«Кузебай Герд мон понна гожъяськиз»

Ангелина Снигирева
By Ангелина Снигирева 23 марта, 2020 11:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Егит тодосчи, кылбурчи, дышетӥсь Андрей ГОГОЛЕВ Москваысь Литинститутын аспирантураын дышетске, Кузебай Герд сярысь диссертация гожтэ. Али со Ижысь частной школаын ӟуч кылъя дышетӥсь луыса ужа. Удмурт но ӟуч литератураослэн кусыпсы сярысь лекциос лыдӟылэ. Сое кылзӥськыны уно калык вуылэ, угось котькуд лекциез — пичи спектакль выллем. Кылбуръёсыныз, романъёсыныз кӧня ке книгаез вань, алигес лыдӟисьёссэ «Свидетельство» романэныз тодматӥз.

А. Гоголев
Туспуктӥз Максим Оффо

Удмурт Япония

— Мон вордски Казахстанысь Уральск городын, — вера Андрей Гоголев. — Анае но отын вордскемын. Бубиме Уральскысь заводэ ыстӥзы Казаньысь институтэз йылпумъямез бере. Мыным 6 арес вал, семьяеным Удмуртие кошкимы, Можгае интыяськимы. Нырысьсэ адӟи Можгаез уйин 1996-тӥ арын 6-тӥ мае. Мон малпай, ми Япония выллем шаере сюрим шуыса: чияпу сакура кадь сяськаяське. Сюгаильской урамамы кыӵе ке сёгунъёс уло, малпай. Та шаеръёс маин ке но ог-огзылы укшало ик, дыр. Япония океанэн котыртэмын, нош Удмуртия — шуръёсын. Отын но, татын но калык кӧня ке интровертной.

Казахстанысь степьёс бере Удмуртия выжыкылысь дунне кадь потӥз мыным. Мон малпай, семьямы шуак узырмиз шуыса. Агае шуэ: тани кызьпу сылэ, со милям кызьпумы, потэ ке — йылаз туб. Кызьпу котыртӥ дургаос (майский жук) пуляос кадь лобало. Агае сачок сётӥз: ме, пе, соосты кутылы. Милям асьмелэн вишня садмы вань, отын уӵыос чирдо! Чебер инкуазь кузьым кадь вал. Удмуртиын нырысетӥ нуналэ — улонысьтым огез шудоез нунал.

14 арес. Чебоксары карын. 2003-тӥ ар

Мон али но шумпотӥсько, писпуосты адӟыкум. Можгалась инкуазез яратӥсько, нюлэскытӥ поръяны кель­ше. Татын ваньмыз бордаз кыс­ке: пу­­жымъёс, кызъёс, уллёен ло­­бась чи­биньёс, шур дурын пукись чорыгасьёс, октябрь толэзе ин­мысь ошиськись йылтэм-пумтэм зор. Со ваньмыз шуд! Можгала вуисько ке, велосипедэн кыӵе ке гуртэ мынӥсько. Ломеслудэ вуылон мон понна кыӵе ке Монте-Карлое вуылэмлэсь но тунсыкогес йӧтэ.

«Вотяк»

— Война вакытэ Уральске Санкт-Петербургысь калыкез эвакуировать каризы. Соин сэрен та карын, Петербургын кадь, бадлон (водолазка), поребрик (бордюр) выллем кылъёс пыртылыса, чылкыт ӟуч кылын верасько вал. Можгалан школае мынӥ но одӥг пияшлэсь юай: кызьы тӥ шудӥськоды? Со маке туж ӝог вераз, мон одӥг кылзэ но ӧй вала. Валатэк кыли, кытын огез кыл кутске, кытын мукетыз йылпумъяське. Таӵе вераськон манерез кылылэме ӧй вал. Мукет пиналъёс но мынэсьтым мукет сямен вераськемме, акцентме шӧдӥзы. Школаын монэ вотяк шуыса исаны ӧдъязы, малы ке шуоно мон калыклэсь пӧртэм вал. Пиналъёс асьсэос дышемын вал, дыр: адями акцентэн вераське ке, со вотяк. Жугиськылонъёс но вал. Мон соку валай, та туж урод кыл шуыса.

