«Удмурт Кенеш» огазеяськонлэн исполкомаз А. Оки премилэсь туэлы лауреатъёссэ юнматӥзы

Ангелина Снигирева
By Ангелина Снигирева 18 марта, 2020 15:46
Исполком
Туспуктэм: Удмурт Кенешлэн пресс-службаез

Исполком огкылэ вуиз: туэлы А. Оки премиен пусъёно Россия Федерациысь дано артисткаез Валентина Пудоваез, «Удмурт Кенешлэсь» Сарапул ёросысь ёзэзлэсь кивалтӥсьсэ, дышетон удысысь сӥё-дано ужасез Нина Бехметоваез но Парижысь эстон но француз кыллы дышетӥсез, удмурт литератураез эскерись профессорез Ева Тулузэз.

Лауреатъёсты сиё-дано пусйыны чакламын Удмурт нылкышно огазеяськонлэн юбилеезлы сӥзем бадӟым конференция дыръя. Сое Пичи Пурга ёросысь Баграш-Бигра гуртын апрель пумын ортчытыны чакламын вал. Но исполкомын шугъяськонзэс веразы, коронавирусэн сэрен луоз меда ужрадэз орчытыны? Оло, майлы выжтоно? Сыӵе шугъяськемзэ вераз «Удмурт нылкышно кенеш» огазеяськонлэн кивалтӥсез Надежда Степанова но. Туж жаль, дуннеын алясь вирус сэрен трос тунсыко ужрадъёс мукет дырлы выжтэмын луо. Но, ма карод на… Озьы Нылкышно кенешлэсь конференцизэ 15-тӥ мае ортчытыны чакламын.

Со сяна, «Удмурт Кенеш» али ик дасяське ни Гербер празднике пыриськыны. Туэ со Вавож ёросын ортчоз. Нош ар пумын, декабре, «Удмурт Кенеш» огазеяськонлэн бадӟым ӧтчамез ортчыны кулэ. Со Удмурт элькунлэн 100 ар тырмонэз вакытэ ортче бере, яркытгес но мургес луыны кулэ.

Ӝутэмын на мукет сюлмаськытӥсь ужпумъёс но. Кылсярысь, Можга но Глазов городъёсын удмурт гимназиос усьтон. «Удмурт Кенеш» огазеяськонлэн кивалтӥсез Татьяна Ишматова верамъя, Глазовын гимназия пумысен уж азьвылгес но нуэмын ни, соин ик анай-атайёслэн, нылпиослэн пумитъяськон мылкыдзы ӧвӧл. Бадӟым валэктон уж нуиз «Удмурт Кенеш» огазеяськонлэн Глазов ёросысь ёзэныз кивалтӥсь Инесса Рябова. Нош Можгалан уж нуэмын ӧвӧл на, кивалтӥсьёсын но, калыкен но пумиськылоно, вераськоно на.

Исполкомын нош ик ӝутэмын вал вуоно Удмурт культурая центр сярысь ужпум. Ку сое лэсьтон ужъёс кутскозы ни?

Исполкомчиос огкылэ вуизы: матысь дыре котрес ӝӧк сьӧры люкаськыса, шаерысьтымы министръёсты ӧтьыса, та ужпумъя эшшо кенешозы. Соку ик пыр-почгес вераськозы Удмуртилэн кунлык басьтэмезлы сӥзем ужрадъёс пумысь.

Елена Васильева

Ангелина Снигирева
By Ангелина Снигирева 18 марта, 2020 15:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<