Школа – уж, спорт – шутэтскон

Ангелина Снигирева
By Ангелина Снигирева 27 марта, 2020 13:28

Грак ёросысь Пуклё гуртысь Печниковъёс тэк пуконэз уг валало: соос я пыдын, я куасэн бызьыло, я кырӟало-экто, я вожвылъяськонъёсы пырисько. Кузпалзэ но нылпиоссэ котьмалы бурдъя Маргарита Печникова — Пуклё школалэн директорезлэн воштӥсез. Семьяенызы 6-тӥ арзэ кужымзэс мертало ни гужем но тол Гурт шудонъёсын. Удмуртлыкез азинтэменызы адӟем карымон луо. 2019-тӥ арын «Арлэн семьяез» элькун вожвылъяськонлэн «Гуртысь семья» номинацияз вормизы.

М. Печникова

Маргарита Владимировна, кытысь сыӵе шаплы сямды, котькытчы вутскыны мылкыдды?

— Анай-атае Грак ёросысь Улын Йыраш школаын дышетӥзы, уж пӧлы выемын вал ке но, котьку котькыӵе ужрадэ мыло-кыдо пыриськылӥзы. Соин пичи дырысеным гань-гань улонэз тодытэк будӥ, али но тэк пукыны сюлэм уг чида. Школаын дышетскыкум киужъя, эктонъя кружокъёсы ветлылӥ. Эктыны туж яратылӥ, концертъёсын гуртъёсы но вуылӥм. Сцена вылын чебер вырыны дышетӥз Зинаида Геннадьевна Болтачева (Удмурт театрысь артистлэн Роман Болтачевлэн анаез – авт.). 2010-тӥ арын ёросысь «Чеберай» конкурсэ пыриськи — ворми. Семьяе но ачим кадь ик — гань-гань улонэз уг тоды.

Дышетӥсь луон мылкыдды анай-атайдылэсь паласькиз, вылды?

— Династимылы 100 ар пала ини. Со Бушкова Серафима Андреевна песянае бордысен кутскиз. Песянае Можга педучилищеез йылпумъяз, быдэс улонзэ визьнодан удысын тыршиз. Солэн сузэрез но, Банникова Людмила Евгеньевна, трос аръёс ӵоже нылпиосты дышетӥз.

Мамае Глазовысь пединститутэз йылпумъяз – физикая но математикая дышетӥсь луиз. Быдэс улонзэ нылпиосты визьмаз: нырысь начальной классъёсты дышетӥз, огвакытэ гуртысьтымы школаен но кивалтӥз, бӧрысь Лолошур-Возжиын обществознание нуиз, али пенсиын ни. Со Россиысь дышетон удысысь дано ужась луэ.

Шудон вакыт

Атае Можга педучилищеез быдтӥз, 3 ар физкультурая дышетӥсь вал. Ужаны сьӧр гуртэ ветлӥзы, 2 сменаен дышетӥзы. 2-тӥ пиналзы вордӥськем бере атае колхозын автобус нуллыны кариськиз. Но калыкен ужан мылкыдыз ноку ӧз кысылы, али но со Улын Йырашын гуртлэн старостаез луэ, ёрослэн Данъян пул вылаз 2 пол пыртылэмын.

Дорамы дышетӥсьёс сяна, куноосмы но ӧй вал кадь, вераськизы но школа, дышетон сярысь гинэ. Пичи дырысеным дышетӥсь кариськыса шудӥсько ни вал, эшъёсме пуктылӥ ӝӧк сьӧры, гожъяськыны, лыдӟиськыны дышетылӥ. Азьвыл нылпиосты дышетон пособиос ваньзэ киын лэсьтоно вал ук. Озьы мон анаеным ӵош ӝытбыт мар ке вандылыса, лякылыса, суредаса пукылӥ.

