Удмуртиысь 1 сюрс 426 мурт улон интызэ умоятыны малпа

Ангелина Снигирева
By Ангелина Снигирева 26 марта, 2020 13:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Гуртын юрт басьтыны я пуктыны мылкыд карисьёслы 3 процентъем ипотека сётъяны кутскизы. 16-тӥ мартлы шаерысьтымы 8 муртлы 19 миллион манет тыр займ висъямын ни.

Вотка ёросысь Пихтовкаын выль корка кылдэ
Туспуктӥз Елена Сараматова

6 ёросын пуктӥськись ӧжыт?

Капчиятэм ипотека сётӥське гуртъёсты котыр ласянь азинтонъя кун программа улсын. Валтӥсь ужпум — гуртъёсты быронлэсь утён. Туннэ капчиятэм ипотека басьтыны пӧрмытӥзы ни 12 улосъёсысь адямиос. Ипотекалы тужгес трос вазиськизы Башкортостанын — 5,8 миллиард манет висъямын. 2-тӥ интыын Татарстан — 4 миллиард манет, 3-тӥ интыын — Ленинград улос — 3,4 миллиард манет.

Капчиятэм ипотека корка я квартира басьтыны гинэ уг сётӥськы. Вуж юртэз тупатъяны, ву, газ, тыл кыскыны но висъяське. Озьы ик ӝутӥськись юрт, пуктӥськон вылысь музъем басьтыны. Валтӥсь курон — музъемед но, юртэд но гуртын мед луозы, ачид городын ужад но улӥд но ке но.

Та программая кредит басьтыны мылкыд карисьёс нуналысь нуналэ йыло шаерамы но. Правительстволэн Тӧроезлэн воштӥсез, гурт удысъя но сиён-юонъя министр Ольга Абрамова пусъемъя, гурт ипотека 1 сюрс 426 адями куре. Та пӧлысь 382-ез — ӵыж-выль коркалы, 474-ез — вуж коркалы, 112-ез — юрт пуктыны, 458-эз — коркаен музъем басьтыны. Вань вазиськем адямиос пӧлысь 67 процентэз Дэри ёросысь юртъёс шоры учкыло. Иж городлы матын интыяськемын угось, ужан интыос но отын лачак. Ӧжыт куриськонъёс вуэмын Каракулино, Сюмси, Грак, Шаркан, Кияса но Юкаменск ёросъёсысь. Тае специалистъёс тазьы валэктэ: та палъёсын ужан интыос тыро-пыдо ӧвӧл.

Вужгурт ялан выльдӥське

Али капчиятэм ипотека сётъянэн выре Россельхозбанк гинэ. Нош куд-ог ёросъёсын солэн ёзъёсыз ӧвӧл, кылсярысь, Гракын. Адямиос куриськон гожтыны Алнаш кеме мыноно луо, быгатӥсез Иже лыктэ.

— Кинлы, кызьы но марлы 3 процентъем ипотека сётӥське шуыса, гуртъёсамы 28 пумиськон ортчытэмын, — вера Грак ёросысь Депутатъёслэн Кенешенызы кивалтӥсь Михаил Крестьянинов. — Вылӥ Эгра гурт поселениын но Грак черкогурт котырын пуктӥськисьёс вань. Татын угось уж вань. Мукет гуртъёсын югдур секытгес. Тани Ӟатча гуртын 325 улӥсез, но татын хозяйство ӧвӧл бере, калык Татарстан улосэ ужаны ветлэ. Котловка, Макаргурт, Новогорское гуртъёсын калык секыт улэ. Соин ик соослы 3 процентъем ипотека кулэ ӧвӧл. Нырысь йӧн-йӧн ужан интыос кылдытоно.

