Нылкышно ке тон азьын…

Ангелина Снигирева
By Ангелина Снигирева 6 марта, 2020 10:46

Ксения ШИРОБОКОВА — Удмуртиысь «Чеберай» конкурслэн вормисез (2010), фин-угор чеберайёслэн «Звезда Севера» конкурсазы вормись (2011), республикаысьтымы Калык творчествоя юртысь специалист, Россилэн Президентэзлэсь грантсэ утэм «Чеберай» марафонлэн авторез но 2 муспотон дыдыослэн анайзы.

К. Широбокова


— Мон котьку паймисько ас чеберлыксэс бадӟым сцена вылын возьматыны дӥсьтӥсь удмурт нылъёслы. Кытысь со дӥсьтон?

— Нырысьсэ сыӵе конкурсэ пыриськыны дэмлазы вордӥськем гуртысьтым, Шаркан ёросысь Зар-Вишурысь, адямиос. Со вал 2006-тӥ арын, мон Воткаысь крезьгуръя колледжын дышетскисько вал. Но мон ӧй вормы.

Озьы ке но азинскыны, вормыны тыршон вирам, дыр. Анай-атае но сыӵеесь. Соос — азьвыл комсомолецъёс, весь «айда карисесь», азьлань мынӥсесь.

Атае Ижын комсомоллэн райкомаз ужамын. Берло колхозын. Мамае вань улонзэ нылпи садын ужа ни, ачиз но пичи пинал кадь мыло-кыдо.

Улонам бадӟым инты басьтӥзы ӵужанае (мамалэн анаез) но бабае (папалэн анаез). Бабае туж паймымон кышномурт вал. Дас пиналэз огназ будэтӥз, картэз туж вазь кулӥз. Вань пиналъёссэ юн возьыны быгатӥз, дышетӥз. Уй но, нунал но ужаз. Ӵукна султӥськом — бабамы бакчаын ни. Сое адӟыса, керпотӥськом но вӧзаз султӥськом. Со нокинэ номыр карыны уг куры вал, ачиз лэсьтыны кутске, пример возьматэ. Бордаз ми но будӥмы.

Ӵужанае но тунсыко кышномурт вал — туж кужмо «Пахарь» колхозлэн валтӥсь бухгалтерез. Ёросамы тодмо адями. Солэн сыӵе йырсазьыз зол вал! Гуртысь ваньмызлэсь вордскем нуналзэс тодылӥз. Бадӟым лыдпусъёсты йыраз кытӥ-мар лыдъялляз.

Мон туж паймисько удмурт нылкышноослы. Азьвыл но, али но ку гинэ ужзэс лэсьтыса вутто — соослэн ваньмыз радызъя.

— Семьяяды тӥ 3 нылъёс будӥды, Пушкинлэн выжыкылаз сямен. Кыӵегес кусыпъёсты?

— Ми туж пӧртэмесь, но ог-огмес туж яратӥськом. Бад­ӟымез милям туж визьмо но мыло-кыдо, котьку эшъёсыз, калык пӧлын. Та ласянь мон со­лы вожъяськисько вал. Ачим мон тросгес ас пушкам, творчество дуннеын улӥ.

3 сузэръёс

Пичиез сузэрмы али но пичи кадь потэ. Со милям тужгес чеберез. Со уз малпаськы кыӵе ке социальной проект кылдытон сярысь, но ӧтид ке, шумпотыса юрттоз сое радъяны.

— Туала вакыт егит нылкышноос азе выль куронъёс пуктэ: ялан азинсконо. Али пыӵась «Чеберай» проектады быдэс люкетэз сӥземын нылкышно бизнеслы. Нош семья кыкетӥ интые уг кыльы-а?

— Удмурт кышномурт генетикаезъя лидер. Юнме ӧй вал ук удмуртъёслэн матриархат. Семьяын но, гуртын но со нырысетӥ радъёсын. Солэн мукетгес луэмез потӥз ке но, уз быгаты, дыр. Солы котьку мае ке валтыны кулэ. Соин ик бизнес идеяосъя дышетонъёс солы ӵапак интыяз.

