Огназы

Ангелина Снигирева
By Ангелина Снигирева 4 марта, 2020 15:16

Сюмси ёросысь Бадӟымлуд (Бадзимлуд) пыре Орловской муниципал кылдытэтэ. 2012-тӥ арын ортчем переписья отын 12 адями улӥз. Туннэ нуналлы бадӟымлудъёслэн лыдзы 3 поллы кулэсмиз.

Бадӟымлудын Стуловъёс гинэ уло на

Гуртэз чаклась

Бадӟымлуд пуксемын сюрес вылэ. Котыраз мульыё-губиё тэльёс будо. Озьы ке но тэльлэсь кузьымъёссэ бичаны нокинлы. Гуртэ пырись-потасьёсты пумитало куштэм коркаос. Куд-огъёсыз йыг-йыг сыло ай, нош мукетъёсызлэн липетсы я кенерзы куашкамын ини. Гуртын Стуловъёслэн семьязы гинэ улэ. Алигес гинэ адямиез тросгес вал. Пумен кин ке но кулӥз, кин ке но пиналъёсыз доры улыны кошкиз. Озьы 3 ар талэсь азьло Стуловъёс Бадӟымлудын огназы кылизы.

83 аресъем Антонина Семёновна вордскиз Бадӟымлудын, татын ик быдэсмиз, бызиз но 30 ар ӵоже доярка луыса ужаз. Со сяна, табере нокин но гуртлэсь историзэ рос-прос уз мадьы. Соин ик, дыр, Антонина Семёновна ассэ гурт чаклась нима. Мыло-кыдо песянай котькинэ шумпотыса пумита, вераське, куноятэ. Пинал дыръяз сямен, со дась эктыны но, кырӟаны но.

— Пие дэмла мыным ваньмон дыръям, киям бодыос кутыса, урам кузя скандинав амалэн ветлыны. Нош мон солы вазисько: мынам аслам ходьбае — удмуртской. Корка котырын кӧня ужано, бергано, — серекъяса вера Антонина Семёновна.

Аресыз бадӟым ке но, со али но хозяйство возе, пудо-живот вордэ.

Азьвыл улон

— Куке но Бадӟымлудын улон пӧзиз. Калык ужаз но шулдыръяськиз дэмен. Гуртамы одӥг урам гинэ ке но, трос адями улӥз. Мон тодэмъя, татын 50-52 хозяйство вал, котькуд семьяын 4-5 пиналъёс. Быдӟым ожысь гинэ 26 пиосъёс ӧз берытске. Огдыре татчы вуизы вал интыяськыны мылкыд карисьёс. Но буш места ӧвӧлэн кошконо луизы, — шуэ Антонина Семёновна.

Антонина Семёновна внукъёсыныз

Нырысь ик Бадӟымлудын улӥсьёс тыршизы асьсэлэн «Заря» эштосазы. Гуртоос люкылӥзы асьсэдыз улланьёслы но вылланьёслы. Соя ик кык бригада кылдытӥзы. Колхозын вордӥзы скал, ыж но вал. 1950-тӥ арын Игыр, Васюки (2-ез ик быремын ини), Бадӟымлуд, Зун, Нерсы, Орло гуртъёсты «Звезда» эштосэ огазеязы. Собере Бадӟымлудын ферма гинэ кылиз.

— Калыкмы туж ужась вал, — маде Антонина Семёновна. — Шунды ӝужам бӧрсьы ик бусые ужаны потылӥзы. Мон но анаелы юрттӥськыны ветлӥ ай. Огазеям эштослэн председателез Кальвин талы туж паймылӥз. Нырысетӥ комбайнъёс гуртэ 1958-тӥ арын гинэ вуизы, соин ик вань ужез киын быдэсъям.

