Орлой чемпионъёс

Ангелина Снигирева
By Ангелина Снигирева 13 марта, 2020 11:18

Пичи Пурга ёросысь Орлой гурт пичи гинэ ке но, дано луэ кужмо спортсменъёсыныз. Светлана но Александр Филимоновъёсты спорт огазеяз. Денис но Оксана нылпиоссэс асьсэос кадь чырмыт будэтӥзы. Семьяенызы ялан пыриськыло шаерамы ортчылӥсь Гурт тол шудонъёсы. 
7-тӥ мартэ та семьяысь спортэз яратӥсьёс 2 медаль утӥзы. Светлана ФИЛИМОНОВА Гурт шудонъёсын бронза 
медаль басьтӥз, нош Денис пизы — Германиысь 
Обервизенталь городын ортчем дуннеысь егитъёслэн первенствоязы — азвесь медаль.

С. Филимонова

Эмъясь луиз

— Ныл йырыным Баграш-Бигра гуртысь луисько, Михайлова вал, семьяямы 3 пиналъёс будимы, — веранзэ мытӥз Светлана Серафимовна. — Пиос пӧлын будыса, лэся, котьмалы шаплы вал. Кытчы соос — мон сьӧразы, юрт котырын но юрттӥськылӥмы. Мемеймы Зинаида Гавриловна вань улонзэ фермаын скал кыскиз, тятямы агрономын, председательын тыршиз, берло аръёссэ ёросысь валтӥсь агроном вал. Табере кыкназы ик пенсиын.

Школаын дышетскыкум, спортэн эшъяськи. Нырысь пу куасъёсын бызьылӥмы, собере пластик куасъёс потӥзы. Улонме спортэн герӟало шуыса, ноку но ӧй малпалля. Туж потэ вал эмъясь луэме.

Пинал дыр

Можга городэ вамыштӥ, нош ачим уг валаськы, кудаз училищее пыроно: медициная оло ветеринарияя. Адямиез но пудоез эмъян одӥг ӧвӧл ке но, мыным кыкез ик кельшизы. Нырысь вамыштӥ медициная училищее. Документъёсме но нырысетӥ экзаменме сётэме бере тодмо нылъёсты пумитай. Соос котыр ласянь ушъязы пудо эмъянъя училищеез, спортлы но тросгес саклык, пе, висъялод. Отысь физкультурая дышетӥсьлы Сергей Яковлевич Плехановлы но мон сярысь ивортӥллям, кужмо 
спортсменка, пе, кудаз 
училищее пырыны шугъяське. Тре­нер монэ шедьтӥз, небытак гинэ индылӥз: ветеринар янгышаз ке, пудоез вандыны, пе, луэ, нош фельдшерлы янгышаны уг яра.

Та кылъёс сюлэмме бугыр­тӥзы кадь. Ӵуказеяз ик документъёсме кутӥ но ветеринарияя училищее вамыштӥ. Со пумысен али но уг ӧпкелиськы. Пудо котырын берганы пичиысен яратӥсько вал: мемей сьӧры фермае ветлылӥ.

Дышетсконлэсь золгес спортэн эшъяськон кельшиз. Училищелэн командаяз котьку вал нимо-дано спортсменъёс, ми вакытэ но кужмоосыз шедизы. Республикаын вормыса, Россиысь ӵошатсконъёсы пыриськылӥмы. Со вакытысь тросэз эшъёсы гурт удысын ужало, нош спортэн эшъяськонзэс кемалась аналтӥзы ни. Мон но, дышетсконме йылпумъяса, вордскем гуртам — Баграш-Биграе — бертӥ, ужаны кутски «1 Май» колхозын.

Анай-атаеныз

Со гужемаз ик бызи Орлой гуртысь пияшлы. Саша Филимонов артэ гуртысь гинэ вал ке но, соин ми пичи дыръямы трос ӧм пумиськылэ, угось со Пичи Пурга школаын дышетскиз. Армиысь бертэм пияш колхозын ужа вал, нырысь ик вукоын, собере КЗС-ын оператор луыса тыршиз. Табере 18-тӥ арзэ Пичи Пургалан водитель луыса ужа.