Мукет ласянь, аслым мыным туж матын православной учконъёс. Соин ик семьяямы валтӥсь инты мужике басьтэ. Кышномурт тросгес гуртаз мед луоз, коркалэсь шунытсэ возись-утись кадь. Но ми валаськом: али ваньмыз дунын. Гуртын ке но улӥськом, нылпиосмес дышетон сярысь малпаськом ук. Бакча сиён будэтыса гинэ, нылпидэ уд азинты, уд дышеты.

Туала улонлэн куронъёсыз будо. Пиосмуртлы но юрттэт кулэ. Со корка пуктоз, писпу мерттоз, нылпиоссэ сюдоз-вордоз, но кулэ на тодон-валан но сётыны. Ӵапак образование сётон, мынам малпамея, со анайлэн сюлмаськонэз.

Эшшо, малпасько, чебер луон понна кышномуртлэн аслаз уксёез луыны кулэ. Пиосмурт кышномуртэ чеберен, тазаен мед адӟоз. Но со дыре ик, кыӵе амалъёсын, кӧня дунын со чеберлык лэсьтӥське, медаз тоды. Валамон: кышномуртлэн туж жадён дыръёсыз но луыло. Но аслаз кисыысьтыз коньдонэз ик мед юрттоз солы шутэтскыны но. Шуом, декретын пукыку, хобби вылын уксё поттыны луэ. Со уж, кудзэ кышномурт ас мылкыдызъя, быгатэмезъя гинэ лэсьтэ. Со ужезлы со нылпиоссэ но дышетыны быгатэ.

— Мукет суред: туала вакытэ туж трос сыӵеос, кудъёсыз узыр пар утчало. Куд-ог егитъёс меӵак шуо: мар понна мыным карт, уксё ӧз сёты ке?

— Мон но сыӵе вал. Зэм, зэм. Оло, Западысь фильмъёсысь адӟем карыса. Сузэреным шуиськом вал: пересезлы бызём но, ваньбурзэ милемлы кельтоз. Яратон сярысь малпаськон ӧй вал. Мамамы милемыз романтик мылкыдын, выжыкылъёс вылын будэтӥз ке но, ми малпаськом вал: улонын яратон ӧвӧл.

Но будэммыя мылкыд воштӥськиз. Яратонтэк шудо уд луы. Зэм, куддыръя егитъёс коньдонэз быръё, шудэз коньдон бордысь адӟо. Сыӵе тодмоосы мынам но вань. Но бӧрысь кыӵе соос куректо…

— Чеберай луэмед бере тон шоры пиосмуртъёс тросгес учкыны кутскизы, вылды?

— Сцена вылын эктӥсь, кырӟась нылъёс шоры котьку учко. Концертъёсын ӵем поталлям бере, мон учкисьёслы дышемын ни вал.

Чеберай луэме бере трос ӟечкыласьёс вал. Но куд-ог умойтэм учыръёсы но шедьылӥ. Одӥг пол укно улам ик бадӟым сьӧд машина дугдӥз. Монэ потыны куро. Потӥ. Кыӵе ке тодмотэм пиосмурт. Ойдо, шуэ, машинае пуксьы. Уг, шуисько. Нылъёс мыным уг пумитъясько, шуэ, лекъяськыса пуксьыны косэ. Мон берытски но корка пыри. Собере монэ кышкатъяны кутскизы, СМС келяллязы, жингыръязы…

«Звезда Севера» конкурсын вормись

— Городын дышетскыса, тросэз гуртэ уг ни берытско. Нош тон Зар-Вишурад ик бертӥд, гуртысь культураез, чеберлыкез ӝутӥд, Шаркан ёросад туж тодмо луид…

— Воткаысь крезьгуръя колледж бере мыным Зар-Вишур муниципал кылдытэтмылэн йырыз Елена Витальевна Широбокова жингыртӥз: ми, пе, бадӟым мероприятилы дасяськиськом, сое нуись кулэ. Мон бертӥ. Мероприятиын ёрослэн йырыз Александр Прохоров но вал. Бӧрысь со шуэм: таӵе кадръёсын пазяськоно ӧвӧл, мед бертоз, клубын солы ставка сётомы.

Тӥни озьы мон вордӥськем гуртам клубын ужаны кутски, хореограф вал, эктонъя студия нуи. Берлогес крезьгуръя школаын но ужаны кутски на, эшшо садикын крезьгуръя кивалтӥсь вал. Уг тодӥськы, кытысь сомында кужыме тырмылӥз. Нылпиосы конкурсъёсы весь ветло вал, ёросын ялан нырысетӥ интыос басьямы.

