Андрей Гоголев. Иворъёс. Романысь люкетъёс

Удмурт Дунне
By Удмурт Дунне 23 апреля, 2020 17:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Андрей Гоголев, кылбурчи, писатель, М. Горький нимо литинститутысь аспирант.

Романысь люкетъёс

4-тӥ люкет

Яратон сярысь

Ваня туж йӧно дусым вал. Подъездысь тубатэз таркам розаосын шобыръямезлы кызьы уд синмаськы — малпанъёсаз ваньмыз чебер вал ук. Нылашлэн квартираез дорысен тамак пумъёсын шобыртэм тэшкам укно дурозь, кытчы Ваня аслэсьтыз туспуктэмзэ понӥз, сяська бурдъёслэсь сюрес вальыны дуно усьысал. Соин со сюсьтылъёслэсь сюлэм пӧрмытӥз, нош буш интыяз розалэсь бурдъёссэ вӧлдӥз — яралоз. Улӥяз сяськаослэсь кылем-мылемзэс понӥз на. Тросгес мед адӟиськоз. Ӧсэ жингыртӥз. Пегӟиз. Тазьы шыръяса но, аслэсьтыз туспуктэмзэ кельтыны ӧз вунэты, сое понӥз сюсьтылъёслэсь сюлэм азе. Туспуктэм: Ваня ВАЗ машиналэн руль сьӧраз, тӧдьы дэремен, сиресэз ӝутэмын, зарни жильы, сьӧд очкиезлэн мильымъёсаз туспуктӥсь адске. Машиналэн ӧсэз кырсь, вылаз кыӵе ке вишты лякыштэмын.

Ӧз сёты.

Коньдонэз кылдӥз. Тодмо печатникез вал. Печатлазы нылашлэн туспуктэменыз кузь баннер, со улӥе учке. Ваня туспуктэмез фотошопын ачиз тупатъяз. Туспуктэмзэ шедьтӥз ныллэн вотэс бамысьтыз. (Тупатъямтэ фото: ныл Викаез кык китӥз кутэ, со нылпи садикысь выпускной. Викаез но киосты вандӥзы.) Баннерлэн улаз Ваня ассэ лякиз. Тӧдьы дэремен, ӝутэм сиресэн, сьӧд очкиен со лыз сюлэмъёслэсь пӧрмытэм пагӟаетӥ нюштыртэ. Горд буёл ӧз тырмы. Ӝуждалаез — 5 метр, пасьталаез — одӥг. Баннерез интыязы ныллэн подъездэз дорысь кызьпуос вискы, бодые. Улыз музъем вылын сюл-кал кыстаське, вылланегес ӝутыны ӧз сузе.

Мукет нуналаз Ника та коркась выль интые улыны выжиз. Мон сое ӧй ни адӟылы. Ваня соку трос кыскиз но вералляз, пуньырамез потэ шуыса. Уйин водка басьтӥз но огназ юыны кошкиз. Гопниклы чассэ кузьмаз. Ӵушъялэз шедьтӥз, тӧдьы дэремзэ кылиз, центретӥ ӵушъялэн солань-талань ветлӥз. Уен-нуналэн ужась лавкаысь ӵушъяллы йӧл басьтӥз. Гужем кафеысь «пиво Красный Восток» гожтэмен пуконэз лушказ — прудлэн ярдураз пукыны, ву шоры учкыны но шунды ӝужанэз ӵушъялэн ӵош пумитаны. Но кудӟем йыраз оломар шуккиз. Ваня ӵушъялэз выйтыны мынӥз. Мон, пе, Вукузёлы курбон сётӥсько. Ваня дэремаз бинялтэм ӵушъялэз вуэ лэзиз. Ӵушъял соку ик лугыр-лугыр вырыны кутскиз, дырекъя. Ваняез быдэс бышказ, солэн киосысьтыз бус кадь вир вия. Ваня ӵушъялэз ярдур вӧзысь нюлэскы лэзиз. Дэремзэ тыметэ сэрпалтӥз. Зар-зар бӧрдэ огназ. Ника солы ӧз сёты. Ачиз Вукузёлэсь кӧтсэ ӝож кариз. Ӵушъялэз вие ини вал. Чассэ сётӥз. Дэремзэ изъянтӥз. Бадӟым пӧсь синкылиос, ымныртӥз васькыса, тузон вылэ усьылӥзы.

