Анастасия Ермакова. Мамай кышно. Верос

Удмурт Дунне
By Удмурт Дунне 20 апреля, 2020 17:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Анастасия Ермакова, Москваысь прозаик, «Литературная газеталэн» валтӥсь редакторезлэн воштӥсез

Так ке солэн нимыз Надяпай вал. Ми, пичи макеос, корка дортӥз шур-вар бызьылыкумы, со капказэ усьтэ но, кудмес ке китӥмы кырмыса, юа: «Тон бон кинлэн-о луиськод ай?» Пинал шузимыса кесяськыны кутске, ишкалске но ульча трос горыса пегӟе.

Со ог 70 аресъем песянай вал, ӝужыт, ӟызы, котьку но йӧспӧртэм дӥсяськемын, лякыт ымныро но шорад кызьы ке озьы учкись — тани-тани маке туж кулэзэ, лушкемзэ вералоз кадь.

Сад-бакчаяз со быдэс ар ӵоже улэ вал. Аслаз хозяйствояз кеч, кроликъёс возиз, быдэс нуналъёсын азбартӥз отӥ-татӥ шумприч бергаз, мерттӥськиз, уриськиз, удобрение киськаз. Сергей нимо кузпалыз висиз ни, ялан кызыса улӥз, часъёсын кыллиз усьтэм верандаын «Наука и жизнь» журналъёс пӧлын, конгро чиньыосыныз котэн гыжмытэм журнал бамъёсты лисъяз.

Мамай кышно монэ ӟеч тодэ вал — солэн Сашуня нунокеныз 3 арес котыраз ми ӵошен одӥг пичи ваннаын мисьтӥським. Та сюлэмез шунтӥсь учыр сярысь собере со арлы быдэ мыным огвыллем бурдъяськыса вералляз.

— А, Кати! — вазе вал мыным 8 арес дыръям, — кытчы бызиськод ай, нуные?

— Пыласькыны, Надяпай! — кеськыса, мон утыр пегӟисько.

— Анаед кыӵе ни?! — кеське со бӧрсям.

Нош мон кылымтэ улсы кариськисько. Мар кыӵе ке пересен вераськонэз!

Ми сое серем карыны яратӥськом вал. Котьку маке выльзэ малпаллямы.

— Надяпай, Надяпай! — ог-огмес азьпалтыса, кесяськиськом корка дораз. Со куалектыса, тэтчыса потэ. Йыраз кӧжыё пичи панамка, сьӧд сюй тусо киосаз — кукчо.

— Надяпай, кечед нюлэскы пегӟем ук, отысен сое кырпарсь кесям! Ум алдаськиське, асьмеос адӟим, — сереммес мырдэм возьыса, пӧяськом.

Мамай кышно тӧдектэ, кукчозэ куштэ но нюлэс пала бызе. Нош ми горыса корка сьӧраз пегӟиськом…

Яке юри култӥськиськом вал: пиналъёс пӧлысь кин ке укно улысьтыз сюрес вылэ ик выдэ но маке вӧсь луэм кадь нискетыны, юрттэт курыны кутске. Со серемес выросъёсмылы Мамай кышно котьку оске вал, бызьыса потэ, лулӟылэ, кыӵе ке эмъюмлы берен дораз пыре. Со вискын ми пегӟиськом.

Пӧсь куазен но со куятэк нуллӥз гын сапегъёссэ, йыраз котьку — тӧдьы кӧжыё чагыр такъя, мугораз — сяськаё, гыжмыны кутскем шуныт халат. Та дӥсезлэн бирдыосыз но кемалась ӧй вал ни. Бирдыос интые кык интыын халат юнматӥськиз сыномем тэчкон венен. Сыӵе дӥсяськемзэ ми серекъяськом вал. Эшшо серекъяськом вал, со сыӵе пересь, ыльык-сыльык, но та дунне вылын аслаз шузи кеченыз но висись песятаеныз ялан малы ке улэ на шуыса.

Мамай кышно ар бӧрсьы ар уг но пересьмы вал кадь, ялан огвыллем улӥз. Но шуак одӥг гужем ӵоже ваньмыз воштӥськиз: мон будӥ, песянай губырскиз, песятай — кулӥз. Кечез но кроликъёсыз кытчы ке ышизы, мылкыдтэк, каллен гинэ бергаз со бакчаяз. Уриськем интыысьтыз сьӧд музъемез жаг турын оломар куспын нош ик согылӥз, пересьлэсь тыршемзэ ӧвӧлтэм карылӥз.

Пельыз но урод кылыны кутскиз. Соин ик ми, 14 аресъем шпанаос, садаз уйин пыраллямы, куаӵ-куаӵ куртчоно ческыт улмооссэ лушкаллямы, котькудмылэн садамы ӵапак сыӵеосыз ик будӥзы ке но.

