Армян но ӟуч выжыысь… удмуртъёс

Ангелина Снигирева
By Ангелина Снигирева 7 апреля, 2020 14:14

Кияса ёросысь Уддядие (Карамас-Пельга) вуыкум, синъёсы одно ик соосты утчало. Тодӥсько ке но, Пилоян кузпалъёс одӥг аре, одӥг арня куспын кошкизы улонысь… Арня но ог-огзытэк улыны ӧз быгатэ.

Кияса ёросысь Уддядиысь Пилоянъёслэн семьязы.

«Чырткем! Как дела?»

Но сюлэм уг дышы, уг оскы. Тани контора сэргысь потоз кадь котьку шляпаен ветлӥсь, пыӵ кадь шаплы, мыйыко Максим Николаевич но шуоз:

— Чырткем! Как дела?

1960-тӥ аръёсы, Ижысь сельхозинститутэз йылпумъяса, Максим но Тамара Пилоянъёс ужаны лыктӥзы Кияса ёросысь «Ленинец» колхозэ. Картэз — инженер, кышноез — зоотехник. Гуртоос понна тужгес йӧспӧртэм вал соиз: Максим Николаевич — Грузиысь армянин, Тамара Петровна — ӟуч кышномурт. Ма, быдэс «Ленинец» колхоз но интернациональной. Уддядиын — удмуртъёс, Ушкурын — поръёс, Байсарын — бигеръёс, Вознесенскын — ӟучъёс, Купчаын — ӟучъёс но удмуртъёс. Кузпалъёс, Уддядие вуыса, удмуртомизы. Бон ачиз Пилоян асьме кылын туж ик ӧз вераськы, но пельёсыз сак вал — уд алда. Нош Тамара пичи дыръяз артысь Купча гуртын улэм. Шур сьӧрын ӟучъёс вылӥллям, шур тапалан — удмуртъёс, соин ик паймонэз ӧй вал удмурт сямен ваземезлы.

Кӧня ке дыр ортчыса, 26 аресъем инженерез колхоз предэ бырйизы, озьы Удмурт шаерын нырысьсэ армян воргорон колхоз кузё луиз. Нош Тамара Петровна быдэс улонзэ татын валтӥсь зоотехник луыса ужаз, со УАССР-ысь дано зоотехник. Вакчи дыр куспын «Ленинец» колхоз миллионер луиз. Фермаос, гаражъёс выльдӥськизы, выль урамъёс кылдӥзы, школа, клуб, магазинъёс ужазы. Гуртозь вуиз асфальт. 23 ар М. Пилоян зол гинэ тэльбугозэ кутӥз, солы орден сётӥзы, УАССР-ысь Вылӥ Кенешлэн депутатэз вал. Кузё вань колхозникъёсты нимын-тулын тодэ вал, нош Тамара Петровна пудо утисьёсты либытак Сэдык апай, Нюра апай шуылӥз. Кузпалъёс огъя кыл шедьтылӥзы ӟучен но бигерен, порен но таджикен, тужгес ик удмуртъёсын. Пилоянъёс данъямын вал Россилэн «За любовь и верность» медаленыз.

Курег кутылӥсьёс

Син азям али но пуксё Пилоянъёсын герӟаськем куд-ог учыръёс. 1963-тӥ арын ми Вуж Салья школаын 3-тӥ классын дышетским. Нина Викторовна дышетӥсьмы шуэ: Уддядиысь лыктэм Тамара Пилоян, армян кышно, солы, пе, курег кутылӥсьёс кулэ. Ваннапал урамын, Ӟамбетъёс вадьсын, колхоз контора вал. Колхозмес Юрмалаен огазеям бере юрт бушаз. Артэ ӝужыт забор ӝутӥзы, озьы гурт шорын ик курег гид луиз. Но курегъёслэсь пайдазэ ӧз адӟе, соин ик соосты Уддяди колхоз басьтоно кариськем. Ура! Классын пукытозь, курег кутылом.

Милемлы, пичиослы, гуртысь потамтэослы, телевизор-компьютер адӟылымтэослы, ӟуч кылын шенгыль-пенгыль вераськисьёслы, армянъёс негръёс кадь сьӧд куо пото вал. Но милемыз пумитаз йӧн-йӧн чебер кенак, небытак гинэ удмурт сямен вазиз: о, юрттӥсьёс, пе, вуизы.

…Уг ни тодӥськы, кин меда золгес черекъяз: кышкам курегъёс яке ми, пичильтыкъёс. Куномы кошкем бере вераськиськом: армян кенак дотово чебер, мунё кадь, тӧдьы йырсиё, а эшшо удмурт сямен вераське. Вот тыныд негр кышно!

Ӝыны даур ортчыса, ёрос газетын ужакум, Тамара Петровналы верай курег кутылэммес. Со кит-кит серекъяз, кыӵе армян кышно чебер шуэмысьтым.

«Сием потэ…»

Максим Пилоян 23 ар колхоз предын ужаз бере, дорысь уж семья вылын вал, тужгес но — тулысысен аран бырытозь. Кузёлэн аслаз шофёрез — Ондрей агай Андриянов, ожысь но ужысь ветеран. 90 арессэ ортчем песятай али но руль сьӧраз ачиз пуке. Предлэн шофёрез вераз одӥг учырез, эсьма, ӵошен горим.

