Хозяйствоос пото кунгож сьӧры

Ангелина Снигирева
By Ангелина Снигирева 13 марта, 2020 12:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нуналысь нуналэ гуртоос ӟечгес ужало. Шаерысьтымы 14 гурт предприятие кунгож сьӧры вуззэ поттэ ни. Асьмемыз сюдыны пӧрмытӥськом.

2019-тӥ арын шаерысьтымы хозяйствоос 829,2 сюрс тонна йӧл кыскизы
Туспуктэм: udmurt.ru

Сӥль поттонэз будэтоно

Туннэ шаермы сиён-юон поттонъя Россиын огез кужмоез улос луэ. Йӧл кулэезлэсь 50 процентлы уногес поттӥськомы, сӥль — 11 процентлы, курегпуз — 6 процентлы.

— Йӧл поттон удысын ужало шаерысьтымы 300 хозяйствоос, 40-эз племзаводъёс но репродукторъёс луэмын, — шуэ гурт удысъя но сиён-юонъя министр Ольга Абрамова. — Кылем арын 892,2 сюрс тонна йӧл кыскимы. Котькуд скаллэсь шорлыдын 400 килограммлы уногес йӧл люканы пӧрмытӥмы. Азьвыл арлы быдэ ог 2,5-3 процентлы йылӥськомы вал ке, миым шуак 6 процентлы тросгес кыскимы. Со юрттэт сётэм бордысь гинэ уг поты — хозяйствоос ужан амалъёссэс воштыны, кунгож сьӧрысь тӥрлык вуттыны кутскизы. 2019-тӥ арын туала куронъёслы тупась 28 ферма пуктэмын вал 6 сюрс 886 скаллы. Туэ эшшо 30-эз кылдоз. Ужаськомы ӟеч выжыысь пудоез йылэтон бордын. Но азьланяз мукет ӧръёсты но тазьы ик азинтон сярысь сюлмаськоно.

Али бадӟымесь луонлыкъёс усьтӥсько сӥль поттонын. Шаерамы миым 183,8 сюрс тонна тылобурдо но пудо сӥль люкаськиз. Кылсярысь, Можга ёросысь курег вордонъя «Аскор» предприятие Россиын 10-тӥ интыын возиське. Парсь сӥль поттонъя Удмуртия Приволжск федерал округын 5-тӥ интыын, Россиын 24-тӥ интыын. Кужмоосыз луо Дэри ёросысь «Восточный», Шаркан ёросысь «Кипун» но «Восход», Можга ёросысь «Россия» предприятиос. Ольга Викторовна пусъемъя, тазьы ик кунян сӥль поттонэз азинтыны кулэ. Али сӥлё выжыысь 700 йыр скалъёсмы ке, 2030-тӥ арозь соосты 10 сюрс йырозь вуттоно. Таин валче арлы быдэ ватсаса 1 сюрс 400 тонна сӥль поттыны луоз.

А. Бречалов

Удмуртилэн Тӧроез Александр Бречалов:

– Асьме шаермы кылем арын кунгож сьӧры 2,7 миллион доллар тыр сиён-юон келяз. Туэ январе 255,6 сюрс доллар тыр вуз кариз ни. Озьы 8 кунэн эшъяськыны ӧдъямы. 2024-тӥ арозь, сиён-юон вузаса, 10,4 миллион доллар поттыны ужпум пуктэмын.

— Шаерамы 3 хозяйство гинэ кеч вордонэн рос-прос выре. Али та ӧрын асьсэды эскерыны медо фермеръёс. Оглом гидъёсын лыдъяське 17 сюрс 655 кеч. Уллёез 10 ар ӵоже 25 сюрсозь вуттыны ужпум пуктэмын. Соку арлы быдэ 62 сюрс тонна кеч йӧл кыскыны быгатомы. Таин валче сыр лэсьтӥсьёс но йылозы — кеч йӧллэсь сыр пӧзьтӥсьёс али 4 кузя.

Шаерамы бадӟым саклык висъяське чорыг будэтонлы но. Кылем арын 1 сюрс 258 тонна чорыг поттӥмы, 1 сюрсэз — Вотка ёросысь «Пихтовка» предприятилэн. Аналмем ӵыпетъёс лачак на бере, отчы но чорыг лэзёно.

Музъемез гыроно

Гурт удысын азинтӥсь-кыны луонлыкъёс паськытэсь. Кылсярысь, гыроно-кизёно бусыос али ог 945 сюрс гектар лыдъясько, вань бусыос пӧлысь со ӝыныез.

— Туж троссэ музъемез быгатыса но кулэезъя ум кутӥське, — шуэ Удмуртилэн Тӧроез Александр Бречалов. — Алнаш ёросын одӥг квадрат метрзэс но кизьытэк уг кельто, со дыре ик мукет ёросъёсын гектаръёсын бусыос пашмо. Хозяйствоослэн музъемен ужаны быгатэмзыя адӟиське ёрос йыръёслэн сюлмаськемзы.

Музъем бордысь угось потэ ӟеч урожай но, пудо сиён дасян но. Ӟеч сиёнтэк йӧнала пудо уд ворды. Озьыен, рынокын инты шедьтыны шуггес луэ.

— Али шаерысьтымы 14 гурт предприятиос экспортлы ужало, эшшо 6-ез документъёссэс дасяло. Кылем арын Россиысь вань предприятиос пӧлысь асьме шаермы нырысь ик Китае йӧл но солэсь лэсьтэм сиён поттыны быгатӥз. «Комос-групп» огазеяськонлэн мытэм ужез ӟеч мынэ, китайёс тросгес но тросгес йӧл куро. Озьы ик кылем ар пумын Монголие келяны кутскимы сӥль. Куасьтэм бакча сиён Казахстанэ мынэ. Туэ етӥн мертчанэз (волокно) уногес экспортлы дасян сярысь сюлмаськомы. Юкаменск ёросысь фермеръёс огазеяськизы, етӥн сэстонъя заводэ кунгож сьӧрысь выль тӥрлык вуттӥзы. Табере машина, самолёт пушъёсты лэсьтонлы, дӥсь вуронлы тупась етӥн поттыны пӧрмыто. Ӝоген эшшо одӥг сыӵе линия ужаны кутскоз. Со умойлы гинэ — етӥнлы зол кулэяське Китай, — шуэ Тӧро.

Елена Сараматова

Ангелина Снигирева
By Ангелина Снигирева 13 марта, 2020 12:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<