Азьвыл сямен ик Мамай кышно сюрес вылэ поталляз. Но табере со номыр ӧз ужалля, урод адӟись синъёсыныз котыр мӧзмыт учкылӥз, маке утчась мурт выллем. Монэ адӟыса, пальпотэ вал. Но нимме тодаз вайыны шугъяськиз ни, янгыше усем мурт сямен, дыртӥд-дыртӥд кӧня ке нимъёсты бичаз:

— Кин ай та? Иринӥ-Ленӥ-Кати?

— Катя, Катя, — керӟегъяськыса верасько мон но ӝоггес азьлань дыртӥсько. Ма мар сярысь мон соин вераськом?..

Берме учкыса, со кема сылӥз, губырскемын, аслаз кӧжы панамкаеныз, куятэк нуллоно гын сапегеныз. Долкаса кадь учкылӥз тузонэн пурысьтам турын, йылсо шаянтӥсь ваёбыжъёс но гылӟыса кадь кошкись улон шоры…

— Воксё огнам мон, — огпол шуиз, — тон коть пересь мурт доры куное пыра вал…

Та бӧрсьы мон мукет ульчаетӥгес ветлыны тырши, нош ик бордам тэбинёз: «Иринӥ-Ленӥ-Кати»? Собере мадьыны кутскоз, кызьы мон но Сашик нунокез одӥг ваннаын пылаським. Сыӵе мӧзмыт.

Шӧдонтэм кадь ортчиз эшшо кӧня ке ар. Мон институтэз йылпумъяй но бызи. Сад-бакчае ялан шергес вуылӥ ни. Нош огпол, мамай кышноез адӟыса, соку ик ӧй но тодма. Со кык полэс куасалскем ни, кинлэн ке пыд азяз музъемозь йыбырттыны выронъяз куспетӥ луэм кадь, тыбырыз губырскем, йырыз сэзъяське. Та сульдэр, кырыж кызьпу боды вылэ пыкъяськыса, сюрес вылын, аслаз капкаез азьын, сылӥз, мае ке туж-туж адӟемез потыса кадь азьлань учкиз. Йырыз сокем сэзъяськиз, кожалод, со кин ке адскисьтэм мынӥсь-ветлӥсьлы пумит луэмзэ дотово мыло-кыдо вера.

— Ӟечбуресь, Надяпай.

Пересь куалектӥз, йырыз эшшо золгес сэзъяськыны кутскиз, бодыез тузон изъёс вылтӥ шар кариз.

— Мон — Кати, уд тодмаське-а?..

Ог минут ӵоже со йырызлэн шыкысъёсысьтыз поттыны выриз ортчемезлэсь мырдэм чильпырась юдэссэ, нимылэн чузъяськемезъя шӧдыны тыршиз тодмо куараосты.

— Ка-ти? — нёръяса кадь вазиз со но, нош ик шып луиз.

Ӧз, тодаз ӧз вайы ни.

— Тодӥськоды на-а, мон — Кати, Катя. Ми Сашикен одӥг ваннаын пылаським!..

Со лопырскиз, бодыез борды лёго чиньыосыныз эшшо юнгес кырмиськиз, йырыныз сэзъяны, бӧрдыны кутскиз.

— Катие, нуные мынам… Катие… — лабыртӥз со, — кыӵе тон бадӟым будэмед! Кыӵе будэмед!

Куараез дырекъяз, йырыныз валче сэзъяськиз, куспетӥ чигиськылӥз но выльысь потылӥз. Монэ китӥм кутыса, со корка палаз кыскиз. Ачим аслым паймыса ик, сьӧраз вамыштӥ.

Садэз быдэсак ӝужыт нап турын пӧлы выем, одӥг-ог адскылӥзы сяськаос, но юн турынлэн путэтъёсыз пӧлысь потыны соослы секыт вал. Татын кемалась ини нокыӵе пудо ӧз возиськы. Коркан чылкыт пересьмонлэн, висъетъёсы пыӵам шундылэн но прениклэн зынзы лӧсъяськиз.

— Али чай лэсьто, — шорам туж мусояса, синзэ вошъятэк, учкиз со, ӧз но оскылы кадь, дораз зэмзэ но куно пыриз шуыса.

— Вае, мон юртто…

— Кулэ ӧвӧл, кулэ ӧвӧл, — кышкатскиз со, — мон ачим, ачим.