Бадӟымлудъёслэн клубзы вал. 1957-тӥ арын усьтӥськиз начальной школазы. Со ужаз 1975-тӥ арозь. Та дырлы гуртын улӥсьёслэн лыдзы зол кулэсмиз. Азьлогес ик бадӟымлудъёс мукет интые улыны выжылӥзы: война дыръя одӥг кышномурт пиналъёсыныз валче Мурманск улосэ кошкиз, бӧрысь кӧня ке семья — Ростов улосэ но Казахстанэ целинае. Нош 1960-тӥ аръёслэн пумазы туж трос семьяос умойгес улон утчаны кошкизы.

— Колхоз шакта (ляб) вал, уждун умой-умой ӧз тырылэ. Эшшо ке музъеммы начар, луо, урожай ичи вал. Нош 1994-тӥ арын эштосмы воксё куашказ, фермамес донгазы. Нокызьы уг оскиськы вал, со куке но быроз шуыса. Тӥни соку ик гуртын улӥсез ӧжыт вал ини, — валэктэ песянай.

Шуг-секытъёс но шумпотонъёс

Али Бадӟымлудын интыяськемын «Увадрев-Холдинг» огазеяськонлэн ёзэз. Отын кладовщик-оператор луыса ужа 2 адями. Одӥгез соос пӧлысь — Антонина Семёновналэн кенэз Людмила Стулова. Людмилалэн картэз вахта амалэн Уйпалан тырше. 4 пиналъёссы пӧлысь 2-ез пичиесь ай, Гуры гуртэ школае но нылпи садэ ветло. Котькуд нунал соосты нуэ-вае автобус.

Куашкам коркаос трос

Бадӟымлудын трос шугъяськонъёссы. Гуртэ нуись сюрес асфальтэн шобыртэмын ӧвӧл. Соин сэрен сӥзьыл но тулыс тэль нуллӥсь машинаос сое быдто, гуртэ вуыны туж шуг луэ. Мобильной телефон урод кутэ, газ гуртэ пыртэмын ӧвӧл, Стуловъёс корказэс пуэн эсто. Антонина Семёновна газэн улӥсьёсты серекъяса «газовикъёс» нима. Мыным, пе, 20-22 градусэн но умой, нош соос кынмозы.

— Мон тодӥсько ай сыӵе аръёсты, куке картэ, генераторез лэзьыса, быдэс гуртлы ӝыт 10 часозь тыл поттылӥз. Нош али со езъёстӥ лыктэ. Радио но телевизор вань. Мар эшшо кулэ на? Тани ӵуказе улыса пенсия но вуоз. Мон умой улӥсько, — уг ӝожтӥськы со.

Антонина Семёновналэн бадӟым семьяез. Пиналъёсыз но нунокъёсыз уло Сюмсиын но Уваын. Песянайзылэн котькуд вордӥськем нуналаз соос Бадӟымлудэ вуыло.

— Пичи дыръям мон котькуд гужем песянае дорын улӥ. Сыӵе шулдыр вал. Бусыос кизьылӥськизы ай, улӥсьёсыз быдэс урам вал, — шуэ Алёна Ефремова, Антонина Семёновналэн нунокез.

Гуртсы сярысь уг вунэто отысь кошкемъёс но. 2018-тӥ арын 18-тӥ августэ кыкетӥзэ ини гуртсылэн нуналыз ортчиз. Отчы 30-лэсь ятыр адями бичаськиз.

Гуртысьтызы данъямон адямиос — дышетӥсьёс, эмъясьёс, фармацевтъёс — потэмын. Ижысь Индустриальной ёрослэн йырыз Любовь Зайцева но Бадӟымлудын вордскемын.

Али Стуловъёс Ува-Тукляе корка пукто. Ваньмыз дась луиз ке, Бадӟымлудысь берпуметӥ улӥсьёс отчы улыны выжозы.

Валентина Семёнова

Туспуктылӥз Валентина Семёнова

Ангелина Снигирева
By Ангелина Снигирева 4 марта, 2020 15:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<