Ӧй тодысал ке, кыӵе предметъя тӥ дышетӥсь, шуысал, ӟуч яке удмурт кылъя, литературая. Нош тӥ информатикаен тодматӥськоды. Малы та предметэз бырйиды?

— Школа бере Можга педучилищее пыри – покчи классъёсты дышетӥсь луыса потӥ. 4-тӥ курсэ вуыса, диплом гожъяно вал – нырысьсэ быдэс ужез компьютерен бичаны куризы. Нош компьютеръёс со вакытэ, 2001-тӥ арын, куд-огезлэн гинэ вал ай.

Студент вакыт

Братэ соку агрономын колхозын ужа вал, аслаз кабинетэз, компьютерез вал ни. Озьы мон нырысьсэ компьютер сьӧры пукси, 5 нунал куспын 100 бам печатлай. Со 5 нуналзэ ик компьютер сьӧрысь ӧй ик кошкылы кадь, отын ик сиськылӥ но, изьылӥ но. Та бордысен ик информатика, компьютер тунсыко потӥзы – выль, валантэм маке котьку но бордаз кыске.

Тодӥсько, 4 дипломды шуыса…

— Ваньмыз но 4 дипломъёсы нылпиосын герӟаськемын. Педучилище бере Удмурт кун университетэ пыри,социальной работниклэсь профессизэ басьтӥ. Бызи Пуклё гуртэ. Школаын инты ӧй вал, соин клубе ужаны кутски лулчеберетъя кивалтӥсь луыса.

2-тӥ нылпимес, Серёжамес, вордэме бере, 2007-тӥ арын, школае ужаны ӧтизы. Кутски логопед луыса. Эшшо 3 гуртэ — Вужгуртэ, Байтугановое, Мишкиное — ветлӥсько вал на, отысь нылпи садъёсысь пичиосын ужалляй. Нырысь картэ машинаен нуиз-ваиз, собере ачим руль сьӧры пукси. Отӥяз школаын секретаре каризы. Нялтас, Дышетонэз азинтонъя институт пыр информатикая тодон-валанме будэтӥ. 2016-тӥ арын завуче пуктӥзы ни, нош 2017-тӥ арын менеджмент удысъя дышетскыны мынӥ на. Завуч дышетӥсьёсын но, нылпиосын но, атай-атайёсын но кусып тупатыны быгатыны кулэ. Соин та ужез ӟеч радъян понна менеджментъя курсъёс пайдаё луизы. Но нырысь-валысь завучлэн ужез туж секытэн сётӥськиз. Капчи ӧй вал мае ке но лэсьтыны курыны, уката ик тынэсьтыд трослы бадӟым тодон-валанэн дышетӥсьёсты.

Завуч

Выль удыс борды басьтӥськеме берегес ик, ӝыны ар ортчыса, школаямы Обрнадзор эскеронэн лыктӥз. Милям одӥг но замечанимы ӧй вал. Директормы монэ мактаз. Документъёсты дасяса, визьтэм но кылёд (серекъя — авт). Соин бумагаослэсь кӧня ке шутэтскон понна выжисько мукет удысъёсы – спортэ, культурае.

Тӥледын тодматски Гурт шудонъёс дыръя. Вазиськись сямдылы, мыло-кыдо луэмдылы, семьядылы синмаськи. Таза улонэн тӥ ваче ки мынӥськоды шуыса шӧдӥське.

— Семьяенымы 2015-тӥ арысен Гурт шудонъёсы пырылӥськом. Зэм, ачим мон спортлэсь азьвыл воксё палэнын вал. Грак ёросысь Улын Йырашысь школаямы спортзалмы гинэ но ӧй вал уго. Гурт шудонъёсы пыриськон азьын гинэ куас вылэ нырысьсэ султӥ. Нырысь ӵошатсконэ чик дасяськытэк мынӥ вал, но бере кыльыны возьыт ук, соин ик куасэн, пыдын бызьылыны ӧдъяй. Кыӵе ке бадӟым вормонъёс понна ӧй — пимылэсь мылкыдзэ бурдъян вылысь. 13 аресъем Серёжамылэн спортэн вырыны бадӟым мылкыдыз. Кузпалы но физкультурая дышетӥсь, соин таза улонэн эшъяськыны ачиз Инмар косӥз, лэся.