Кылдытӥм «Инвожо» ансамбль, гастрольёсын ветлыны ӧдъям. Зар-Вишурын культурая центр кылдытӥм, монэ отчы директорлэн воштӥсез, чеберлыкъя кивалтӥсь каризы. Ог-огмес туж валаса, одӥг семья кадь ужамы, поталлям улосъёсы, фин-угор фестивальёсы. Трос вал вормонъёсмы.

Егитъёсын ужанъя центрын но специалист луи, спортэн вырись ас пал адямиосмес утчай. Городэ кошкемъёс пӧлын сыӵеос вань вылэм. Одӥгез гира ӝутъянын спортъя мастер, мукетыз — нюръяськонъя. Одӥг пол «Батыр шоу» ӵошатсконэ чортӥ Костяез — Зар-Вишурын вордӥськем но пичи дырысеныз ик городын улэм пиез. Со нюръяськонын спортъя мастер вал. Лыктӥз, вормиз. Та бӧрсьы пӧртэм ужрадъёсамы ачиз куриськыны кутскиз. Вордӥськем гуртаз но арнялы быдэ бертылыны ӧдъяз, дорам, клубе, розаосын ветлыны кутскиз. «Газелен» ужа вал бере, туж юрттылӥз. Шуак машина кулэ, кытчы ке егитъёсын потоно — мон лыкто, нуо-ваё, шуэ. Удмурт сямен но туж умой вераське, эктэ, кырӟа, ваньмыныз огкыл шедьтыны быгатэ.

— Озьыен, Удмурт Элькунлэн чебераез луыкуд, тӥ Костяен ӵош вал ни?

— Эшъёс гинэ. Но ворми но, малы ке нырысь ик солы жингыртӥ. Тодӥськод-а, шуисько, мон — ворми! Но со кыӵе ке огшоры учыре выллем: ярам, ӟечкыласько, шуэ. И всё. Мон шуисько: корона — мынам!

Мон понна соку со сыӵе бадӟым вормон кадь потэ вал — быдэс дуннелэн эксэй нылыз луи, оло. Нош со «молодец» шуиз но — всё. Мон сыӵе пайми.

Бӧрысь, конечно, валай. Мон сомында ужрадъёсы пыриськисько, вормылӥсько вал бере, солы со нуналмысь уже кадь потылӥз ни. Бӧрысь ини дорамы журналистъёс вуылыны кутскизы но, данъяськыны ӧдъяз.

— «Чеберай» тӥледыз юнгес герӟаз?

— Озьы гинэ ӧй вал ай. Мылкыды бурдъяськиз «Звезда Севера» ӵошатсконэ пыриськыны. «Чеберайын» вормыны мыным туж зол юрттӥз Зар-Вишур гуртэ, вань сюлмысьтым тау карисько соослы. Нош Перме дасяським ни Шаркан ёрос культурая юртысь специалистъёсын. Соослы но тау карисько.

Со вакытэз малпаса, ачим паймисько. Гуртын мынам ваньмыз вал: яратоно уже, кудӥз сярысь куд-огез уйвӧтазы гинэ малпало. Ӟеч уждунэ. Улӥсько на вал анай-атае вӧзын, со дыре ик яратоно адямие арнялы быдэ вуылэ. Кыкетӥ тодон-валан басьтӥсько на вал Кун службая академиын. Сыӵе луонлык мыным ёрос сётӥз. Куд-огез, оло, шуоз: кизилияськиз. Но со озьы ӧвӧл. Гуртын улон мыным туж яра вал, Костяе но гуртэ бертыны, корка пуктыны дась вал. Но кыӵе ке валантэм мылкыд монэ бугыртӥз: ваньмыз, мар сярысь малпаськи, вань ини, кыстӥськыны нокытчы кадь. Кыӵе ке кужым монэ интыысьтым ишкалтӥз, одӥг ӵукна культура юртэ лыктӥ но Елена Витальевналы шуисько: мон городэ кошко… Со туж паймиз: а кытын ужалод? Уг тодӥськы на, шуисько.