ПТУ но Литинститут

— Школаез йылпумъяме бере ӟудыса улӥ. Школалы воже потӥз — мыным номыр кулэзэ ӧз вералэ, ӧз валэктэ, кызьы та улонэз улоно, кызьы адямиосын кусып возёно, кызьы уксё поттоно. Кыӵе хлорофиллъёс, кыӵе логарифмъёс? Мыным али мар ке но ужано, квартира понна уксё тыроно. Нош семья кылдытэме потӥз ке, нылпи вайыны медӥ ке, мар кароно? Школа талы уг дышеты.

Нырысь мон ИжГТУ-ысь колледже математиклы дышетскыны пыри. Дипломозь 2 арня кылемын вал — дышетсконме аналтӥ. Анаелэн кӧтыз ӝож вал. Мон шуисько: со мынам уже ӧвӧл, ваньмыз та кулэтэм маке, соин ик пушкам уг пыры. Мон уг валаськы, кызьы мон соин уло-выло. Мынам потэ вал выреме соин, мар мыным шумпотон ваёз, улыны юрттоз, ӟеч мылкыд кузьмалоз. Гань-гань, лад-лад мед луысал пушкам.

Литератураен герӟаськем пӧртэм лекциос лыдӟылэ

Собере мон ПТУ-э электриклы дышетскыны мынӥ. Татын ини улыны дышетӥзы ке дышетӥзы. Али малпасько: ПТУ Литературной институтлы маин ке но тупа. Та интыосын мон туж кулэ тодон-валан басьтӥ. ПТУ-ын но поэзия вань, со улонысь поэзия. Татын но кылэз уже кутыны быгатоно. Диплом басьтӥ, электрикын кӧня ке ужай но шуисько: анай, та уж сюлэмыя ӧвӧл. Мыно, пӧй, юристэ дышетскыны. УдГУ-лэн Можгалась филиалаз пыри. Нырысетӥ сессия дыръя «витьёс» гинэ басьтӥ. Мыным судебной приставъёслэн службаязы ужаны ӵектӥзы. Милемлы, пе, валась адями кулэ, кӧня ке ужалод но, ми тыныд майор звание сётом. Мон пуми. Мон — майор? Та малпанлэсь шуэрскыса, дышетсконме куштӥ. Али но документъёсы отын кыллё. Анае нош ик ӧпкеле: малы кошкид? Мар ужалод?

Мон Петербурге шонтӥ. Восстанилэн площадетӥз мынӥсько. Номыри ӧвӧл, гитарае сяна. Улон интые но ӧй вал. Пумитам кришнаитъёс кырӟаса мыно. Мон шуисько: чебер кырӟаськоды, мон но та кылбурез тодӥсько. Кылбурез шара лыдӟи. 15 арескам киям «Бхагавад-гита» книга сюриз вал уго. Мон сое лыдӟи, ас поннам санскритэз дышетыны ӧдъяй. Кришнаитъёс юало: кин тон, кытысь? Удмуртиысь, пӧй. Пӧраськыны быгатӥськод-а? Ма, быгатӥсько кадь. Ойдо милемын, Кришналы служить карод, милемлы пӧраськись кулэ, со понна улон инты сётом. Мон мынӥ, конешно. Озьы огвакыт кришнаитъёслэн монастырязы улӥ. Монастырь трос этажъем юртысь квартираын интыяськемын вал. Кошкыкум одӥг воргорон шуиз: тонэ Кришна туж яратэ.

Собере Петербургысь Балтийской университетэ, военмехе, пырыны утчай, Иудаикая университетэ куриськи.  Ӧз кутэ но, Москвае мынӥ. 
Татысь Литинститутэ басьтӥзы. Озьы 2011-тӥ арысен отын дышетскисько, али аспиранту­ра­ын.

Анае малпа: озьы пуаса улэме — со алама вакытэ. Мыным секыт потӥз, номыри ӧй вал, зэм. Но котькуд нунал монэ кызьы ке но шумпоттӥз. Мон котькуд нунал гожъяськи. Гожъяськон оскымон юрттӥсе вал. Текст ас шорад палэнысен учкыны юрттэ, возьматэ, мар тынад пушкад каръяськемын, мар тонэ сюлэмшугъяськытэ. Кыл юрттэ пушкысьтыд вань йырйиськисьёстэ кырмыны.

