс шулдыр вамышъяло дамба вылтӥ. Горд кышетъёссы мак сяська кадь пишто, тӧдьы шукы сӧзуло лыз юбкаоссы ыр тӧлын гырлысяськаос кадь лопыръяло.

Дэрие кугӟам уробо вылын господин пуке. Валъёслы так но шутэтсконо ни шуыса, уробозэ дугдытэ но нылъёслы вазиське:

— Кытчы, кытчы, нылъёс?

— Галамбошысь лыктӥсь­ком, Париттяше мынӥськом.

— Нош малы меда?

— Курегпузлы.

— Кыӵе-сыӵе курегпузлы?

Нылъёс ог-огзы шоры учко но серекъяны кутско. Куинь кырдыдыкъёс сямен гурлало. Кызьы уз серекъялэ! Сокем паймымон юалляське та господин. Сое но уг тоды, кыӵе курегпузъёс.

Жужика, самой шӧртчиез, валэктэ:

— Курегпуз бичаны мы­нӥськом. Тӥ уд тодӥське шат, туннэ Быдӟым пятница шуыса?

Тодмотэм господин пальпотыса йырыныз шона.

— Тодӥсько, Быдӟым пят­ни­ца шуыса, нош малы тӥ­ледлы курегпуз, созэ
уг тодӥськы.

Нылашъёс нош серекъяло зол куараен, шулдыр. Жужика нош ик лэчыт кылзэ поттэ.

— Ма, уд тодӥське шат тӥ:

Быдӟым пятницае

бӧрдылӥзы,

Трос курегпуз чеберъяса

буязы?

— Тодӥсько мон.

— Ну, милям татын сыӵе сяммы вань. Быдӟым пятницае ми, пичи нылъёс, люкаськиськом но кӧня ке кузя пиос доры мынӥськом тӧдьы курегпуз бичаны. Тӧдьы курегпузъёсыз чебер гожмаса буя песянае, нош Быдӟынналлэн (Паска) кыкетӥ нуналаз пиос милемыз вуэн кисьтаны лыкто ке, соосыз сётӥськом пиослы.

— Иське, мон но мынӥ ке, мыным но, оло, сётысалды?

Нылашъёс эшшо золгес серекъязы но горд кышето йыръёсынызы сётом шуыса шоназы.

— Ну, вералэ ай эшшо, Галамбошысь нылъёс гинэ ветло-а Париттяше курегпузлы? Отысь тӥ доры уг лыкто-а курегпуз бичаны?

— Ой, кыӵе ӧжыт тодӥсь­коды тӥ, — йӧнтэмъ­яськыса вераз Жужика. — Котькин тодэ ук, Галамбошын нылъёс трос. Соин ик Быдӟым пятницае нылъёс мыно Париттяше, Быдӟынналлы учконо ук ӵыпетэз, озьы гинэ Париттяшысь пиос ми пала лыктозы.

Тодмотэм господин йырыныз шоназ, пальпотӥз но быдэн одӥг тӧдьы уксё сётӥз нылъёслы, ӟеч луэ шуыса, уробозэ вырӟытӥз но дэриетӥ азьлань тяпыльтӥз.

Нош нылъёс дыртыса азьпала вамыштӥзы, горд кышетъёссы кыдёке пишто вож удам ю-нянь но вожектӥсь бадьпу куакъёс пӧлын.

Шулдыр серекъяса, кырӟаса мыно Париттяш пала. Пичи кудыоссэс выллане ӝутӥзы, нуназе тыр кудыосын бертозы шуыса, шумпотыса пальпото.

2.

Жужика Сабадош — вал­тӥсьсы.

Та сутэр синмо пичильток кенӟали кадь вал. Шумприч, шӧртчи, лэчыт синмо, сэрыт киё, чебер, лякыт. Со кылем арын но вуылӥз ни Париттяше, зэм, соку апаез вӧзын лёгаськиз, но умой синйыл­тӥз ваньзэ, соин али кылзэ
серметатэк валэктылэ:

— Шуисько тӥледлы,
нылъёс, нокытысь но ум куре курегпуз, кытчы асьсэос ӧтёзы, отысь гинэ.

