Сибирьысь удмурт командир

Ангелина Снигирева
By Ангелина Снигирева 27 марта, 2020 16:31

Удмуртъёслэн нырысетӥ ӧтчамазы пыриськиз Александр Петрович Худяков. Со вордскемын но дышетӥсь луыса ужамын Пичи Пурга ёросысь Шорын Юри гуртын. Аркадий но Анатолий пиосыз Бадӟым ожын вал. Аркадий Александрович луэ Александр Невский орденлэн кавалерез, трос аръёс Сибирьын ужаз, отын кивалтӥз ӟичы вордонъя фермаен.

А. Худяков (1915-1999)

Ожгарчи

Можгалась пушномеховой товароведческой техникумез йылпумъяса, Аркадий Худяков 1936-тӥ арын армие кошкиз. Дышетскиз пограничникъёслэн полковой школаязы, советско-румынской кунгожез утиз. Киевысь пограничной училищеез йылпумъямез бере заставалэн командирез луиз. Пограничникъёс шӧдылӥзы, немец армия кунгожмы котыре люкаське шуыса. 1941-тӥ арын 22-тӥ июне А. Худяковлэн заставаысьтыз связь возён линиез кин ке но вандыса кельтэм. Ӵукна пал ӟардӥсь инмын самолётъёслэн гуретэм куаразы шуккиськиз — война…

А. Худяковлэсь заставазэ, та вадесын бадӟым сюресъёс ӧвӧл шуыса, немецъёс палэнтӥ ортчизы, озьы пограничникъёс ож мышкы кылизы. Соин ик соос малпазы чугун сюрес кузя Брест доры вамыштыны.

Пограничникъёс сюрес вылэ потыны дасясько ни вал — тушмон вылазы бомба куяны кутскиз. Улэп кылемъёс сиён-юонэн, топливоен складъёсты пуштытъязы — тушмон кие медаз сюре шуыса. Та вакытэз тодаз вайылыкуз, А. Худяков вералляз: — Син азям немец армилэсь пегӟисьёс, пересьёс, кышномуртъёс, нылпиос — нокинэ немецъёс ӧз жалялэ, зор сямен, пуляос инмысь усьылӥзы. Нош инмын ӧвӧл одӥг но советской самолёт, матын ӧвӧл одӥг но асьме воинской часть.

Пограничникъёс соку тушмонэн ваче син кылизы, Минскысь дивизиен огазеяськытозязы. Отын А. Худяковез взводлы командире пуктӥзы. Татысен кутскиз солэн сюресэз нырысь Москваозь, бӧрысь Германия пала.

1941-тӥ арын Смоленск котырын пӧсь ожмаськонъёс бере Аркадий Худяковлы Горд Кизили орден сётӥзы. Война кутскем бере нырысетӥ толэзьёсы таӵе вылӥ данъетъёсын кӧня ке муртэз гинэ пусйизы. Удмурт воргорон озьы ик Москваез сӧсьёслэсь мӧзмытонэ пыриськиз, та понна 1994-тӥ арын «За оборону Москвы» медален данъямын. 1945-тӥ арын Аркадий Худяков стрелковой батальонлэн капитанэз вал, Кёнигсберг городэз басьтэмез понна Александр Невскийлэн орденэныз пусъемын. Сое сётылӥзы сыӵе командиръёслы, кин ӧжыт кузя трослы бадӟым тушмон армиез пазьгылӥз. Батальонэнымы пленэ кутэм немецъёс кӧня ке сюлэсь трос вал, тодаз вайылӥз Кёнигсберг котырын ожмаськемзы сярысь Аркадий Александрович. 1946-тӥ арын со Литваысь нюлэсъёсы ватӥськыса улӥсь фашистъёсты быдтонэн выриз.

Фермаен кивалтӥсь

1940-тӥ аръёсы Эвенкийской национальный округын (туала дыръя Красноярск улосысь Эвенкийской ёрос) азвесь-сьӧд ӟичыосты вордон борды басьтӥськизы. Аркадий Худяков та палъёсы та удысэз азинтон понна 1948-тӥ арын лыктӥз. Илимпийской ёросысь Юкта каргуртын нырысетӥ звероферма усьтӥз. Татысь арлыдо калык Аркадий Александровичез туж шунытэн тодаз вае. Со ӟеч сюлэмо вал, калык сярысь сюлмаськылӥз, адямиослы уже интыяськыны юрттылӥз. Войнаез ортчем мурт трос тунсыкозэ мадьыны быгатылӥз, пиналъёсын мыло-кыдо пумиськылӥз. Нялтас вераса, та палъёсын, Эвенкиын, Александр Невский орденэн пусъем муртъёссы ӧй вал ни.

Аркадий Александрович 10 арзэ сӥзиз Атыкай музъемез утёнлы, 4 ар ожмаськонлэн пӧсь пуртыяз вал. Со улэп кылиз ке но, вӧсь луэм интыосыз 1950-тӥ аръёсы асьсэдыз шӧдытыны кутскизы. Днепр шур дурын ожмаськонъёс дыръя тушмон асьмелэнъёсты жалятэк ыбылӥз, пуштытъяз. Аркадий Александрович вӧзын ик бомба пуштӥз, воргорон йырсазьзэ ыштӥз. Та учыр бере, аръёс ортчемъя, синъёсыз лябгес но лябгес адӟыны кутскизы.

Нырысетӥ группаысь инвалид луэмез сярысь матысьёсыз гинэ тодо вал. Калык азьын со котьку йӧн-йӧн возиськылӥз, тазалыкез сярысь ӧз поттылы. Ӵемысь Аркадий Александрович сярысь гожъяллязы газет-журналъёсы, отын поттылӥзы пӧйшур будэтонъя визь-кенешъёссэ.

Чорыганы яратэ вылэм. Сукыр луэмез бере но со кузпалыныз ӵош Тунгуска шур дуре хариус кутыны вуылэм, руль сьӧрын Екатерина Ивановна кузпалыз вал. Паймытъяз со лулчеберетэз валаменыз но: баянэн, гитараен шудӥз, чебер кырӟалляз.

Синмаз операция лэсьтӥз 1980-тӥ аръёсы. Но пумен воксё адӟемысь дугдӥз. Озьы ке но сое нокин сукыр шуыса ӧй но малпасал — со шугъяськытэк ульча кузя ветлылӥз, куное лыктэм эшъёсызлы ачиз ӝӧк бичалляз, бакчаяз ужалляз. Али ке но со палась калыклэн солэсь басьтэм сутэрпуосыз будо. Яратӥзы отысь адямиос калыкын «аркадьевка» нимаськиз сюкасез но — солэсь рецептсэ ачиз Аркадий Александрович малпаз.

Берло аръёссэ А. Худяков Можга карын улӥсь бадӟымез нылыз дорын ортчытӥз. 1999-тӥ арын улонысь кошкиз.

Материалэз дасяз историк Николай Кузнецов

Ангелина Снигирева
By Ангелина Снигирева 27 марта, 2020 16:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<