Сюан

Кошки. Нош дасяськоно «Звезда Севера» ӵошатсконэ. Туж юрттӥз «Удмурт Кенеш» огазеяськон, Культурая министерство. Пермьын Костяе весь бордам ветлӥз, конкурсэз радъясьёс сое асьсэ адямизэс кадь пумитало ни вал. Огпол дорам «Мисс Эстонии» лыктӥз но шуэ: «Мон адӟисько, тон вормод, конкурентъёсыд ӧвӧл». Мон эшшо бурдъяськи. Нош ӵошатскон йылпумъяськем бере жюрилэн тӧроез, Германиын улӥсь дизайнер, шуиз: «Ксения, вань этапъёсын жюриысь вань адямиос тӥледлы 10 баллэсь ӧжыт ӧз пуктылэ. Туж зол вормон!» Нош мон та ӵошатскон бере тодӥсько ни вал: Костя — мынам адямие.

Бертэме бере Ижысь Эшъяськон юртэ ужаны интыяськи.

— Фин-угор чебераез быръё ке, вуоно конкурс та нылашлэн шаераз ортчыны кулэ. Но Удмуртиын сыӵе ӵошатскон ӧз ортчы. Малы?

— Трос аръёс ӵоже та мынам вӧсе ни. Валамон: соку нуны витисько вал бере, та ужен ӧй выры. Отчы-татчы вазиськылӥ ке но, нокинлэн мылкыдыз ӧй вал, конкурс, пе, туала улонлы уг ни тупа.

Декретын дырын-дырын учкылӥ Пермьын сётэм корона шоры, йырам дӥсялляй. Солэн кыӵе ке кужымез вань кадь потылӥз. Кӧня фин-угор чеберайёс сое йыразы нуллэмын ук! Йыре понон туж чебер, дуно, лэсьтэмын саам мастеръёсын. Нош огпол Эшъяськон юртысь жингыртӥзы но шуизы: Пермь, пе, коронаез берен куре… Малы? Удмуртия чеберайлы сӥзем конкурс уг ортчыты, соин… Мон понна со сыӵе секыт вал! Иське, мар понна вал мынам тыршеме? Мар понна мон со ӵошатсконэ пыриськи? Конечно, уг сёты шуыны луэ вал. Но корона —киысь кие сётӥськись. Котькуд ӵошатсконын сое азьвылэз вормись вылезлы вормисьлы йыраз понэ. Озьы ик луыны кулэ вал Удмуртиын.

Пыд улысьтым музъем кошкиз, дунне быриз кадь. Мон уг валаськы вал: кызьы чеберлык­лы сӥзем конкурс туала улонлы уз тупа? Вань ук адямиос, кинлы со тунсыко! Со анай кылдэ, культурадэ вӧлмытонъя одӥгез амал ук! Малы шаермылы сыӵе конкурс кулэ ӧз луы?

Пушкам туж мур яра кылиз. Мон тырши со сярысь вунэтыны, вань сюлэмме нылъёсме будэтонлы сётӥ. Но декретысь потӥ но, ваньмыз выльысь бугырскиз. Ярае бурмымтэ!

Эшшо ке улон монэ юри таӵе конкурсъёсы вуттэ кадь. «Мисс Содружество», пе, лэсьтоно. Кин? Ксюша юрттоз. Башкириын, пе, удмурт чеберай быръё. Кин мыноз? Ксюша. «Этнокрасавица», пе, ортче. Кин специалист? Ксюша. Собере «Печоряночкае» нылашез дасяно, «Палэзян» фестивальысь модая люкетсэ радъяно, «Тыло толэзе» мыноно… Малпасько, токма шорысь ӧвӧл ук та! Улон ачиз возьматэ: дышетскы, лэсьты!

Калык творчествоя элькун юртын ӵош ужась эшъёсыныз

2014-тӥ арын Удмуртиын берпуметӥзэ чебераез бырйизы. Та нимез Анастасия Тутаева (али — Пушкина) басьтӥз. Со бӧрсьы нош ик шыпыт луиз, Удмурт культурая «Дэмен» огазеяськон та ужлэсь палэнскиз. Трос кытчы вазиськылӥ, нокин уг оскы вал, та проектлы грант басьтыны луоз шуыса. «Удмурт Кенешлэн» тӧроез Татьяна Ишматова гинэ юрттом шуиз. Туж бадӟым тау солы. Солэн 
оскеменыз, мон азьлань мыныны тырши. Россилэн Президентэзлэн грантъёсъя конкурсаз гожтӥ. Ӧй вормы. Туж ӝожоми — сомында дырме быдтӥ ук! Но «Шунды» огазеяськонлэн азьвыл кивалтӥсез Ольга Тронина (соку Эшъяськон юртын ӵош ужаськом вал) буйгатӥз: нырысь пыриськись адями понна тынад баллъёсыд туж умоесь. Тӥни соку калык творчествоя юртысь ужасен Мария Якунькинаен кужыммес огазеям.