Бурдъясь пи

— Колхозын ужаны кутскыса, спортэн эшъяськыны дыры ӧз кыльы ни, отӥяз нылпиосмы — Денис но Оксана — вордӥськизы, — шуэ Светлана Серафимовна. — Но пие туж шаплы бызьылэ кадь потӥз. Школае мынӥз гинэ, вань эшъёссэ куасэн бызьылонъя ӵошатсконын азьпалтӥз. Нырысетӥ вормонъёсыз бере ик, Ижысь базаре мыныса, быдэс семьямылы куасъёс басьтӥмы. Нош мукет араз семьямы нырысьсэ шедиз шаерамы ортчылӥсь Гурт шудонъёсы. Со вал 2008-тӥ арын Красногорск черкогуртын. Рос-прос дасяськытэк но, 5-тӥ инты басьтӥмы. Семьяос пӧлын пимы пичиез вал ке но. Со шудонъёсысь ми бурдъяськыса бертӥмы.

Денис пиеныз

8 ар пала вис кареме бере выльысь мугорме кыдатон борды басьтӥськи. Тужгес секыт йӧтӥз папамылы. Сашалы соку 35 арес вал ни, школаын гинэ бызьылэмын. Пимылэн синъёсыз ӝуало вал бере, ваньмылы куас вылэ султоно луиз. Пичи гинэ ваньмон дыр шедьтыкумы но, лыжня вылэ потылӥмы.

Мукет тол ӵошатсконъёслы рос-просгес дасяськимы ни. Спортэн эшъяськеммес валаса, бабушкаосмы но юрттӥськоно кариськизы. Люкам уксёзэс Денис пимылы кузьмазы, ӟеч куас басьтыны косыса. Со уксёен ми 2 куз куас басьтӥмы: кезьыт но шуныт куазьлы. Кыкетӥ араз милям семьямы 3-тӥ инты басьтӥз ни.

Отӥяз шудонъёс ортчизы Можга городын. Куазь туж кезьыт вал. Ӵошатсконэ семьяен пыриськем сяна, мыным ёрос команда понна спринтын но эстафетаын бызьылоно луиз. Чидай, ёросэз но, семьяме но возьытэ ӧй уськыты.

Озьы ми 4 ар Денис пиенымы Гурт тол шудонъёсы пыриськимы, 3-тӥ интылэсь улӥе ӧм лэзиськылэ. Отӥяз Оксана нылмы будӥз. Ёрослэсь данзэ семьяенымы эшшо 3 арзэ утимы на. Бӧрысь папамы но кужмо спортсменъёсын артэ вожвылъяськиз ни.

Азьвыл аръёсы Гурт шудонъёсы семьяос понна куасэн бызьылон гинэ пыртэмын вал. Нош бӧрысь семьяослэсь ӵошатсконзэс паськытатӥзы: дартсэз (гужем — шашки но ӝӧк выл теннис) пыртӥзы. Куасэн бызьылонын ми котьку азьпалан вал, нош дартс — ляб интымы.

Вормонэн-а, вормонтэк-а бертылӥмы Гурт шудонъёсысь, ноку но мылкыдмес ӧм куашкатылэ. Озьыен, эшшо но умойгес дасяськоно. Ӵошатскон ми понна бадӟым праздник выллем луэ: эшъёсын адскиськод, трос тунсыкозэ тодӥськод, азьланезлы кужым басьтӥськод. Денис пимылы луыса милям кыкетӥ шокчонмы усьтӥськиз кадь. Спортэн эшъяськем гинэ ӧвӧл, быдэсак спортэн висьыны кутскимы, мемеен тятяе — 
милесьтым но зол.

Кузпалыныз но Оксана мнылыныз

Табере нылпиосмы будӥзы. Денисмы шедемын Россиысь куасэн бызьылӥсь егитъёслэн сборной командаязы, нош Оксанамы туэ 11-тӥ классэз йылпумъя. Мон гинэ на табере Гурт тол шудонъёсы пыриськисько. Нош кӧня медальёсмы, ваньзэ ошид ке, борддор куашкалоз, дыр.

Удалтонлык

— Денис пиенымы вормонъёс тросгес басьтылӥмы. Соин ми Россиысь Гурт шудонъёсы но пыриськимы. Со аре Удмуртиысь 2 семья — Уваысь Веретенниковъёс нылынызы но ми — Омске ветлӥмы. Куасэн ӵошатсконын удмуртъёс кадь шаплы бызьылӥсьёс ӧй вал. Комбинированной эстафета лотерея выллем: кинлы тросгес удалтоз но кыӵе вал шедёз. Папаосмылы, вал кыткыса, семьязэс нуыны кулэ вал. Та ӵошатсконын но бере ӧм кыле. Секыт йӧтӥз дартс. Озьы Удмуртиысь семьяос 4-тӥ но 5-тӥ интыосы гинэ кылизы.

