1941-тӥ арысь тус

Ангелина Снигирева
By Ангелина Снигирева 25 марта, 2020 12:48

Санкт-Петербургысь Религиослэн историзыя кун музейын утиське Пичи Пурга ёросысь Улын Юри гуртысь Зоя Атамановалэн портретэз. Удмурт нылкышноез 1941-тӥ арын суредаз Фёдор Кригер, этнографической экспедициен шаерамы вуылыкуз.

Пичи Пурга ёросысь Улын Юриысь З. Атамановалэн портретэз утиське Санкт-Петербургысь Религиослэн историзыя кун музейын. 
Суредаз Ф. Кригер.

— Нэнэмылэн портретэз вань шуыса, ӧм ик тодылэ. Гуртысьтымы Вера Чернышева паймемзэ вераз, музейысь Зоя Митрофановнаез адӟимы, пе. Тае тодыса, Финляндиын улӥсь нылы Санкт-Петербурге потаз, нэнэмылэсь портретсэ туспуктӥз. Ымныр котырыз аслаз ӧвӧлгес, нош синъёсыз пырак солэн! — вера Зоя Атамановалэн нылыз Людмила Фёдорова.

Людмила Ильинична пусъемъя, анаез улытозяз огпол но суред сярысь поттылымтэ. Ушъяськонэн йырин но ӧй вал, дыр. Фёдор Кригер 1941-тӥ арын май-июнь толэзьёсы Улын Юри гуртын улэм. Татчы Санкт-Петербургысь Центральной антирелигиозной музейысь научной экспедиция потам, пӧлазы вылӥллям фин-угор калыкъёсты эскерись мукет тодосчиос. Соос вуиллям удмуртъёслэн осконзы, вӧсяськон интыоссы, язычестволэсь куштӥськемзы, колхозникъёслэн улэм-вылэмзы, сям-йылолъёссы сярысь материалъёс люканы. Художниклы со вакытысь тусъёсты суреданы оскиллям. Суредам сяна, котькуд героез сярысь Фёдор Кригер холст мышкы вакчияк зарисовка гожтыса кельтэм. Улын Юри гуртысь кӧня ке адямиез суредаса вуттэм, отӥяз кутскем война. Солэн портретъёсызъя но зарисовкаосызъя зэмос суред син азе пуксе.

— Нэнэмы дышетскемезъя дышетӥсь вал, — вера Людмила Ильинична. — Тятямы но дышетӥсь. Со калыкез огазеяськыны но колхоз кылдытыны ӝутъям. Колхозэ пыремзы потытэк, адямиос саникен пумит пото вылэм. Тятя калыкез буйгатыны быгатэм. Иллёк агай сыӵе лякыт вал, 
шуо али но сое тодӥсь 
адямиос. Озьы «Кизили» колхоз кылдӥз. Бызем-басьтэмзы бере анайзы нэнэелы шуэм: мар со дышетӥсьын ужамедлэн толыкез, колхозын коть пуд нянь сётозы. Анайлэн кылыз — закон. Озьы 1936-тӥ арын нэнэмы колхозэ ужаны потӥз. Скал кыскисьын но, пудо сюдӥсьын но ужаса вуттӥз.

Пумен Зоя Атамановаез кооперативлэн магазиназ ужаны потто, визьмо, дышетскем адями шуыса. Калыкын солы котьку Зоя Митрофановна шуыса вазиськылӥзы. Соин ик 
гуртазы 1941-тӥ арын 
экспедициен вуэм куноосты Атаманова доры ыстӥзы. Кузпалыз соку Горд армие басьтэмын ни вал.

— Война вакытэз тодаз вайыны нэнэ уггес яраты вал, — вера Людмила Фёдорова. — Нормаез тырмытыны турттыса, сыӵе бызьылыса ужаськомы вал, огпол Бакан Такан апайлэн пыдысьтыз кутэз но усьыса кылиз, шуоз вал. Тятя но ож сярысь вераськыны ӧз яратылы. Сӧсырмыса бертӥз со. Слава орденэн но Быдӟым Отечественной войналэн орденэныз пусъемын. Сельсоветын председатель 
луыса ужаз, колхозын но пред вал. Адямиосты жалясь вал со. Нэнэен тятя ялан калык понна тыршизы. Сюлэмыз вӧсь луыса тодаз вае вал гуртысьтымы вӧсяськон лудысь куалаез кесямзэс. Колхоз пред луыса, ачиз но со уже пыриськиз угось. Куректэменыз экзема но кутскиз. Калыкез христианствое пыртон туж секытэн ортчиз. Куала коръёслэсь кин ке аслыз лапас, кин ке гид ӝутӥз. Со семьяос отӥяз кайгу адӟизы.

Зоя Атаманова но Илья Иванов 5 нылпи будэтӥзы. Эшшо огез, тифен висьыса, вазь ик кулӥз. Нылпиоссэс йӧн-йӧн будэтыны тыршизы. Анай-атайзэс гурт калык гажа бере, нылпиоссы но адӟем карымон мед луозы шуыса сюлмаськизы. Нылпиоссы дышетӥсьёс, зоотехник, ужбергатӥсь, повар луизы. Пересьмемез бере но Зоя Митрофановна гуртысь егитъёсты нодъяны вырылӥз. Магазинэ мынэ ке, чотаськонэз киязы кутӥсьёслы шуэ вал, йырады лыдъяськыны уд быгатӥське шат? Со пересьмемез бере но ваньзэ йыраз лыдъялляз, шуэ Людмила Ильинична. Нэнэез 82 аресказ 1996-тӥ арын кулӥз, картэз кулэм бере со эшшо 10 ар улыса вуттӥз на.

Архивъёсын утчаськыса, выжыосмы, гуртоосмы сярысь материалъёс люкасько вал ай, табере эшшо тросгес выльзэ тодэм но шедьтэм потэ, шуэ Людмила Фёдорова. Со Улын Юри гуртысь музеез возе.

Елена Сараматова

Ангелина Снигирева
By Ангелина Снигирева 25 марта, 2020 12:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<