Марча Тотэз анаез кужмысь Жужика сьӧры келяз, пужыё нылаш куаньгетӥсь куараен вазиз:

— Нокытчы но ӧз ӧте ке?

— Соиз ини мынам сюлмаськонэ.

Борца Каваш Жужикалэн мукет палтӥз мынэ, йӧн-йӧн тусбуё, чебер пичи нылаш оскыса но чилясь синмын учкылэ Жужа шоры. Со но вал ини миым Париттяшын но тыр кудыен бертӥз дораз.

Ӝог вуизы гурт доры. Париттяш черклэн зарниям
корт йылыз кыдёкысен пиштэ пилеш писпуос вискытӥ.

Гуртлэн бадӟым урамаз пыризы гинэ но, Жужика малпамтэ шорысь курегпуз люкан кырӟанзэ мытӥз:

Сяла тусо куреге,

Кӧня пузэз, вералэ,

Куинез ӧвӧлэн дас кык,

Ӧжыт! Сётэ на ог-кык.

Кокорико, атасэ,

Малы буш на кудые?

Ӧд ке люка ӵуказе,

Бералто мон чыртыдэ.

Тӧл шулам кадь кылӥськиз Жужикалэн куараез.

Котькуд азбаре бызьыса потылӥзы пиналъёс:

— Галамбошысь нылъёс лыкто курегпуз бичаны!

Отысь но, татысь но кузё кышноос куаретӥзы:

— Эй, нылъёс, пичи нылъёс! Ми доры уд пыре шат?

— Ӧтиды ке, — вазиз
Жужика.

— Ма, ӧтисько ук!

Озьы пырылӥзы.

— Кинлэн луиськоды тӥ, нылъёс? Ма, тон Сабадош Габорлэн нылыз, лэся, ук, Жужи. Ма быдӟа будӥд ни, дыды. Тон-а кырӟад? Ох, зол куараед. Тани тыныд, гыдыке, куинь курегпуз. Мынам куинь пие, куинез ик тонэ кисьтаны мыноз… Нош таиз кин меда?

Борца востэм вазиз:

— Борца Каваш.

— Каваш Петерлэн нылыз, озьы-а?

— Озьы.

— Ц-ц. Будкоды ке, будкоды, пичильтокъёс. Тани тыныд но ог-кык курегпуз… Нош таиз кинлэн нылыз-
пиез?

Марча Тот нылъёслы вожъяськыса, кунэрес учке ини. Нукыр куаретӥз:

— Тот Пал господинлэн нылыз мон.

— Озьы-а? Тот Пал господинлэн? Ну, тонэ мон ӧй ӧтьы, ма, ярам ини, тани тыныд одӥг курегпуз.

Кудыысьтыз самой пичизэ бырйиз но Марчалы сётиз. Мискинь Марча, со уг тоды, Корцошъёс атаеныз уг тупало шуыса.

Куинь горд ымныро пияшъёс лушкем нылъёс шоры учкыло. Бадӟымезлэн чильпам дуро пичи кышет понэмын ини кисыяз — со миым школаез быдтӥз. Жужика солы кельшиз.

Соин ик куаретӥз солы:

— Ох, кисьтало ук мон тонэ Быдӟыннал дыръя.

Жужика лэчытак вазиз:

— Вунэтод ин тон отчыозь, нылъёс пӧлысь кудӥз мон.

Пияшлэн синмыз ик кымес вылаз тэтчиз, сокем паймытӥз ныллэн лэчыт верамез, соин ик мыр-мыр учке Жужи шоры, табере улытозяз уз вунэты ни.

Нылашъёс тау карыса ураме потӥзы.