5-тӥ люкет

Гондыр

Витьтон удмуртъёс пластмасс валъёс вылын сьӧд бусы кузя ширто. Вал пыдъёс улын музъем бугырске, омырлэсь сӥльзэ шуламъёс кесяло. Вӧзазы гондыр погылляське.

— Гондыр! Умой, гондыр! Кужым вань, амал ӧвӧл! — кесясько удмуртъёс.

— Я, я, — вазе гондыр. — Тани куто но мар ке мукетызлы пӧрмо.

— Мар-о вераськод?

— Мае уд возьмаське, солы ик пӧрмо.

Дугдытӥзы удмуртъёс валъёссэс, пуксись тузон пушкын Лади батырлэн юн мугорыз адскиз, вӧзаз пичи гинэ вал сылэ, со вылын Пичи батыр пуке, тӧролэн выныз но валтӥсь юрттӥсез.

Со вакытэ инбаме олокытысь-марысь ӝутскиз иронилэн тӧдьы мугорыз. Удмуртъёс пукыӵъёссэс вылӥе ӝутӥзы, ньӧлъёссылэн йылъёссы ӝуало-чиляло. Лади батыр чӧльыосыныз улӥе возьматӥз но, ньӧлъёс но улӥе лэзиськизы.

Гондыр выж лёгет кадь вӧлдӥськиз сьӧд бусы вылтӥ, нош удмуртъёс азьлань кошкизы, вордӥськем музъемзылэсь пурӟытэм пырыоссэ сьӧразы кельтыса.

9-тӥ люкет

Измурт

Ӝоген ваньмыз кошкоз-быроз, ваньзэ утялтозы, шуэ мыным Лади. Пельтэм Ондӥ юа солэсь: маро-о-о? маро-о-о? Лади вадьсазы сылӥсь коркаезлэн укноосыз пала киоссэ мыче: пегӟыны кулэ ни. Пегӟоно, уске. Мар бен, номыр уз кыльы ни шат, Лади?

Измурт кылёз.

Куке музъем тӧдьы вал най, со пушкы нокин ӧз кулылы, шепъёслэн модосъёссы тысен быдэс шобыртэмын вал. Кышноос нянез октыку-калтыку, нуныос штанязы сӥтязы. Ӧз васькелэ шур дуре азьтэм кышноос. Шепен ик ӵушалтӥзы. Инмар тае адӟиз, чабкиз но — бусыос пилеш луизы, нош инбам выллане ӝутскиз. Инмар Толэзьлэсь ӧссэ усьтӥз но со пушкы пыриз. Куатаськиз. Инбам ялан выллане кошке. Адямиос вӧсяськизы, курбон сётъяллязы, но Инмарлэн соосты кылзэмез ик ӧз поты. Сютэм улон вуиз. Пуныез но номырин сюдыны. Соку пуны толэзь шоры вузыны ӧдъяз. Мар-о луиз? Инмар, мон шат сьӧлыкай? Тон монэ адямилэн ляльчиез карид, шеплэн йылаз пуны пайме сётӥд. Инмар валаз: пуны ачиз понна уг сюлмаськы, адями понна куректэ — толэзь пушкысь потӥз, шултӥз но, пилеш бусыос вылын тысьёс кылдӥзы. Нош инбам озьы ик музъемлэсь палэнске. Куке но со копак кыдёке ӝутскоз но, кезьыт луоз. Инмар гырпум котыртӥз висэз бинялоз но, ваньмыз ышоз-быроз. Мукет сямен вераса, Инмар гырпум котыртӥз ингожез бинялоз.

Измурт — со излэсь адями. Сое нокытысь но адӟыны уг луы, со Байгурезь пушкы ватэмын. Куке ваньмыз ышоз-быроз, ваньмыз пегӟоз, со сайкалоз но, излэсь выль удмуртъёс кылдозы. Кытысь тон тае кылӥд, Лади? Бен ваньмыз тае тодо.

10-тӥ люкет

Иншургурт

Удмуртия но Татарстан вискын, Туташ гурт палан, Иншургурт сылэ. Мутус (карта) вылысь сое уд шедьты: геодезиен вырисьёс, карта лэсьтӥсьёс татысь юртъёсты аналтэмен лыдъязы, гидъёс тэк сыло, шуизы; соин гуртэз карта вылэ пунктирен пусйизы, «разр.» пус пуктӥзы, нош сизьымдонэтӥ аръёс бере Иншургурт воксё но мутусъёс вылэ ӧз ни сюрылы.