…Гужем нуналэ Пилоянъёслэн Алёша пизы папаез сьӧры калъяськиз. Ма, уске, мед ветлоз. Со нуналэ пред кытчы но ӧз вуы! Нырысь складэ, отысь Гуӵинпал бусые, комбайнъёс доры, бӧрысь — Байсаре, выль ферма ӝутонэ. Пиёклы дотово тунсыко — мае но ӧз адӟы! Но акыльтӥз ик кадь: пӧсь, тузон. Утыр эшъёсызлэсь но мӧзмиз. Сием но потэ ини… Нош папаезлэн тодаз ӧвӧл пиез — только уж. Ондрей агай, шофёрез, шӧдӥз: Алёшкалэн бӧрдонэз ымдураз.

— Ма луиз, пие? — юа шофёр.

— Сиеме потэ… — викышъя Алёшик.

— Спроси, чего он хочет? — Пилоян но валаз пиезлэсь мылкыдзэ.

— Сиемез потэ, — валэктэ Ондрей агай, — тыныд вераны курда, тышкаськод, пе.

Собере Максим Николаевич валаз: удмурт кылэз дышетоно! Кузпалыз, Петровна, нылпиосынызы удмурт сямен гинэ вераськылӥз, нош картэз артэ ке — ӟучо-удмурто. «Сиеме потэ» — тае армянин пересьмытозяз ӧз ни вунэты.

«Ротаям мон огнам удмурт»

Пилоянъёслэн бадӟымез пизы, Алёша, армие кошкиз. Нырысь гожтэтъёсаз вера вал: мӧзмисько Уддядилэсь, удмурт кыллэсь, эшъёсылэсь. Нош огпол гожтэм: «Мон ротаям воксё огнам удмурт, вераськыны нокинэн». Мамаез солдат пилы гожтэ: «Алёша, табере ӟуч сямен ивордэ лэзь, папаед мӧзме, солэн но гожтэтъёстэ лыдӟемез потэ».

«Ас кылдэ ӧд на вунэты-а?»

Пилоянъёслэн бадӟымез нылзы ёросысьтымы Атабай школаен кивалтэ, ӟуч кылъя но литературая дышетэ. Марина Ажимова шуэ:

— Мыным уддядиос удмурт кылэз вунэтыны уг сёто. Арлыдо кенакъёс одно ик юало: нылы, ас кылдэ ӟуч гуртын ӧд вунэты-а?

— Кызьы сое вунэтом? — пальпотэ Марина Максимовна. — Али но сузэр-вынъёсыным удмурт сямен вераськиськом.

Пилоянъёс 5 пинал будэтӥзы. Мариналэн картэз ӟуч, Надялэн — удмурт, Танялэн — украин. Алёша но Максим кема гинэ 
бырйисько ини — ӵок, кузпалъёссы ӟуч луизы ке но, ас кылзэс уз вунэтэ.

— Азьло паспортэ национальностез гожто вал, — шуэ Марина Ажимова. — Ми, 5 нылпиос, асьмемыз армян гожтӥм. Шаерамы ӟучъёс митэк но трос, армянъёс ӧжытгес. Папамы сыӵе куанӥз, эсьма, синвуосыз ик потӥзы.

Петровна

— Папамы мамамес весяк Петровна гинэ шуэ вал, — серекъя Марина нылзы, — нош мамамы сое только Максим Николаевич. Калык азьын но, дорын но. Озьы быдэс улонзэс. Со вал ог-огдэ яратон, гажан.

— Нош семьяын кин кузё вал? — тодэме потэ.

— Папамы, валамон. Со милям вулкан, гейзер кадь пуштӥсь вал, нош мамамы — туж гань-гань, вожез потэ ик, дыр, вал, но мылкыдзэ ноку ӧз адӟытылы. Папамы ми понна котьку авторитет, гажано адями вал. 50 ар тупаса улӥзы, улонысь но кошкизы ӵош. Ог-огзытэк ӧз чидалэ, 2 юсьёс кадь.

Пичи Максиос, Томиос

Пилоянъёс институтэз быдтэм дырысенызы быдэс улонзэс Уддядиын улӥзы. Чын, пред шунды ӧй вал — ваньзэ уд шунты, толэзь но ӧй вал — ваньзэ уд югдыты. Но Максим Николаевич лексэ кема ӧз возьылы — ӵуказеяз нош ик эшъёс, ӵош ужано ук. Гуртоослэсь Пилоянъёсты гажамзэс вера та учыр но: ӝыны даур ӵоже «Ленинец» колхозын трос гинэ вордскизы пичи Максиос но Томиос — Пилоянъёс кадь, пе, мед луозы.

Кузпалъёс улонысь кошкем бере уддядиос асьсэ уксёен, ас мылкыдзыя Пилоянъёслэн улэм юртсы борды буре ваён пул шуккизы, нош ёросын, М. Пилоян председательлы сӥзьыса, бызьылонъя ӵошатсконъёс ортчыло. Спонсоръёссы — Пилоян нылпиос, гуртоос. Армяно-ӟучо-удмурто семьялэн выжыез медаз быры, медаз ышы. Мон ӵектысал на уддядиослы: дыр вуэмын огезлы урамзылы Пилоянъёслэсь нимзэс сётыны. Колхозлэн самой зарни вакытэз вал, соос кивалтыку.

Геннадий ПАРФЁНОВ, Россиысь Журналистъёслэн огазеяськонзылэн ёзчиез

Ангелина Снигирева
By Ангелина Снигирева 7 апреля, 2020 14:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<