Жужика курегпуз бичан кырӟанзэ азьланьтӥз:

Ӟазеге, тон, ӟазеге,

Вань-а кудыын пузэд?

Вань отын, оло, сю пуз но,

Весед сомында уз лу.

Ӟазеге, тон, ӟазеге,

Миым кӧня вал пузэд?

Кин-о меда лыдъясал,

Мырдэм вуттӥм люкаса.

Жужикалэн куараез омырез вандыса кадь жонгетэ.

Пичигес пиос анайёссылэсь сӧзулзэс сэзъяло, нылъёсты мед ӧтёзы шуыса, Жужиез потэ кисьтамзы.

Ӧтчазы но.

Черк дорозь вуытозязы, сомында курегпуз люказы, Жужика кытчы поныны ӧз вала ни.

— Умой луоз ни табере бертыны! — шуиз.

Борцалы но тырмиз ни, соин нылаш капчиен соглаш кариськиз дораз бертыны. Но Марча вог, солы таин уг тырмы, зэм, солэн кудыяз котькӧня тэрысал на, соиз но зэм: кӧттырмостэм пичильток маке быдӟа куды кутэм. Нылъёслэсь люкиськиз, эшшо уллапала ветлоз на.

— Мын, — шуиз Жужика, — юнме гинэ сьӧрамы лыктӥд.

ud20-16

Чуркак берытскиз но, Борцаен ӵошен дор палазы вырӟизы.

Котькуд капка азьын пиос сылӥзы но серекъяса бӧрсязы маке черекъяло, озьы но тазьы ведраен, пе, кисьталомы. Жужика котькудӥзлы кыӵе ке лэчыт, серемес кыл вераны пӧрмытэ. Озьы гуртысь потӥзы.

Нош Марча черкез ортчиз гинэ но, кема малпаськытэк, «Куреге, куреге» шуыса кырӟаны кутскиз. Куараез шуш. Мискинь, кырӟаны но уг быгаты вылэм. Пуныос но тани, капка азе потыса, кудӥз ыргетэ, кудӥз куаньгетэ.

Пиос ӝоген, кӧня ке кузя люкаськыса, пичи ныл шоры серекъяса учко. Марча туж кышказ, возьдаськиз но.

— Эй, тон но-а Галамбошысь? — юаз огез бадӟымгес малай.

— О-о.

— Тыныд куркапуз кулэ, дыр, о-о?

— Ӧвӧл.

— Ӧвӧл, дыр. Нош тусыд точно куркапуз кадь ик.

Пиос горо, серем каремез кылыса. Марча кӧбераса тӧдьыектӥз, гордэктӥз.

— Кулэ ӧвӧл тыныд курегпуз! — шуиз вирсэртэм пияш.

Марчалэсь кудызэ кутӥз но зуркатыны кутскиз. Мукетъёсыз йӧнтэм пиос горо, нош таиз кудыез зуркатӥз-бергатӥз, вань курегпуз сӧриськытозь.

Мискинь Марча азьвыл кырӟамезлэсь золгес кесяське. Отысь но, татысь но адямиос потылӥзы. Кин ке, боды кутыса, пиосты улляз. Таос, кыдёке пегӟыса но, мискинь ныллэн бӧрсяз черекъязы:

— Учке ай, удалтӥз сӥтьпужыё ныллы. Буям курегпуз нуэ ини дораз.

Огез шуиз:

— Эн кышка, сӥтьпужы, так но уз кисьта тонэ нокин но.

3.

Чебер Быдӟыннал ӵукна вуиз.

Париттяшысь пиос валесысьтызы тэтчаллязы, ӧз ни кылле азьтэмъяськыса, ӟурыса. Анайёссэс нерад каризы, чаляк чебер дӥсь мед сётоз ни шуыса, эшшо чильпам пичи кышет, тури тылы шляпазы вылэ.

Но песянайзы нырысь гудыртӥз шоразы:

— Дэриесь сапегъёсты чи­лясь ӧз луэ ке, Саламонлэн ымнырыз кадь, уд адӟе дӥсьтэс.

