Нылпиос котькытын огкадесь

Ангелина Снигирева
By Ангелина Снигирева 30 марта, 2020 09:23

Сьӧлта ёросысь Югдон школаын 63 нылпи тодон-валан люка. Соосты 20 дышетӥсьёс визьнодало, пӧлысьтызы 12-ез — егитэсь.

Сьӧлта ёросысь Югдонысь А. Нестерова но Е. Блинова дышетӥсьёс пиналъёсын ужрад ортчыто.
Туспуктэм басьтэмын Екатерина Блиновалэн архивысьтыз

Екатерина Блинова 2-тӥ арзэ школаын ужа — ӟуч кылъя но литературая дышетэ. Нылмурт Глазовысь пединститутэз йылпумъямез бере ик Югдонэ лыктӥз.

Е. Блинова

— Дышетӥсь луэме пичи дырысеным потэ вал ини, — шуэ Екатерина Львовна. — Песянай-песятае но быдэс улонзэс Югдонын дышетӥзы, соос мон понна адӟем карымонэсь. Мон гуртын будэмын бере, кыӵе ке пичи школае лыктэме потӥз. Ӵапак Югдонын ӟуч кылъя но литературая дышетӥсь утчало вылэм, шумпотӥ, татын, песянай-песятае вӧзын, ужан ӧре пырыны капчигес луоз шуыса. Школаын мыным кельше, нылпиосты яратӥсько. Кӧня ке ар практикаме Глазовысь огаз гимназиын ортчи, городъёсын классъёс бадӟымесь, котькуд нылпилы нимаз саклык висъяса уд вуттӥськы. Со ласянь гуртысь школаын туж лякыт – татын котькуд нылпиен нимаз ужаськод.

Е. Блинова 8-тӥ класслэн классной руководителез луэ на. Нылпиосын со пӧртэм ужрадъёс ортчытъя, дышетӥсь тырше шудон пыр мар ке вылез сярысь вераны, ӟеч сямъёс пыӵатыны.

Югдонын 2-тӥ арзэ ужа ни Анжелика Нестерова, со английской кыллы дышетэ. Удмурт кун университетысь удмурт филологияя факультетысь англи но удмурт кылъя ёзэтэз йылпумъямын.

— Мон Сьӧлталась школаын дышетски, — вера Анжелика Александровна. — Cоку черкогуртын удмурт кылэз предметэз сямен дышето вал ай, али та урокъёс воксё быдтэмын. Тодӥ УдГУ-ысь удмурт филологияя факультет сярысь, отын удмуртсэ но, английскойзэ но дышето шуыса. Татын удмурт кылэз яратӥ, вераськон кылме волятӥ.

А. Нестерова

Удмурт культураен данъяськемзэ Анжелика Нестерова алигес ёрос сцена вылысен возьматӥз. Сьӧлталан нылкышно творчествоя «Чеберай» вожвылъяськон ортчиз. Анжелика Александровна 35 аресозь нылкышноос пӧлын вормиз – яркыт ужрадлы дасяськыны юрттӥзы нылпиос но, ӵош ужась эшъёсыз но.

А. Нестерова университетэз быдтэмез бере Ижысь 91 номеро школаын ужаз английской кылъя дышетӥсь луыса. Но сюлмыз вордӥськем палъёсаз кыскиз.

Городысь но, гуртысь но нылпиос огкадесьгес пото: котькытын дышетскыны тыршисьёсыз но, азьтэмъёсыз но вань. Зэм, гуртысьёсыз лякытэсьгес, соосын кусып тупатыны капчигес.

Та дышетскон арысен Анжелика Нестерова эшшо немец кылэз нуыны басьтӥськиз на. Шаерысьтымы школаосын пыӵаны кутскемын 2-тӥ кунгожсьӧр кылэз дышетон.

— 2-тӥ кунгожсьӧр кылэз одно ик дышетонэз умоен уг лыдъяськы, — шуэ дышетӥсь. — Тани милям нылпиос сотэк но 3 кылэз дышето: ӟуч, удмурт но англи. Нылпилэн аслаз мылкыдыз вань ке, мед со выль кылъёсын тодматскысал кружокъёсын, эшшо вань элективной курсъёс. Мон нылпиосын ужаны дась. Али тани соосын ӵош ачим но немец кылъя тодон-валанме муромытӥсько. Эшшо мыным туж кельше испан кыл, культура, крезьгур, та кылын, английскоеныз сямен ик, эркын вераськисько ни.

О. Васильев классэныз

Нырысетӥ арзэ та школаын тырше Олег Васильев. Со Югдонэ Эгра палъёсысь лыктэмын. Олег Степанович Дэбесысь училищеез йылпумъямын, 5 ар Ижкарын лэсьтӥськон удысын тыршемын. Но бӧрысь нылпиосын ужан мылкыдыз вормем. Заочно амалэн дышетскыны пыриз УдГУ-ысь историяя но социологияя институтэ.

— Кузпалы Ижысь гурт удысъя академиез йылпумъямын, — вера Олег Степанович. — Сое Сьӧлта ёросысь Югдонысь «Батыр» хозяйствое зоотехнике ӧтизы. Мыным но школаын уж шедиз. Озьы вуимы Югдонэ. Милемлы колхоз тупатъям корка висъяз, тани туэ газ пыртозы на. Куд-огез шуоз, дыр, гуртын мӧзмытгес. Но машинамы вань, кулэ ке, Сьӧлтала но, Увае но, Ижкаре но вуылӥськом. Нуналлы быдэ сямен школаысь спортзал усьтэмын — гурт калыкен волейболэн шудыны люкаськылӥськом. Ваньмыз яра.

Ангелина Снигирёва

Ангелина Снигирева
By Ангелина Снигирева 30 марта, 2020 09:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<