Яхта лэсьтӥсь

— Куддыр кыӵе ке тунсыко ужен выреме потылэ. Огпол видео учки, кызьы воргорон гаражаз яхта лэсьтэ. Малпай: мынам яхтаос лэсьтэме потэ, табере мон — яхта лэсьтӥсь. Мон пичи дыръям корабльёслэсь модельёссэс бичалляй, соин тодӥсько, малы корабль уя, уг выйы. Пичи дыръям потэ вал матрос луэме, армиын служить кареме, но монэ ӧз кутэ. Яхта лэсьтыны ӧдъяй, ог 5 час маке выри но ужме аналтӥ.

Озьы куддыръя луылэ — маке монэ зол бурдъя. Собере малпасько: так, мыным журналэ гожъяськоно, двоечникъёслы задание дасяно, контрольной сётоно. Со сяна, статья гожтоно, научной журналэ ыстоно. Огдышем ужъёс борды басьтӥськисько но, мылкыд кулэсме. Но куддыр мон асме пӧртэм ужъёсын адӟисько: мон плотник, мон бармен, мон дальнобойщик, мон лётчик… Син азям сыӵе яркыт суред пуксе — зэм но ваньзэ пӧрмытӥсько кадь. Собере со малпанме быдэстыны номырлы ни. Озьы огдышем сямен улӥсько. Но куд-ог дыръя маке борды басьтӥськисько ик. Кылсярысь, сугон мерт­тӥсь­ко.

Сугон но нылпи

— Трос коньдонэ луысал ке, мон ӧй ужасал, сугонлэн будэмез шоры учкыса, кылльысал. Но али мон сугон шоры уг учкиськы — адӟисько, кызьы нылы будэ. Нылпилэн будэмез сугонлэн пушъемезлэсь но тунсыкогес вылэм.

Мыным нокин ӧз вера, атай луон сокем бадӟым шуд шуыса. Али валасько, макем мыным удалтӥз! Бен, тон мукет адями понна кыл кутӥськод, сюлмаськиськод, бӧрдэмезлэсь уд изиськы, трос ужаськод. Тыршиськод, ачид но умойгес мед луод шуыса. Озьы ке но нокин, нуны сяна, уз дышеты тонэ адямиез быдэскын адӟыны. Али, шуом, мон тодӥсько, кызьы адями котыр дуннеез адӟыны-синйылтыны дыше. Кызьы со синъёсыныз арбериосты кырме. Собере со пальпотыны ӧдъя. Кызьы пичи адями котыр дуннелэсь адӟем карыны медэ. Кызьы со нырысьсэ уяны выре но шумпотэ талы. Паймымон ук!

Екатерина кузпалыныз. Сергиев Посад, 2019-тӥ ар

Нуны — быдэс дуннеез валэктӥсь учебник. Мон ноку ӧй малпалля вал, дунне сярысь нуналлы быдэ сомында тодон-валан басьтыны луэ шуыса. 30 ар улӥ, визьмо книгаос лыдӟыса, пӧртэм кылъёсты дышетыса. Малпасько вал: мон визьмо, мон усто. Нош мон, гуманитарной наукаосъя специалист, адямиез зэмзэ ке уг тодӥськы вылэм. Нуны вордэммы бере тае валай.

Культураос вискын

— Мон эскерисько Кузебай Гердлэсь ӟуч кылын гожъямъёссэ, удмурт но ӟуч культураослэсь пумиськемзэс. Пичи дыръям, удмурт культураен нырысьсэ пумиськыса, мон сое ӧй вала, но мыным со тунсыко потӥз. Мынам тодэме потӥз, кызьы со культура пушкын астэ возёно, кыӵе логикая татын уло. Кузебай Гердлэсь 
творчествозэ эскерыса, та сярысь но трос малпаськоно луиз.

Культураез валан понна со вӧзын эшшо мукет культура луыны кулэ. Ӵошатыны ӧз ке пӧрмы, культураез уд адӟы. Адямиез валан понна но сое ӵошатоно маин ке — пӧйшурен яке инопланетянинэн. Вань на кылъёс, стереотипъёс, соос тыныд верало: ӟуч таӵе, нош удмурт сыӵе. Но соос уг юртто. Нош куке пӧртэм калыкъёс артэ уло, соос ог-огзылы асьсэды валаны юртто.

