Улонэз коньдонэн уг мертало

Ангелина Снигирева
By Ангелина Снигирева 6 марта, 2020 12:57

27-тӥ феврале Кун Кенешын ортчиз 21-тӥез сессия. Ӝутэмын лэчыт ужпумъёс, кутэмын выль законъёс — оглом эскеремын 16 ужпум.

Нылпиос сиськозы дунтэк

Калыкез улонын утён политикая но ужъя министр Татьяна Чуракова пусъемъя, берло 10 ар ӵоже шаерамы трос нылпиё семьяослэн лыдзы 2 поллы йылӥз. 2010-тӥ арын 1-тӥ январе соос 10 сюрс 720 кузя вал, туэ 22 сюрс 624 кузя луизы ни. Нош кун ласянь юрттэт кин ке басьтэ, кин ке уг басьты вал. Лыдэ басьтӥськылӥз семьялэн огъя доходэз. Со семьяысь котькуд адямилы улыны тупатэм минимумлэсь ичигес луыку гинэ льготаос тупатъяськылӥзы. Удмуртилэн Тӧроез Александр Бречаловлэн кичӧлтэмезъя дасямын но кутэмын трос нылпиё семьяослы юрттэт сётонъя законэ воштонъёс. Табере 1-тӥ мартысен бадӟым семьяосысь 1-тӥ-11-тӥ классъёсын вань дышетскисьёс школаын дунтэк сиськыны быгато. Семьялэн доходэз лыдэ уг басьтӥськы.

О. Аляшева

Ижысь трос нылпиё анай Ольга Аляшева:

— 3 пиналмы пӧлысь 2-ез школаын дышетско. Азьвыл милемлы льгота чакламын ӧй вал — семьямылэн доходэз тырмылӥз. Табере нылпиосмы но, асьмеос но шумпотэмын. Угось толэзьлы быдэ ог 4 сюрс манет шыръяськоз — сомында усе вал 2 пиналэз школаын сюдон. Со уксёен нылпиосты кружокъёсы ватсаса нуллыны быгатом.

Табере шаерысьтымы вань трос нылпиё семьяослы огкадь льгота чакламын транспортлы налогъя но. Соя семьяысь одӥг машина понна выт тыроно луоз 50 процентсэ гинэ. Интернатын, пансионатын, больницаосын кун чотын улӥсьёссы-эмъяськисьёссы, военной училищеосын дышетскисьёссы вань дыръя семьяослэсь льготаоссэс быдтылӥзы, соос сотэк но кун чотын уло ни шуыса. Табере озьы уз луы ни.

Кун Кенешысь депутатъёс трос нылпиё семьяослы сямен ик льготаос юнматӥзы опекае мурт пиналэз басьтэм оген адямиослы но. Табере юрттэт таослы но быдэсак сётӥськоз.

Мар возьматӥзы эскеронъёс

Кылем арын ужамзылы йылпумъянъёс лэсьтӥз эскеронъя кун комитетлэн кивалтӥсез Борис Сарнаев.

Кызьы со пусйиз, миым комитет 262 эскерон уж радъяз. Чаклано объектъёс пӧлы пыризы министерствоос но ведомствоос — 2,3 миллиард манет тыр янгышъёсты шараяз. 2018-тӥ арен ӵошатыса, со 200 миллион манетлы ӧжытгес. Кытын ке бюджетысь коньдон кулэезъя кутэмын ӧвӧл, кытын ке пайдаез ӧз шӧдӥськы.

Кун Кенешлэн Тӧроезлэн воштӥсез Надежда Михайлова:

— 2020-тӥ арын 1-тӥ мартысен шаерысьтымы 
22 сюрс 624 трос нылпиё семьяосысь ог 35 сюрс пиналъёс школаын дунтэк сиськыны кутскизы. Вуоно дышетскон арысен покчи классъёсын вань дышетскисьёсты дунтэк сюдозы. Школаос сюлмаськозы сиёнлэсь ӟечлыксэ умоятон сярысь но. Столовойёсты тупатъяны-выльдыны бюджетысь ог 100 миллион манет висъяськоз.

Трос янгышъёс бухгалтерской ужын, отчётъёс лэсьтонын. Кивалтӥсь верамъя, лушкаськон учыръёс пусъемын ӧвӧл, но 1 уголовной но 10 административной уж ӝутэмын. Сюресъёсты лэсьтон, тазалыкез эмъян, дышетон удысъёсын бюджетысь коньдон радызъя ӧз кутӥськы. Куддыр одӥг проектлы висъям уксё шуак мукет проектлы кошкылӥз, шуиз Борис Сарнаев.

— 2014-тӥ арысен шаерысьтымы кивалтонъя кун учреждениосысь мозмытэмын 1 сюрс 150 ужасьёс. 2018-тӥ арын оптимизациен валче уждунлы чаклам 106 миллион манет уксё шыръяськыны кулэ вал кадь. Но улон возьматӥз, та адямиос мукет учреждениосы гинэ поттэмын вал шуыса. Озьы бюджетэз радъяны ноку ум быгатэ, — шуиз Борис Сарнаев.

Кун Кенешлэн Тӧроезлэн воштӥсез Надежда Михайлова вератэк ӧз чида:

— Бюджетлэсь ку­тӥсь­­кемзэ одно ик эскероно. Но адямилэсь улонзэ утёно ке, куддыр законъя гинэ кариськыны уг луы. Кылсярысь, ас вакытаз бюджетын ӧй вал чакламын ракен висисьёсты эмъянын кутӥськись дуно химия препаратъёслы коньдон. Онкоцентр шыръям уксёен басьтӥз со препаратъёсты, таослэсь адямиослы зэмен ик капчи луэ шуыса. Табере валтӥсь врачлэсь кылзэ юало, уксёез кулэезъя ӧз куты шуыса. Куддыръя пыкылон но административной уж ӝутон азьын малпаськоно, дыр: мар дуногес — адямилэн улонэз яке уксёез огысьтыз статьяысь мукетаз выжтон?

Правительстволэн Тӧроез Ярослав Семёнов проектъёслы висъям котькуд копейка пумысен вераськыны дась луэмзэ ивортӥз. Туннэ нацпроектъёсъя пуктэм школаос, садъёс, больницаос ужало, сюресъёс лэсьтэмын, талы шумпотыны кулэ, шуиз со.

Бюджетэ воштонъёс

Сессиын туэлы бюджетэ воштонъёс пыртӥзы — солэн доход люкетэз ог 5,5 миллиард манетлы йылтэмын, расход люкетэз — 5,1 миллиард манетлы. Та пӧлысь 22,8 миллион манет чакламын нацпроектъёслы, 90,3 миллион манет — калыклэсь улон-вылонзэ утьыны но эмъяны. 282 миллион манет — нылпиослэсь гужем шутэтскон дырзэс радъяны. 314 миллион манет висъяськоз соцобъектъёсты выльдыны-пуктыны.

Елена Сараматова

Ангелина Снигирева
By Ангелина Снигирева 6 марта, 2020 12:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<