Люр-лярын так но изьыны ӧз луы ни, атайёс но сайкамзы бере дыртӥсь, пӧрмостэм пичи киосысь дэриен наштаськем сапегъёсты кутӥзы но оп! шуытозь чебер-чылкыт сузязы.

Шунды ӟардытозь, пиос огзы бӧрсьы мукетъёсыз Париттяшысь Галамбоше вырӟизы ни.

Азьпалазы Пешта Корцош кык выныныз. Шляпаысьтыз лентаоссэ тӧл пелля, пияшлэсь бамъёссэ горд луытозяз чепылля. Шарк-шарк вазе шпораосын сапегез — атаез кылем арняе гинэ Дярмат базарысь вайиз. Пешталэн йыраз весь одӥг малпан бергаз, кызьы Жужикаез адӟоз? Нош Жужика сое тодмалоз-а меда? Сое Пешта тодмасал сю нылъёс пӧлысь но, сюрс пӧлысь но.

Галамбошысь нылъёс но ӧз изе лымшорозь.

Нырысетӥ рота гурт пуме вуытозь, одӥг коркан но дасяськымтэ-дӥсяськымтэ ныл ӧз кыль ни. Йырсиоссэс анайёссы чебер, юн-юн вольыт пунӥзы, кымесъёссы гинэ тӧдь-тӧдь пишто на. Выль модая вурем дэремъёссы вылын лентаос, чильпамъёс сэзъясько. Коркаос но чылк-чылк утялтэмын, курасьёс лыктозы, кожалод.

Пешта Корцош трос пол вал ини Галамбошын, тапала ветло
Уйлак базаре, но татчыозь
ӧз малпаськылы на, кудпалан улэ Жужика.

Сабадошъёс кытын уло шуыса юаны возьыт потӥз. Мар кароно табере? Пияш азьлань мынӥз, мынӥз. Отысь-татысь пиос сюрылӥзы пумитазы, соос но киязы роза зыно вуэн. Нылъёс гинэ ӧз адӟиське нокытын. Нылъёс сыӵе дыръя коркан возьмало кавалеръёсыз.

Ой, тӥяз ук йырзэ Пешта эшмы, кызьы шедьтоно Жужаез.

Учке но, синмызлы уг оскы. Гурт шорын ик выль чебер коркалэн азьпалаз гожтэмын: «Инмар юрттэмъя Сабадош Габор пуктӥз». Ух, та луоз со корка! Та ук Жужикалэн атаез.

— Ну, татчы пыром, — вынъёсызлы куаретӥз но кечат-вамат пулъёсын чебермам пичи капка доры вамыштӥз. Корказе пыризы, отысен — корка пушкы.

Ӧс куспы ог-огзы вӧзы султӥзы. Пешта зол куараен кутскиз:

Туннэ усьтӥськиз инлэн

ингурез,

Туннэ васькиз муз вылэ

кылчинэз,

Му вылысь кулонэз улонэн

воштӥз,

Ин улын луисьёс пӧлын

сан но дан басьтӥз.

Кузь кылбурзэ тыршыса пумозяз вераз, синмыныз со куспын, портыса сямен, отысь-татысь утчаськиз, кинэ утча, оло, адӟоз шуыса. Нокытысь но ӧз адӟы Жужикаез. Пичиез но, бадӟымез но нылъёс сыло, но Жужика ӧвӧл.

Выныз но вераз ни ас кылбурзэ:

Кисьтаны татчы лыктӥ,

Роза зын вуме вайи,

Утиське али, нылъёс,

Кисьтало тани рос-прос…

Пичиез но чурен-чурен
вераз:

Лык дорам, пичи Музае,

Мон ӧй ветлы на школае,

Но озьы ке но тодӥсько:

Иисусмы туннэ вордӥськем.

Вань умойзэ сӥзисько,

Коньы-копейка возьмасько.

