«Таза будэ, армилы мед яралоды»

Ангелина Снигирева
By Ангелина Снигирева 2 марта, 2020 15:57
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Алнаш ёросысь Байтэрек гуртысь кузпалъёс Лидия Васильевна но Денис Семёнович Пчельниковъёс 6 пинал будэтӥзы: 5 пи но 1 ныл, вань пиоссы армие ветлэмын.

Лидия Пчельникова

Анай

Лидия Васильевна вордскиз 1938-тӥ арын Алнаш ёросысь ик Пероггуртын. Анаез — Ольга Дмитриевна — вань улонзэ гуртын ужаз, колхоз валъёсты сюдӥз, нош атаез — Василий Капитонович — вуриськись вал. Быдӟым ож кутскон азьын сое действительной службае, отӥяз войнае басьтӥзы, нош 1943-тӥ арын со бырыны шедиз.

Секыт улон шоры учкытэк, анаез Лида нылзэ дышетыны выриз. Озьы со Кадикгуртысь 7 классъем школаез йылпумъяз. Школаын дышетскыкуз ик, колхоз ыжъёсты пастухаз, нош школа бере ыж гидэ ужаны вамыштӥз. Пичи мугоро нылаш шоры учкыса, фермалэн кивалтӥсез паймем но арессэ юам: нюкын пастуханы, куйыысь вуэз поттыса карнанэн нуллыны, ӝужыт сенике турын ӝутканы быгатоз меда?

Озьы-а, тазьы-а, егит муртэ фермае ужаны басьтӥзы. Лидапай нокыӵе ужлэсь ӧз кышка, питран кадь чырткем, котькытчы вуттӥськись, ужаны шаплы вал. Сюлмо тыршемзэ кивалтӥсьёс но адӟытэк ӧз улэ, данъян грамотаосын пусйылӥзы, туспуктэмез колхозысь но ёросысь Данъян пул вылын возиськылӥз.

Та кышномурт улон вылэ ноку ӧз ӝожтӥськылы, Инмарлэсь, пе, вожзэ уг потты. Ужезлэсь ваньмон дыръя яратэ вылэм кырӟаны-эктыны, маскаръяськыны.

Одӥг пол Ӟунняпочинкае сюанэ ветлэм, отысен егит но шаплы нылашлы гуртоос синмаськиллям, Денис пимылы, пе, кышно басьтомы. Зэм но, кӧня ке арня ортчыса, Ӟунняпочинкаысь калык Пероггуртэ ныл кураны лыктэм.

— Бызь, нылы, ӟуння выжые бызисьёс шудо луо, шуиз анае, мон пумит ӧй кариськы, — шуэ Лидия Васильевна. — Бызьыкум 20 арес вал ни. Киужлы усто вал бере, бызён сандыке тырмытэмын вал пужыятэм оброс чалмаосын, ӵушконъёсын, аслам вурем дэремъёсыным — соос 20 вал. Озьы 1959-тӥ арын 27-тӥ феврале сюан каримы, пар валъёсын гырлыосын ворттылыса.

Ӟунняпочинкае улыны выжыса, Лидапай колхозэ вамыштӥз. Нырысь рядовой вал, собере конюх — валъёсты сюдӥз. Егит кузпалъёслы нуныяськыса улыны кема ӧз кылды, ар но ӝыны ортчыса, Дениссэ армие басьтӥзы.

— Пимылы 7 толэзь вал ни, быдэс гуртэн шулдыр келямы, — шуэ кышномурт. — 11 толэзь служить каремез бере Денис 10 нуналлы адскыны бертӥз. Арлэсь кемагес служить кариз но нош ик адскыны бертаз. Озьы бертылон висказ нылпи ваёно луи. Мар карыны паймыса, бӧрдӥсько, армиысь гожтэт витьытозям, кӧтысьтым пиналы ӵыжаськыны кутскиз. Кыкетӥ пиме керпотыса дорын вордӥ. Анайзы юрттӥськиз.

