Тылож пыр потэм туспуктэм

Ангелина Снигирева
By Ангелина Снигирева 31 марта, 2020 15:19

1941-тӥ арын 21-тӥ июне Балезино ёросысь Нурызгуртысь егит кышномуртэз Ангелина Фёдороваез фотограф лӧпкытэм: ойдо, пе, туспуктэм лэсьтом, сое картэдлы ыстод. Кин тодӥз, ӵуказеяз война кутскоз шуыса…

Туспуктэм вылын — Балезино ёросысь Нурызгуртысь Ангелина Павловна Фёдорова Эмилия нылыныз. Туспуктэм лэсьтэмын 1941-тӥ арын 21-тӥ июне.

Со вакытэ Ангелина пичи Миля (Эмилия) нылыныз дораз пуке вал, нош Николай кузпалыз Горд Армиын служить кариз. Огаз гожтэтаз Ангелина Павловна та туспуктэмез картэзлы ыстӥз — мед, пе, пичи Милямы тонэ быронлэсь, лек адӟонлэсь утёз. Пичи фотоез — со спичка коробка быдӟа гинэ вал — офицер Николай Семёнович гимнастёркаезлэн кисыяз пыдло понӥз. Мӧзмыкуз нош но нош учкылӥз кузпалызлэн но нылызлэн ымныръёссы шоры. Николай Фёдоров одӥг малпанэн улӥз: ӝоген берто Нурызгуртам мемие, кышное, Миля нылы доры. Но малпамъя гинэ улоно ӧвӧл…

Ожъёслэн лыдзы-пумзы ӧй вал. 1942-тӥ арын 25 апреле Н. Фёдоровлэн взводэз Ленинград палась Синявино вырйылъёсын ожмаськиз. Офицерлэн соку киыз сӧсырмиз, но госпитальын кема ӧз возе — Ленинград котыртэмын, ожмаськисьёс кулэ. 4-тӥ ноябре Николай нош ик зол сӧсырмиз, ымныраз корт чалепъёс мертчиськизы. Сое нош ик полевой госпитале ыстӥзы. Ымнырысьтыз вань кортсэ поттыны хирургъёс ӧз дӥсьтэ, кышказы синъёссэ вӧсь карыны. 1943-тӥ арын февраль толэзе фронтовикез дораз ыстӥзы.

Поездэн Николай ӵукнапал ик Балезино станцие вуиз. Но дораз соку ик бертыны ӧз дӥсьты — ымнырыз кӧшкемыт. Возьмаз акшанэз, соку гинэ Нурызгуртаз мыныны потӥз. Пеймытэн, пе, ымнырме адӟись уз лу, нокин уз кӧшкема. Вордскем гуртаз вуыса, кема азбаретӥ поръяз. «Лейтенант Фёдоров, кинлэсь тон курдаськод?» — аслыз вазиз воргорон. Дӥсьтӥз ик, усьтӥз ӧсэз.

Коркан одӥг гинэ керосин лампа ӝуа, соин пеймытгес вал. Но Ангелина соку ик тодмаз кузпалзэ, шумпотыса сое пумитаз. Мемиез со вие гур азь палан сиён дася вал. Пизэ со мырдэм тодмаз. «Чебер пинал пиме армие келяй вал. Мар война та!» — синвуаськиз мемиез. Пичи Милялы Николай сакыр-канфет ваем. Нылаш нырысьсэ сииз таӵе ческыт сиёнэз.

— Уй но нунал та туспуктэм кисыям вал. Мон сое ути. Нош тон, нылы, монэ утид! — пичигес гинэ фотозэ ожгарчи ӝӧк вылаз понӥз.

Школаез йылпумъяса, Эмилия Глазовысь институтын дышетскиз, бӧрысь 40 ар пала Кияса ёросысь Атабай школаын математикалы дышетӥз. Ангелина Павловна но Николай Семёнович, пенсие потытозязы, Балезино ёросысь Юнда черкогуртысь школаын ужазы. Пересьмыса нылзы доры Атабае улыны выжизы.

Эмилия Николаевна атаезлэсь ож вакытысь басьтымтэ орденъёссэ утчаз. Озьы 1968-тӥ арын Николай Семёнович дӥне Горд Кизили орденэз вуиз. 20 ар ортчыса, Эмилия атаезлэсь 1-тӥ степенё Оте-чественной война ордензэ шедьтӥз. Но соку бубиз улэп ӧй вал ни. Ангелина Павловна, 90 аресъем песянай, бӧрдыса кутӥз кузпалызлэсь наградазэ.

Туннэ нуналлы Фёдоров кузпалъёс но, Эмилия нылзы но улэпесь ӧвӧл ини. Али та пичи фотоез уте Фёдоровъёслэн Надежда нуныкайзы. Со но дышетӥсь, Атабай школаын ужа.

Геннадий Парфёнов

Ангелина Снигирева
By Ангелина Снигирева 31 марта, 2020 15:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<