Ужен сэрен куас вылэ султылыны ик маза ӧй вал. Эшшо хозяйствомы бадӟым: вазенгес 3 скал возьылӥм, али трос ош вордӥськом. Озьы ке но тренировкаосмес, уката ик бадӟым ӵошатсконъёс азьын, ум кельтылӥське. Корка котырамы кыӵе ке ужъёс вань ке но, соосты заман-заман лэсьтӥськом ни. Озьы пудо сюдэм бере ваньмы мугормес посыны потӥськом. Гужем ми котькуд нунал – шунды пиштыку но, зорыку но — быдэс семьяен тренировкае потӥськом, одӥг нуналаз велосипедэ пуксиськом, мукетаз пыдын бызьылӥськом.

Ӝытъёсы пуксиськом шашкиен шудыны, мукетъёсыз дартс куяло. Гурт шудонъёсын ӟеч результатъёс возьматоно шуыса, профессиональной дартс басьтӥм ини. Толалтэзэ арнялы быдэ картэ асьме машинаен нылпиосмес но куд-ог дышетскисьёсты Кизнере яке Киров улосысь Сосновкае тренировкаосы нуллэ. Асьме палан умой куас сюресъёсмы ӧвӧл уго. Кузпалы физрук бере, асьме пиналъёсты но, дышетскисьёссэ но таза улонэн эшъяськытыны тырше. Мон со понна шумпотӥсько, уродэныз эшъяськытозь, мед нылпиос кыӵе ке пайдаё ужен вырозы.

Гурт шудонъёс дыръя

Спортэн рос-прос вырон понна тӥрлык туж дуно ке но, быгатэммыя куас но, дӥсь но басьтыны выриськом. Кылем толалтэ пимылы 50 сюрс тыр экипировка басьтӥм: классикалы но конёклы нимаз куасъёс кулэ, котькудӥзлы нимаз пыдкукъёс, тренировочной костюмъёс. Аделинамы но Сережамы ГТО-я куронъёсты зарни гадьпусъёслы быдэстӥзы. Пимылэн куасэн бызьылонъя 1-тӥ разрядэз вань, нылмылэн 2-тӥ. Пичиезлы, 6 аресъем Лералы, но куас дасямын ни, со но сьӧрамы кыстӥське.

Нылпиосын лагерьёсы но ветлыны вуттӥськоды…

— Кылем сӥзьыл школае вуиз элькунамы ортчылӥсь интеллектуально-творческой марафонэ пыриськыны ӧтён. 8-тӥ классысь нылпиослэн мылкыдзы бугырскиз. Но марафонэ шедён понна нырысь школаямы 4 предметъя олимпиада радъям, асьме сярысь видео лэсьтӥм. Ортчимы. Табере нылпиосты огназэс уд лэзьы – бордазы 2 чакласьёс кулэ. Но одӥг дышетӥсь но мыныны соглаш ӧвӧл, лагере, аслэсьтыд коньдондэ тырыса, мыноно, эшшо кельтэм урокъёстэ берло ортчытоно на. Ум быгатэ, ум мынэ шуыса директормылы вераны дасяськисько вал ни, гуртысь библиотекарьмес Елена Рожина пумитай. Со пумит ӧз кариськы.

Озьы эшшо асьме сярысь презентация лэсьтӥм, театральной постановка, 2 художественной номер дасямы. Арня ӵоже тае ваньзэ вуттӥм. Куд-огез шуылӥзы вал, мар юнме сереме усьыны гинэ ветлоды. Но нылпиослэн мылкыдзы бурдъяськемын бере, мыноно. Собере, азинсконъёс басьтон понна пиналъёсты бадӟым ужрадъёсы поттаны кулэ ук.

