Улонзэ ачиз чильпа

Ангелина Снигирева
By Ангелина Снигирева 16 марта, 2020 15:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижысь Галина Широбокова туж чебер керттӥське, чильпаське — киужъёсыз музей усьтымон люкаськемын.

Г. Широбокова

Та кибашлы нылкышно вордскиз Дэри ёросысь Кечгуртын. Можга педучилищеын дышетскемез бере покчиосты дышетӥз. Нылпиосты нодъяз 30 арлэсь кема. Пенсие потыса, Галина Леонидовна дышетскыны пыриз Удмурт кун университетысь Удмурт кылтодонъя, финно-угроведениея но журналистикая институтлэн магистратураяз. Арлыд люкамъя дышетскыны эшшо но тунсыкогес вылэм, шуэ со.

— Анае доярка луыса тыршиз. Милемыз утялтӥз-вордӥз бадӟым мамамы — песянаймы. Со черсӥськыса пуке вал. Нош мон я мышказ, я пукон вылэ султыса, учкылӥ солэсь ужамзэ. Небыт ыж гон доры кизэ мыче, чиньыосыз улысь векчи шорт потэ. 1-тӥ классын пӧзь керттон борды басьтӥськи — толалтэ кутскыса, гужем йылпумъяй: огезлэн кунчиез мукетызлэсь кузьгес, огезлэн пӧлыез мукетызлэсь сюбеггес. Малпай сое ачим быдӟа ик ӵыжы-выжыелы Володьлы кузьманы. Толлэсь вуэмзэ чидатэк возьмай: ку меда Володь пӧзьме нуллоз ни! Таки адӟыны ӧз кылды, — пальпотыса вера Г. Широбокова.

Куиськонэз но гажа

Нош курикен чильпаськыны дышетэм сое анаез.

— Курик векчи, мынам сое киям кутэме уг луы, — чильпаськыны дышетскемзэ тодаз вае усточи. — Курадӟемме адӟыса, тятяе кутӥз но чӧльые зӧкта вайлэсь чильпаськон вень лэсьтӥз. Киы волям бере дорамы зэмос фабрика усьтӥськиз, шуыны луоз: апаеным вожмаськыса кадь ӟустариослэсь выж лёгет чильпаны кутскимы. Али ке но вуж дӥсез куштыны киы уг пыры: кесэген-кесэген кесясько но маке чильпасько. Малпанэ вань выж лёгетъёслы сӥзем музей усьтыны. Соосты угось малэсь но уг чильпало: векчи вайёслэсь, бунлэсь, пушнерлэсь, пужым лыслэсь, эсьмаса, вал быжлэсь но. Пиелэн пичи коркаез вань, сое музейлы висъяны дась, — вера Г. Широбокова.

Г. Широбоковалэн нылыз кильтро айшетэн

Калык тужгес но зол синмаськемын Галина Леонидовналэн чильпам айшетъёсызлы. Соос дэра басма вылысь кадь пужыосын.

— Вуриськыны туж умой уг быгатӥськы, — шуэ нылкышно. — Огпол кулэ луиз удмурт дэреме вӧзы тупась айшет. Мар кароно? Вуремлэсь, малпасько, сое ӝоггес чильпало. Сое удмурт пужыё кари. Маша нылылы но чильпай ни, ӵошен табере кильтыръяськиськом. Дышетски на тани коклюшкаосын чильпаськыны, та амал туж кельшиз. Троссэ киужъёсме мон кузьмасько. Сюлмын нясь-нясь луэ, киужедлы шумпото ке.

Галина Леонидовна гожъя кылбуръёс, веросъёс. Яратэ фотоаппаратэн калгыны, туспуктэмъёс лэсьтыны. Туэ со поттыны чакла «Чильпаса лэзё али…» бичетсэ. Отчы пырозы гожъямъёсыз, туспуктэмъёсыз, озьы ик киужен вырон амалъёсыз.

Елена Никитина

Ангелина Снигирева
By Ангелина Снигирева 16 марта, 2020 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<