Грак ёросын кылем арын чарак кулэсмизы пуктӥськыны музъем басьтӥсьёс но. Со вакытэ ик паськытало Вылӥ Эгра поселение котырысь 5 гуртъёс. Татын али 22 корка ӝутӥське. Ваньмыз со — «Родина» хозяйство сюлмаськемен. Предприятие ас вакытаз субсидия но висъялляз. Уждунзы бадӟым.

Гуртъёсты котыр ласянь азинтон программая 2020-тӥ арын Россиысь 5,5 сюрс адямиослэсь улон условиоссэс умоятыны чакламын, висъяськоз ог 1 миллиард манет.

— Семьяеным Татарстан улосысь Менделеевск городын улӥськомы но ужаськомы, — вера Грак ёросысь Вужгуртысь Владимир Крестьянинов. — Озьы ке но ми ялан вордскем гуртамы. Менделеевскен висмы 20 иськем гинэ. Уг быгатӥськы гурттэк. Татын бакча но, эрик но, эшъёс но, омыр но чылкыт. Татын выжымы, татын анай-атае. Милям тросэз гуртоос Набержные Челны, Елабуга городэ ужаны ветло, нош уло гуртын. Кылем сӥзьыл Пуклё гуртэ коркалы фундамент кисьтӥ, проект лэсьтӥ ни. Киы мынэ, ваньзэ аслам лэсьтэме потэ. 3 процентъем кредитлы вазиськи. Со программа киосме думылэ: аслыд юрт пуктыны уг яра, шуо, подрядчик кулэ, пе. Милям ёросамы подрядной организациос воксё ӧвӧл — матысез Алнаш ёросын. Муртлы оскем но уг поты — аслыд ачид оскымонгес пуктӥськод. Та ласянь программа ӧжытак умойтэмгес.

Дунъёсты эгесалозы

Шаркан ёросын но югдур пӧртэм ик ӧвӧл. Туннэ та ёросысь 15 мурт банке капчиятэм ипотекалы вазиськемын ни. Ваньзы сямен дась юртэз басьтыны малпало ӵапак подрядчикен шуг-секытъёс кылдэмен

Быгы гуртысь Владимир Мышкин верамъя, туннэ гуртазы 1 гинэ корка вузаське. Дуныз 1 миллион манет. Кирпичлэсь бере, басьтоно кариськимы, шуэ. Асьсэос угось двухквартирной коркан уло. 3 нылпиоссы. Улон интызэс паськытатэмзы потӥз.

— Гуртамы «Восход» хозяйство ужа, уждун умой тыро. Ачим механизатор луыса ужасько. Мувӧй кыскисьёс дорын но ужасьёс вань. Соин ик кредит шоры учиськисьёс туж трос ӧвӧл – асьсэлы кыӵе кулэ, сыӵе юрт пукто. Пичи процентъем кредит сётъялозы шуыса, начаргес улӥсь калык шумпотӥз. Гуртъёсын газэн 500-600 сюрс манетэн пу корка шедьтыны луэ, газтэк – 200-300 сюрс манет. Сыӵезэ анай капиталэнгес басьяло.

Кредитлы но квартираослы вожмаськон кылдэмен, куд-ог застройщикъёс но корка вузасьёс дунъёссэс ӝутӥзы ни. Удмуртилэн Тӧроез Александр Бречалов Ольга Абрамовалы вазиськиз, дунъёсты эскерыса возьыны курыса. Дунэз мултэс куасалтӥсьёсын антимонопольной служба ужалоз. Александр Бречалов пусъемъя, калыклы юрт пуктыны луонлык сётон бордын гинэ ужпум ӧвӧл. Гуртъёсты утён вылысь отын улон-вылонэз радъяно, шуэ со. Кылсярысь, 88 фельдшер-акушер пунктъёс выльдэмын луозы. Туэ тросаз гуртъёсы газ кыскозы — гумыослэн огъя кузьдалазы 130 иськемлэсь ортчоз.

Елена Сараматова

Ангелина Снигирева
By Ангелина Снигирева 26 марта, 2020 13:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<