Выль проектэз ар но ӝыны гожъяны выри. Со вискын 
3 уж воштӥ: Эшъяськон юртысь методист, «Чердак» клублэн кивалтӥсез, калык творчествоя юртын ужась… Нош Мария Москваысь калык творчествоя юртэ ужаны кошкиз. Озьыен, проект быдэсак мон вылэ усиз. 2 миллион 580 сюрс манет тыр грант утӥм. Со верантэм бадӟым шумпотон вал! Проект «Удмурт Кенеш» огазеяськонлэн, Культурая министерстволэн бурд улазы пыӵа. Со бордын бадӟым команда ужа.

— Таиз «Чеберай» мукетъёсызлэсь зол висъяське. Туръёс республикаысь вань 25 ёросъёсын ортчо, ӵошатсконэ 
3 сюрслэсь трос нылкышноос пырисько. Кышкан ӧй вал-а?

— Улонын мон нылпиос понна гинэ кышкасько, гурезьысь нискылакузы гинэ но, весь бурд улам возьысал кадь. Нош ужея малы ке ноку кышканэ уг луы.

«Чеберай» проектэз лэсьтӥсьёсын ӵош

«Чеберай» проект — со удмурт нылкышно чеберлыклы, творчестволы сӥзем бадӟым марафон. Со, кылем арын пӧсьтолэзьысен кутскыса, туэ ноябрь толэзёзь кыстӥськоз. Нырысь радъяськиз «Интерчеберай» интернет-конкурсмы, собере ёросъёсын чеберлыкъя но творчествоя «Чеберай» конкурсъёс. Огдыре ик нылкышноосты бизнес-проект гожъяны, блог нуыны дышетӥм.

Котькуд ёросысь быдэн 3 чебераез бырйимы ни. Мартэ соос понна Интернет пыр куара сётон кутскоз. Со куара сётон бере быръемын луоз 
10 вормись. Пӧлысьтыз тямысэз — 18-30 аресъемъёс, одӥгез — 30-50 аресъемъёс но эшшо одӥгез — 50 арес но солэсь бадӟымъёсыз пӧлысь.

Оглом 10 вормись сярысь профессиональной видеороликъёс лэсьтэмын луозы. Со съёмкаос сӥземын луозы удмурт сям-йылолъёсты утёнлы. Нош финалэ 8 нылаш пыриськоз. Таиз ужрад зэмос бадӟым праздниклы пӧрмоз, орт­чоз со 2020-тӥ арын ноябре. Ужрад бадӟым гала-концертэн йылпу­мъяськоз. Соку ик сцена вылын дизайнеръёслэсь коллекциоссэс возьматэммы потэ на. Умой вылэм быдэс Россиысь профессиональной дизайнеръёсты ӧтьыны, соос, татын улыса, асьме удмурт культура вылэ пыкиськыса, выль коллекциоссэс мед кылдытозы.

Кузпалыныз (шорысез) но нылъёсыныз

— Огвакытэ ик трос проектъёсты валтӥськод. Семьяедлы дырыд тырме-а?

— Ӝытъёсы мон гуртын, семьяеным, пиналъёсын. Нылъёсмес картэным вошъяськыса кружокъёсы нуллӥськом. Соос гимнастикаен выро, экто, суредасько.

Малпасько, туала улонын нылкышнолы уг тырмы небыт луон. Со небытлык, тупаса-кенешыса улыны быгатон ик вань чеберлык. Туж синмаськыса учкисько вал нылкышно тодосчи, историк Галина Никитина шоры: визьмо, сабырлы, небыт луыны быгатӥсь. Но со дыре ик солэсь кылзоно, соя кариськыны тыршоно. Сыӵе луыны кулэ, дыр, туала кышномурт.

Елена Миннигараева

Ангелина Снигирева
By Ангелина Снигирева 6 марта, 2020 10:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<