Мон Казахстанын 1990-тӥ аръёсы будэмын. Лыдӟиськыны дышетски гинэ, «Русские, убирайтесь вон!» гожтэмез кытысь ке адӟи. Озьы гожъязы та вакытэ Уральск городын, соин ик кошконо луимы. Вераны шуг, кин янгыш, кин кинэ вӧсь кариз, ултӥяз. Со пумысен трос малпаськоно, бугыръяськоно на. Со аръёсы шыпыт война котькытын вал, но со ӧжыт возьматэмын литератураын, умой эскеремын ӧвӧл историын.

Ижысь огаз барын кылбур лыдӟе
Туспуктӥз Александр Шкляев

Вот соку, пичи дыръям, мон валай: мон музон кылын вераськисько, мон мукет, монэ та палъёсысь улляло. СССР, РСФСР, СНГ, Республика Казахстан, Удмуртия — вань та нимъёс йырме суразы. Кин мон? Ӟуч кылын вераськисько, озьыен, ӟуч. Мон валай, адями улон интыен герӟаськемын ӧвӧл шуыса.

Бурдъясь кыл

— Мон понна Удмуртия, удмурт кыл — со эрик. Ӟуч кылбурчилы удмурт кыл бадӟым кужым сётэ. Киров яке Оренбург выллем улосъёсын улыса, кытын ӟучез бордын мукет кыл вӧлмемын ӧвӧл, мон куанергес луысал.

УдГУ-ысь литературовед Александр Лаврентьев туж умой вераз удмурт кыл сярысь: улон-вылонысь потэм (бытовой) культура сыӵе ик кыл пӧрмытэ. Но таин сэрен со кылэз куанер, бездыт шуыны уг яра. Со кылын ваньмыз сярысь вераськыны луэ. Озьы туж мур пуштрос, мудрон веранъёс пӧрмо. Ичи кылтӥрлыкез кутыса, туж узыр пуштрос кылдытӥськод. Нош со поэзилэн валтӥсь ужпумез ук — малпанъёсты вакчияк, но сюлме пырымон вераны. Удмурт кыл юромо кылбуранлы малпамын вал, дыр.

Кыллэсь логиказэ валаны тыршыса, дунне валандэ паськытгес кариськод. Шуом, «инвис» кыл. Ин но вис — пӧрме горизонт! Ӟуч кылын сыӵеез ӧвӧл. Кылэз тазьы пичиен-пичиен валасько но, мылкыды ӝутске. Николай Гумилёв «Шестое чувство» кылбураз гожтӥз: «Кричит наш дух, изнемогает плоть, / Рождая орган для шестого чувства». Мон понна удмурт кылэз тодон — дуннеез шӧдыны юрттӥсь эшшо огез мугор люкет кадь.

Улӥысь — вылӥе

— Колумбиысь писательлэн Габриэль Гарсиа Маркеслэн романъёсаз туж трос поэзиез. Сое лыдӟиськод но — ваньмыз йырин-чукин луэ, дунне шоры мукет синмын учкыны кутскиськод. Маркес калыкезлэсь лулзэ возьматыны быгатӥз. Огшоры улон-вылонэз суредаса, музъемен, коръёсын, кырсен-юрӟымен валче со культуразэ
вылӥе ӝутӥз. Удмуртиын но озьы лэсьтыны луоно. Удмурт литератураын уг тырмо бадӟым произведениос, романъёс. Кин ке туала эпос гожтысал ке, мон сое шумпотыса берыктысал. Али 100 ар тырме кунлыклы — кыӵе усто луысал, кин ке, удмурт семьялэн улэм-вылэмез сярысь гожтыса, со пыр шаермылэсь историзэ возьматысал ке. Гожъяськись, кӧттырмостэм мурт кадь, романаз ваньзэ-ваньзэ мед пыртысал. Со романэз быдэс дунне дунъясал.

Бытовой кыллэсь кышкано ӧвӧл. Куке мон Григорий Верещагинлэсь этнографической ужъёссэ лыдӟи, мар мыным тунсыко потӥз? Кызьы кумышка пӧзьтоно, вирен перепеч пыжоно, сюанэ мыноно, кут кутано, кыӵе зын корка пушкын… Тае лыдӟыку, тустэм-шӧмтэм кылъёс улӟо, кыӵе ке магия кылдэ. Маркес сое шӧдӥз. Асьмелы но Удмуртиын ӝутоно пыд улысь музъемез, кыедэз, кутоно сое, ма борды йӧтскылэм но уг поты. Таӵе романэз кӧня ке мурт ӵошен но гожтыны быгатысал. Али ваньмыз вань ук, архивъёс усьтэмын.