Ужрад Ижысь «Дружба» лагерьын ортчиз. Отчы Глазовысь, Чайковскийысь, Кизнерысь нылпиос люкаськизы, ваньзы кӧня ке пол татчы ветлэмын ни, милямъёсыз — нырысьсэ. Озьы ке но котыр ласянь асьмедыз туж умой возьматыны быгатӥм. Проектъёсмыя 4 командаос пӧлын 2-тӥ луимы, олимпиадаос ортчытэммыя — 2-тӥ интыын. Эшшо нылпиос азьын курон пуктэмын вал: М. Метерлинклэсь «Синяя птица» пьесазэ азинтыса, постановка возьматоно. 2 час куспын пиналъёсмы асьсэос сценарий дасязы, дышетӥсьёслы юрттӥськыны лэземын ӧй вал. Пуклё пиналъёс сцена вылэ удмурт дэремъёсын потӥзы, веранъёсазы удмурт кылъёс пыртылӥзы, возьматонзэс йылпумъязы Н. Анисимовлэн «Ӟеч луэ, тӧдьы кызьпуос» кырӟанэн. Сыӵе аспӧртэм, шаплы луэмзылы дунъясьёс но, мукет пиналъёс но паймизы. Вуоно арын но та ужрадэ ик пыриськыны ӧтизы, быдэсак удмурт сценарий дасяса, лыктыны куризы.

Тӥ 3 нылпиен анай, уждылы но, пиналъёстылы но дырды тырме-а?

— Паймисько, мумы-бубыос ӝожтӥсько ке, нылпиосмылэсь уроксэс эскерыны дырмы ӧвӧл шуыса. Мынам 10 час ӝытозь котькуд часэ гожъямын: сиён пӧзьтоно, пудо сюдоно, нылпиослэсь урокъёссэс эскероно, та ужъёсты йылпумъятэк, асламез борды уг пуксиськы. Аделинамы 10-тӥ классын дышетске, солэн чик тэк пукон дырыз ӧвӧл: урокъёссэ лэсьтэ, конкурсъёслы дасяське, киужен выре. Кемалась ик ӧвӧл нылмылэн пужъятэм миндэръёсыз нырысь ёросын вормизы, отӥяз Удмурт кун университетын радъяськем адӟытонын устоосыз пӧлын возьматэмын вал. Та вожвылъяськонын Аделиналы 2-тӥ инты сётӥзы. Кемалась ик ӧвӧл нылмы ачиз дэрем пужыятӥз, мон юрттӥськем кари. Со сяна, мыло-кыдо пыриськылэ «Шунды» огазеяськонэн радъям быгатӥсь удмурт нылпиослэн «Вамыш» сменаязы. Алигес ёросамы ортчем «Мисс весна» конкурсын вормиз на.

Таза улонэн эшъясько

6 аресъем Лера нылмы школае уг ветлы на, но лыдӟиське, 10-озь лыдъяськыны, сложение, вычитание карыны быгатэ. Ми соин ваньзэ ӵошен лэсьтыны выриськом: шыд пӧзьтыны кутскисько ке, Лераез ӧтисько. Со вӧзам кеньырез сузяса пуке, солы со шудон интые, но озьы чиньыосыз но выро, мамалэн но ужез лэсьтӥське. Ӝыт ваньмы ӵошен зарядка лэсьтӥськом, скакалкаен тэтчаськом, крезьгур лэзиськом но кыӵе ке флеш-моб малпаськом, кин тросгес созэ яке тазэ упражнениез лэсьтоз шуыса вожвылъяськиськом. 10 час бере вань нылпиос тодо ни: вуиз мамалэн дырыз, сое исаны уг яра ни. Мон 1 часлэсь вазьгес изьыны ноку уг выдӥськы – котькуд нунал кыӵе ке отчёт келяно.