Озьы-а, тазьы-а, но пимы понна шумпотӥськомы. Тау кариськомы, дыраз ӟеч тренеръёс — Василий Трошкин но Дмитрий Ходырев — шедизы шуыса. Та вакытэ пимы Казаньысь спортъя академиын дышетске, эшъёсыныз ӵош Татарстан понна бызьылэ. Отын номыр уродэз ӧвӧл кадь, куд-огезлэн дорзэ вузаз шуэмзы потэ ке но.

Россиысь егитъёслэн куасэн бызьылонъя сборной командаенызы ӵош Денисмылы 2-тӥзэ шуд усиз дуннеысь егитъёслэн первенствоязы пыриськыны. Кылем арня пумын экран дорысь ик ӧм кошкылэ кадь. Германиын ортчись ӵошатсконэз Интернет пыр учкимы. Жаль, спринтын Денисмы 5-тӥ интые кылиз. Шӧдске, туж потэ вал вормемез, финиш азьынгес усиз но — медалез ныр ултӥз кошкиз. Куашкам мылкыдзэ милемлы возьматыны ӧз тыршы ке но, куараезъя шӧдӥськиз ик. 
Быдэс семьяен соку буйгатыны тыршимы. Эх, ас поннам шуисько, телевизоре пырыса, юрттӥськы, визь-кенеш сёт вал бызьыкуз — жаль, уг луы.

Та первенствоын пимы, спринтын бызьылэм сяна, суро (нылъёс но пиос) эстафетае пыриськиз на. Вераны кулэ, кыкез ик пиос Удмуртиысь вал, эшез, Балезино ёросысь Сергей Ардашев, та ӵошатсконын 3 медаль утӥз. Кужмо пиослы луыса Россилэн сборной командаез 2-тӥ инты басьтыны быгатӥз.

Ӵапак со нуналэ ачим но ӵошатсконэ пыриськи: Дэри ёросысь Италмасын Гурт тол шудонъёсын 3 иськеме бызьылӥ, ас ёзо эшъёсы пӧлын 3-тӥ инты басьтӥ. Ас поннам малпай: мон медаль басьтӥ бере, пие но басьтыны кулэ. 15 час котырын мемее жингыртӥз но Денис сярысь ӟеч ивор вераз: Россия, пе, эстафетаын 2-тӥ инты басьтӥз, Денисмы аслаз этапаз командаез 4-тӥ интыысь 2-тӥ интые поттыны быгатӥз. Шумпотэменым ма карыны ӧй вала ни. Кӧня ке улыса, пие но жингыртӥз, нош Дэри ёросысь Италмас стадионын комментатор ӟеч иворез шара вераз. Соку ини калык монэ ӟечкыланы кутскиз…

Дуннеысь егитъёслэн первенствоязы Россиысь команда эстафетаын 2-тӥ инты басьтӥз. Денис — бурысез

Со-а шумпотон ӧвӧл — 8-тӥ Март азьын тужгес бадӟым кузьым. Нош ӝытазеяз ачиз гуртамы вуиз. Гуртамы дышемын ни ӵошатсконысь бертӥсьёсты чемпионъёсты кадь пумитаны, нош Денисмы дуннелэн вице-чемпионэз луиз. Таӵеез ӧй вал на! Ӝытазеяз бертӥз гинэ, ӵукнаяз Ярославльын ортчоно ӵошатсконэ кошкиз ни. Папамы сменаен ужа бере, пимылэсь бертылэмзэ адӟытэк но кылиз.

Пудоен улоно

— Ветеринарын ужаны туж кельше вал, вылаз ик, колхозамы спортъя ӵошатсконъёс ортчытъяны кутскизы. Жаляса верано, соос 2 ар пала кыстӥськизы но чалмизы. Колхозын ужа но ужа вылэм, нош мынам эшшо кужмогес луэме потӥз. Гурт шудонъёсы мыноно ке, колхоз ужез 3 нуналлы кельтоно. Нош мыным 3 гидысь пудоез эскероно, артысь Куреггурт но Чурашур фермаосы вуылоно. Шутэтскон нуналъёсыз тодытэк, колхозын ужалляй. Гурт шудонъёсы мынон дыр вуэ ке, азьпал ик куректылӥ: ас интыям адями шедьто-а, шудонъёсы лэзёзы-а меда. Утчано луылӥз интыям ужаны соглаш кариськисьёсты.

Дасо ар пала ортчыса, выль уж утчаны малпай. Одӥг нуналэ Пичи Пурга ёрос больницае пыри, выж миськись, пе, кулэ. Пичи уждунэз шоры учкытэк, уж борды басьтӥськи. Отӥяз тодон-валанъёсме будэтӥ, табере санитарка луисько.