Пияшлэсь кылбурзэ кылыса, ваньзы ик серекъяны кутскизы: пичи визь люк шугъяськем-кепыраменыз Ымусьтон кылбурзэ вераз. Пешта, выныз понна возьдаськыса, шораз ыргетӥз, но корка кузё гордэктэм пичи пияшлэсь тыбырзэ топ-топ вешаз:

— Ярам, покчи эше, тодӥськом коть, малы вань кык праздникмы. Толон Иисус кулэм, туннэ выльысен вордӥськем. Та кылбуред понна кык чебермам пуз сётом… Ну, кытын ини со нылмы буям пузъёсын?

Пешта но сое возьма ини туж.

Но соку витьымтэ шорысь маке луиз. Висъет ӧс усьтӥськиз но, ньылон тыр чиргетыса, ӧс куспы Жужика потӥз.

— Мар луиз! Мар луиз?! — кышказы ваньзы.

— Чебермам курегпузъёсты кин ке сӧрем! — викышъя Жужика.

— Кин вал со! Кин озьы кариз?! — черекъяло анаез, атаез.

— Кин вал со? Кин луоз на, Марча сяна, Марча Тот.

Толон ӝыт Марча Жужика доры вуылӥз но Париттяшын мар луэмзэ мадиз. Собере ушъяськиз, озьы ке но анаез быдэс куды курегпуз чебермаз шуыса. Паймыса учкиз, ушъяз, вожъяськиз Жужикалэн курегпузъёсызлы. Кин эшшо, со сяна, чуланэ лушкем пырыса, ваньзэ сӧриз-нажгатӥз.

Пешта Жужикалэсь бӧрдэмзэ учкиз, учкиз но вераз:

— Эн бӧрд, Жужи, луоз на буям курегпуз. Эн кышка, тонэ сотэк но Париттяшысь котькуд пи кисьталоз, нош со вожъяськисьлэн корка азяз но нокин уз мын, сое тыныд мон, Пешта Корцош, верасько, кылме сётӥсько!

Жужи шораз учкиз:

— А, тон-а со? Ма, тынад курегпузэд кылиз. Мон сое нимаз понӥ вал.

Вуж шкаф доры мыныса, лач-лач тырем куэм-пужъятэмъёс вискысь куинь синмаськымон чебер буям курегпуз поттӥз но куиньзэ ик Пешталы сётӥз.

Пешта Жужа шоры учкиз:

— Шуи ук, мон тонэ тодмало. Шуи ук, тон монэ уд тодма.

Жужика пельпумзэ гинэ выретӥз серекъяса. Сыӵе паймиз. Синлыс вылаз синкыли чиля на, нош кескич пичи ымдурыз серекъя ини. Сӧриськем курегпузъёсты уг но жаля ни кадь.

Мӧйыос, атаез но анаез, ваче учкизы но кык пиналъёслэсь тыбырзэс вешазы.

Кыкез пичи Корцош пиос но та корка ик кылизы, малы ке шуоно агайзы шуиз, со мукет интые уз мыны ни нылъёсты пылатыны.

Капка азе султӥз но Париттяшысь вуись котькуд пилы та учыр сярысь вераз.

Жужикаез котькуд пияш кисьтаз. Галамбошысь но, Париттяшысь но, курегпузъёстэк но пылатӥзы.

Нош Марча доры нокин ӧз йыгаськы.

Нуназе котырын куинь чиган пиос пыризы ик доразы.

Марчалэн анаез чебермам курегпузъёсын быдэс кудыез ик соослы сётӥз.

Но Марча, сьӧразы мыныса, талаз ваньзэ. Таосызлы но вожъяськиз.

Ӧз но ветлэ ни матаз чиган пиналъёс но.

Мадьяр кылысь берыктӥз Анастасия

Деметер-Петрова

Удмурт Дунне
By Удмурт Дунне 22 апреля, 2020 17:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<