Утялтӥз яблокен

— Кузебай Гердлэсь творчествозэ 5 ар эскерисько. Мыным ваньзы юртто, Москваын но, татын но. Архивъёсын трос бугыръяськисько. Озьы тодыны луэ, кин азьвыл рукописьёсты, документъёсты кутылӥз. Жаляса верано, мон дорозь соос нокинлы кулэ вылӥллямтэ.

Мон Гердлэсь ӟуч кылын гожъямъёссэ эскерисько. Лыдӟисько соосты но валасько, Кузебай Герд мон понна гожъяськиз, мыным вазиськиз шуыса. Удмуртъёслы со удмуртэн гожъяськиз, финъёслы — фин кылын, милемлы, кин али Удмуртиын улэ, лыдӟиське но гожъяське ӟуч кылын — ӟучен. Мон солэсь ужъёссэ лыдӟыны, эскерыны, калыке вӧлмытыны кулэ. Со оскиз ук: кин ке лыдӟоз, маке лэсьтоз.

Куд-ог дыръя улон монэ паймытэ но, осконэ юнма: токма таин уг выриськы. Шуом, 2014-тӥ арын августэ Можгалась Вавож ёросэ, Кузебай Гердлэн дор палъёсаз, велосипедэн мынӥ. 100 иськем пала ортчоно вал. Сьӧрам аръян, нянь кутӥ. Мынӥсько но — яблок сиеме потӥз. Та малпанэн ик жадьыса вуи со интые, кытын азьло Кузебай Гердлэн юртэз вал. Нош со интыын сомында яблокпуос будо! Секыт вайёссы ошкылэмын, сомында отын улмоез. Капка усьтэмын. Кинлы со усьтэмын вал? Мыным. Кузебай Герд монэ озьы дораз ӧтиз — мон сое озьы валай.

Кузё Кузебай

— Мон малпасько, Кузебай Герд зэмос кузё вал. Пыриськемез витись, дасьсэ возьмась кузё ӧй вал со. Со калык понна ачиз сюлмаськиз, кызьы зэмос кузё, атай сюлмаське нылпиосыз сярысь. Сюлмыз сэректӥз югдурлэсь, котыр дуннелэсь: удмуртъёс гожъяськыны-лыдӟиськыны уг быгато, правооссэс уг тодо, ченгешыса уло, медицина ӧвӧл… Соин йырин удмуртъёс шоры пудо шоры кадь учкисьёс но вал. Кузебай Гердлы та ӧз яра, соин со кузё кариськыны малпаз. Кузебай Герд юртъёсын, визьёсын «утялскыны» ӧдъяз. Кызьы калыклы возьматоно, мар умой, мар чебер? Поэзия пыр. Со кылбуръёс гожъяз, Максим Горькиез берыктӥз, угось соиз гожтӥз: «Человек — это звучит гордо!» Удмуртъёс валаны кулэ вал, соос мукет калыкъёслэсь чик уг висъясько шуыса. Та вамыштэк номыр ӧз воштӥськысал.

Кузебай Герд сярысь лекция лыдӟе
Туспуктӥз Александр Шкляев

К. Гердлэн творческой улонэз 14 ар гинэ кыстӥськиз. Но та вакчи дыр ӵоже со Удмуртиез кылдытыса вуттӥз. Малы ке шуоно одӥг минут но тэк ӧз пукы. Ялан вуриське, утялске, маке тупатэ вал. Огпол со Можгалась Сюга станцие мынэм, сое валэн одӥг воргорон нуэм. Со ямщикез Герд ӝыны час куспын нодъям но, соиз, кӧня ке толэзь ортчыса, книга гожтэм! Ачиз Герд ноку ӧз шутэтскылы. Тани али асьмеос вераськыса пукиськомы, нош со, интервью сётытозяз, выжез ӵужысалыз, кружкаосты миськысалыз ини, вылды.

Анастасия Шумилова

Ангелина Снигирева
By Ангелина Снигирева 23 марта, 2020 11:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<