Уже туж кельше. Пичи дыр малпанъёсы улонын быдэсмизы, шуыны луоз. Сьӧрло ветлон но монэ ӧз кышкаты. Гуртысенымы Пичи Пурга черкогуртозь 8 иськем пала люкаське. Гужемзэ 
великен ветлӥсько. Уж дорысь кивалтӥсьёс спортэн эшъяськыны луонлык сёто. Толалтэзэ куд-ог дыръя ужысь но вазьгес лэзё. Эмъян удысын ужасьёслэн спартакиадаязы но пыриськылӥсько. Шаерысьтымы дуатлонъя (куасэн бызьылон но великен ворттылон) ӵошатсконъёсы но ветлӥсько.

Гуртысьтымы тросэз спортэн эшъясько. Ма, кызьы куасэн уд нискыла, укно улад ик куас сюрес лэсьтэмын ке, нош тренермы Василий Трошкин уй-нуналъёсты но уг тоды кадь: ялан сюресэз волятэ. Куд-ог дыръя шыд пӧзьтон куспам но тренировкаосы потаса вуисько. Спортсмен эшъёсылы озьы верасько ке, вожъясько.

Кузпалэным кыкнамы но сьӧр гуртэ ужаны ветлӥсь­комы ке но, гид тыр пудо вордӥськомы: скал, парсь, кунян, чипы-курег. Нимысьтыз инкубатормы вань, чипы-курегмы вузаны но тырме. Аслым ачим шуи: ветеринарлэн гидэз буш луыны кулэ ӧвӧл. Тазалык вань дыръя пудо вордоно. Гуртоос черлам пудозэс йӧнатыны ӧтьыло. Куд-ог дыръя ачим ик скал но бызьылытӥсько.

Гуртын ӧй улысал ке, паймисько, ма ужасал меда. Гид котырын бергасько, бакчаын уриськисько, телевизор дорын пукыны дыры ик уг кыльы. Уж тросэн ик шаерамы ортчись ӵошатсконъёсы кузпалэным черодэн вет­лӥськомы: скал кысконо ук. Кылем шутэтскон нуналъёсы мон Гурт шудонъёсын бызьылӥ, солэсь азьвыл Саша ветлӥз «Калашников Биатлон Фест» ӵошатсконэ.

Мылкыд ке капчи…

— Орлой гуртмы бадӟым ӧвӧл, ваньмы куспамы тупаса улӥськомы, — шуэ Светлана Филимонова. — Кыӵе ке ужрад ортче ке, кин ке кырӟа-вера, кин ке пӧраське — ваньмызлы уж шеде. Ӵемысь гуртамы ортчыло нылпиослэн ӵошатсконъёссы. Отчы но быдэс гуртэн потӥськомы. Одно ик бадӟым гырлы но Россилэсь «Орлой» гожтэмен флагзэ кутӥсько. Орлое вуылэмзы дуннеысь ӵошатсконэ ветлэм кадь мед потоз. Юнме шат милям гуртмылы ваньмыз синмасько. Эсьмаса, ӟеч тренерлы луыса милям спортсменъёсмы гужем но куасэн нискылало.

Гурт шудонъёсын быдэс семьяен но тренерен

Вылысьтым спорт дӥсе но уг усьылы. Спортивной костюмме куштӥсько исключительно удмурт праздникъёс дыръя гинэ. Туж яратӥсько шулдыръяськыны, маке выльзэ малпаны. Тани Денисмылэн выпускноез дыръя кӧня ке анайёсын ӵош сценка пуктӥмы, пичи нылъёслы пӧрмытскыса. Йырсиосамы бантикъёс думимы, чулкиямы шпаргалкаос тыримы, кырӟамы-верамы, калыкез шулдыртӥмы, куд-огез туннэ но серекъяса тодазы ваё на. Нош кылем арын школаез йылпумъяммы дырысен 25 ар тырмиз, отчы но эшъёсынымы пӧрмытскыса мынӥмы.

Толалтэ телевизор учкыны пуксисько ке, киям чильпаськон вень кутӥсько. Киужен вырымтэ дыръя нылкышно романъёсыз дурыныз лыдӟисько. Гужемзэ шутэтскон сярысь малпанэз ик ӧвӧл, бызьылыса ужано луэ.

Валентина Емельянова

Ангелина Снигирева
By Ангелина Снигирева 13 марта, 2020 11:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<