Ужын — паяльник, дорын — гира

Ангелина Снигирева
By Ангелина Снигирева 25 марта, 2020 12:16

Пичи Пурга ёросысь Яган-Докья гуртысь Катерина Заварухина тусызъя ненег гинэ. Ужез но, ваньмон дырзэ ортчытэмез но веськрес мугоро кышномуртлы чик уг тупало кадь.

Пичи Пурга ёросысь Яган-Докьяысь К. Заварухина 
гира ӝутъянэн выре

Катерина 2 ар пала Ижысь беспилотникъёсты лэсьтонъя предприятиын тырше, беспилотникъёс вылэ пуктӥськись камералэсь пушсэ бича-лякылэ. Нош дышетскемезъя со садысь воспитатель, йылпумъяз Ижысь педколледжез.

— Нылпиосын ужан мынам удысэ ӧвӧл шуыса валай, — вера Катерина. — Котьку кельшылӥз техникаен вырыны. Озьы колледж бере «Аксион» предприятилэсь ялонзэ адӟи — отын радиоэлектронной аппаратураен ужасьёсты (монтажник) утчало вылэм, нимаз дышетон но радъяське, пе. Монэ отчы кутӥзы, дышетӥзы. 2-3 ар заводын ужай — микросваркая оператор луыса.

Бӧрысь нылмурт мукет уже выжиз. Беспилотникъёсты поттонын ог 300 мурт тырше. Уноез воргоронъёс. Камера лэсьтонын Катерина огназ ужа. 20 сантиметр ӝуждалаем но 10 сантиметр пасьталаем арбериез лэсьтыны быдэс нунал кошке. Угось сыӵе арбериын юнматэмын 500 пала пӧртэм микросхемаос, резисторъёс, конденсаторъёс, трос пумо векчи езъёс, котькудзэ нимаз интые тупась езъёсын вачеяно. Ужан тӥрлыкез Катериналэн — паяльник, микроскоп, лупа но фен. Паяльникен векчи арбериосты лякылэ, фенэн езъёсты пӧсятэ — озьы соос сюбегало, пе.

Камераысь векчи арбериосын ужаны трос чидан кулэ, шуэ Катерина. Куддыръя нылмурт дырыз дыръя ужзэ быдэстон понна уж дураз ӵукна 6 часлы но вуэ.

Ваньмон дырзэ но Катерина аспӧртэм ортчытэ. 3 ар пала со гира ӝутъянэн выре, шаерамы ортчылӥсь Гурт шудонъёсын 63 килограммозь нылкышноос пӧлын — кужмоосыз радын. 16 килограммъем гираез троссэ 157 пол ӝутъя. Таӵе тунсыкъяськон нылмуртлы паласькиз анаезлэсь — Ирина Заварухина гира ӝутъянъя шаерамы одӥгез кужмоез спортсмен луэ, нош кылем арын декабрь толэзе дуннеысь чемпион луиз.

— Гира ӝутъянын но, ужам сямен, чидась луыны кулэ, —азинтэ нылмурт. — Соин но, дыр, спортысь та амал мыным туж кельше. Огдыре секыт атлетикаен вырыны кутскылӥ вал, отын одӥг пол штангаез ӝутӥськод но ужед быре. Со мыным сюлэмыя ӧз луы. Нош гираез 10 минут ӵоже кӧнялы кужымед тырмоз ӝутъяно.

Ангелина Снигирёва

Ангелина Снигирева
By Ангелина Снигирева 25 марта, 2020 12:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<