Денис Семёнович Москва улосысь Загорск городын службазэ ортчытӥз. 3 ар но 3 толэзь ӵоже вордскем палъёсаз 3 пол адскыны бертаз, дораз сержант луыса вуиз. Етӥз, чебер, тузӥ, ӝужыт, сьӧд-сьӧд воргоронлы Лидия Васильевна эшшо но золгес синмаськиз кадь. 1975-тӥ арын та семья асьсэлы выль корка пуктӥз — Байтэрек гуртэ. Ӟунняпочинказэс, неперспективной шуыса, быдтӥзы. Кузпалъёс кыкназы но «Искра» колхозын ужазы шофёр но ыж вордӥсь луыса. Отӥяз кузпалъёслэн бӧрсьысь бӧрсе эшшо нылпиоссы вордскизы на.

Пенсие потон азяз Лидапай вӧсь луыны шедиз, паллян кизэ чигтӥз, бӧрсьысь бӧрсе 5 пол вандылӥзы. Улэп кылемезлы эмъясьёс но паймиллям, кызьы, пе, тон чидад. Нош со операция лэсьтон ӝӧк вылын но маскаръяськыны, кырӟаны вырем.

Бурмиз гинэ, гуртоос сое инвалидъёслэн огазеяськонэнызы кивалтӥсе бырйизы. Улон шоры котьку капчигес учкыны тырше, эшъёссэ бурдъяны вала.

Пичи мугоро кышномурт, шунды кадь ик, котьку пальпотэ. Байтэрек клубын ужасьёслэн нырысетӥ юрттӥсьсы, вашкала кырӟанъёсты тодаз вае, гуртысь фольклорез утьыны юрттэ. Ёросын но шаерын ортчись ужрадъёсы мыло-кыдо пыриське. Киужлы но усто.

Пчельников кузпалъёслэн табере 14 внукъёссы, 7 правнукъёссы будо. Нылпиосынызы данъясько. Али, пе, пӧртэм муг утчаса, пиоссэс армилэсь мозмытыны тыршо, нош Лидия Васильевна вордскем беразы ик пиоссэ индылэм: таза будэ, армилы мед яралоды.

Пиосыз

Пчельниковъёслэн вань нылпиоссы Байтэрек школаез йылпумъязы. Ваньзы шаплыесь, визьмоесь, кужмоесь будӥзы. Ваньзы пичиысен ужлы дышизы. Раиса Денисовна нылзы, Глазовысь пединститутэз йылпумъяса, 30 арлэсь трос нылпиосты визьнода ни. Пиоссы ваньзы армие ветлэмын, дано адямиос луэмын.

Вячеслав Пчельников

Вячеслав служить кариз Ленинград улосысь спецчастьын, 32 ар ӵоже КамАЗ заводын плавильщик луыса ужаз. Али пенсиын, ужысь ветеран, ӟеч ужамез данъян грамотаосын пусъемын.

Виктор Пчельников

Виктор служить кариз Забайкальеын, пограничник вал. Сержантъёслэсь школазэс йылпумъяз, взводлэн командирез вал, старшина званиен бертӥз. Армия бере Елабугаысь милицейской школаез йылпумъяса, Алнаш милициын следователь луыса ужаз. Вордскем гуртаз улэ, пенсие потыса, колхозын ужаз на, бригадирын но лэсьтӥськон удысын тыршиз.

Валера Пчельников

Валера служить кариз Амур улосын, пограничник вал. Армиысь бертыса, Волгоградысь физкультурая институтэз йылпумъяз, югдурез утён удысын ужаз, майорозь будӥз. Табере ужысь ветеран лыдъяське, ӟеч тыршемез медальёсын но грамотаосын пусъемын.

Родион Пчельников

Родион служить кариз Польшаын самоходно-артиллерийской полкын, взводлэн командирезлэн воштӥсез вал. Йылпумъяз Ярысь педучилищеез, школаын ужаз, физкультурая урокъёсты нуиз. Та вакытэ водитель луыса ужа.

Сергей Пчельников

Сергей службазэ нуиз Свердловскысь спецчастьын, снайпер вал. Дышетскиз Можгаысь ДОСААФ-ын водителе. Али ужа старший прапорщик луыса шаерысьтымы одӥгаз колониын. Уно медальёсын но грамотаосын пусъемын.

Ираида Самсонова. Алнаш ёросысь Байтэрек гурт

Ангелина Снигирева
By Ангелина Снигирева 2 марта, 2020 15:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<