Трансформаторной будка, бус костаське, тӧдьы гын сапег кадь, ЛЭП-лэн корт лыосыз вылысь куать езъёс мушъёс кадь гужгето, музлэсь одӥг но ӝыны метр вылӥынгес нап-ӵуж помидор каллен гинэ лобе, берга. Со озьы адями мынэ, нош помидор — солэн сюлмыз. Иншургуртын сукыр адямиос уло, соосты но нокин уг адӟы. Сюлэмъёссылэн нап-ӵуж помидорзы гинэ адске. Соос ваньзэ кыло. Скалъёссэс бӧксэмзыя яке гырлыоссы жонгетэмъя утчало, яке, мугоръёссылэсь шунытсэс шӧдыса, шедьто. Мон доры, каллен гинэ лобӟыса, матэктӥз помидор. Та калык киужен-мар уг выры, татын ӵукнаысен уёзь кырӟало-верало. Мурт адямиез яке кионэз шӧдо ке, кырӟамысь дугдо. Гондырез ке — кырӟаны яра. Но солэсь нимзэ шара поттылыны уг яра. Бадӟым мужик, пе, нимано сое.

Иншургуртын улӥсь пересь кышномурт вылэм. Мон ваземез бере гинэ тае валай.

— Ӟечбур! Мынам нимы Ондӥ. Мон кылбурчи.

— Остэ, Инмаре, Ондӥ.

Валаз, мон сое вӧсь уг кары шуыса. Китӥм кутӥз. Пересьлэн саесэз вань, но со уг адӟиськы. Озьыен, адӟиськисьтэм етӥнэн шобыртэм бусыос но вань татын. Ми уллапалтӥ вамыштӥськом, бус пушкы-тӥ. Нап, мон сапегме но уг адӟиськы. Шурлэн пыдсаз шуккем пу майыг борды дурыныз пыж кокаське.

— Остэ, Инмаре.

Пыдесъёсы кот луо пушкы выё. Мон вуэз адӟисько. Шур вылтӥ ширъясь кибыос, вутурынлэсь кузь йырсизэ вандыса, кошко. Тупалан кырӟало.

11-тӥ люкет

Можга батыр

Зэмзэ ке, Лади кураськыса ӧз улы. Супыльтӥсьёс Ладиез тордос шуо. Мон солы водка басьялляй, но со сое ӧз юылы, люкаса возиз. 20 литр бензин пунэмен куриз вал, ваньзэ берыктӥз. Ас мылкыдыныз ваньзэ мадьылӥз. Ондӥ сое «куальтра ым» шуэ вал, нош ачиз Ондӥ пельтэм ук. Кытысь-о, пе, сонгро адями тодоз, алдаське адями яке уг? Мон, Ладиез кылзылыкум, солы тамак сётылӥ. Огпол гинэ сое кудӟемен адӟи. Соку но, монэ синйылтыса, со шуиз: куд-ӟи, кудӟи-и-и, эн курлалэ вал!

Кызьы Можгаез ватӥм. Ньыль кузя сое уробо вылэ понӥм, бызьыса кошким. Ми палан мукет сямен, йӧскадь вато, но батыр ачиз валэктӥз, кызьы сое ватоно. Бызиськом, ӟукыртӥськом, со тӧрна, вуын котмем юбка кадь, секытгес луэ. Солэн кускерттонэз кесиське, сое кышноос пунӥзы вал. Тыл дурсыез (пуйы) кус бордаз думемын, отын со нуллылӥз спичка но мар но со, вот соиз солэн вупульы кадь луиз ини тордыса. Маке сьӧд пушкысьтыз вия, мувӧй порма-а, мар-а. Пертчылоно-а, ӧвӧл-а, но тани пертчылӥм но, отысь атас лобӟыса потӥз, кесяське, тылыоссэ котыр пазя, нош тылыосыз муз вылэ уг усё, омырын солань-талань бергало. Можга ассэ Чебер шур дуре ватыны косӥз. Ярдуре вайим, какалӟим. Сьӧрамы кышноос вуо инь. Ми кышноос шоры учкиськом, соос — ми шоры. Шӧдтэк шорысь кутскизы ук гырпумъёссы сьӧры ватскыны, кин черекъя, кин серекъя, кин кесяське, нош ми адӟиськом: Можга улын уробо но куашказ ини, ачиз но со тӧрнамын, дэремез но уг адӟиськы. Быдэс будӥз, кукъёсыз гинэ малы ке ӧз будэ. Пуртэз кукъёсыз вискын шонаське. Учкиськом: мугорыз кузя тӥнь со маке сьӧд вия, мувӧй но ӧвӧл кадь — сьӧд ву. Озьы му пушкы ик вияз Можга батыр.