Бездэм вумульыосын (кувшинка) вож обойёс, пож синучконэн трюмо, кырыжам ворсэтъёсын книга шкаф быдэсак туйылэмын «Наука и жизнь» журналъёсын, укноос вылын асьсэды асьсэос сиыны кутскем ӵуж катанчиос. Укно сьӧрын — улмопуос. Улмопуос… Тэчкон венен шуак донгем кадь юн бышкалскизы тодэ ваёнъёс — со улмоослэн шӧмзы…

Борддор вылын — «Утро в сосновом бору», отын мусо гондырпиос шунды ӝужамлы шумпото, 100-200 ар талэсь азьвыл сямен ик. Отын ик мыйыко, туж йӧно казакпилэн бадӟым туспуктэмез, вылысьтыз дэремезлэн чырты дорысьтыз бирдыосыз пертчылэмын.

Сакырӟем варення, преникъёс но пичи дырысь карамель канфетъёс. Таӵеоссэ али уд но басьты ни.

— Надяпай, таиз нош кин? — нош ик учкисько туспуктэм шоры.

— Та-а? Ма, Сергее со, татын кышно ваён азяз ай, — шаплы луэ песянай. — Ой, яратэ вал со монэ. Дото зол!

Син азям пуктыны вырисько вашкала «дото зол» яратонэз но верандаын кызыса кыллись, улонысь кемалась ини кошкем песятаез, солэсь шудо пинал дырзэ.

— Монэ нош Сергие лушказ ук, — лушкем ивортэ пересь, — уйин валъёс вылын лыктӥз, мон сыӵе кышкай! Атае у-у-у! туж лек вал — ултозям, пе, тонэ со кыл быдтӥсьлы уг сёты! Мон бӧрдӥсько, атае аслэсьтыз куасалтэ. Нош Сергиелэн но сётскемез ӧз поты — лушкало, шуэ, котьма каре. Лушказ. Тӥни озьы! Мон, шуэ, быдэс улытозям тонэ ярато…

— Нош атайды?

— Мар атай! Уж лэсьтэмын ни. Берло простить кариз — нылыз ук.

Азям пукись 90 аресъем пересь шоры учкисько но пинал дырзэ син азям пуктӥсько: егит, векчи, шудо, уйин валъёс вылын ворттэ. Шуак шӧдӥсько: песянай шорам учке, синъёсыз сыӵе осконтэм егитэсь.

— Яралоз-а, мон одӥг-ог дорады паралляло?

Синъёсам паймыса учке, уг оскы, зэмзэ верасько шуыса.

— Оло, юрттэт кулэ луоз, — мыным малы ке возьыт потӥз, — яке огшоры — вераськыны…

— Пыра, пыра, нылы, — йырыныз сэзъя но кынмем сакырӟем варенняез кылзӥськисьтэм киосаз кутэм пуньыен кока.

Мон нош ик Сергей песятайлэн егит дырысьтыз туспуктэмез шоры учкисько, нош ик син азям пуктӥсько солэсь кезьыт тол куазен туссэ — дӥсьтӥсь, яратӥсь, луло.

Келяськыкуз Мамай кышно киосам вашкала канфетъёссэ донгиз.

Со гужемзэ мон дораз вуылыны таки ӧй ни ваньмы. Нош вуоно гужемаз со ӧз вуы. Кӧня ке ар ӵоже ни солэн куштэм коркаез буш сылэ. Липетыз вылысь вужмем рубероидэз тӧл турка. Буям бервылъёс зорлэсь но шундылэсь ломдылэмын ни. Корказез урдэслань кырыжскемын но, кытӥ-мар сисьмем пу пагӟаос вискытӥ турын мычиськем. Та коркан нокин уг улы. Шунды сиослэн пиштэмзылэсь синъёссэс кыньыртыса кадь, учко сирота укноос. Котыр эриклэсь шузимем турын гинэ.

Куддыръя мон поттӥсько песянайлэсь кузьмам карамельзэ но, пичи кӧльыез сямен ым пушкам берыкъяса, сюпсисько сое, шӧдӥсько, кызьы со пумен пичигес кыле, шуна.

Соку мон берлань бергатӥсько чигиськоно, пилиськоно кадь дырез: мыным 8 арес, тодмо капка вӧзтӥ мон бызьыса уг ортчиськы, Мамай кышноен вераськыны дугдӥсько. Нош пиналъёс кеч ласянь шоккетыны кутско ке, кесяськисько: «Эн оске, эн оске, соос алдасько!»

Тани мон — быдэ вуымтэ пинал, садаз улмо лушканы уг пыраськы, нерад карись мӧзмыт пересен пумиськонлэсь уг пегаськы. Дораз лыктӥсько но шуисько: «Нош мон тӥ доры, куное. Маке асьтэ сярысь вералэ ай. Кызьы улӥды? Кинэ яратӥды?»

Со пальпотэ но шудо выжыкылъёссэ кема-кема маде.

Ӟуч кылысь берыктӥз Елена Миннигараева

Удмурт Дунне
By Удмурт Дунне 20 апреля, 2020 17:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<