«Арлэн семьяез» конкурсын семьяяды утиськись сям-йылолъёстэс возьматӥды. Мае утьыса возиськоды?

— Семьяос пӧлын вожвылъяськонъёсы 3-4 ар пыриськиськом ни, анае-атае но палэнэ уг кылё. 2018-тӥ арын нырысь ёросын «Арлэн семьяез» конкурсын устоосыз луимы. Собере элькунын асьме сярысь верамы. Отчы пыриськон понна семьямы сярысь видео дасям, вормонъёсмес возьматӥм. Аслам, картэлэн, нылпиослэн грамотаосмы сомында люкаськемын, 10 часын ӵукна кутскыса, 7 час ӝытозь дипломъёсты гинэ копировать карим. Та вожвылъяськон бере Серёжамес Москваысь Кремль ёлкае ӧтизы.

Милям семьяямы нимысьтыз сям-йылолъёс кылдӥзы ни. Парсь вандӥськом ке, одно ик виртырем лэсьтӥськом, куноосты ӧтиськом. 4 семьяосын, котькудмы пӧртэм удысъёсын ужаськом ке но — ужбергатӥсьёс, дышетӥсьёс, огшоры гурт удысын тыршисьёс — эшъяськиськом. Асьме машинаосынымы юге ял карыны ветлӥськом, огез нылмы аллергиен курадӟе бере, зарезь омыр тазалыкезлы умой. Озьы ик Выль арез, 8-тӥ Мартэз, 23-тӥ февралез пумитаськом, гужем шашлык пыжиськом. Выль ар бере асьме семьяен одно ик анай-атайёсмы доры бертӥськом. Отын апаелэн, агаелэн семьяоссы но люкасько. Нылпиосмы милемлы пичияк концерт дасяло, конкурсъёс ортчыто, спектакльёс пукто, котькудмес пичильтык кузьымен шумпотто. Ӵужанай, ӵужатай но асьсэ коже мар ке малпало. Ӝӧк сьӧрын пукеммы бере ваньмы гурезь йылысен тюбинген нискыласьком, шашлык пыжиськом.

«Арлэн семьяез» конкурсын сям-йылолъёссэс веразы

Ум кельтылӥське «Ижысь винтовка» ӵошатсконэз. Нырысьсэ отчы вуыкумы, учкисьёс пӧлын велосипед шудытӥськиз. Сое ми утыны кулэ шуыса малпай, озьы ик луиз. Табере та кузьымен пимы ворттылэ.

Шутэтскон нуналъёсы кытчы ке мынӥськом, дорын гань-гань пукеммы уг пот уго. Озьы я Елабугае йӧ двореце шонтӥськом, я Ижкаре кыӵе ке ужрадэ потӥськом. Нылпиос но тодо: арня пумын кытчы ке мыномы, чидатэк витё со нуналэз.

Зэм, ялан тазьы ветлыны уксё уд тырмыты. Соин трос пудо вордыны выриськом. Мамаосмылэн бадӟым бусыоссы, комбайнзы вань, соослы гужемзэ юрттӥськытэк ӧвӧл, озьы пудо сиён асьмелы асьмеос ик дасяськом. Куд-огез семьяослы паймисько, ялан государстволэсь дасьсэ гинэ возьмаса пуко, асьсэлэн номыр каремзы уг поты. Мон, декретын пукыкум но, черсӥськи, керттӥськи, ӟазег вордӥськом вал, Елабугае мыныса, ыж гон, ӟазег вузалляме вань. Умой улэм потэ ке, аслыд мар ке но кароно, саесъёстэ пужалляса тыршоно, кыллись из улэ ву но уг бызьы.

Ангелина Снигирёва

Ангелина Снигирева
By Ангелина Снигирева 27 марта, 2020 13:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<