Лади, тон сыӵе мадиськод, тон отын вал-а, мар-а? Ваньзы отын вал, мон тонэ уг пӧяськы, озьы ук?

Вияз со, Чебер шуре кошкиз. Нош ми со интые батырлэн куремезъя горд юртлэсь кык борддорзэ ӝутӥм. Озьы ик нимаське вал со инты азьло, Горд юрт. Горд юртлэн сэргыз али но отын сылэ, кык укноез вань. Угось батыр куке но, мар ке но весь утчаса, юртъёсты сэрегъёстӥз ӝутъялляз. Учкылӥз юртъёс улысь. Флейта, шуо, аслыз бетон юболэсь лэсьтӥз, уртъёсты (дух) ӧтчалляз но кенешылӥз соосын.

12-тӥ люкет

Дунне Пудга

Дунне югдур сярысь вераськыку, лыдэ уг басьто Бадӟым но Пичи Пудгаос вискысь эчешонэз. Дуннеын уг но тодо Можга ёрос сярысь, кытын та даллашон ортче. Зэм, та Газа инты ӧвӧл, но саклык висъяно ик вал. Бадӟым Пудгаын стадионзы вань, нош Пичи Пудгаын стадионзы я кылдэ, я ыше. Та вошъяськон пичи пудгаослэсь кӧтсэс ӝож каре. Стадионзы ванен-ӧвӧлэн йырин сыӵе зол ӧз но ӝожомысалзы, дыр, но доразы Бадӟым Пудгаысь Кант нимо отряд вуылэ но ну горе ук, стадион ышылыку. Пичи пудгаос, арам-сюрам луэмзэс шӧдыса, Фрейд нимо отряд кылдытӥзы. Отряд бадӟым пудгаослэсь йӧнала улонзэс куашкатыны кызьпулэсь таран лэсьтӥз. Кылдӥз на Кыкто Пудга пичи группа. Но сое, тракторе пуктыса, Можгала нуизы.

13-тӥ люкет

Югыт

Можгаос тылын шокась адями-азьдагаослэсь (дракон) кылдӥзы. Со ӝыныё адямиос но ӝыныё драконъёс ноку ӧз изьылэ, тушмонъёссэс сиыса улӥзы, со сяна, соослы удул выжыысь кӧчылӥсь калык курбонлы вае вал адямиосты — соосты но сиылӥзы. Удулъёс можгаослы инмаръёслы кадь йыбырттылӥзы. Адями-азьдагаос флейтаен шудыны быгато вал. Шудылӥзы соос изъёс понна. Шудылӥзы, тылэн шокаса, собере изъёс небӟылӥзы, адями-азьдагаос, флейтаоссэс изъёс пушкы мертчытыса, непыльӟем изъёс пушкы гуръёссэс шудылӥзы, крезьгурзэс йылпумъяло вал, сюмык пелляса ини. Та суредэз Можгалэн гербез вылысь адӟыны луэ. Та амалэн кылдэм посуда дун-чылкыт лыдъяське, отын пукем ву чылкыт луэ, шуо, ошмесысь дун ву кадь чылкыт.

Та пала вуылэмъёс чаклазы, можга вырйылъёсын котьку но югыт шуыса. Тае валэктыны капчи: адями-азьдагаос уен-нуналэн посуда лэсьязы. Нош палэнысь вуэм калык, тае адӟыса, можга вырйылъёсты нырысь нимаз инты, кытын югыт, бӧрысь «югыт» кыл гинэ кылиз, со бордысь ик та карысь заводлэн нимыз но потӥз. Адями-азьдагаос кытчы кошкизы, нокин уг тоды.

Ӟуч кылысь берыктӥз Анастасия Шумилова

Удмурт Дунне
By Удмурт Дунне 23 апреля, 2020 17:26 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<