Ӵуказе нуналэ билет

Ангелина Снигирева
By Ангелина Снигирева 23 марта, 2020 16:34

Кыӵе ужасьёсты возьма туала экономика? Кыӵе воштонъёс кулэ законъёсы пыртыны выльдӥськонъёслэсь бере кылёнтэм вылысь?

«Купол» заводын арлы быдэ ортчылэ наукаен, техникаен вырись егитъёслэн но пиналъёслэн форумзы.
Туспуктэм: kupol.ru

Специалистъёсты утчало школаысен

Та юанъёсты сэрттӥзы-пертчизы Удмуртиысь Кун Кенешын. Уго сӥзьыл шаерамы нимысьтыз заседание радъялозы Россиысь Кун Думалэн Дышетонъя но наукая комитетэз но Федерацияя Кенешысь Закон кылдытӥсьёслэн кенешсылэн комиссиез.

— Кадръёслы ёрмонэз тодэ котькуд предприятилэн кивалтӥсез. Соин та юанэз сэрттыны кулэ, закон кылдытӥсьёсын, кивалтон ёзъёсын, дышетон удысэн но предприятиослэн кивал­тӥсьёсынызы валче кариськыса, — шуиз Кун Думаысь депутат Алексей Загребин.

Ижысь, Воткаысь, Сарапулысь но Глазовысь заводъёс быдэс дуннелы тодмо вуз потто. Со дыре ик отын уг тырмо туала технологиосты тодӥсь адямиос.

Шаерысьтымы заводъёс сюлмасько вуоно кадръёсты 
дасяны. Кылсярысь, «Купол», «Аксион» кусып тупато школаосын, усьто нимысьтыз классъёс. Собере пиналъёслэн луонлыксы вань ИжГТУ-э пырыны.

— Ми кылем арын техникая университетысь 42 выпускникез ужаны кутӥмы. Ар ӵоже предприятиысь 86 процентэз ужасьёс квалификацизэс будэтӥзы. Эшшо ми заводэ ӧтчаськомы ИжГТУ-ысь дышетӥсьёсты, тодматӥськомы соосты выль оборудованиен. Педагогъёс тодыны кулэ, малы дышетоно студентъёсты, — вераз «Купол» заводысь огъя ужпумъёсъя но персоналъя директор Игорь Краснов.

Со вакытэ ик предприятиос тросгес егитъёсты практикае яке гужем ужаны кутысалзы.
Азьвыл уго озьы заводэ лыкто вал. Ужало, эскеро, кельше ке — кылё. «Куполын» кылем гужем 346 пинал мурт ужаз. Нош егитъёс бӧрсьы заводэ эскеронэн вуиз Прокуратура, со кырмиськыны дась котькуд чыры-пыры борды, ватсаз Игорь Краснов.

«Аксионлэн» валтӥсь директорез Сергей Сидоров пусйиз:

— Сюлмаськытэ мукетыз но: ми, Удмуртиысь предприятиос, тыршиськом асьмелы специалистъёс будэтыны, соослы стипендия тыриськом, нош 5-тӥ курсэ вуэм студентэз мукет предприятие кайпалтыны быгатэ.

ЕГЭ-лы дасяськоно

Визьмо кадръёслэн кошкемзы сюлмаськытэ Дышетонъя но наукая министерствоез.

— Россиын ортчылӥсь олимпиадаослэн рейтингазы Удмуртиысь пиналъёс 3-тӥ интыын луо. Озьы ке но таӵе визь люкъёс Удмуртиысь 
вузъёсы уг кылё — учко Москва но Санкт-Петербург шоры. Кыл­сярысь, миым Россиысь олимпиадаын вормем пиналъёс пӧлысь 2-ез гинэ шаерысьтымы университетъёсы пыризы, — ивортӥз дышетонъя но наукая министрлэсь ужзэ быдэсъясь Ирина Крохина.

Ватсаны кулэ со­зэ но: республикаысь 572 школа пӧлысь 407-ез ёросъёсын интыяськемын. 134 школаын профильлы дышетонъя программаос мытэмын. Удмуртиысь школаос мыло-кыдо пырисько дышетон удысысь федерал проектъёсы. Кылсярысь, «Проекторий», «Билет в будущее» программаосъя 28 пумо профессилы дышетскыны луонлык вань.

Кун Думаысь Дышетонъя но наукая комитетлэн аппаратэныз кивалтӥсь Павел Кондрашов юан сётӥз Ирина Крохиналы:

— Кулэ-а азьло вакытъ­­ёсы ся­мен нылпиослы 10-тӥ-11-тӥ классын кыӵе ке про­фессия сётыны?

— Вуриськисьлы дышетскемез луысал ке, нылмуртлы со ноку ӧй люкетысал, — вераны кутскиз дышетонъя но наукая министрлэсь ужзэ быдэсъясь Ирина Крохина.

Солы пумит вераз Ижысь радиозаводлэн директорез Александр Майер:

— Нош анай-атайёс пумит, малы ке шуоно 10-тӥ-11-тӥ классын пиналъёс ЕГЭ-лы дасясько, вылӥ балл люканы сюлмасько. Нылпи дась техникуме пырыны, собере ужаны кутскыны. Нош мумы-бубыез косо вылӥ образование басьтыны.

Мукет ласянь, вылӥ тодон-валанэн рабочийёс ӵа­пак али уг тырмо заводъёсын. Дуно станокъёс сьӧры уд пукты дышетскымтэ 
мур­тэ. Предприятиос утчало IT-технологиосты тодӥсь егитъ­­ёсты.

— 4-тӥ-5-тӥ курсъёсын дышетскись программистъёс уже интыяськемын ни. Асьмелэн арлы быдэ ог 500 программистъёс вузэз быдто. Пӧлысьтыз 300-эз уже интыяське, мукетъёсыз асьсэлэсь ужзэс усьтыны выро. Республикаын IT-удысын 11 сюрс специалист ужа, озьы ке но эшшо 1 сюрс инты буш. Дышетскон 4 ар ӵоже мынытозь, улон воштӥське. Нош дышетӥсьёс выльзэ сутыса уг вутто. Асьме программистъёсмылэн мукетыз ляб интызы — англи кылэз урод тодо, — мылкыдзэ вераз информатизацияя но связья 
министр Тимур Меджитов.

Уждун — нырысетӥ интыын

Кадръёсты дасянлы сӥ­зем вераськон пӧрмиз пӧсь­кыосты шараянлы. Предприятиос возьмало визьмо специалистъёсты, нош ӟеч ужасез будэтонлы 15-17 ар кулэ.

Вузъёсы уг лыкто егит дышетӥсьёс. Уго кужмо заводын уждунъёс, дышетон удысэн ӵошатоно ке, трослы вылӥынгес. Соин сюлмаськыны кулэ преподавательёслэсь, производствоысь мастеръёслэсь уждунзэс йылэтон сярысь.

— Лэчыт ужпумъёсты сэрттон вылысь депутатъёс законэ туала воштонъёс пыртыны кулэ. Туннэ шараям сюлмаськонъёсты эскером на котырес ӝӧк сьӧрын сентябре, — йылпумъяса вераз Кун Думаысь Дышетонъя но наукая комитетлэн аппаратэныз кивалтӥсь 
Павел Кондрашов.

Елена Скворцова

Ангелина Снигирева
By Ангелина Снигирева 23 марта, 2020 16:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<